Langsung hu konten

Langsung hu daptar isi

‘Tangihon Hanima ma Pangajaran Ase Pentar Hanima’

‘Tangihon Hanima ma Pangajaran Ase Pentar Hanima’

“Ale anakku . . . tangihon hanima ma pangajaranku, ase pentar hanima.”​—POD. 8:32, 33.

DODING: 56, 89

1. Aha na porlu ibahen hita ase mandapot hapentaran humbani Jahowa, anjaha aha do gunani ai banta?

MALAS do uhur ni Jahowa mambere hapentaran hubanta. Songon na ihatahon bani Jakobus 1:5, ‘Anggo adong i tongah-tongah nasiam na hurangan bani hapentaran, ipindo ma ai hubani Naibata, na ra mambere bani haganup.’ Jadi ase dapot hita hapentaran humbani Jahowa, maningon ra do hita iajar Jahowa. Ai do na boi mangurupi hita ase lang mangkorjahon na lepak, janah gabe orot ma parhasomananta bani Naibata. (Pod. 2:10-12) Anjaha gabe dong ma pangarapan banta ase boi manggoluh sadokah ni dokahni.​—Jud. 21.

2. Aha do na boi iparlajari hita humbani pangajaran na ibere Jahowa?

2 Halani ganup hita mardousa, anjaha lang homa sarupa cara ni namatorasta mangajar hita, on ma mambahen sunsah pangahapta manjalo pangajaran humbani Jahowa. Tapi dobkonsi iahapkon hita bahat do gunani pangajaran ni Jahowa ai, gabe iarusi hita ma holong tumang do Jahowa hubanta. Ai ma ase ihatahon bani buku Podah 3:11, 12, “Ale anakku, ulang ma mapas uhurmu bani pangajarion ni Jahowa . . . Ai  hinaholongan-Ni do ipinsang Jahowa.” Hunjon ibotoh hita ma anggo Jahowa marosuh do mambere na sidearan hubanta. (Basa Heber 12:5-11.) Halani ibotoh Jahowa do paruhuranta, jadi ganup pangajaran-Ni sosok do hubanta. Bani artikel on iulas hita ma ompat bagian pangajaran: (1) mangajar diri sandiri, (2) pangajaran humbani namatoras, (3) pangajaran humbani kuria, ampa (4) sonaha do ujungni anggo lang ra manangihon pangajaran.

AHA DO GUNANI MANGAJAR DIRI SANDIRI?

3. Aha do na mangurupi niombah ase ulang mangkorjahon na lepak? Bere ma contohni.

3 Artini na mangajar dirinta sandiri ai ma, marusaha do hita manrajai diri ase ulang mangkorjahon na lepak, anjaha manjaga pingkiranta. Jadi maningon ipasomal-somal hita ma manrajai diri. Usih ma ai songon sada bapa na mangajari niombahni marlereng. Mungkahni, ijolom bapani do hun pudi lereng ai. Tapi dobkonsi lambin pandei anakni marlereng, janah domma pos uhurni, baru pe ipaluahni nanget-nanget. Sonai homa ma, anggo domma ipasomal-somal namatoras mangajari niombahni “ibagas ajar ampa podah ni Tuhan in”, gabe maruhur ma niombahni ai janah lang mangkorjahon na lepak.​—Ep. 6:4.

4, 5. (a) Aha do na boi mangurupi hita ase boi tongon-tongon manrajai diri? (b) Anggo dong hasalahanta, mase ulang pala hita maretek ni uhur?

4 Sidea na marlajar Bibel dobkonsi magodang, ra do domma boi otik manrajai dirini. Tapi ase boi tongon-tongon manrajai dirini, maningon marusaha ma sidea mangusihi Jesus Kristus janah mambahen hamubahon. (Ep. 4:23, 24) Anggo hita boi manrajai dirinta, ai do na mangurupi hita ase “marnalangkon uhur na so daulat ampa hisap-hisap dunia on, ase iparlahouhon hita hapormanon, hapintoron, ampa hadaulaton i dunia on”.​—Tit. 2:12.

5 Ganupan hita domma mardousa. (Par. 7:20) Jadi porini hita mambahen hasalahan, sedo artini ai anggo hita lang boi manrajai diri. Halani ihatahon do bani Podah 24:16, “Ai pitu hali pe tompas halak parpintor, jongjong do ia use.” Aha do na mangurupi hita ase boi “jongjong” use? Halani pangurupion ni Naibata do ai, sedo halani gogohta sandiri. (Basa Pilippi 4:13.) Anjaha dingat ma buah ni tonduy do panrajaion diri ai.

