Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  November 2017

Marmalas ni Uhur ma Mandoding bani Jahowa!

Marmalas ni Uhur ma Mandoding bani Jahowa!

“Dear do mandoding bani Naibatanta.”​—PS. 147:1.

DODING: 10, 2 *

1. Sonaha do pangahapmu sanggah mandoding?

SAHALAK pangarang doding ongga do patugahkon anggo doding atap pe musik, lang pitah sodap itangar tapi boi do hona bani uhur. Jadi sanggah hita mandoding laho mamuji Jahowa, ai patuduhkon holongta bani Jahowa. Hita pe boi lambin dohor hu Bani. Halani ai ma, ponting tumang do mandoding sanggah manombah Jahowa.

2, 3. (a) Sonaha do pangahap ni piga-piga halak sanggah mandoding i partumpuan? (b) Sungkun-sungkun aha do na laho iulas hita bani artikel on?

2 Ai maila do nasiam mandoding sanggah i partumpuan? Bani piga-piga ianan, adong do dalahi na maila rap mandoding pakon halak na legan. Sasintongni lang dear hasomalan sisonai iboan hu kuria. Lang dear do homa anggo sintua pe maila mandoding atap pe ia mangkorjahon tugas na legan sanggah mandoding i partumpuan.​—Ps. 30:13.

3 Jadi ponting tumang do mandoding ibagas panombahan  bani Jahowa. Halani ai, ulang ma hita mardalani hujai hujon sanggah mandoding i partumpuan. Pingkirhon hita ma on, ‘Ai maila do ahu mandoding sanggah i partumpuan? Anggo maila do, aha ma na boi hubahen ase ulang maila? Anjaha aha ma use na boi hubahen ase boi mandoding humbani gok ni uhur?’

PONTING TUMANG DO MANDODING IBAGAS PANOMBAHAN BANI JAHOWA

4, 5. Aha do na ibahen halak Israel sanggah mamestahon rumah panumbahan?

4 Humbani sapari, juakjuak ni Naibata domma manggunahon musik laho mamuji Jahowa. Sanggah setia ope halak Israel, ponting tumang do mandoding ai bani sidea laho manombah Jahowa. Umpamani, sanggah si Daud pasirsirhon aha na porlu bani rumah ni Naibata, ibobahonni ma 4.000 halak Levi laho mamuji Jahowa marhitei musik. Humbani sidea, adong do 288 halak na dob iajari janah pandei mandoding.​—1 Kron. 23:5; 25:7.

5 Sanggah mamestahon rumah panumbahan, adong do musik ampa doding na ibahen. Bibel mangkatahon, “Sanggah na manompul tarompit ampa na mandoding ai sidea, songon sada sora do ai bogeion, laho mamuji ampa mangkatahon tarima kasih bani Jahowa; anjaha sanggah na tarbogei doding ai, marhasoman tarompit, arbap pakon parsora na laingan na legan, bahen puji-pujian bani Jahowa . . . hamuliaon ni Jahowa do manggoki Rumah ni Naibata.” Tontu gabe toguh ma haporsayaon ni halak Israel halani ai!​—2 Kron. 5:13, 14; 7:6.

6. Sanggah laho mamestahon tembok Jerusalem, aha do na ibahen si Nehemia?

6 Sanggah laho mamestahon tembok Jerusalem, ibobahon si Nehemia ma halak Levi laho mandoding ampa marmusik. Halani ai lambin marmalas ni uhur ma sidea. Ipilih si Nehemia do homa “dua tumpuan banggal sipandoding”. Marodor ma tumpuan ai mardalan i atas ni tembok ai. Na sada hu siamun janah na sada nari hu sambilou, ronsi jumpah ma sidea bani ianan na dohor i rumah panumbahan. (Neh. 12:27, 28, 31, 38, 40, 43) Tarbogei do sora ni sidea hun na daoh. Jadi malas do uhur ni Jahowa mambogei juakjuak-Ni, mandoding ibagas malas ni uhur laho mamuji-Si.

7. Sonaha do Jesus pataridahkon anggo mandoding ai ponting tumang do laho mamuji Jahowa?

7 Bani panorang ni Jesus, tongtong do doding igunahon laho manombah Jahowa. Umpamani, pingkirhon ma aha na ibahen Jesus ampa susianni bani borngin parpudi paima ia matei. Dobkonsi salosei sidea mangan, mandoding do sidea laho mamuji Jahowa.​—Basa Mateus 26:30.

