Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  November 2017

Ai Marlinggom do Nasiam bani Jahowa?

Ai Marlinggom do Nasiam bani Jahowa?

“Jahowa do sitobus tonduy ni juakjuak-Ni, anjaha seng anjai marutang sagala na [marlinggom] Bani.”​—PS. 34:23.

DODING: 8, 54

1. Sipata, mase hita maretek ni uhur?

IHATAHON si Paulus do, “Aih, ahu jolma na [marsitaronon] on”. (Rom 7:24) Sonari on, bahat do juakjuak ni Naibata na mangahapkon songon na ihatahon si Paulus ai. Mase? Sihol do hita mambahen malas uhur ni Jahowa. Tapi halani mardousa, gati do hita lepak. Gabe maretek ni uhur ma hita halani ai. Dong homa halak na mambahen dousa, marpangahap anggo Jahowa ai lang ra manasap dousa ni sidea.

2. (a) Sanggah hita maretek ni uhur, mase porlu irimangi hita Psalmen 34:23? (b) Aha do na laho iparlajari hita bani artikel on? (Tonggor ma kotak “ Sada Parlajaran do atap Gambaran?”)

2 Anggo hita marlinggom bani Jahowa, lang be hita lalab maretek ni uhur hassi pe ongga mambahen hasalahan. (Basa Psalmen 34:23.) Aha do artini marlinggom bani Jahowa? Anjaha aha do na porlu ibahen hita ase Jahowa ra manalpuhon dousanta? Balosni ai boi dapot hita anggo iparlajari hita pasal huta haporusan, atap pe huta parlinggoman na dong i Israel sapari. Pangaturan pasal huta ai dong do bani Titah ni si Musa. Tapi dobkonsi tahun 33 M, lang dong  be pangaturan ai. Hassi pe sonai, marhitei pangaturan ai, ibotoh hita ma sonaha do pangahap ni Jahowa bani pardousa, ampa bani sidea na mambahen hamubahon. Sonari ulas hita ma mase dong ibahen huta parlinggoman i Israel sapari.

“PAPULIG HANIMA MA” BANNIMA HUTA PARLINGGOMAN

3. Aha do uhuman bani halak na mamunuh i Israel sapari?

3 Lang marosuh Jahowa anggo dong halak na matei halani ibunuh. Jadi anggo dong halak Israel na mamunuh, pamunuh ai maningon do ipamatei dalahi humbani kaluarga na matei ai. Dalahi ai igoran ma “jolma siparlulu”. (4 Mus. 35:19) Sonai ma na ibahen sapari i Israel. Anggo pamunuh ai lang mintor ipamatei, gabe butak ma atap pe lang be pansing Tanoh Parpadanan ai bani Jahowa. Halani ai ma iparentahkon Jahowa do, “Ulang ma butaki hanima tanoh na niianannima in.”​—4 Mus. 35:33, 34.

4. Anggo adong halak na lang sangaja mamunuh, pangaturan aha do na ibahen hu bani?

4 Sonaha do anggo dong halak na lang sangaja mamunuh na legan? Hassi pe sonai, totap do ia marsalah. (1 Mus. 9:5) Tapi ipatuduh Jahowa do idop ni uhur-Ni bani halak sisonai. Ibahen ma pangaturan ase na mamunuh ai boi lari hu sada huta humbani onom huta parlinggoman. Ijai ma ia boi ilinggomi humbani kaluarga ni na matei ai. Anjaha maningon totap ma ia tading ijai ronsi matei sintua ni malim.​—4 Mus. 35:15, 28.

5. Aha do na boi iparlajari hita pasal Jahowa humbani huta parlinggoman?

5 Sedo jolma na mambahen pangaturan pasal huta parlinggoman ai, tapi Jahowa do. Iparentahkon Jahowa ma bani si Josua, “Papulig hanima ma bannima huta haporusan” atap huta parlinggoman. Jadi “iuras sidea” ma huta ai. (Jos. 20:1, 2, 7, 8) Jadi isuruh Jahowa do ase huta ai ipapulig atap ipalegan. Humbani huta ai, bahat do na boi iparlajari hita  pasal Jahowa. Umpamani, lambin iarusi hita ma sonaha Jahowa patuduhkon holong atap idop ni uhur. Anjaha iarusi hita homa, sonaha hita boi marlinggom hu Bani.

