Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Mei 2017

Ulang Paturut Holongmu Lambin Borgoh

Ulang Paturut Holongmu Lambin Borgoh

“Halani martambah-tambah hajahaton, lambin borgohni ma holong ni uhur ni jolma buenan.”MATEUS 24:12.

DODING: 60, 135

1, 2. (a) Hubani ise do mulani hata ni Jesus bani Mateus 24:12 marlaku? (b) Sonaha buku Lahoan ni Apostel pataridahkon buenan halak Kristen bani abad na parlobei manjaga holong ni sidea totap toguh? (Idah gambar bani alaman 15.)

SANGGAH i tanoh on, ipatugah Jesus do sonaha halak mambotoh tanda “ajal ni dunia on”. Dob ai nini use, “Lambin borgohni ma holong ni uhur ni jolma buenan.” (Mat. 24:3, 12) Halak Jahudi bani abad na parlobei mangaku anggo sidea juakjuak ni Naibata, hape sasintongni domma borgoh holong ni sidea.

2 Legan do anggo halak Kristen ijia. Bahatan do sidea na ringgas mangambilankon pasal Jesus janah mangkaholongi Naibata, hasoman sahaporsayaon, ampa halak na so mambotoh hasintongan. Tongtong do ipatoguh sidea holongni hubani Naibata. (Lah. 2:44-47; 5:42) Hassi pe sonai, dong piga-piga halak Kristen na lambin borgoh holongni. Hunja ibotoh hita?

3. Mase holong ni piga-piga halak Kristen gabe borgoh?

 3 Ihatahon Jesus do bani halak Kristen na i Epesus, “Itadingkon ham do holong ni uhurmu na bani mungkahni ondi.” (Pangk. 2:4) Ra do ai halani sidea mangihutkon parlahou ni buei halak ijia na rosuh marsonang-sonang. (Ep. 2:2, 3) Bahat do halak na bayak i Epesus. Hasonangan ampa habayakon tumang do na ipindahi sidea. Bahat do sidea na lang mangkorjahon titah ni Naibata janah sambor do parlahouni. Rosuhan do sidea pasonangkon diri sandiri marimbangkon mangkaholongi Naibata ampa halak na legan.

4. (a) Mase lambin borgoh holong sonari on? (b) Aha na laho iulas hita?

4 Aha na ihatahon Jesus ai, tarjadi do homa sonari on. Bahat halak marpangunsandeian bani organisasi ni manisia laho pasaloseihon parsoalan na masa i tanoh on, sedo hubani Naibata. Halani ai, lambin borgoh ma holongni hubani Naibata. Anjaha juakjuak ni Jahowa pe boi do lambin borgoh holongni songon halak Kristen i Epesus. Jadi, ulas hita ma pasal tolu holong na maningon ipatoguh hita: (1) mangkaholongi Jahowa, (2) mangkaholongi hasintongan ni Bibel, ampa (3) mangkaholongi sanina-botounta.

HOLONG HUBANI JAHOWA

5. Mase maningon ihaholongi hita Naibata?

5 Ise do na sipontingan ihaholongi hita? Nini Jesus, “Maningon haholonganmu do Tuhan Naibatamu humbani gok ni uhurmu, humbani gok ni tonduymu ampa humbani gok ni pingkiranmu. In ma titah sibanggalan anjaha na parlobei.” (Mat. 22:37, 38) Anggo ihaholongi hita Naibata, lambin urah ma hita mambalosi titah-Ni, martahan, janah mangkagigihon na masambor. (Basa Psalmen 97:10.) Tapi, marusaha do Sibolis ase ulang ihaholongi hita Naibata.

6. Aha do na masa bani halak na lang mangkaholongi Naibata?

6 Legan do pangarusion dunia on pasal holong. Buei do jolma “mangkaholongi dirini” marimbangkon Naibata. (2 Tim. 3:2) Holongan do sidea bani “rosuh-rosuh ni daging, rosuh-rosuh ni mata ampa na mangenjengkon haadongan”. (1 Joh. 2:16) Ipasingat apostel Paulus do aha na boi masa anggo hita mangkaholongi dirinta sandiri. Ia mangkatahon, “Hamatean do hauhuron ni daging.” Mase sonai? Gabe munsuh ni Naibata do hita anggo mangkorjahon sisonai. (Rom 8:6, 7) Pusok do uhur ni halak na pitah mangindahi duit ampa mangkorjahon hisap-hisap ni daging.1 Kor. 6:18; 1 Tim. 6:9, 10.

7. Pamingkirion na sonaha do ra na iihutkon halak Kristen?

7 Bahat do halak na so porsaya bani Naibata atap lang sai porsaya adong do Naibata. Marusaha do sidea mambahen halak na legan ase ulang mangkaholongi atap porsaya bani Naibata. Halak na oto do iahap sidea anggo porsaya bani Naibata. Na leganni bahat do na porsaya bani ilmuwan marimbangkon Panompa. (Rom 1:25) Halak Kristen pe ra do marpingkir sisonai. On mambahen lang be orot parhasomanan ni sidea pakon Jahowa, janah holongni pe boi lambin borgoh.Heb. 3:12.

