Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Mei 2017

‘Holongan do Uhurmu Bangku Ase On?’

‘Holongan do Uhurmu Bangku Ase On?’

‘Ale Simon, anak ni si Jonas, holongan do uhurmu bangku ase on?’JOHANNES 21:15.

DODING: 128, 45

1, 2. Dob manjala dengke manipat saborngin, parlajaran aha do na dapot si Petrus?

MANIPAT saborngin do pitu halak susian ni Jesus manjala dengke. Tapi lang adong age sada dapot sidea dengke. Bani sogod ni ari roh ma Jesus na dob ipapuho, manjumpahi sidea. Dob ai, ihatahon ma bani sidea, “‘Dabuh hanima ma jalanima hu siamun ni parau in, ase dapotan hanima!’ Jadi idabuh sidea ma, gabe seng tartarik sidea be jala ai halani buei ni dengke ai”.Joh. 21:1-6.

2 Ipasirsir Jesus ma roti ampa dengke bahen sipanganon ni sidea. Dob ai isungkun ma si Simon Petrus, ‘Ale Simon, anak ni si Jonas, holongan do uhurmu bangku ase on?’ Ibotoh Jesus do marosuh tumang si Petrus manjala dengke. Jadi isungkun sonai ase ibotoh Jesus na ija do si Petrus holongan, pangajarion ni Jesus do atap manjala dengke. Balos ni si Petrus, “Tuhan, ibotoh Ham do holong ni uhurhu Bamu!” (Joh. 21:15) Dapot si Petrus  ma parlajaran na ponting, ai ma porlunan do mangkaholongi Jesus humbani aha pe. Humbani ari ai, ipatuduh si Petrus ma holongni ai marhitei ringgas marbarita janah manjolom buei tanggung jawab i kuria.

3. Mase halak Kristen maningon manjaga holongni?

3 Aha do na boi iparlajari hita humbani hata ni Jesus hubani si Petrus? Porlu do hita totap manjaga ase holongta hubani Kristus ulang surut. Ibotoh Jesus buei do parlajouan i dunia na jahat on mambahen hita holsohan. Bani limbaga ni Jesus pasal panabur, ihatahon adong halak na manjalo “hata pasal Harajaon ai” janah ringgas do ia mulani. Tapi halani ‘pangkolsohkon ni uhurni bani na i dunia on ampa habayakon sipanipu in’ gabe “tarpisat do hata ai”, janah magou ma haringgasonni. (Mat. 13:19-22; Mrk. 4:19) Anggo lang jaga hita, holsoh-holsoh ni dunia on boi mambahen hita lang ringgas be mangidangi Jahowa. Jadi ipasingat Jesus ma susianni, “Jaga ma hanima bani dirinima, ulang ma boratan uhurnima halani parminum-minumon ampa parmabukon ampa holsoh-holsoh bani na i dunia on.”Luk. 21:34.

4. Sonaha hita mambotoh na toguh do holongta bani Kristus? (Idah gambar bani alaman 21.)

4 Songon si Petrus, ipatuduh hita ma holongta marhitei mambahen horja pangidangion na siporlunan ibagas hagoluhanta. Hunja ibotoh tongtong do hita mangkorjahon ai? Sungkun ma dirinta: ‘Aha do na huharosuhkon tumang? Ai rosuhan do diri mangidangi Jahowa marimbangkon mangkorjahon na legan?’ Laho mambotoh balosni, ulas hita ma tolu bagian na mambahen surut holongta hubani Kristus, ai ma horja, hiburan, ampa arta.

JAGA MA ASE ULANG HORJANTA NA SIPORLUNAN

5. Aha do tanggung jawab ni kopala kaluarga?

5 Lang pitah harosuh bani si Petrus na manjala dengke ai. Tapi ai do horjani laho mansarihon kaluargani. Sonari pe ibere Jahowa do tanggung jawab bani kopala kaluarga laho mansarihon kaluargani. (1 Tim. 5:8) Jadi, maningon ringgas do sidea marhorja. Tapi, bani panorang parpudi on, horja ai boi mambahen holsohan.

