Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Maret 2017

Bere ma Hasangapon Bani na Talup

Bere ma Hasangapon Bani na Talup

“Puji-pujian, hasangapon, hamuliaon ampa hagogohon ronsi sadokah ni dokahni ma bani na hundul i atas paratas in pakon bani Anak ni biribiri in!”PANGUNGKABON 5:13.

Doding: 9, 108

1. Ise do na somal ipasangap halak, janah aha do na laho iparlajari hita bani artikel on?

SONAHA do hita pasangapkon na legan? Marhitei mangkargai atap hormat bani sidea. Somal do hita pasangapkon sidea na dear horjani, na dong tanggung jawab atap jabatanni. Bani artikel on, iparlajari hita ma ise do na maningon ipasangap anjaha mase hita pasangapkon sidea.

2, 3. (a) Mase Jahowa talup manjalo hasangapon? (Idah gambar i atas.) (b) Ise do Anak ni biribiri na ipatugah bani Pangungkabon 5:13, janah mase hita maningon pasangapkonsi?

2 Bani Pangungkabon 5:13 ihatahon “na hundul i atas paratas” ampa “Anak ni biribiri” in do na talup ipasangap. Jahowa do “na hundul i atas paratas” ai. Bani Pangungkabon bindu 4, ipatorang malekat do hubanta mase Jahowa, “na manggoluh ronsi sadokah ni dokahni” talup manjalo hasangapon. Sidea mangkatahon, “Ham Tuhan Naibatanami, na talup do Ham manjalo hasangapon, hamuliaon pakon hagogohon, ai Ham do na  manompa sagala na dong; humbani rosuh-Mu do ase manjadi in haganup anjaha tartompa.”Pangk. 4:9-11.

3 “Anak ni biribiri” na ipatugah bani ayat ai, in ma Jesus. Hunja ibotoh? Sanggah i tanoh on, isobut do ia “biribiri ni Naibata, na mamorsan dousa ni dunia on”. Jadi, talup do ia ipasangap. (Joh. 1:29) Ai dong do raja na legan, na ra matei gabe tobusan mangkopkop rayatni? Dob ai, halani ia do “Raja ni sagala raja anjaha Tuhan ni sagala tuan”, talup do Jesus ipasangap. (1 Tim. 6:14-16) Ra do sarupa pangahap ni ham pakon malekat i surga na mandodingkon, “Na talup do Anak ni biribiri, na dob tarsambolih in, manjalo kuasa, habayakon, hapentaron, hagogohon, hasangapon, hamuliaon, ampa puji-pujian.”Pangk. 5:12.

4. Mase dear anggo hita pasangapkon Jahowa pakon Kristus?

4 Bani Johannes 5:22, 23 ihatahon gabe panguhum bani sagala bangsa do Kristus ibahen Jahowa. Ai do alasan sipontingan mase hita pasangapkon Jesus. Anggo ipasangap hita Jesus, doskon pasangapkon Jahowa do ai. Anjaha dapot hagoluhan sadokah ni dokahni ma hita anggo ipasangap hita sidea.Basa Psalmen 2:11, 12.

5. Mase hita boi mangkargai janah pasangapkon ganup halak?

5 “Songon rupa ni Naibata” do manisia itompa. (1 Mus. 1:27) Artini, manisia boi mangusihi biak ni Naibata. Umpamani, manisia boi pataridahkon holong, habujuron, ampa idop ni uhur. Janah ibere do homa panggora ni uhur bani jolma laho mambotoh na lepak atap na sintong, na jujur atap na ladung. (Rom 2:14, 15) Bahat do jolma na marosuh bani na dear ampa na jenges, janah sihol mardamei pakon na legan. Mase sonai? Halani Jahowa pe sonai do. Naibata na taratur anjaha damei do Ia. On ma na mambahen manisia boi mangusihi Jahowa. Ai do alasanni mase hita mangkargai ampa pasangapkon na legan.Ps. 8:5.