6. Aha na porlu ibahen hita ase marosuh marlajar Bibel? (Tonggor ma gambar bani alm. 27.)

6 Ase hita boi manrajai diri, maningon martonggo do hita, marlajar Bibel, ampa manrimangi aha na iparlajari hita. Tapi sonaha anggo lang dong panorangta atap lang marosuh hita laho marlajar Bibel? Pindo ma pangurupion ni Jahowa ase nasiam gabe marosuh marlajar Bibel. (1 Ptr. 2:2) Porsaya ma anggo Jahowa boi do mangurupi hita mangatur panorangta laho marlajar Bibel. Mungkahni, boi ma ibahen nasiam piga-piga minit laho marlajar. Lambin dokah, lambin marosuh ma nasiam marlajar janah manrimangi Hata ni Naibata.​—1 Tim. 4:15.

7. Anggo hita boi manrajai diri, mase ai boi mangurupi hita ase mambere bahat panorang laho mangidangi Jahowa?

7 Anggo hita boi manrajai diri, ai do na  mangurupi hita ase boi mambere bahat panorang laho mangidangi Jahowa. Umpamani, dong sada bapa na marpangahap anggo ia domma hurang ringgas marbarita. Halani ai, marsura-sura ma ia ase boi gabe parintis biasa. Sonaha do panrajaion diri boi mangurupi ia pasaudkon sura-surani ai? Ibasani ma artikel-artikel na mangulas pasal na marintis, anjaha itonggohonni ma sura-surani ai. Halani ai lambin dohor ma ia bani Jahowa. Hassi pe sunsah, tapi marusaha do ia ase totap marintis ekstra, anjaha ujungni boi ma ia gabe parintis biasa.

MANGAJAR NIOMBAH DOMU BANI HAROSUH NI JAHOWA

Halani lape ibotoh dakdanak ija na sintong ampa na lepak, maningon iajari ma sidea (Tonggor ma paragrap 8)

8-10. Aha do na mangurupi namatoras ase boi pagodangkon niombah songon na iharosuhkon Jahowa? Bere ma contoh.

8 Ibere Jahowa do tanggung jawab bani namatoras laho ‘pagodang-godangkon niombah ibagas ajar ampa podah ni Tuhan in’. (Ep. 6:4) Tapi lang sai urah mandalankon tanggung jawab ai, tarlobih ma sonari on. (2 Tim. 3:1-5) Sanggah poso-poso ope, lape ibotohni na ija do na sintong ampa na lepak. Anjaha panggora ni uhurni pe lape tarlatih. Halani ai, porlu ma sidea iajar.  (Rom 2:14, 15) Sada pakar Alkitab patugahkon hata Junani “mangajar”, sarupa do artini laho mangajar niombah gabe halak na martanggung jawab.

9 Anggo namatoras mangajar niombahni ibagas holong, parlinggoman do ai bani niombahni. Gabe ibotoh sidea ma adong do na lang boi ibahen sidea, anjaha sambor do ujungni anggo mangkorjahon na lepak. Bani piga-piga ianan, lang sarupa cara ni namatoras mangajar niombahni. Tapi halak Kristen, porlu do mangindo hapentaran humbani Jahowa laho mangajar niombahni. Ulang ma sidea marpangunsandeian bani dirini sandiri atap pe halak na legan.

10 Hita boi marlajar humbani si Noak. Sanggah isuruh Jahowa ia pajongjongkon parau, lang ra si Noak marpangunsandeian bani dirini sandiri. Tapi ganup na iparentahkon Jahowa “sonai do ihorjahon” si Noak. (1 Mus. 6:22) Ujungni gabe maluah ma ia pakon kaluargani sanggah roh Bah na Sumbang. Anjaha si Noak pe boi mangajar niombahni songon na iharosuhkon Jahowa, hassi pe bani masa ai bahat do parjahat. Halani pangurupion ni Jahowa, si Noak boi mambere pangajaran ampa siusihan na dear bani niombahni.​—1 Mus. 6:5.

