Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  November 2017

Tongtong ma Pingkirhon Upah In

Tongtong ma Pingkirhon Upah In

“Ulang ma ra upah hamonangan nasiam irampas.”​—KOL. 2:18.

DODING: 122, 139

1, 2. (a) Upah aha do na ipaima-ima juakjuak ni Jahowa? (b) Aha do na mangurupi hita ase mandapot upah ai? (Tonggor ma gambar bani alm. 27.)

HALAK Kristen na iminaki marpangarapan hu surga. Apostel Paulus manobut pangarapan on “upah hamonangan ni pandiloon na hun babou, na humbani Naibata”. (Pil. 3:14) Dihut do holi sidea mamarentah rap pakon Jesus Kristus janah mangurupi manisia i tanoh on ase gabe gokan dear. (Pangk. 20:6) Tapi biri-biri na legan marpangarapan manggoluh sadokah ni dokahni i Paradeiso!​—2 Petrus 3:13.

2 Si Paulus sihol mangurupi na iminaki ase totap martenger ni uhur janah mandapot upah. Ia mangkatahon, “Na i babou ai ma paruhurhon nasiam.” (Kol. 3:2) Jadi porlu do sidea totap mamingkirhon pangarapan ai. (Kol. 1:4, 5) Lang soal hita marpangarapan hu surga atap pe i tanoh on, torus ma pingkirhon pasu-pasu ni Jahowa ase boi hita mandapot upah ai.​—1 Kor. 9:24.

3. Aha do na ipasingat si Paulus bani halak Kristen?

 3 Tapi, dong na boi manlanglangi halak Kristen mandapot upah ai. Halani ai ipasingat si Paulus ma sidea. Umpamani, ipatugah do bani halak Kristen i Kolosse pasal halak Kristen palsu na totap mandalankon Titah ni si Musa sedo marhaporsayaon bani Kristus. (Kol. 2:16-18) Ia mangulas pasal bahaya na dong ronsi sonari na boi manlanglangi hita laho mandapot upah ai. Ia patorangkon sonaha hita manlawan hisap-hisap ni daging. Janah aha na porlu ibahen sanggah dong parsoalan ibagas kaluarga atap pakon sanina-botou. Ulas hita ma piga-piga sipasingat na isuratkon si Paulus bani halak Kolosse ai. Marguna do sipasingat ai ronsi sonari.

BUNUH MA HISAP-HISAP NI DAGING

4. Mase hisap-hisap ni daging boi manlanglangi hita manjalo upahta?

4 Dob ipaingat si Paulus sidea pasal pangarapan ai, ipatugah do homa ase ibunuh sidea hisap-hisap ni daging na mangihutkon parlahou ni dunia on, songon “parriah-riahon, habutakon, hisap-hisap, sura-sura jahat ampa uhur haut.” (Kol. 3:5) Marbanggal do hisap-hisap ni daging ai janah boi pasedahon parhasomanan dompak Jahowa ampa pangarapanta. Dong sada saninanta na ongga madabuh halani hisap-hisap ni dagingni tapi ujungni mulak use hu kuria. Humbani pangalamanni, ia patugahkon marbanggal do hisap-hisap ni dagingni janah “seng tarhorom”.

5. Sonaha hita manjaga diri humbani situasi na boi parrohkon mara?

5 Na siporlunan, jaga ma hita bani situasi na mambahen hita manlanggar aturan ni Jahowa. Umpamani, bani na martunangan dear do anggo ipatugah batasan aha na boi ibahen pakon aha na lang boi sanggah sidea mardua-dua. (Pod. 22:3) Bahaya na legan ai ma sanggah marhorja hu luar kota atap rup saianan marhorja dalahi pakon naboru. (Pod. 2:10-12, 16) Anggo sonai, aha do na maningon bahenonta? Tangkas ma patugah anggo hita sahalak Saksi Jahowa. Tongtong ma jaga parlahounta janah dingat ma anggo hetel parrohkon mara do ai. Sobali ai, jaga ma hita sanggah lungunan pangahapta. Bani panorang sisonai, somalni hita sihol ipardiateihon. Ai mambahen hita ra manjalo ise pe gabe hasomanta. Anggo sonai ma na masa bani nasiam, ulang horjahon aha pe na mambahen nasiam lang mandapot upah humbani Naibata. Pindo ma pangurupion-Ni ampa humbani sanina botou.​—Basa Psalmen 34:19; Podah 13:20.

6. Aha do na porlu idingat hita sanggah mamilih hiburan?

6 Ase boi ibunuh hita hisap-hisap ni daging ai, lembangi ma hiburan na marisi parriah-riahon. Bahat do sonari on hiburan na dos pakon na ihorjahon halak i huta Sodom ampa Gomora na hinan. (Jud. 7) Hiburan  sisonai ibahen laho patuduhkon anggo parriah-riahon lang pala salah. Halani ai, jaga ma hita tongtong. Pangkei ma hita sanggah mamilih hiburan. Ulang pilih hiburan na mambahen hita lang mandapot upah humbani Naibata.​—Pod. 4:23.