IA MANINGON “MANGADU-ADUHON PARHARANI” BANI SINTUA

6, 7. (a) Aha do tugas ni sintua na manjaga gerbang ni huta parlinggoman? (Tonggor ma gambar bani alm. 9.) (b) Mase dearan do anggo sahalak pamunuh manjumpahi sintua-sintua ai?

6 Jadi anggo adong halak Israel na lang sangaja mamunuh halak, maningon lari ma ia “mangadu-aduhon parharani” bani pangintuai atap pe sintua i gerbang ni huta parlinggoman ai. Jadi ialo-alo sintua ai ma ia. (Jos. 20:4) Dob ai, itaruhkon ma use ia hu ianan pamunuhan ai. Janah ijai ma ia iadili. (Basa 4 Musa 35:24, 25.) Anggo iputuskon sintua ai na lang sangaja do ia mamunuh, boi ma ia mulak use hu huta parlinggoman.

7 Mase na lang sangaja mamunuh ai maningon manjumpahi sintua-sintua? Ase sintua ai boi manjaga halak Israel totap borsih. Anjaha boi mangurupi pamunuh ai mandapot idop ni uhur ni Jahowa. Sahalak pakar Alkitab mangkatahon, anggo pamunuh ai lang ra manjumpahi sintua ai, boi do ia ibunuh. Anjaha ipatugah pakar ai use, salahni sandiri do anggo matei pamunuh ai halani lang ra mandalankon parentah ni Naibata. Halani ai, maningon ra do pamunuh ai manjalo pangurupion ase totap manggoluh. Anggo lang ra ia lari hu huta parlinggoman ai, boi ma ia ibunuh kaluarga ni na matei ai.

8, 9. Mase halak Kristen maningon mangakui dousani bani sintua?

8 Sonari on pe, sasahalak na mambahen dousa na banggal maningon do homa manjumpahi sintua. Mase? Ase sintua ai boi mangurupi ia mardear use pakon Jahowa. Mase porlu tumang on? Alasan na parlobei, Jahowa do na mamilih sintua laho pasaloseihon parsoalan ai. (Jak. 5:14-16) Na paduahon, sintua ai boi mangurupi ia ase mambahen hamubahon, ampa lang be mangulaki salahni ai. (Gal. 6:1; Heb. 12:11) Na patoluhon, sintua-sintua do na ibere hak janah sidea domma ilatih laho mangurupi ia ase ulang lalab maretek ni uhur halani hasalahanni. Ihatahon Jahowa do anggo sintua ai songon parlinggoman atap “panisioan humbani haba-haba”. (Jes. 32:1, 2) Jadi on ma sada cara na ibahen Jahowa laho patuduhkon holong-Ni.

9 Bahat do halak Kristen na mangahapkon hadameion dobkonsi patugahkon dousani bani sintua. Umpamani si Daniel. Marbulan-bulan do ia lang patugahkon dousani bani sintua. Ia mangkatahon, “Halani domma dokah, huahap lang boi be sintua mangurupi ahu.” Tapi mabiar do ia anggo salahni ai holi ibotoh sanina-botou na legan. Jadi mangaku salah ma ia bani Jahowa tiap martonggo. Ujungni, ijumpahi ia ma sintua. Nini ma use, “Lang urah huahap laho manjumpahi sintua. Tapi dobkonsi hupatugah bani sidea, songon na iangkat do batu na borat humbani abarangku.” Sonari lang dong be na mangganggu ibagas uhurni.  Ia domma mardear pakon Jahowa anjaha mangidangi gabe siparugas i kuria.