6. Mase parhorjaan boi mambahen holsohan?

6 Somalni otikan do parhorjaan marimbangkon sidea na mangindahi horja. Halani ai bahat ma na marlumba mangindahi horja. Ra do sidea lembur hassi pe otik upahni. Buei parusahaan sihol mambahen bahat barang na dear, tapi otik parhorja na igunahon. Halani ai, buei parhorja gabe loja tumang anjaha boritan. Halani mabiar ipakaluar hun parhorjaanni, ra ma sidea mangkorjahon ganup parentah bosni.

Maningon balosan do hita hubani Jahowa marimbangkon hubani na legan

7, 8. (a) Hubani ise do hita balosan? (b) Pasal parhorjaan, parlajaran aha do na dapot hita humbani sanina i Thailand?

 7 Maningon balosan do hita hubani Jahowa marimbangkon hubani bos atap na leganni. (Luk. 10:27) Tongon maningon horja do hita laho pasirsirhon haporluanta atap marbarita. Tapi anggo lang jaga hita, boi do horja ai manlanglangi pangidangionta hubani Naibata. Hita boi marlajar humbani pangalaman ni saninanta  i Thailand. Ia mangkatahon, “Marosuh tumang ahu padearhon komputer, tapi gati do ahu lembur. Halani ai lang dong be panorangku manlahouhon horja partonduyon. Dobni, hubotoh ma Harajaon ni Naibata do na siporlunan. Jadi hupindahi ma horja na legan.” Aha na laho ihorjahon sanina ai?

8 Ia patorangkon, “Ibagas na satahun, hupasirsir ma aha na porlu hubahen. Dob ai, huputushon ma manjual es krim. Mulani pusok do uhurhu halani otik pansarianku. Sanggah ididah hasoman sahorjangku hinan, itartawai do ahu halani songon na oto iahap sidea horja na hupilih on, hape dearan do horjangku padearhon komputer i ruangan na mar-AC nini sidea. Jadi, hutonggohon ma ai bani Jahowa ase martahan ahu janah boi mambere bahat panorang ibagas pangidangion. Lang piga dokah, mubah ma situasingku. Hubotoh ma aha na iharosuhkon pamboli, janah lambin pandei ma ahu mambahen es krim. Bois do ganup es krim na hujual tiap ari. Sasintongni bahatan do pansarianku marimbangkon padearhon komputer. Malas tumang uhurhu, lang be holsohan ahu halani horjangku hinan. Janah na siporlunan, lambin dohor do sonari huahap bani Jahowa.”Basa Mateus 5:3, 6.

Ai ringgasan do ahu sanggah marhorja, tapi marayoh sanggah mangidangi Jahowa?

9. Aha do na porlu ipingkirhon laho mambotoh lang horjanta na siporlunan?

9 Marosuh do Jahowa anggo hita ringgas marhorja. Bahat do gunani ai. (Pod. 12:14) On ma na ihatahon Jesus, “Parlobei ma pindahi hanima Harajaon ni Naibata ampa hapintoron-Ni, dob ai tambahkonon-Ni do ganupan ai bannima.” Halani ai, maningon jaga do hita ase ulang parhorjaan na siporlunan ase Jahowa. (Mat. 6:33) Tapi, hunja do ibotoh hita lang parhorjaan na ibahen hita na siporlunan? Pingkirhon ma, ‘Ai ringgasan do ahu sanggah marhorja, tapi marayoh sanggah marbarita?’ Anggo ipingkirhon hita sungkun-sungkun on, taridah ma bani aha do hita holongan.

10. Aha do na iajarhon Jesus hubanta?

10 Jesus mangajarhon aha do na siporlunan ibagas hagoluhanta. Bani sada ari, roh ma Jesus hu rumah ni si Maria pakon si Marta. Mintor sihap do  si Marta pasirsirhon sipanganon hu bani, tapi anggo si Maria hundul do dohorhon ni Jesus laho manangar ajaranni. Marungut-ungut ma si Marta halani seng iurupi si Maria ia. Nini Jesus ma bani si Marta, “Ipilih si Maria do rupei sidearan, seng sibuaton ai hun bani.” (Luk. 10:38-42) Hunjon, dong do parlajaran na maharga. Ase ulang haporluan siganup ari na ibahen hita gabe siporlunan, porlu do hita mamilih “rupei [atap, bagian] sidearan” laho patuduhkon holongta bani Jesus. Artini, maningon parhasomananta dompak Jahowa do na siporlunan ibagas hagoluhanta.