PATUDUH MA HOLONG AMPA HABASARON

7. Sipata parsoalan aha do na dong ibagas kuria?

7 Malas do uhurta ibagas kuria Kristen. I partumpuan hita marlajar Hata ni Naibata janah marsihaholongan. On ma na mangurupi hita totap mamingkirhon upah ai. Tapi sipata ra do hita marsalisih pakon sanina-botou. Anggo lang mintor isaloseihon, on boi mambahen hita marsogam ni uhur.​—Basa 1 Petrus 3:8, 9.

8, 9. (a) Aha do biak na porlu ipatuduh hita ase manjalo upah ai? (b) Aha do na mangurupi hita anggo adong na paboritkon uhurta i kuria?

8 Ulang ma sogam ni uhur mambahen hita lang manjalo upah ai. Si Paulus patorangkon aha na porlu ibahen halak Kristen, “Nasiam na dob pinilih ni Naibata, na mapansing anjaha na hinaholongan, pakei nasiam ma biak paridopniuhuran, habasaron, toruh ni uhur, halamlamon, ampa lumbang ni uhur, marsianju-anjuan anjaha marsisasapan dousa, anggo marpangkurangi uhur ni na sada dompak hasomanni; songon na dob isasap [‘Jahowa’, Terjemahan Dunia Baru] dousa nasiam, sonai ma homa nasiam marsisasapan. I atas ni ganupan ai dalankon nasiam ma holong, ai in do rahut-rahut ni sagala hadearon.”​—Kol. 3:12-14.

9 Holong ampa habasaron mangurupi hita ase ra manasap hasalahan ni hasomanta. Anggo borit uhurta halani parsahap atap pambahenan ni sasahalak, dingat ma hita pe ongga mambahen sisonai hubani na legan. Tontu malas do uhurta sanggah sidea ra manasap hasalahanta. (Basa Parambilan 7:21, 22.) Martarima kasih do hita halani Kristus hita boi marsada manombah Naibata. (Kol. 3:15) Ganup hita mangkaholongi Jahowa, padaskon barita na sarupa, janah bahat do parsoalanta na sarupa. Jadi, anggo ra hita manasap hasalahan ni sanina-botou, dong hasadaon ibagas kuria. Hita pe lambin pongkut mamingkirhon upah ai.

10, 11. (a) Aha do bahaya ni parsimburuon ai? (b) Sonaha ase ulang urah hita simburu?

10 Parsimburuon pe boi manlanglangi hita mandapot upah ai. Bibel patuduhkon parrohkon hasedaon do parsimburuon. Umpamani, halani simburu ibunuh si Kain ma si Abel. Si Kora, si Datan, pakon si Abiram manlawan dompak si Musa halani simburu. Marusaha do Raja Saul mamunuh si Daud halani simburu bani. Tongon do na ihatahon Bibel, “Ijin adong parsimburuon ampa paringoran, ijai ma adong hageoron ampa haganup bagei ni horja hajahaton.”​—Jak. 3:16.

11 Ase ulang urah hita simburu, patuduh ma holong ampa habasaron.  Bibel mangkatahon, “Na sabar do haholongon in anjaha na basar, seng subil haholongon in.” (1 Kor. 13:4) Marusaha ma hita mangihutkon pingkiran ni Jahowa ase ulang urah simburu. Doskon sada angkula do hita pakon sanina-botou i kuria. Bibel mangkatahon, “Anggo ipasangap sada pagori, rap marmalas ni uhur do ganup pagori in.” (1 Kor. 12:16-18, 26) Jadi, anggo marmalas ni uhur saninanta, tontu hita pe dihut marmalas ni uhur, sedo simburu. Pingkirhon ma siusihan humbani si Jonatan, anak ni Raja Saul. Hassi pe si Daud na ipilih gabe raja, seng simburu ia. Ipatoguh janah iurupi do si Daud. (1 Sam. 23:16-18) Ai ra do hita mangusihi si Jonatan patuduhkon holong ampa habasaron?

JALO MA UPAH AI RAPKON KALUARGA

12. Podah aha do na ibere apostel Paulus bani ganup kaluarga?

12 Anggo ganup anggota kaluarga mandalankon onjolan ni Bibel, martuah ma kaluarga janah boi rup mandapot upah ai. Apostel Paulus mambere podah na jenges bani ganup kaluarga, “Nasiam parinangon, balosi nasiam ma paramangon nasiam, songon na talup ibagas Tuhan in. Nasiam paramangon, haholongi nasiam ma parinangon nasiam, anjaha ulang ma kasar dompak sidea. Nasiam dakdanak, balosi nasiam ma namatoras nasiam ibagas haganup, ai in do rosuh ni Tuhan in. Nasiam bapa, ulang ma makorastu nasiam dompak niombah nasiam, ase ulang mandolei sidea.”  (Kol. 3:18-21) Sonaha podah ai marguna bani nasiam?