SONAHA PASANGAPKON NA LEGAN

6, 7. Sonaha Saksi-Saksi Jahowa legan humbani bahat halak sanggah pasangapkon na legan?

6 Ibotoh hita ganup halak do maningon ipasangap. Tapi ra do lang sai iarusi sonaha sasintongni pasangapkon halak na legan. Ai boi halani bahat halak mangihutkon parlahou ni dunia ni Sibolis on. Umpamani, bahat do halak na mamuji-muji sasada dalahi atap naboru. Sidea lang mangkargai atap pe pasangapkon Naibata Jahowa, tapi jolma do na iparnaibata sidea. Sidea mangusihi sonaha parpakeian atap parlahou ni sahalak politikus ampa pambobai ni ugama, atlet, bintang film, atap na leganni.

7 Tapi ibotoh halak Kristen salah do parlahou sisonai. Humbani ganup jolma, pitah Jesus do na manadingkon sitiruon na dear na boi iusihi hita. (1 Ptr. 2:21) Dingat ma anggo “haganup do [hita] mardousa, anjaha seng dong sipujion i lobei ni Naibata”. (Rom 3:23) Jadi seng dong jolma na talup isombah. Anggo jolma do na ipuji-puji hita, on boi paboritkon uhur ni Jahowa.

8, 9. (a) Aha do na pataridahkon anggo Saksi Jahowa pasangapkon pejabat? (b) Sadihari do hita lang unduk bani pejabat?

 8 Adong do halak na talup ipasangap halani jabatanni. Pingkirhon ma na ihorjahon pejabat. Iurupi sidea do haporluan ni rayatni ase damei goluh ni sidea. Bahat do guna na dapot hita humbani pamarentah. Halani ai maningon do hita mangakui pejabat ai “pamarentah na markuasa” songon na ihatahon apostel Paulus. Ihatahon do use ase hita mangihutkon aturan on, “Galar nasiam ma bani ganup halak na patut situngguonni. Balasting bani na patut manjalosi” anjaha “sangap bani na patut pasangapon”.Rom 13:1, 7.

9 Na gabe Saksi-Saksi Jahowa, hita pe mangkargai pejabat marhitei mangkorjahon aha pe na ipindo sidea. Tontu, dong bei do aturan ni ganup nagori. Aha na ipindo pejabat bani sada ianan, ra do lang sarupa bani ianan na legan. Hassi pe sonai, totap do hita mandalankon aturan ai. Tapi anggo isuruh sidea hita mangkorjahon aha na lang iharosuhkon Naibata Jahowa, lang ra hita mangkorjahon ai. Balosan do hita hubani Jahowa ase bani jolma halani hita sihol pasangapkon-Si.Basa 1 Petrus 2:13-17.

10. Sonaha juakjuak ni Naibata sapari gabe siusihan na madear hubanta?

10 Hita boi marlajar humbani juakjuak ni Naibata sapari na pasangapkon pamarentah ampa pejabatni. Umpamani, si Josep pakon si Maria na mambere sitiruon na madear. Sanggah pamarentah i Rom sihol manuratkon bilangan ni halak na tading i nagori ai, laho do si Josep pakon si Maria hu Betlehem halani mangihutkon aturan na ibahen ai, hassi pe ijia na boratan rumah do si Maria. (Luk. 2:1-5) Apostel Paulus pe mambere siusihan na madear. Ipasangap do pamarentah na markuasa. Sanggah ia ituduh mangkorjahon na lepak, dear do si Paulus ijia marsahap i lobei ni Raja Herodes Agrippa pakon si Festus, gubernur ni Rom hun propinsi Judea.Lah. 25:1-12; 26:1-3.

11, 12. (a) Mase lang boi hita malobihtu pasangapkon pambobai ni ugama? (b) Aha do gunani sanggah si Engleitner hormat marsahap bani pejabat?

