Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Mei 2017

Mangurupi “Halak Panginsolat” Ase Malas Uhurni Mambalosi Jahowa

Mangurupi “Halak Panginsolat” Ase Malas Uhurni Mambalosi Jahowa

“Jahowa do na manramotkon halak panginsolat.”PSALMEN 146:9.

DODING: 84, 73

1, 2. (a) Hasunsahan aha do na iahapkon piga-piga sanina-botounta? (b) Sungkun-sungkun aha do na laho iulas hita?

“SANGGAH masa porang i Burundi, i kebaktian ope hanami sakaluarga,” nini si Lije. “Ididah hanami do bahat halak na marlintun janah marsitembakan. Jadi, maporus ma namatorashu, ahu, pakon sapuluh saninangku pitah mamboan barang-barang na iboan hanami hu kebaktian ai. Piga-piga kaluargangku das i ianan pangungsian i Malawi, daohni 1.600 kilometer. Tapi, na leganni merap do.”

2 I sab dunia on, adong hira-hira 65 juta halak na maningon manadingkon hutani halani porang atap iparburu. Lape ongga sonai bahatni halak na mangungsi. * (Idah surat partoruh.) Humbani pangungsi ai, dong marribu  Saksi Jahowa. Bahat do sidea na hamagouan halak na hinaholonganni ampa barang-barangni. Aha ope hasunsahan na iahapkon sidea? Sonaha hita boi mangurupi sanina-botounta ase totap marmalas ni uhur mambalosi Jahowa? (Ps. 100:2) Sonaha hita boi marbarita bani pangungsi na lape mananda Jahowa?

HAGOLUHAN NI HALAK PANGUNGSI

3. Mase Jesus pakon susianni laho mangungsi?

3 Ongga do Jesus pakon namatorasni misir hu Masir, dob ipasingat malekat si Josep anggo Raja Herodes sihol mamunuh Jesus. Tading ma sidea ijai ronsi matei si Herodes. (Mat. 2:13, 14, 19-21) Martahun-tahun dob ai, susian ni Jesus pe ‘merap hu nagori Judea ampa Samaria’ halani pangayak-ayakon. (Lah. 8:1) Jesus mambotoh bahat do susianni maningon manadingkon rumahni. Ia mangkatahon, “Anggo iparburu hanima bani sada huta, laho ma hanima hu huta na legan.” (Mat. 10:23) Atap halani aha pe, tontu lang urah manadingkon rumah.

4, 5. Bahaya aha do na adong bani pangungsi sanggah (a) maporus? (b) tading i ianan pangungsian?

4 Marmasam do hasunsahan na iahapkon pangungsi sanggah maporus atap tading i pangungsian. “Marminggu-minggu do hanami mardalan janah montas i holangkolang ni maratus bangkei na ragei,” nini si Gad, anggi ni si Lije. “Marumur 12 tahun do ahu ijia. Halani mabutong naheihu, husuruh ma ase itadingkon kaluargangku ahu. Tapi, lang ra bapa halani mabiar holi iboan halak parjahat ahu. Jadi, iombah bapa ma ahu. Bai ganup ari, totap do hanami martahan marhitei martonggo janah martenger ni uhur bani Jahowa. Sipata, dong hayu mangga i dalan, jadi pitah buahni ma na ipangan hanami.”Pil. 4:12, 13.

5 Bahat do kaluarga ni si Lije, dokah tading bani ianan pangungsian ni Perserikatan Bangsa-Bangsa. Ijai pe dong bahayani. Si Lije, na sonari gabe sintua kaliling patorangkon, “Bahat sidea lang dong horjani. Halani ai manggosip ma sidea, tenggen, marjudi, manangko, ampa marriah-riah.” Ase lang dihut mangkorjahon sisonai, Saksi-Saksi porlu do ringgas marhorja i kuria. (Heb. 6:11, 12; 10:24, 25) Ase boi totap toguh partonduyonni, dear ma igunahon sidea panorang janah dong homa na marintis. Porsaya do sidea lang lalab mangungsi, songon halak Israel sapari lang lalab i halimisan. On do na mangurupi sidea ase totap mangkorjahon na dear.2 Kor. 4:18.

HAHOLONGI MA PANGUNGSI

6, 7. (a) Holong ni uhur ni Naibata mangojur ase sonaha hita bani sanina-botounta? (b) Bahen ma contoh.

