Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Mei 2017

Hatuahon Halani Mambahen Hamubahon

Hatuahon Halani Mambahen Hamubahon

SI DANIEL PAKON SI MIRIAM marhajabuan bani bulan September tahun 2000 janah tading i Barcelona, Spanyol. Sonang do goluh ni sidea ijai. Nini si Daniel, “Banggal do gajinami, jadi boi ma hanami mangan i restoran, mardalani hu luar nagori, ampa mamboli baju na mahal. Hanami pe tongtong do marbarita.” Tapi adong na mambahen mubah hagoluhan ni sidea.

Bani Kebaktian tahun 2006, itangar si Daniel ma sada ambilan. Bani ambilan ai dong sungkun-sungkun, “Ai boi do hita mangurupi halak na ‘itogu hu panayatan’ ase mandapot hagoluhan na sadokah ni dokahni?” (Pod. 24:11) Ambilan ai patugahkon anggo barita hun Bibel boi paluahkon hagoluhan ni buei halak. (Lah. 20:26, 27) Ihatahon si Daniel, “Huahap songon Jahowa do na marsahap bangku.” Bani ambilan ai ihatahon use malas do uhurta anggo roh bahatni hita marhorja bani Jahowa. Ibotoh si Daniel tongon do ai halani domma iidahni si Miriam marmalas ni uhur dob marintis.

Hona do bani uhur ni si Daniel ambilan ai. Jadi, ihurangi ia ma panorangni marhorja ase boi homa marintis. Janah ipingkirhon ia ma tontu malas do uhurni pakon si Miriam anggo sidea laho mangurupi hu ianan na mamorluhon bahat parbarita.

SUNSAH DO MULANI—MARTUAH MA UJUNGNI

Bani bulan Mei tahun 2007, kaluar ma si Daniel pakon si Miriam hun parhorjaanni, janah pindah hu Panama na ongga irohi sidea. Mangidangi ma sidea bani piga-piga pulou i Bocas del Toro i Laut Karibia. Halak Ngabe do na bahatan ijai. Si Daniel pakon si Miriam mangahap boi ma sidea tading ijai sadokah 8 bulan mamakei tabungan ni sidea.

Markapal ampa marlereng ma sidea laho mangidangi hu pulou-pulou. Idingat sidea do, sanggah parlobei sahali sidea marlereng daohni 30 kilometer janah milas tumang ari. Loja tumang si Daniel janah laho pingsan ma ia. Tapi, bujur janah basar do halak Ngabe ai bani sidea, tarlobih halani ibotoh sidea otik bahasa ni halak ai. Lang piga dokah, dong ma 23 halak na marlajar Bibel pakon sidea.

Aha do na masa dob bois tabungan ni sidea? Nini si Daniel ma, “Pusok do sasintongni uhurnami anggo mulak hu Spanyol halani manadingkon sidea na marlajar Bibel pakon hanami.” Tapi dob sabulan, dong barita na pamalaskon uhur ni sidea. Si Miriam mangkatahon, “Hanami iontang ase gabe parintis istimewa. Malas tumang uhurnami boi totap mangidangi ijon!”

HATUAHON NA IAHAPKON SIDEA

Halani dong parubahan ibagas organisasi, lang be parintis istimewa si Daniel pakon si Miriam bani tahun 2015. Sonaha do pangahap ni sidea? Porsaya do sidea bani janji na dong bani Psalmen 37:5, “Ondoskon ma dalanmu bani Jahowa anjaha hatengerhon Ia, ase Ia patorsahon.” Dapot sidea ma horja na mangurupi sidea ase boi gabe parintis biasa. Anjaha sonari sidea mangidangi i kuria Veraguas, Panama.

Nini si Daniel, “Paima itadingkon hanami Spanyol, songon na lang pos uhurnami boi atap lang mambahen hamubahon. Hape boi do hanami, janah lang marhahurangan hanami.” Aha na mambahen sidea martuah? Ia mangkatahon, “Mangurupi halak na martoruh ni uhur laho mananda Jahowa, ai ma hatuahon na sibanggalan bennami!”