11. Mase namatoras maningon marusaha laho mangajar niombahni?

11 Sonaha do namatoras boi mangusihi si Noak laho mangajari niombahni? Tangihon ma parentah ni Jahowa. Dalankon ma podah humbani Bibel pakon organisasi ni Jahowa. Halani iahapkon niombah bahat do guna ni pangajaran na ibere nasiam ai i pudian ni ari, tontu martarimakasih tumang do sidea! Dong sada sanina patugahkon, “Martarimakasih tumang do ahu bani namatorasku halani ibahen sidea do na sidearan laho mangajari ahu.” Ihatahonni do use anggo ia boi dohor bani Jahowa, halani pangurupion ni namatorasni do. Hassi pe namatoras domma mambahen na sidearan laho mangajari niombahni, tapi dong ope niombah na manadingkon Jahowa. Halani ai ulang ma nasiam maretek ni uhur. Tapi mangarap ma ase sidea boi mulak use manombah Jahowa.

12, 13. (a) Sanggah dong niombah na ipadarat hun kuria, sonaha do namatoras boi totap unduk bani parentah ni Jahowa? (b) Aha do gunani bani sada kaluarga halani namatorasni totap unduk bani Jahowa?

12 Tontu, lang sai urah bani piga-piga namatoras ase totap unduk bani Jahowa sanggah niombahni ipadarat hun kuria. On ma na iahapkon sada botou sanggah boruni ipadarat hun kuria janah laho hun rumah. Nini ma, “Hupindahi ma humbani publikasinta, sonaha do carani ase boi ahu marsidalian laho manjumpahi ampa marsahapi pakon borungku ai ampa pahompungku.” Tapi iurupi paramangonni ma ia ase mangarusi anggo sidea lang be martanggung jawab bani boruni ai, janah sidea maningon totap setia bani Jahowa.

13 Dob piga-piga tahun, ijalo ma use boruni ai i kuria. Nini inangni ai ma, “Sonari, tiap ari ma hanami martalepon atap pe mar-SMS. Anjaha domma lambin hormat ia bani namatorasni halani totap hanami unduk bani aturan ni Jahowa. Sonari domma martuah hanami.” Jadi porini adong niombah ni nasiam na ipadarat hun kuria,  ai totap ope nasiam ‘martenger ni uhur bani Jahowa humbani gok ni uhur’? Atap pitah ‘marpangunsandeian bani pingkiranmu sandiri’ do nasiam? (Pod. 3:5, 6) Dingat ma, pangajaran humbani Jahowa ai tongtong do marguna, anjaha halani holong do Ia mambere ai. Anjaha ibere-Ni do anakni bahen tobusan bani jolma, ase sidea boi tongtong manggoluh. (Basa 2 Petrus 3:9.) Jadi, porsaya ma anggo pangajaran ampa parentah humbani Jahowa, ai do na sidearan banta. Halani ai totap ma dalankon pangajaran humbani Jahowa, hassi pe ai lang sai urah.

PANGAJARAN IBAGAS KURIA

14. Aha do gunani banta anggo ra hita mandalankon pangajaran humbani juakjuak na bujur ampa na maruhur?

14 Marjanji do Jahowa laho mansarihon, manlinggomi ampa mambere pangajaran bani kuria Kristen. Ibahen-Ni do ai marhitei piga-piga cara. Umpamani, ipilih Jahowa do Jesus gabe kopala ni kuria. Dob ai ipilih Jesus ma juakjuak na maruhur laho mambere pangajaran ampa tugah-tugah ase hita boi totap setia bani Jahowa. (Luk. 12:42) Ai ongga do nasiam mambahen hamubahon dobkonsi mambasa publikasinta atap pe halani manangar ambilan? Anggo sonai ibahen nasiam, dos do artini ai nasiam mandalankon pangajaran humbani Jahowa.​—Pod. 2:1-5.

15, 16. (a) Aha do na boi ibahen hita ase mandapot guna humbani aha na ibahen sintua? (b) Aha na porlu ibahen nasiam ase lambin urah sintua mandalankon tugasni?