8. Sonaha do halak Kristen bani abad na parlobei mambahen siusihan hubanta pasal mamuji Jahowa?

8 Halak Kristen bani abad na parlobei mamuji Jahowa marhitei doding. Anggo halak Israel, i rumah panumbahan do sidea manombah Jahowa. Tapi anggo halak Kristen ai, mamuji Jahowa i rumah-rumah do. Hassi pe rumah ai lang songon jengesni rumah panumbahan, tapi totap do sidea mandoding ibagas malas ni uhur. Taridah do ai humbani aha na ihatahon si Paulus, ‘Marsiajaran anjaha marsipaingatan ma marhitei doding Psalm, doding puji-pujian ampa doding partonduyon; dodingkon nasiam  ma Naibata ibagas uhur nasiam maruhur tarima kasih.’ (Kol. 3:16) Sonari on pe, dodingta marisi “doding puji-pujian”. Anjaha doding ai pe sipanganon partonduyon do homa, na ipasirsir “juakjuak na bujur anjaha na maruhur” hubanta.​—Mat. 24:45.

SONAHA ASE ULANG MAILA SANGGAH MANDODING

9. (a) Mase dong na maila sanggah mandoding i partumpuan? (b) Sonaha do carani hita mandoding, anjaha sonaha ma namin sintua sanggah mandoding? (Tonggor ma gambar bani alm. 3)

9 Sipata, mase dong halak na maila sanggah mandoding? Ra do bani iananni lang somal mandoding. Atap pe ibandingkonni sorani pakon pandoding na pandei i TV atap pe i radio. Halani ai ma dong halak na maila mandoding. Tapi dingat ma, haganup hita martanggung jawab do mamuji Jahowa marhitei doding. Jadi, sanggah mandoding ulang ma unduk bahen ulu ni nasiam, ampa gogoh ma bahen soramu! (Esr. 3:11; basa Psalmen 147:1.) Sonari on, bani ianan partumpuan domma somal lirik ni dodingta boi ipataridah marhitei TV atap pe layar. Jadi on ma na mangurupi hita ase lambin urah sanggah mandoding. Anjaha sonari on pe bani sikolah sintua, dong do iulas pasal na mandoding. On patuduhkon porlu tumang do ase sintua ulang maila sanggah mandoding i partumpuan.

10. Aha do na maningon idingat hita anggo lang jenges soranta sanggah mandoding?

10 Alasan na legan mase sasahalak maila mandoding, halani pangahapni lang jenges sorani. Tapi dingat ma ‘ganup hita gati do marsalah’ sanggah marsahap. Hassi pe sonai, lang halani ai gabe lang ra be hita marsahap. (Jak. 3:2) Sonai homa ma sanggah mandoding. Ulang halani lang  jenges soranta, gabe lang ra be hita mandoding mamuji Jahowa.

11, 12. Aha na boi ibahen hita ase lambin jenges soranta sanggah mandoding?

11 Sipata ra do hita maila mandoding halani lang ibotoh hita sonaha do carani mandoding. Tapi dong piga-piga cara na boi mangurupi hita ase lambin jenges soranta sanggah mandoding. *

12 Sora ni nasiam boi do gogoh sanggah mandoding anggo iparlajari nasiam carani mangatur napas. Lampu boi do manggoluh halani arus listrik. Sonai homa ma, soranta boi do gogoh sanggah marsahap atap pe mandoding halani pandei hita mangatur napas. Jadi sonaha gogohni soranta sanggah marsahap, sonai ma namin sanggah mandoding. Tapi dearan do anggo gogohan soranta sanggah mandoding marimbangkon marsahap. (Torih ma buku Memperoleh Manfaat dari Pendidikan Sekolah Pelayanan Teokratis, alaman 181 ronsi 184, bani subjudul “Mengatur Persediaan Udara Saudara dengan Baik.”) Sipata bani Bibel ipatugah do anggo juakjuak ni Naibata “marsurak” do laho mamuji Naibata.​—Ps. 81:2.

13. Aha do na boi ibahen hita ase ulang mabiar sanggah mandoding?

13 Sanggah parlajaran Bibel kaluarga, atap pe sanggah marlajar Bibel sandiri, hita boi do marlajar mandoding. Pilih ma doding i partumpuan na iharosuhkon nasiam. Dob ai, gogoh ma basa nasiam lirikni. Basa ma use sada kalimat ibagas sahali manarik napas. Dob ai, gogoh ma dodingkon ai. (Jes. 24:14) Anggo sonai ibahen, lambin gogoh ma sora ni nasiam anjaha jenges. Ulang halani lang jenges sorani ni nasiam gabe lang ra be nasiam mandoding!

14. (a) Mase porlu ibuha hita bolag pamanganta sanggah mandoding? (Tonggor ma kotak “ Ase Lambin Dear Sanggah Mandoding.”) (b) Pandapot ni nasiam, aha do na domma mangurupi nasiam ase lambin gogoh soramu sanggah mandoding?

14 Ase lambin gogoh sora ni nasiam sanggah mandoding, bolag ma buha pamanganmu. Lobih bolag ma buha pamanganmu sanggah mandoding marimbangkon sanggah marsahap. Tapi sonaha anggo  totap ope manangetu atap magogohtu sora ni nasiam? Torih ma hatorangan na boi mangurupi nasiam bani kotak “Mengatasi Problem-Problem Spesifik”, i buku Memperoleh Manfaat dari Pendidikan Sekolah Pelayanan Teokratis, alaman 184.