IA MANINGON “MAPORUS” HU SADA HUTA HUMBANI HUTA PARLINGGOMAN

10. Ase dousani boi isasap, aha do na porlu ibahen sidea na lang sangaja mamunuh?

10 Ase dousani boi isasap, maningon lari ma pamunuh na lang sangaja ai hu huta parlinggoman. (Basa Josua 20:4.) Maningon ijai ma ia tading ronsi matei sintua ni malim. Halani ai, tontu bahat tumang ma na maningon itadingkon pamunuh ai. Umpamani horjani, rumahni, anjaha ia pe lang boi mardalani hu darat ni huta ai. * (4 Mus. 35:25) Lang soya-soya anggo ibahenni sonai. Tapi anggo itadingkon ia do huta parlinggoman ai, on patuduhkon anggo ia lang manosal bani pambahenanni ai. Anjaha ia pe boi do ibunuh.

11. Aha na porlu ibahen hita ase Jahowa ra manasap dousanta?

11 Sonari on pe, sarupa do. Anggo sasada halak na mambahen dousa, sihol ase Jahowa manasap dousani, maningon marusaha ma ia ase lang be ulaki mangkorjahon dousa. Anjaha ipadaoh ma dirini humbani aha pe na boi mangojur ia mambahen dousa. Songon na ihatahon si Paulus bani halak Kristen i Korint na mambahen hamubahon. Ia mangkatahon, “Tanda nasiam ma pusok ni uhur na humbani Naibata, na mangkorhon ibagas nasiam sonai buei ni ringgas ni uhur, pangapition, ringis, biar, sihol ni uhur, pongkut ni uhur, ampa paminsangon.” (2 Kor. 7:10, 11) Jadi anggo marusaha hita ase lang be mangkorjahon dousa, on patuduhkon anggo hita tongon-tongon sihol mambahen hamubahon. Janah hita lang marpangahap, anggo holong atap pe idop ni uhur ni Jahowa boi urah idapot hita.

12. Aha use na maningon ibahen hita ase Jahowa ra manasap dousanta?

12 Aha use na maningon ibahen hita ase Jahowa ra manasap dousanta? Maningon ipadaoh hita ma aha pe na boi mambahen hita mardousa, hassi pe ai iharosuhkon hita hinan. (Mat. 18:8, 9) Umpamani, anggo hasomanta mangojur hita ase lang mangkorjahon parentah ni Jahowa, ai ra do nasiam ase lang be marhasoman pakon sidea? Sipata sunsah do nasiam mangantan minum Alkohol. Ai ra do nasiam padaohkon diri humbani situasi aha pe na mambahen nasiam bahattu minum? Sipata sunsah do nasiam manjaga pingkiran ase ulang mamingkirhon pasal seks. Ai ra do nasiam lang be mangidah film, situs web atap pe horja na mambahen nasiam mamingkirhon pasal seks? Dingat ma lang soya-soya haganup na ibahen hita laho mangkorjahon titah ni Jahowa. Anggo iulaki hita mangkorjahon dousa, ra do iahap hita lang be maharga hita i lobei ni Jahowa. Anjaha on boi mambahen pusok uhurta. Tapi anggo tongtong do hita marusaha mandalankon parentah ni Naibata, iahapkon hita ma ‘idop ni uhur-Ni sisadokah ni dokahni’.​—Jes. 54:7, 8.

GABE HUTA PARLINGGOMAN MA AI

13. Mase pamunuh na tading i huta parlinggoman boi marmalas ni uhur?

13 Anggo sasada halak domma masuk hu huta parlinggoman ai, lang dong be na  mambahen ia mabiar. Halani ai ma ihatahon Jahowa, “Gabe huta [parlinggoman] ma ai bani nasiam.” (Jos. 20:2, 3) Jahowa pe lang mangindo ase pamunuh ai iuhum use i huta ai. Anjaha kaluarga ni na matei ai pe lang boi masuk hu huta ai laho mamunuhsi. Huta ai lang songon penjara. Halani pamunuh ai boi do marhorja, mangurupi na legan atap pe manombah Jahowa i huta ai. Jadi boi ma ia marmalas ni uhur ibagas huta ai!