15 Ipilih Jesus do sintua-sintua na laho mangurus kuria. Bani Bibel, ihatahon do sidea “sibere-bere” humbani Naibata. (Ep. 4:8, 11-13) Aha do na boi ibahen hita ase mandapot guna humbani aha na ibahen sidea? Usihi ma haporsayaon ni sidea, parlahouni na dear, anjaha tangihon ma podah ni sidea. (Basa Heber 13:7, 17.) Holong do sidea hubanta janah sihol do sidea ase hita dohor bani Jahowa. Jadi porini ipardiateihon sidea dong na lang martumpu, ampa lang ringgas be mangidangi, mintor podas do sidea manjumpahi hita. Ra do sidea manangihon hita, mangojur, anjaha mambere podah na sosok humbani Bibel. Ai iahapkon nasiam do pangurupion ni sidea ai patuduhkon holong ni Jahowa?

16 Sasintongni lang sai urah bani sintua laho mamodahi hita. Rimangi ma sonaha do pangahap ni nabi Natan sanggah laho mamodahi Raja Daud halani paponopkon dousani. (2 Sam. 12:1-14) Na leganni, sanggah si Paulus mamodahi apostel Petrus halani ia domma gabe sididah bohi, tontu lang sai urah bani si Paulus laho mamodahisi. (Gal. 2:11-14) Halani ai, aha na porlu ibahen nasiam ase lambin urah sintua laho mambere podah? Martoruh ni uhur ma manangihon podah ni sidea, anjaha mangkargai pambahenan ni sidea. Halani aha na ibahen sidea ai patuduhkon holong ni Jahowa do hubanta. Anggo ibahen nasiam sonai, marguna do ai banta anjaha gabe marmalas ni uhur ma sintua ai mandalankon tugasni.

17. Aha do na ibahen sintua laho mangurupi sada botou?

17 Dong sada botou patugahkon halani hasalahanni na salpu, gabe sunsah ma pangahapni mangkaholongi Jahowa. Nini do,  “Jadi hujumpahi ma sintua. Lang dong isalahkon sidea ahu. Tapi ibere sidea do ojuran hubangku. Tiap salosei martumpu, hassi pe bahat do horja ni sidea, tapi sai isompatkon sidea do manungkun sonaha baritangku. Mungkahni, pangahapku songon na lang sosok be ahu ihaholongi Jahowa halani salahku ondi. Tapi igunahon Jahowa do kuria pakon sintua laho patuduhkon na holong do Ia hubangku. Jadi marjanji ma ahu bani Jahowa, lang hutadingkon be Ia.”

SONAHA DO UJUNGNI ANGGO LANG RA MANANGIHON PANGAJARAN?

18, 19. Sonaha do ujungni anggo lang ra manangihon pangajaran? Bere ma contohni.

18 Tongon sunsah do pangahapta sanggah ipodahi atap pe ipinsang. Tapi sunsahan do holi anggo seng ra manangihon podah. (Heb. 12:11) On ma na masa bani si Kain pakon Raja Sedekia. Sanggah si Kain sihol mamunuh anggini, ipasingat Jahowa ma ia, “Mase milas tumang uhurmu anjaha migar bohimu? Ai lang dirgak do bohimu, anggo ihorjahon ho na madear? Tapi anggo lang ihorjahon ho na madear, monggop ma dousa in i lobei ni labah in, anjaha hubam do ihasiholhon, tapi ho do patut manrajaisi.” (1 Mus. 4:6, 7) Tapi seng itangihon si Kain sipasingat ai. Ujungni, ibunuhni ma anggini ai, anjaha gabe sunsah ma ia sadokah goluhni.​—1 Mus. 4:11, 12.

19 Si Sedekia ai ma raja na parbiar ampa jahat. Halani ai, lambin sunsah ma hagoluhan i Jerusalem. Domma marulak-ulak nabi Jeremia pasingatkon si Sedekia, tapi lang ra ia manangihon sipasingat ai. Ujungni, gabe bahat ma sitarononni. (Jer. 52:8-11) Sasintongni lang marosuh Jahowa anggo hita sunsah halani lang ra manangihon pangajaran-Ni!​—Basa Jesaya 48:17, 18.

20. Sonaha do ujungni halak na ra ampa na lang ra manangihon pangajaran ni Jahowa?

20 Sonari on, buei do halak na lang ra manangihon pangajaran ni Jahowa. Tapi ujungni gabe sunsah ma hagoluhan ni sidea. (Pod. 1:24-31) Jadi ‘tangihon nasiam ma pangajaran, ase pentar nasiam.’ Janah songon na ihatahon bani Podah 4:13, ‘Jolom hita ma podah ulang paluah, ramot bahen, ai hagoluhan do ai banta.’