SONAHA DO PANGAHAPTA PASAL HIBURAN

11. Aha do na iajarhon Bibel pasal marsaran?

11 Halani bahat sihorjahononta, gabe porlu ma hita marsaran. Bibel mangkatahon, “Seng dong sidearan bani jolma humbani na mangan ampa na minum, anjaha ipasonang uhurni marhitei na madear ibagas halojaonni.” (Par. 2:24) Jesus pe, isuruh do susianni marsaran dobkonsi loja sidea marbarita. Ia mangkatahon, “Laho ma hita bani ianan na lungun, ase marsaran otik.”Mrk. 6:31, 32.

12. Pasal hiburan, aha do na porlu idingat hita? Bere ma contoh.

12 Tongon, porlu do hiburan ampa marsaran. Tapi jaga ma hita, ase ulang ai na gabe siporlunan ibagas hagoluhanta. Bani abad na parlobei adong do halak na mangkatahon, “Mangan minum ma lah hita, ai matei do hita patar.” (1 Kor. 15:32) Sonari on pe, bahat do homa halak na marpangahap sonai. Umpamani, adong sada garama i Eropa Barat domma roh hu partumpuan. Tapi, halani rosuh tumang ia bani hiburan, lang be marsaor ia pakon Saksi-Saksi Jahowa. Dob lambin dokah, ibotoh ia bahat do hape parsoalan anggo lalab marsonang-sonang. Halani ai, marlajar Bibel ma ia use janah gabe parbarita. Dobkonsi ididi, ia mangkatahon, “Manosal tumang do ahu halani mabahattu panorangku bois bani hiburan. Hape sasintongni, martuahan do huahap mangidangi Jahowa marimbangkon marsonang-sonang.”

13. (a) Bahen ma limbaga na patuduhkon sadiha bahat ma namin panorangta bani hiburan. (b) Aha do na mangurupi hita laho mambotoh lang hiburan na siporlunan ibagas goluhta?

13 Porlu do hiburan ai hubanta laho mangalop gogoh. Halani ai, sadiha bahat ma dearni panorang na igunahon hita bani hiburan? Umpamani, bahat do hita na marosuh bani sipanganon na matobu. Tapi anggo mabahattu ai ipangan, boi mambahen hita gabe boritan. Jadi porlu do hita mangankon sipanganon na sehat. Sonai homa, anggo mabahattu panorang na igunahon hita bani hiburan, boi do ai pasedahon parhasomananta dompak Jahowa. Jadi hunja do ibotoh sedo hiburan ai na siporlunan ibahen hita? Parlobei, etong ma ibagas na saminggu sadiha bahat do panorang na igunahon hita laho martumpu, marbarita, janah marlajar Bibel. Dob ai, etong homa sadiha bahat panorang na igunahon hita laho manonton TV, mar-game, atap marolahraga. Dob  ibandingkon hita ai, aha na boi iarusi hita? Ai porlu do hita mambahen hamubahon?Basa Epesus 5:15, 16.

14. Aha na boi mangurupi hita mamilih hiburan na dear?

14 Ipaturut Jahowa do hita mamilih hiburanta sandiri. Kopala kaluarga pe boi do mamilih hiburan bani kaluargani. Tapi sanggah mamilih hiburan, porlu do iirikkon hita onjolan na ibere Jahowa hubanta ibagas Bibel. Onjolan on, boi mangurupi hita mambahen haputusan na dear. * (Idah surat partoruh.) “Sibere-bere ni Naibata do” hiburan na dear. (Par. 3:12, 13) Tontu lang sarupa pilihan ni ganup halak pasal hiburan. (Gal. 6:4, 5) Tapi maningon jaga ma sanggah mamilih hiburan. Jesus mangkatahon, “Ija artamu, ijai do uhurmu.” (Mat. 6:21) Anggo holong hita hubani Jesus, Rajanta in, tontu pingkiran, parsahap, ampa parlahounta patuduhkon Harajaon ni Naibata do na siporlunan ibagas goluhta.Pil. 1:9, 10.