8. (a) Aha do na boi mambahen hita maretek ni uhur? (b) Sonaha Psalmen 136 boi mangapoh hita?

 8 Halani hita manggoluh bani dunia na jahat, sai adong do na boi mambahen hita maretek ni uhur. (1 Joh. 5:19) Tapi anggo lalab hita maretek ni uhur, gabe galek ma haporsayaonta janah holongta pe lambin borgoh. Umpamani, bahat do hasunsahan halani lambin matua, boritan, atap sunsah ibagas parduiton. Ra do sunsah pangahapta halani lang boi mangkorjahon atap na tarjadi lang songon na niarapkon. Aha pe hasunsahanta, ulang ma marpingkir domma itadingkon Jahowa hita. Tapi pingkirhon ma hata na isuratkon bani Psalmen 136:23, Naibata “mardingat hita bani haetekonta, tongon, ronsi sadokah ni dokahni do idop ni uhur-Ni”. Pos ma uhurta itangihon Jahowa do ‘elek-elekta’ anjaha ibalosi do ai.Ps. 116:1; 136:24-26.

9. Aha do na mambahen holong ni si Paulus bani Naibata totap toguh?

9 Bagas do ipingkiri apostel Paulus pasal pangurupion ni Jahowa hubani, janah on do na mangurupisi ase totap toguh. Ia manuratkon, “[Jahowa] in do pangurupi bangku, seng mabiar ahu, aha ma boi bahenon ni jolma bangku?” (Heb. 13:6) Tenger do uhurni bani pangurupion ni Jahowa sanggah ibagas hasunsahan. Hassi pe ipenjara, ipatoguh do hasoman sahaporsayaonni marhitei surat na itongosni hu kuria-kuria. (Ep. 4:1; Pil. 1:17; Pilem. 1) Lang soal aha pe sitarononni, totap do ia patoguhkon holongni bani Jahowa. Marpangunsandeian do ia bani ‘Naibata sipangapoh in, na mangapohsi ibagas sagala sitarononni’. (2 Kor. 1:3, 4) Sonaha hita mangusihi si Paulus?

Haholongi ma Jahowa (Idah paragrap 10)

10. Sonaha do bahenonta ase holongta bani Naibata totap toguh?

10 Ipatorang si Paulus do hubanta aha  do bahenon ase holongta bani Naibata totap toguh. Ia manuratkon, “Totap martonggo.” Dob ai, ia pe manuratkon, “Golgol bani tonggo!” (1 Tes. 5:17; Rom 12:12) Sonaha tonggo mambahen hita lambin dohor hubani Naibata? Sanggah martonggo, hita marsahap pakon Jahowa. On mambahen lambin orot ma parhasomananta pakon-Si. (Ps. 86:3) Sanggah ipatugah hita ganup na ibagas uhurta hu Bani, lambin dohor ma hita pakon-Si. (Ps. 65:3) Anjaha lambin toguh ma holongta hu Bani, sanggah ibotoh hita ibalosi do tonggonta. Pos ma uhurta “dohor do Jahowa bani sagala na mandilo-Si”. (Ps. 145:18) Hasunsahan aha pe na roh hubanta, age sonari atap pe i lobei ni ari, boi do hita totap toguh anggo tenger uhurta bani holong ampa pangurupion ni Jahowa.

HOLONG BANI HASINTONGAN NI BIBEL

11, 12. Sonaha ase lambin ihaholongi hita hasintongan ni Bibel?

11 Tontu holong do hita bani hasintongan. Janah ibotoh hita hasintongan ai dong bani Bibel. Ihatahon Jesus do bani Bapani, “Hata-Mu do hasintongan.” (Joh. 17:17) Ase boi mangkaholongi hasintongan, maningon do ibotoh hita isi ni Bibel. (Kol. 1:10) Tapi lang pitah ai. Pardiateihon ma aha na porlu bahenonta humbani Psalmen 119. (Basa Psalmen 119:97-100.) Bani ganup ari, porlu do ipingkirhon hita aha na ibasa hita hun Bibel. Anggo ipingkirhon hita aha do gunani ibagas hagoluhanta, lambin ihaholongi hita ma hasintongan in.

12 Panurat ni psalmen pe mangkatahon, “Tobuni in hata-Mu bani langit-langitku, tobunan humbani manisan bani pamanganku.” (Ps. 119:103) Songon sipanganon na mantin do publikasi na ipasirsir organisasi ni Naibata. Sanggah hita mangankon sipanganon na iharosuhkon, lang tarolos hita mamboiskon ai. Sonai homa lang tarolos hita sanggah marlajar. Gabe rosuh ma hita bani “hata na sangkan” humbani hasintongan, lambin urah ma hita mardingat aha na ibasa, janah manggunahon ai laho mangurupi na legan.Par. 12:10.