11 Sonaha do bani pambobai ni ugama? Ai boi do hita malobihtu pasangapkon sidea? Sonaha hita pasangapkon na legan, sonai ma homa ibahen hita bani sidea. Tapi, salah do anggo malobihtu hita pasangapkon sidea, hassi pe ai do harosuhni. Mase? Halani ugama na ladung lang mangajarhon hasintongan pasal Naibata ampa Bibel. Ihatahon Jesus do sidea sipakulah-kulah ampa pambobai na jahat. (Mat. 23:23, 24) Tapi anggo hita pasangapkon pamarentah, sipata boi do sidea mangurupi hita.

12 Dong sahalak pejabat ai ma Dr. Heinrich Gleissner, politikus hun Austria. Sanggah Porang Dunia II, itangkap Nazi do ia. Sanggah ia iboan hu kamp konsentrasi markareta api, jumpah ma ia pakon sahalak Saksi hun Austria na margoran si Leopold Engleitner. Dear do Dr. Gleissner manangihon si Engleitner patorangkon  pasal haporsayaonni. Hormat do sanina ai sanggah marsahap pakonsi. Dob salosei porang ai, halani pejabat do si Gleissner, gati do ia mangurupi Saksi-Saksi i Austria. Ra do ibotoh nasiam sarita na legan na patuduhkon bahat do gunani anggo hita pasangapkon pejabat.

PASANGAPKON HALAK NA LEGAN

13. Bani ise do na tarlobih hita mambere hasangapon, anjaha mase?

13 Talup do hasomanta sahaporsayaon ipasangap. Tarlobih ma ai sanina na mambobahon songon sintua, sintua kaliling, pagori ni Panitia Cabang, ampa pagori ni Pangurus Pusat. (Basa 1 Timoteus 5:17.) Isarihon sidea do juakjuak ni Naibata. Bani Bibel isobut do sidea “sibere-bere bani jolma”. (Ep. 4:8) Jadi, maningon do hita hormat janah pasangapkon sidea lang soal hunja asalni, sonaha sikkolahni, parduitonni, atap status sosialni. Halak Kristen bani abad na parlobei mambere siusihan na madear. Sidea pasangapkon halak na mambobahon, janah hita pe sonai ma. Lang ibahen hita sidea songon malekat atap jolma na jago. Tapi hormat anjaha sangap ma bahen hita sidea, halani sidea domma pongkut marhorja janah martoruh ni uhur.Basa 2 Korint 1:24; Pangungkabon 19:10.

14, 15. Sonaha do sintua i kuria legan pakon pambobai ugama?

14 Songon parmahan na martoruh ni uhur do ganup sintua. Lang ra sidea ibahen songon selebriti. Jadi legan do sidea pakon pambobai ugama bani  panorang ni Jesus ampa na sonari. Nini Jesus, “Marosuh do sidea, hundul bani ianan na sangap bani parpestaan, sonai homa bani hundulan lobei-lobei bani parguruan, ambahni ai, bani tabi ni halak i tiga.”Mat. 23:6, 7.

Anggo toruh maruhur sintua manangihon Jesus, urah ma sanina mangkaholongi, hormat, janah pasangapkon sidea

15 Ganup sintua mangihutkon parentah ni Jesus, “Ulang ma ra nasiam igoran halak rabbi, ai sada do Guru bani nasiam, anjaha na marsanina do nasiam ganup. Ulang ma parbapa nasiam atap ise i tanoh on, ai sada do Bapa nasiam, ai ma na i nagori atas ai. Ulang ma homa ra nasiam goranon pambobai, ai sada do pambobai nasiam, ai ma Kristus in. Tapi barang ise sisangapan i tongah-tongah nasiam, ia ma sipangidangi bani nasiam. Ai barang ise na pagijang dirini, sipatoruhon do, tapi barang ise na patoruh dirini, ai do sipagijangon.” (Mat. 23:8-12) Anggo ganup sintua toruh maruhur janah manangihon Jesus, lambin urah ma ganup sanina mangkaholongi, hormat, janah pasangapkon sidea.