ULANG BAHEN ARTA NA SIPORLUNAN!

15, 16. (a) Sonaha arta boi gabe siding hubanta? (b) Podah na jenges aha na ibere Jesus hubanta?

15 Bahat do halak marpingkir maningon do sidea mamboli barang-barang naimbaru songon baju, HP, atap komputer.  Arta ampa duit do siporlunan bani sidea. Tapi na ija do na siporlunan hubanta, na gabe halak Kristen? Sungkun ma dirimu: ‘Ai gatinan do ahu mamingkirhon pasal motor atap baju naimbaru marimbangkon pasirsirhon bahan-bahan na laho iulas i partumpuan? Ai lang sompat be ahu mambasa Bibel ampa martonggo halani bahattu na huhorjahon?’ Anggo lang jaga hita, gabe arta ma siporlunan ipingkirhon hita, sedo Jesus. Pingkirhon hita ma na ihatahon Jesus on, “Ramotkon hanima ma dirinima dompak sagala uhur haut!” (Luk. 12:15) Mase ia mangkatahon sonai?

Seng boi hita mambere na sidearan hubani Jahowa anggo hita mangkaporluhon arta

16 Nini Jesus “seng tarbalosi sada halak dua tuan”. Nini use, “Seng tarbalosi nasiam Naibata rap pakon Mammon!” Artini, seng boi hita mambere na sidearan hubani Jahowa anggo hita mangkaporluhon arta. Songon na ipatorang Jesus, “sogam do uhurni bani na sada, haholonganni na sada nari” atap “hombaranni do na sada, anjaha mapas uhurni bani na sada nari”. (Mat. 6:24) Halani lang gokan dear, maningon lawan hita do pingkiran laho mangindahi “hisap-hisap ni dagingta”, sonai homa arta.Ep. 2:3.

17. (a) Mase bahat halak lalab mamingkirhon arta? (b) Aha do na mangurupi hita ase ulang mangkarosuhkon arta?

17 Sonari bahat do halak na pitah mangkarosuhkon hasonangan. On mambahen sidea lalab mamingkirhon arta. (Basa 1 Korint 2:14.) Halani sonai pamingkirion ni sidea, gabe payah ma sidea mambotoh parleganan ni na madear ampa na masambor. (Heb. 5:11-14) Hassi pe domma bahat artani, tapi tongtong do ai na ipindahi sidea. (Par. 5:9) Aha do na boi ibahen hita ase ulang sonai? Tongtong ma mambasa Bibel, halani ai do na mangurupi hita ase ulang mamingkirhon arta tumang. (1 Ptr. 2:2) Halani marimbagaskon Hata ni Naibata, monang ma Jesus humbani lajouan ni Sibolis. (Mat. 4:8-10) Sonari pe, porlu do iparimbagaskon hita podah ni Bibel ase ulang mangkarosuhkon arta. Marhitei ai ma ibotoh Jesus holongan do hita hu bani, sedo arta.

Aha do na siporlunan ibagas goluhmu? (Idah paragrap 18)

18. Aha do na sihol bahenonmu?

18 Sasintongni, sanggah Jesus mangkatahon ‘holongan do uhurmu bangku ase on?’, ia laho mangajari si Petrus ase mangidangi Jahowa siporlunan ibagas hagoluhanni. Anjaha, “Sada Batu” do artini goran ni si Petrus, na pataridahkon dear do biakni, toguh songon batu. (Lah. 4:5-20) Sonari, hita pe sihol ase toguh holongta hubani Kristus. Halani ai, ulang ma ibahen hita parhorjaan, hiburan, ampa arta na siporlunan ibagas goluhta. Jadi boi ma ihatahon hita, “Tuhan, ibotoh Ham do holong ni uhurhu Bamu!”

^ par. 14 Idah artikel “Apakah Rekreasi Saudara Bermanfaat?” bani Menara Pengawal 15 Oktober 2011, alm. 9-12, par. 6-15.