13. Mase si Jeremia mangkaholongi Hata ni Naibata? Aha do pangkorhonni hu bani?

13 Holong do nabi Jeremia bani Hata ni Naibata. Ia mangkatahon, “Dob jumpah hata-Mu, hupangan ma ai; gabe malas ni uhur do bangku hata-Mu ampa hamegahon bani uhurhu; ai marpanggorani bani goran-Mu do ahu, Ham Jahowa Naibata Zebaot.” (Jer. 15:16) Bagas do ipingkiri si Jeremia hata ni Naibata na maharga in, janah iharosuhkon. Megah do uhurni boi marhorja bani Jahowa laho padaskon tonah-Ni. Anggo hita mangkaholongi hasintongan ni Bibel, megah do homa uhurta gabe Saksi Jahowa anjaha mambaritahon pasal Harajaon-Ni bani panorang parpudi on.

Haholongi ma hasintongan (Idah paragrap 14)

14. Aha ope na boi ibahen hita ase lambin mangkaholongi hasintongan ni Bibel?

14 Aha ope na boi mangurupi hita ase lambin mangkaholongi hasintongan ni Bibel? Porlu do hita totap martumpu halani ijai do hita iajar Jahowa. Hita mandapot pangajarion na ponting marhitei  Ambilan na Madear bani ganup minggu. Ase adong gunani parlajaran ai hubanta, maningon do iparlajari hita lobei, paima iulas i partumpuan. Umpamani, basa ma ganup ayat na dong bani artikel ai. Sonari urah do hita mambasa atap mambuat Ambilan na Madear marhitei HP atap tablet, halani sirsir do ai ibagas marmasam bahasa i jw.org ampa aplikasi JW Library. Hunjai, boi do mintor podas ibuha hita ayat na dong bani majallah ai. Lang soal na ija igunahon hita sanggah marlajar, maningon bagas do ipingkiri hita ayat ai, ase hita lambin mangkaholongi hasintongan ni Bibel.Basa Psalmen 1:2.

HOLONG HUBANI SANINA-BOTOU

15, 16. (a) Domu bani Johannes 13:34, 35, parentah aha do na ibere Jesus hubanta? (b) Aha do kaitanni holong hubani Naibata ampa Bibel pakon holong hubani sanina-botou?

15 Bani borngin paima matei Jesus, nini ma bani susianni, “Titah na baru do Hubere bannima, ai ma, ase marsihaholongan hanima samah hanima. Songon holong ni uhur-Hu bannima, sonai ma marsihaholongan hanima. Hunjon ma botohon ni ganup halak susian-Ku hanima, anggo marsihaholongan hanima.”Joh. 13:34, 35.

16 Adong do kaitanni holong bani sanina-botou pakon holong hubani Jahowa. Anggo hita lang mangkaholongi Naibata, lang boi ihaholongi hita sanina-botounta. Anjaha, anggo lang ihaholongi hita sanina-botounta, lang boi ihaholongi hita Naibata. Apostel Johannes manuratkon, “Anggo seng ihaholongi hasomanni na nididahni, Naibata na so nididahni pe, seng boi haholonganni.” (1 Joh. 4:20) Holongta bani Jahowa pakon sanina-botou, markaitan do homa pakon holongta bani Bibel. Mase? Halani anggo iharosuhkon hita aha na iparlajari hita humbani Bibel, tarojur ma hita mandalankon  titah ase mangkaholongi Naibata pakon sanina-botounta.1 Ptr. 1:22; 1 Joh. 4:21.

Haholongi ma sanina-botou (Idah paragrap 17)

17. Sonaha hita boi patuduhkon holong hubani sanina-botou?

17 Basa 1 Tessalonika 4:9, 10. Aha do na boi ibahen hita laho patuduhkon holong bani sanina-botou i kuria? Ra do adong sidea na matua porlu ialop atap pe itaruhkon ase boi martumpu. Atap, porlu do sidea na mabalu iurupi laho padearhon na maseda i rumahni. (Jak. 1:27) Pardiateihon hita ma sanina-botou na maretek ni uhur ampa na marsitaronon, ase boi iojur atap iapoh. (Pod. 12:25; Kol. 4:11) Ipatuduh hita ma namin holongta bani “hasomanta sahaporsayaon” marhitei pambahenan ampa parsahapta.Gal. 6:10.

18. Aha do na mangurupi hita pasaloseihon parsalisihan pakon sanina-botou?

18 Bibel mangkatahon bani “panorang parpudi” bahat do halak na margijang ni uhur ampa maruhur haut. (2 Tim. 3:1, 2) Jadi, maningon ipatoguh hita ma holongta hubani Jahowa, hasintongan ni Bibel, ampa hasoman. Halani lang gokan dear, sipata ra do hita marsalisih pakon sanina-botounta. Tapi halani holong, podas ma hita pasaloseihon ai janah marsisasapan dousa. (Ep. 4:32; Kol. 3:14) Ulang paturut holongta lambin borgoh! Tapi totap ma patoguh hita holongta hubani Jahowa, Hata-Ni, ampa sanina-botounta.