 

MANDODING HUMBANI GOK NI UHUR

15. (a) Aha do tugah-tugah na ipadas bani partumpuan tahun 2016? (b) Mase porlu ibahen buku doding na baru?

15 Bani tahun 2016, ibahen ma partumpuan tahunan. Ijai ipadas Sanina Stephen Lett hun Pangurus pusat ma tugah-tugah. Ia patugahkon adong sada buku doding na baru. Buku ai marjudul Marmalas ni Uhur ma Mandoding bani Jahowa. Malas tumang ma uhur ni sidea na roh manangar ai. Ipatugah si Stephen Lett anggo buku on ibahen halani Bibel Kitab Suci Terjemahan Dunia Baru domma iperbarui. Bani Bibel ai, dong piga-piga hata na iubah halani lang ipakei be sonari. Halani ai ma, lirik ni dodingta porlu homa iubah. Anjaha bani buku doding na baru ai, adong itambahkon doding pasal horja marbarita ampa tobusan. Halani ponting tumang do na mandoding ai laho manombah Jahowa, ibahen Pangurus Pusat ma haputusan. Ai ma, sampul ni buku doding na baru ai isarupahon ma pakon sampul ni Bibel na baru ai.

16, 17. Parubahan aha do na ibahen bani buku doding na baru?

 16 Ase lambin urah hita manggunahon buku doding na baru ai, isusun ma doding-doding ai mangihutkon topikni. Umpamani, 12 doding na parlobei mangulas pasal Jahowa. Dob ai, 8 doding na mangihut mangulas pasal Jesus ampa tobusan. Sonai ma doding ai isusun. Anjaha bani alaman 2 buku ai, boi ma ididah hita daptar topik-topik ni doding. Marguna tumang do on hubanta. Umpamani lambin urah ma siparambilan mamilih doding bani ambilanni.

17 Ase hita boi mandoding humbani gok ni uhur, adong ibahen parubahan bani lirik ni doding na baru ai. Umpamani hata-hata na dob dokah ampa na lang be iarusi, domma igantih. On mangurupi hita ase lambin mangarusi artini doding ai, anjaha lambin urah mandodingkon. Dong homa piga-piga doding na iubah lirikni ase urah idapot hita parlajaranni na markaitan hu partumpuan ampa horja marbarita.

Marlatih ma mandoding sanggah parlajaran Bibel kaluarga (Tonggor ma paragrap 18)

18. Mase porlu iparlajari hita buku doding na baru? (Tonggor homa surat partoruh.)

18 Bani buku dodingta na marjudul Marmalas ni Uhur ma Mandoding bani Jahowa, bahat do lirikni songon tonggo. Jadi marhitei doding ai, lambin urah ma hita patugahkon sonaha do uhurta bani Jahowa. Doding na leganni mangojur hita ase “mandalankon holong ampa horja na madear”. (Heb. 10:24) Tontu sihol ma hita mambotoh sonaha do musik ampa lirik ni doding ai. Jadi parlajari hita ma doding ai marhitei manangar rokamanni na dong bani jw.org. Marlatih ma nasiam i rumah mandodingkon doding ai humbani gok ni uhur. *

19. Sonaha do hita ganup na i kuria boi mamuji Jahowa?

19 Dingat ma ponting tumang do mandoding laho pasangapkon Jahowa. Marhitei doding, hita boi patuduhkon sonaha holongta bani Jahowa janah martarimakasih hu Bani halani ganup pambahenan-Ni. (Basa Jesaya 12:5.) Jadi anggo marmalas ni uhur hita sanggah mandoding, halak na legan pe boi gabe tarojur mangusihi hita. Ganup hita na i kuria, lang soal na matua, na maposo, atap pe na baru ididi, boi do mamuji Jahowa marhitei doding. Halani ai ulang ma hita maila mandoding humbani gok ni uhur. Ihutkon hita ma hata ni panurat ni buku Psalmen na mangkatahon, “Mandoding ma nasiam bani Jahowa!”​—Ps. 96:1.

^ par. 3 Mulai artikel on ganupan doding domma ibuat hun buku Marmalas ni Uhur ma Mandoding bani Jahowa.

^ par. 11 Torih ma piga-piga carani bani video David H. Splane: Persiapkan Diri untuk Menyanyi Lagu-Lagu Baru. Video on dong bani JW Broadcasting (pindahi i bagian video DARI STUDIO KAMI > KHOTBAH).

^ par. 18 Bani kebaktian, adong dua hali iputar musik sadokah sapuluh minit paima acara imulai. Parlobei sahali bani sogod ni ari, dob ai sanggah arian. Marhitei musik ai, on mangurupi hita ase lambin marmalas ni uhur mandoding ampa pasirsirhon uhurta laho manangar acara. Halani ai, domma hundul ma hita namin sanggah musik iputar.