Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Mei 2017

 PANGALAMAN

Hassi pe Longah Tongtong do Ahu Patugahkon Hasintongan

Hassi pe Longah Tongtong do Ahu Patugahkon Hasintongan

Ahu ididi bani tahun 1941, sanggah marumur 12 tahun. Tapi bani tahun 1946 do baru huarusi hasintongan ni Bibel. Mase sonai? Husaritahon ma da.

BANI tahun 1910, pindah ma namatorasku hun Tbilisi, Georgia, hu Kanada. Tading ma sidea i sada rumah na etek i parladangan dohorhon huta Pelly, Saskatchewan, Kanada bagian barat. Tubuh ma ahu bani tahun 1928, sietekan humbani onom marsanina. Onom bulan paima tubuh ahu, matei ma bapangku. Dob ai, etek-etek ope ahu, matei homa inangku. Dobkonsi ai, matei ma si Lucy, botouhu sibanggalan sanggah marumur 17 tahun. Jadi si Nick, tulangku ma na mangurus ahu pakon saninangku.

Sanggah etek ope ahu, ididah kaluargangku do hutarik ihur ni sada hodanami. Mabiar do sidea itandak hoda ai holi ahu, jadi gogoh ma sidea mandiloi ahu ase ulang hubahen sonai. Lang hutangar sora ni sidea age i pudingku sidea. Dearni lang jadi itandak hoda ai ahu. Tapi halani ai, ibotoh kaluargangku ma na longah do hape ahu.

Adong ma hasoman kaluarganami na mangkatahon anggo ahu dearni marsikolah pakon halak na longah. Jadi isikolahkon Tulang Nick ma ahu i sikolah halak na longah i kota Saskatoon, Saskatchewan. Daoh do sikolahku ai anjaha lima tahun ope umurku sanggah ai, jadi mabiar ma ahu. Sanggah liburan ampa musim milas do ahu boi mulak hu huta. Ujungni, marlajar bahasa isyarat  ma ahu anjaha boi marguro-guro pakon hasoman na legan.

MANANDA HASINTONGAN NI BIBEL

Bani tahun 1939, marhajabuan ma si Marion, botouhu pakon si Bill Danyl-chuck, jadi sidea ma na mangurus ahu ampa botouhu si Frances. Sidea do na parlobei sahali marlajar Bibel pakon Saksi-Saksi Jahowa ibagas kaluarganami. Sadokah musim milas ipatugah sidea ma bangku aha na iparlajari sidea hun Bibel. Payah do hanami marsiarusan halani lang ibotoh sidea bahasa isyarat. Hassi pe sonai, ibotoh sidea marosuh do ahu marlajar pasal Jahowa. Janah ahu pe mambotoh romban hubani Bibel do na ihorjahon sidea ai. Halani ai, dihut ma ahu marbarita pakon sidea. Dob ai, sihol ma ahu ididi. Jadi bani tanggal 5 September tahun 1941, ididi si Bill ma ahu ibagas sada bak bosi. Maborgoh tumang bahni!

Rapkon halak na longah sanggah kebaktian i Cleveland, Ohio, bani tahun 1946

Bani tahun 1946, sanggah musim milas, roh ma hanami hu kebaktian i Cleveland, Ohio, AS. Bani ari na parlobei, ibahen botouhu ma catatan hubangku ase boi huarusi acara ai. Tapi bani ari na paduahon, malas uhurhu halani huidah dong do hape acarani iterjemahkon hu bahasa isyarat. Ujungni, malas uhurhu halani boi mangihutkon ganup acara ai, anjaha boi ma huarusi aha na iajarhon Bibel!

MANGAJARHON HASINTONGAN

Dob kebaktian, mulak ma use ahu hu sikolah. Ondi ai, baru pe salosei Porang Dunia II, janah bahat halak sihol patuduhkon setia do sidea bani negarani. Tapi halani domma huarusi hasintongan, bani Jahowa do ahu setia. Jadi, lang be ahu manghormat bendera, mandodingkon doding negarangku, janah lang be dihut ahu mar-ari raya atap laho hu gareja pakon hasoman sakalashu. Sogam ma guru-guru mangidah ahu, janah irisai ma ahu. Marladung ma sidea hubangku ase hutadingkon hasintongan. Piga-piga hasomanku mambotoh ai, halani ai boi ma hupatugah bani sidea aha na huparlajari. Piga-piga humbani sidea, songon si Larry Androsoff, si Norman Dittrick, pakon si Emil Schneider, gabe ra manjalo hasintongan janah manombah Jahowa ronsi sonari.

Sanggah hu kota-kota na legan, tongtong do ahu mambere hasaksian hubani halak na longah. Umpamani sanggah i Montreal, laho ma ahu hu tumpuan ni halak na longah. Ijai, jumpah ma ahu bani sada garama na margoran si Eddie Tager sahalak pareman. Ronsi hamateanni bani tahun na salpu, ia martumpu i kuria bahasa isyarat i Laval, Quebec. Jumpah homa ahu pakon si Juan Ardanez. Songon halak i Beroa sapari, ia pe sihol manangkasi atap na sintong do na iparlajari ai hun Bibel. (Lah. 17:10, 11) Dob ai, ididi ma ia janah gabe sintua i Ottawa, Ontario ronsi matei.