6 “Holong ni uhur ni Naibata” do na mangojur hita ase mangkaholongi sanina-botounta, tarlobih sidea na ibagas hasunsahan. (Basa 1 Johannes 3:17, 18.) Umpamani, sanggah halak Kristen i Judea bani abad na parlobei mamorluhon sipanganon halani masa loheian, ibahen kuria ma pangaturan  laho mangurupi sidea. (Lah. 11:28, 29) Apostel Paulus pakon apostel Petrus mangojur halak Kristen ase marsitamueian. (Rom 12:13; 1 Ptr. 4:9) Halak Kristen iojur ase bujur bani sanina-botou na roh hun ianan na legan, tarlobih bani sidea na ibagas hasunsahan atap pe iparburu halani haporsayaonni! * (Idah surat partoruh.)—Basa Podah 3:27.

7 Na baru on, dong marribu Saksi-Saksi Jahowa maningon mangungsi halani porang, ampa iparburu i Ukraina bagian timur. Na parahni, bahat do humbani sidea na ibunuh. Tapi, bahatan do na maporus ai ijalo i rumah ni sanina-botou na i Rusia pakon i huta na legan i Ukraina. Totap do netral sanina-botounta bani dua nagori ai, halani “seng hun dunia on” sidea. Anjaha totap do sidea marmalas ni uhur mangambilankon “Ambilan Na Madear”.Joh. 15:19; Lah. 8:4.

PATOGUH MA HAPORSAYAON NI PANGUNGSI

8, 9. (a) Hasunsahan aha do na iahapkon pangungsi bani nagori na baru? (b) Mase maningon sabar hita sanggah mangurupi sidea?

8 Piga-piga pangungsi maningon pindah hu huta na legan i nagori ni sidea. Tapi, bahat do homa na maningon pindah hu nagori na legan. Tongon, ra do pamarentah mangurupi marhitei pasirsirhon sipanganon, parhiouon, ampa ianan bani sidea. Tapi totap do sunsah hagoluhan ni pangungsi ai. Umpamani, sipanganon ijai lang sosok. Piga-piga pangungsi na roh hun ianan na milas, ra do lang mambotoh aha na sosok ipakei sanggah borgoh ni ari. Na legan ra do lang mambotoh manggunahon ugas-ugas ijai.

9 Piga-piga pamarentah mambahen pangaturan ase ganup pangungsi sonang bani ianan ni sidea na baru ai. Tapi, dob piga-piga bulan, maningon do sidea boi mangurus haporluanni sandiri. Boi do lang urah on. Pingkirhon ma, buei do na maningon iparlajari sidea, songon bahasa na baru, hasomalan na baru, sikolah na baru, uhum na baru pasal sonaha manggalar pajak, janah sonaha mangajari dakdanak! Ai sabar janah hormat do nasiam mangurupi sidea?Pil. 2:3, 4.

10. Sonaha hita patoguhkon haporsayaon ni saninanta dobkonsi das sidea bani iananta? (Idah gambar bani alaman 3.)

10 Sipata, ra do saninanta na mangungsi ai, ilanglangi pamarentah laho manjumpahi kuria ijai. Piga-piga pamarentah mangancam lang be mangurupi saninanta ai. Ihatahon anggo lang ra sidea manjalo horja na binere ni pamarentah, iusir ma sidea. Hape horja ai mambahen sidea lang boi martumpu. Halani mabiar, gabe adong ma na manjalo horja ai. Halani ai, porlu tumang do mintor iurupi hita dobkonsi das sidea. Bahen ma ase sidea mambotoh na parduli do hita hubani sidea. Anggo ibahen hita sonai, on boi patoguhkon haporsayaon ni sidea.Pod. 12:25; 17:17.

 BERE MA PANGURUPION BANI PANGUNGSI

11. (a) Aha do na ihaporluhon pangungsi? (b) Sonaha pangungsi boi martarima kasih?

11 Parlobei, porlu do ra hita mambere sipanganon, parhiouon, atap haporluan na leganni. * (Idah surat partoruh.) Age sibere-bere ai etek songon dasi, marguna do ai bani sidea. Ai pe, ulang ma namin sidea na mangungsi mabahattu mangindo, tapi martarima kasih ma bani aha pe na ibahen saninanta ase malas uhur ni sidea. Ujungni, porlu do pangungsi marusaha mangurus haporluanni sandiri. Anggo sonai ibahen, tongtong ma dear parhasoman ni sidea pakon sanina ampa botou. (2 Tes. 3:7-10) Hassi pe sonai, porlu do tongtong hita mangurupi na mangungsi.