Anggo toruh maruhur sintua, gabe ihaholongi, hormat, ampa ipasangap sanina ma sidea (Idah paragrap 13-15)

16. Mase maningon marusaha hita pasangapkon na legan?

16 Porlu do panorang laho marlajar sonaha do pasangapkon na legan. Ai do na masa bani halak Kristen bani abad na parlobei. (Lah. 10:22-26; 3 Joh. 9, 10) Anggo ipasangap hita na legan domu bai harosuh ni Jahowa, seng soya-soya ai.

GUNANI PASANGAPKON NA LEGAN

17. Aha do gunani anggo ipasangap hita na legan, songon pejabat atap guru?

17 Anggo hormat janah ipasangap hita pejabat, gabe rosuh ma sidea manlinggomi hita mandalankon horja parambilanon. Ipuji sidea do horja parambilanon. On ma na masa piga-piga tahun na dob salpu bani si Birgit, parintis i Jerman. Sanggah ia laho hu acara lulusan sikkolah ni boruni, ipatugah guru ma bani malas do uhur ni sidea anggo bahat anak ni Saksi na marsikkolah ijai. Pangahap ni sidea, gabe dear do sikkolah ai halani anak ni Saksi. Nini si Birgit ma bani sidea, “Iajarhon do anaknami ase mangihutkon aturan ni Jahowa, hormat, anjaha pasangapkon guru i sikkolah.” Dong homa guru na mangkatahon, anggo ganupan murid i sikkolah ai songon Saksi, lambin urah ma sidea mangajari. Ipuji sidea do anak ni Saksi na marsikkolah ijai. Halani ai, dob piga-piga minggu dong sada guru na dihut hu kebaktian.

18, 19. Aha do na porlu idingat hita sanggah pasangapkon sintua?

18 Podah hun Bibel mangurupi hita laho mangarusi sonaha pasangapkon sintua. (Basa Heber 13:7, 17.) Puji hita ma horja ni sidea. Anggo  hita ra mangihutkon tugah-tugah na ibere sidea, malas ma uhur ni sidea mandalankon tanggung jawabni. Bibel pe mangkatahon ase hita mangusihi haporsayaon ni sidea, sedo mangusihi sonaha sidea marpakeian atap marsahap atap mangajar. Kristus do na maningon iirikkon hita sedo jolma. Dingat ma anggo ganup sintua lang sempurna songon hita.

19 Sanggah hita hormat anjaha pasangapkon sintua, janah lang ibahen hita sidea songon selebriti, on boi mangurupi sidea. Mase sonai? Lambin urah ma sidea martoruh ni uhur janah sidea pe lang mangahap dirini lobihan humbani na legan, atap sintong do sagala na ihorjahon sidea.

20. Aha do gunani anggo hita pasangapkon na legan?

20 Anggo ipasangap hita halak na legan, on pe mangurupi hita ase ulang mangindahi na porlu bani diri sandiri. Anjaha anggo hita totap martoruh ni uhur sanggah dong na mamuji. On pe manjaga ase ulang surut hita sanggah halak na ipasangap hita mambahen aha na boi paboritkon uhurta. Ambah ni ai, boi do hita totap manjaga hasadaon ibagas organisasi ni Naibata Jahowa. Organisasi on lang ongga mambere hasangapon na lang patut hubani ise pe.

21. Aha do gunani na siporlunan anggo hita pasangapkon na legan?

21 Na siporlunan, anggo hita pasangapkon na legan, on boi pamalaskon uhur ni Jahowa. Sihol do hita mangkorjahon harosuh-Ni janah totap setia hu Bani, ase boi Jahowa marbalos bani Sibolis na mangkatahon lang adong jolma na boi totap setia. (Pod. 27:11) Bahat do halak i dunia on lang mangarusi sonaha sasintongni pasangapkon na legan. Tapi martarima kasih do hita halani mambotoh sonaha pasangapkon na legan domu bai harosuh ni Jahowa!