Tahun 1950-an marbarita i dalan

Bani tahun 1950, pindah ma ahu hu Vancouver. Hassi pe rosuh ahu marbarita hubani halak na longah, seng tarlupahon ahu pangalaman jumpah bani sahalak naboru margoran si Chris Spicer, na hujumpahi i dalan. Ra do ia manjalo majallahta ganup bulan, janah sihol ase ahu manjumpahi paramangonni, si Gary. Roh ma ahu hu  rumahni janah dokah do hanami marsahap marhitei surat. Dob martahun-tahun, jumpah use ma hanami i kebaktian Toronto, Ontario. Tarsonggot ahu sanggah isisei sidea, janah bani ari ai laho ididi ma si Gary! Hunjon, hubotoh ma porlu tumang do tongtong marbarita halani lang ibotoh hita atap ise do na ra manjalo hasintongan.

Dob ai, mulak ma use ahu hu Saskatoon. Ijai, ahu pajumpah pakon naboru na mangindo ase ahu mangajarhon Bibel hubani dua boruni na longah, ai ma si Jean ampa si Joan Rothenberger. Sasikolah do hanami. Haduasi sidea, mintor patugahkon aha na iparlajari sidea hubani hasoman sakalasni. Halani ai, dong lima hasomanni na gabe Saksi-Saksi Jahowa. Sada humbani sidea margoran si Eunice Colin. Ongga do hanami pajumpah, sanggah laho tamat sikolah ahu. Ijia, ia mambere bonbon hubangku, janah isungkun ra do ahu marhasoman pakonsi. Ujungni, gabe haholongan ni uhurhu do ia. Gabe parinangonku ma ia!

Pakon si Eunice tahun 1960 ampa tahun 1989

Sanggah ibotoh inang ni si Eunice anggo ia marlajar Bibel, isuruh ma kopala sikolah ase igilai si Eunice. Age pe ibuat buku-bukuni, tongtong do ia martenger ni uhur bani Jahowa. Sanggah si Eunice laho ididi nini namatorasni ma, “Anggo gabe Saksi Jahowa do ho, kaluar ma ho hun rumah on!” Jadi, sanggah marumur 17 tahun si Eunice, laho ma ia hu rumah ni sada kaluarga Saksi. Dob ai, itoruskon ma parlajaranni janah ididi ma ia. Sanggah marhajabuan hanami bani tahun 1960, lang roh namatorasni. Tapi, dob martahun-tahun, ihargai sidea ma haporsayaonami ampa caranami pagodangkon niombah.

TORUS DO IJAGA JAHOWA AHU

Anakku si Nicholas pakon si Deborah, parinangonni mangidangi i Betel London

Dong pitu anaknami, tapi lang longah sidea. Lang urah pagodangkon  sidea halani haduasi hanami longah. Tapi, totap do iajari hanami sidea marbahasa isyarat ase boi iarusi sidea sahapnami ampa hasintongan. Bahat do sanina-botou na mangurupi hanami. Umpamani, sanggah dong anaknami na marsahap na sambor i Balei Harajaon, mintor ibahen sanina ma surat laho patugahkon ai bennami. Jadi ibotoh hanami ma maminsang ia. Ompat humbani anaknami, ai ma si James, si Jerry, si Nicholas, pakon si Steven gabe sintua janah tongtong mangidangi Jahowa rapkon kaluargani. Si Nicholas pakon si Deborah, parinangonni, mangurupi panerjemahan bahasa isyarat i kantor cabang Inggris. Si Steven pakon si Shannan, parinangonni, mangidangi gabe tim panerjemah bahasa isyarat i kantor cabang Amerika Serikat.

Anakku si James, si Jerry, ampa si Steven pakon parinangonni bei mangurupi horja parambilanon ibagas bahasa isyarat marhitei bahat cara

Sabulan paima gok 40 tahun parhajabuannami, matei ma si Eunice halani kanker. Gabe pusok tumang uhurhu. Sanggah boritan ai ia, toguh do haporsayaonni halani pangarapan parpuhoon. Sihol tumang do ahu jumpah use pakonsi.

Si Faye pakon si James, si Jerry pakon si Evelyn, si Shannan pakon si Steven

Bani bulan Februari tahun 2012  madabuh do ahu janah ponggol ma binongeihu. Jadi pindah ma ahu hu rumah ni anakku halani porlu do ahu pangurupion. Martumpu ma hanami i Kuria Bahasa Isyarat Calgary. Ijai sintua do ahu. Sasintongni, on ma parlobei sahali ahu mangidangi i kuria na marbahasa isyarat! Jadi, sonaha boi totap toguh parhasomananku pakon Jahowa sadokah on sanggah martumpu i kuria marbahasa Inggris? Tongtong do ahu iurupi Jahowa. Totap do ia pasaudkon janji-Ni bani halak na tading maetek. (Ps. 10:14) Martarima kasih do ahu bani sanina na ra mambahen catatan, marlajar bahasa isyarat, janah manerjemahkon hubangku.

Marumur 79 tahun dihut bani sikolah parintis bahasa isyarat

Sipata lang huarusi aha na ihatahon halak hubangku. Atap huahap lang iarusi sidea sonaha mangurupi halak na longah. On mambahen ahu gabe mandolei janah maretek ni uhur. Tapi, tongtong do hudingat na ihatahon si Petrus bani Jesus, “Hu bani ise ma hanami laho Tuhan? Bamu do hata hagoluhan sisadokah ni dokahni.” (Joh. 6:66-68) Songon bahat sanina-botou na longah na dob martahun-tahun martahan ibagas hasintongan, ahu pe sihol do marsabar. Domma huahapkon seng soya-soya anggo marpangunsandeian bani Jahowa ampa organisasi-Ni. Sonari domma bahat publikasi ibagas bahasa isyarat. Malas do uhurhu halani boi martumpu janah dihut bani kebaktian na mamakei Bahasa Isyarat Amerika. Sasintongni, malas tumang do uhurhu janah ipasu-pasu do goluhku halani mangidangi Naibata Jahowa.