Sonaha hita boi mangurupi sanina-botounta na mangungsi? (Idah paragrap 11-13)

12, 13. (a) Pangurupion aha do na boi ibere hita hubani pangungsi? (b) Bere ma sada contoh.

12 Lang maningon bayak hita ase boi mangurupi pangungsi. Holong ampa panorangta do na siporlunan bani sidea. Umpamani, patugah ma marangkot aha do sidea anggo laho hu sada ianan atap ija do mamboli sipanganon na murah tapi sehat. Boi homa ipatuduh ham ija do mamboli masin jahit atap barang-barang na legan na boi igunahon sidea laho mansari. Na siporlunan,  bahen ma ase malas uhur ni sidea i kuria na baru. Anggo dong motorta, arahkon ma sidea ase rap laho hu partumpuan. Patorang ma cara sidearan laho marbarita ijai, janah hasomani ma sidea.

13 Sanggah adong ompat sanina na maposo das bani sada kuria, mintor iurupi sintua do sidea. Sidea iajari manupir, mangetik surat, ampa sonaha mangindahi horja. Ipatorang homa bani sidea ase pangkei manggunahon panorang ibagas mangidangi Jahowa. (Gal. 6:10) Lang piga dokah, gabe parintis ma sidea na ompat ai. Halani haringgason ni sidea mangidangi Jahowa pakon pangurupion ni sintua, lambin toguh ma partonduyon ni sidea janah lang ra mangihutkon dunia na jahat on.

14. (a) Mase pangungsi maningon mambahen Jahowa na siporlunan? (b) Bere ma sada contoh.

14 Songon halak Kristen na legan, porlu do homa pangungsi manjaga diri ase Jahowa ma na siporlunan ulang habayakon. * (Idah surat partoruh.) Si Lije, na ipatugah nongkan ai, pakon saninani, mardingat aha na iajarhon bapa ni sidea pasal haporsayaon sanggah maporus ai sidea. Sidea mangkatahon, “Ipakaluar bapa ma isi ni tasnami. Janah iangkat ma tas na lang dong be isini ai, lanjar tarsirom ma ia mangkatahon, ‘On hansa na ihaporluhon!’”—Basa 1 Timoteus 6:8.

SARIHON NA SIPORLUNAN BANI PANGUNGSI

15, 16. (a) Sonaha hita boi patoguhkon haporsayaon ni sanina-botounta? (b) Sonaha do namin hita mangapoh sidea?

15 Sedo sipanganon ampa parhiouon na siporlunan bani pangungsi. Sidea mamorluhon pangapohon humbani Bibel. (Mat. 4:4) Sintua boi mangurupi sidea marhitei mambere publikasi bani sahap na iarusi sidea. Porlu tumang do on, halani itadingkon pangungsi do ganup na adong bani sidea. Siholan do sidea bani kaluarga, hasoman, ampa kuriani. Jadi, porlu do iahapkon sidea adong holong parsaninaon i kurianta. Anggo lang, ipindahi sidea ma holi pangurupion bani halak na legan na lang Saksi Jahowa. (1 Kor. 15:33) Anggo ibahen hita malas uhur ni sidea, artini rup marhorja do hita pakon Jahowa laho manlinggomi “halak panginsolat”.Ps. 146:9.

16 Jesus pakon kaluargani lang boi mulak hu hutani sadokah manggoluh si Herodes. Sonai homa bahat do pangungsi sonari lang boi mulak hu hutani. Tapi, adong do na lang ra mulak hu nagorini, halani bahat namatoras mangidah dakdanakni iparseda janah ibunuh, nini si Lije. Jadi sidea lang ra mamboan dakdanakni mulak hujai. Sanggah mangurupi sanina-botounta on, porlu do hita “sapangahapan, parholong ni uhur bani hasoman, paridop ni uhur, anjaha partoruh ni uhur”. (1 Ptr. 3:8) Maila do ra sidea marhasoman pakon na legan atap patugahkon sitarononni halani  iparburu, tarlobih anggo ijin niombahni. Jadi pingkirhon ma, ‘Anggo sonai na masa hubangku, aha do na huharosuhkon ase ibahen halak hubangku?’Mat. 7:12.