13. Porini lang sahaporsayaon paramangon, sonaha parinangon mangurupi ia ase manombah Jahowa?

13 Nasiam naboru, porini paramangonmu lang mangidangi Jahowa, aha do bahenonmu anggo lang bujur ia bamu? Anggo maringori nasiam, boi do ai mambahen situasi lambin dear? Hassi pe na tongon ihatahon ham, boi do ai mambahen ia mangidangi Jahowa? Lape tontu. Paramangon do kopala kaluarga. Anggo hormat ham bani, parrohkon hadameion do ai janah Jahowa pe ipasangap. Parlahoumu na madear in do na mangojur ia ase mangidangi Jahowa. Anjaha haduasi nasiam boi manjalo upah ai.​—Basa 1 Petrus 3:1, 2.

14. Aha do bahenon ni paramangon anggo parinangonni lang hormat bani?

14 Nasiam dalahi, porini parinangonmu lang mangidangi Jahowa, aha do bahenonmu anggo lang hormat ia bamu? Ai boi do ia gabe hormat bamu halani isorgangi ham? Tontu lang boi. Jahowa marosuh ase paramangon patuduhkon holong songon Jesus. (Ep. 5:23) Kopala kuria do Jesus in, tapi tongtong do ia sabar janah parholong. (Luk. 9:46-48) Anggo ham mangusihi Jesus, bani panorangni ra do parinangonmu ai dihut mangidangi Jahowa.

15. Sonaha paramangon patuduhkon holong bani parinangonni?

15 Iparentahkon Jahowa do paramangon ase ‘mangkaholongi parinangon, anjaha ulang kasar dompak  sidea’. (Kol. 3:19) Anggo ra paramangon manangihon pandapot ni parinangon, ai patuduhkon ia holong bani. Porlu do parinangon mambotoh anggo pandapotni ponting ibagas kaluarga.(1 Ptr. 3:7) Gati do paramangon boi mambahen haputusan na madear halani manangihon pandapot ni parinangon. (Pod. 15:22) Paramangon na parholong lang mamaksa ase ipasangap parinangonni ia. Tapi pambahenanni do na manontuhon ia gabe ihormati atap lang. Anggo paramangon mangkaholongi kaluargani, lambin martuah ma sidea mangidangi Jahowa anjaha mandapot upah humbani Naibata.

Ulang paturut paringoran ibagas kaluarga mambahen hita lang mandapot upah hagoluhan (Tonggor ma paragrap 13-15)

NA MAPOSO—TONGTONG MA MARUSAHA MANDAPOT UPAH AI!

16, 17. Sonaha ase na maposo lang mandolei sanggah ipodahi namatoras?

16 Na maposo, ra do pangahapnima anggo namatoras makorastu janah lang mangarusi hanima. Ra do ai mambahen hanima mandolei janah lang marosuh be mangidangi Jahowa. Tapi anggo itadingkon hanima Ia, botohonnima ma lang adong na mangkaholongi hanima songon namatorasnima ampa sanina-botou i kuria.

17 Pingkirhon ma: Porini lang ra namatoras mamodahi hanima, hunja ibotoh anggo sidea parduli bennima? (Heb. 12:8) Halani lang gokan dear, ra do cara sidea mamodahi mambahen borit uhur. Tapi ulang ma ai na ididah. Sebalikni, pingkirhon ma mase podah ai ibere. Lamlam ma janah ulang panurakon. Bibel mangkatahon, ‘Halak siantan parsahap,  ai ma na marpambotoh, anjaha halak na lamlam ai ma na maruhur.’ (Pod. 17:27) Marusaha ma gabe halak na maruhur marhitei ra manjalo podah, lang soal sonaha cara ni namatoras mamodahi. (Pod. 1:8) Dingat ma, sibere-bere na maharga do namatoras na mangidangi Jahowa. Sidea marosuh mangurupi hanima mandapot hagoluhan sadokah ni dokahni.

18. Mase ra hita tongtong mamingkirhon pangarapanta?

18 Ganup hita paimahon hagoluhan sadokah ni dokahni. Jenges tumang do pangarapan in. Pasti saud do pangarapan ai halani Naibata sandiri na marjanji. Ia mangkatahon, “Tongon habotohon pasal Jahowa do manggoki tanoh in.” (Jes. 11:9) Lang piga dokah nari, ganup hita iajari Naibata. On ma upah sidearan na boi dapot hita. Jadi tongtong ma dingat aha na dob ibagahkon-Ni janah ulang paturut aha pe manlanglangi hita mandapot upah ai!