Porsaya ma anggo Jahowa ra manasap dousamu (Tonggor ma paragrap 14-16)

14. Anggo domma isasap dousanta, aha do na porlu idingat hita?

14 Dong do piga-piga sanina-botou hassi pe domma mambahen hamubahon, tapi totap ope sunsah pangahapni. Pangahapni, anggo Jahowa lang manlupahon dousani. Anggo sonai do pangahap ni nasiam, porsaya ma seng be idingat-dingat Jahowa dousanta anggo domma isasap. Halani ai, ulang be sunsah pangahapmu. On ma na masa bani si Daniel na isaritahon nongkan ai. Dobkonsi sintua mamodahi ia janah mangurupisi ase marpanggora ni uhur na borsih, lang be sunsah pangahapni. Ia mangkatahon, “Lang be sunsah huahap. Anggo domma isasap dousanta, lang be idingat-dingat ai. Songon na ihatahon Jahowa, ipadaoh-Ni do hasalahanta ronsi lang taridah be.” Anggo pamunuh ai domma masuk hu huta parlinggoman, kaluarga ni na matei ai lang boi be mamunuhsi. Sonai homa ma, anggo domma isasap Jahowa dousanta, lang be idingat-dingat-Ni ai.​—Basa Psalmen 103:8-12.

15, 16. Marhitei aha do Jahowa pataridahkon idop ni uhur-Ni hu banta?

 15 Marimbangkon halak Israel, porsayanan do hita sonari anggo Jahowa ra manasap dousanta. Mase? Nongkan dong do ihatahon si Paulus, jolma na marsitaronon do ia halani gati do lepak. Tapi nini do use, “Tarima kasih ma bani Naibata marhitei Jesus Kristus.” (Rom 7:25) Aha do artini ai? Jadi hassi pe bahat do dousani hinan janah sunsah do pangahapni laho mangkorjahon na sintong, tapi mubah do ia. Janah porsaya do ia sasapon ni Jahowa do dousani marhitei tobusan ni Jesus. Marhitei ai ma, hita boi marpanggora ni uhur na borsih janah mangahapkon hadameion. (Heb. 9:13, 14) Sapari, iurupi sintua ni malim do halak Israel ase porsaya ra do Jahowa manasap dousani ni sidea. Sonai homa sonari on, Jesus do na gabe Sintua ni Malim hubanta. Pitah ia do na boi “mambere haluahon na totap bani sagala na mandohori Naibata marhiteihonsi, ai na manggoluh do Ia tongtong laho mangapiti sidea”. (Heb. 7:24, 25) Halani ai, lambin porsaya ma hita anggo hita boi mandapot ‘idop ni uhur bahen pangurupion bani panorang haporluanni’.​—Heb. 4:15, 16.

16 Ase boi hita mandapot parlinggoman humbani Jahowa, maningon porsaya do hita bani tobusan ni Jesus. Ulang ma iahap hita tobusan ai pitah ibere bani halak na mabuei. Tapi marguna do ai bani dirimu sandiri. (Gal. 2:20, 21) Porsaya ma Jahowa ra do manasap dousamu merhitei tobusan. Anjaha porsaya ma marhitei tobusan, ham boi mandapot hagoluhan sadokah ni dokahni. Jadi tobusan ai, sibere-bere humbani Jahowa do bamu!

17. Mase pitah hubani Jahowa nasiam sihol marlinggom?

17 Marhitei huta parlinggoman iarusi hita ma sonaha Jahowa patuduhkon holong atap pe idop ni uhur. Anjaha ibotoh hita ma maharga tumang do hagoluhan ai bani Jahowa. Dob ai, marhitei pangaturan pasal huta ai, ibotoh hita ma sonaha sintua boi mangurupi hita janah sonaha hita mambahen hamubahon. Dob ai, iarusi hita ma anggo Jahowa lang be mardingat hasalahanta, anggo domma isasap-Ni. Ai ra do nasiam marlinggom bani Jahowa? Pitah Jahowa do parlinggoman na sidearan! (Ps. 91:1, 2) Bani artikel na mangihut, iulas hita ma sonaha do huta parlinggoman ai boi mangurupi hita mangusihi Jahowa na patuduhkon hapintoron ampa idop ni uhur.

^ par. 10 Sahalak pakar ni halak Jahudi mangkatahon, sipata kaluarga ni pamunuh ai pe ra do dihut pindah hu huta parlinggoman ai.