MARBARITA HUBANI PANGUNGSI

17. Sonaha horja pangidangionta boi mangapoh pangungsi?

17 Buei do pangungsi na roh humbani nagori na manlarang horja pangidangionta. Tapi halani haringgason ni Saksi-Saksi Jahowa marbarita, marribu pangungsi ujungni manangar “hata pasal Harajaon ai”. (Mat. 13:19, 23) Buei do sidea “na boratan” tarapoh sanggah martumpu. Anjaha sidea mangkatahon, “Na tongon do Naibata i tongah-tongah nasiam.”Mat. 11:28-30; 1 Kor. 14:25.

18, 19. Aha do na porlu idingat hita sanggah marbarita hubani pangungsi?

18 Porlu do “maruhur” hita sanggah marbarita hubani pangungsi. (Mat. 10:16; Pod. 22:3) Sabar ma hita manangihon sidea, tapi ulang mangulas pasal politik. Ase ulang adong parsoalan, irikkon ma tugah-tugah humbani kantor cabang atap pe pamarentah. Porlu do homa hita mangkargai pandapot ni sidea halani bahat do sidea na roh humbani marmasam ugama atap hasomalan. Umpamani, adong do halak na mamboan hasomalan humbani nagorini pasal sonaha do dearni naboru marpakeian. Jadi, sanggah marbarita bani sidea, ulang ma namin parpakeianta mambahen sidea tartolsu.

19 Hita sihol mangurupi halak na marsitaronon, age pe sidea lang Saksi Jahowa. Anggo ibahen sonai, mangusihi halak Samaria do hita songon ipatugah bani limbaga ni Jesus. (Luk. 10:33-37) Na sidearan, ajarhon ma hasintongan bani sidea. Sada sintua na bahat mangurupi pangungsi mangkatahon porlu tumang do patugahkon bani sidea anggo hita Saksi-Saksi Jahowa. Patorang ma anggo hita pitah sihol mangurupi sidea mambotoh pangarapan na ipatugah bani Bibel, sedo laho mambere duit bani sidea.

HASIL NA DEAR

20, 21. (a) Aha do hasilni anggo maridop ni uhur hita hubani pangungsi? (b) Aha na laho iulas hita bani artikel na mangihut?

20 Anggo maridop ni uhur hita bani “halak panginsolat”, dear do hasilni. Umpamani, sanggah matei paramangon ni si Alganesh, botounta, maporus do ia pakon onom dakdanakni hun Eritrea halani iparburu. Sadokah ualuh ari ma sidea mamontas halimisan. Ujungni dobkonsi pardalanan na daoh ai, das ma sidea i Sudan. Ia mangkatahon, “Songon kaluarga do hanami ibahen sanina na ijai. Ibere do hanami sipanganon, pakeian, pakon ongkos motornami. Ise do na ra manjalo hasoman sahaporsayaonni age pe lape itanda? Saksi-Saksi Jahowa hansa!”Basa Johannes 13:35.

21 Sonaha hita boi mangurupi dakdanak na dihut mangungsi pakon namatorasni? Bani artikel na mangihut iulas hita ma sonaha hita boi mangurupi kaluarga sisonai ase marmalas ni uhur manombah Jahowa.

^ par. 2 Bani artikel on, hata “pangungsi” atap “halak panginsolat” mangartihon halak na manadingkon hutani halani porang, iparburu, atap pe hona bencana. Ra do maningon laho sidea hu nagori na legan atap hu huta na legan bani nagori ni sidea. UNHCR (organisasi na mambere pangurupion hubani pangungsi) mangkatahon anggo 1 humbani 113 halak i sab tanoh on, maningon do laho manadingkon rumahni.

^ par. 6 Idah artikel “Berbaik Hatilah kepada Pendatang” bani Menara Pengawal Oktober 2016, alm. 8-12.

^ par. 11 Dobkonsi das pangungsi, mintor iirikkon sintua ma tugah-tugah na dong bani buku Diorganisasi untuk Melakukan Kehendak Yehuwa, pasal 8, paragrap 30. Sidea boi manongos surat hu kantor cabang marhitei jw.org laho manjumpahi kuria ni pangungsi ai hinan. Dob ai, dear ma sungkun pangungsi ai pasal kuriani hinan ampa pangidangionni, ase mambotoh sonaha partonduyonni.

^ par. 14 Idah artikel “Tak Seorang Pun Dapat Melayani Dua Majikan” pakon “Tabahlah—Yehuwa Penolong Saudara!” bani Menara Pengawal 15 April 2014, alm. 17-26.