Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Maret 2017

Si Asa, si Josafat, si Hiskia, si Josia

Balosi ma Jahowa humbani Gok ni Uhur!

Balosi ma Jahowa humbani Gok ni Uhur!

‘Dingat Ham ma Jahowa, naha ahu marparlahou i lobei-Mu ibagas hasintongan pakon gok ni paruhuran.’2 RAJA-RAJA 20:3.

DODING: 52, 65

1-3. Aha do artini mambalosi Jahowa humbani “gok ni uhur”? Bere ma contoh.

MARDOUSA do hita haganupan janah ongga mambahen hasalahan. Tapi, martarima kasih do hita bani Jahowa halani marhitei tobusan, ra do Ia manasap dousanta anggo hita martoruh ni uhur janah mambahen hamubahon. Pos ma uhurta, lang ibalaskon Jahowa hasalahanta ai “romban hubani dousanta”. (Ps. 103:10) Halani ai, maningon do hita mambalosi Ia humbani gok ni uhurta. (1 Kron. 28:9) Sonaha hita boi mandalankon ai hassi pe hita mardousa?

2 Boi ididah hita sonaha hagoluhan ni Raja Asa pakon Raja Amasia. Mangkorjahon na dear do haduasi raja ai, tapi ongga do mambahen hasalahan. Hassi pe sonai nini Bibel, ‘marsijoloman uhur do si Asa bani Jahowa sadokah manggoluh’. (2 Kron. 15:16, 17; 25:1, 2;  Pod. 17:3) Marusaha do ia pamalaskon uhur ni Jahowa “humbani gok ni uhur”. (1 Kron. 28:9) Ibalosi si Amasia do homa Jahowa, tapi seng humbani “bulat ni uhur”. Dobkonsi manaluhon munsuhni, iboan do gana-gana ni sidea bahen sisombahonni.2 Kron. 25:11-16.

3 Sasahalak na mambalosi Jahowa humbani “gok ni uhur” atap “bulat ni uhur” artini holong tumang do ia bani Jahowa anjaha sihol manombah-Si sadokah goluhni. Bani Bibel hata “uhur” gati do patuduhkon sonaha do dirinta na sasintongni. Umpamani, aha na ipingkirhon hita, na iharosuhkon hita, aha na sihol bahenonta, janah mase ihorjahon hita ai. Hassi pe mardousa, boi do hita manombah Jahowa humbani gok ni uhurta. Ibalosi hita do Ia halani holong, sedo halani ipaksa atap hasomalan tumang.2 Kron. 19:9.

4. Aha do na laho iulas hita?

4 Lambin iarusi hita ma sonaha do mambalosi Jahowa humbani gok ni uhur marhitei mangidah siusihan humbani si Asa pakon tolu Raja na setia i Juda, ai ma si Josafat, si Hiskia, pakon si Josia. Hassi pe ongga mambahen hasalahan, tapi ihorjahon sidea do na mambahen malas uhur ni Jahowa. Halak na mambalosi humbani gok ni uhur do sidea ididah Jahowa. Mase sonai anjaha sonaha do hita mangusihi sidea?

“HUMBANI GOK NI UHUR” DO SI ASA MAMBALOSI JAHOWA

5. Aha do na ihorjahon si Asa sanggah gabe raja ia?

5 Si Asa ma raja na patoluhon i Juda dobkonsi bangsa Israel bolah gabe dua harajaon ai ma harajaon Israel pakon harajaon Juda. Sanggah gabe raja ia, irumbakkon do ganup gana-gana janah ipakaluar do halak na mangkorjahon na sambor hun harajaonni. Ipalaho do na marjolmahon dalahi hun rumah panumbahan. Ipaturun si Asa do homa ompungni hun bani “pangkat harajaon, halani ipadear sada gana-gana”. (1 Raj 15:11-13) Dob ai, iojur do rayatni ase “mangindahi Jahowa” anjaha mangkorjahon “titah-Ni pakon tonah-Ni”. Pongkut do si Asa mangurupi na legan ase manombah Jahowa.2 Kron. 14:4.

Ipakaluar si Asa do halak na mangkorjahon na sambor hun harajaonni

6. Aha na ibahen si Asa sanggah halak Etiopia roh mamorangi Juda?

6 Sadokah sapuluh tahun pamarentahan ni si Asa, lang dong porang i Juda. Dob ai roh ma halak Etiopia rapkon sajuta tentara ampa tolu ratus gareta porang laho mamorangi sidea. (2 Kron. 14:1, 6, 9, 10) Aha do na ibahen si Asa? Mintor mangindo pangurupion do ia bani Jahowa anjaha martonggo ase boi monang sidea. (Basa 2 Kronika 14:11.) Ongga do ibere  Jahowa hamonangan bani Israel hassi pe rajani lang setia, laho patuduhkon pitah Ia do Naibata na sintong. (1 Raj. 20:13, 26-30) Tapi bani panorang ni si Asa, iurupi Jahowa do juakjuak-Ni halani si Asa marpangusandeian hu Bani. Ibalosi Jahowa ma tonggoni anjaha monang ma sidea. (2 Kron. 14:12, 13) Bani panorang na legan ibahen si Asa do hasalahan, ai ma mangindo pangurupion bani raja hun Aram sedo bani Jahowa. (1 Raj. 15:16-22) Hassi pe sonai, ididah Jahowa do anggo si Asa mangkaholongi-Si. Sai tong do uhur ni si Asa “marsijoloman hu bani Jahowa sadokah manggoluh ia”. Sonaha hita boi mangusihi si Asa?1 Raj. 15:14.

7, 8. Sonaha hita boi mangusihi si Asa?

7 Hunja do ibotoh anggo hita mangkaholongi Jahowa humbani gok ni uhur? Boi isungkun hita dirinta: ‘Ai totap do ahu manangihon Jahowa hassi pe ibagas hasunsahan? Ai dihut do ahu manjaga kuria humbani parlahou na masambor?’ Pingkirhon ma sonaha pangkar ni si Asa sanggah paturunkon ompungni humbani pangkat harajaon! Sipata, porlu do hita pangkar songon si Asa. Umpamani, sonaha anggo adong hasoman atap kaluargamu i kuria na mambahen dousa janah lang ra mubah, dob ai ipakaluar hun kuria? Ai ra do nasiam lang be marsaor pakonsi? Sonaha do pangahap ni nasiam?

8 Songon si Asa, sipata adong do halak na manrisai hita. Ra do halani ham Saksi Jahowa, gabe iejek hasoman sakalas atap guru ma ham. Atap, ra do adong hasoman sahorja na mangejek ham halani mambuat cuti ase boi dihut hu kebaktian atap lang gati ham lembur. Bani situasi ai, marpangunsandeian ma bani Naibata, usih songon si Asa. Martonggo ma bani Jahowa, pangkar, anjaha totap ma horjahon na sintong. Dingat ma, iurupi Jahowa do si Asa, sonai homa nasiam.

9. Mase malas uhur ni Jahowa sanggah hita marbarita?

9 Si Asa lang pitah mamingkirhon dirini sandiri; iurupi do ase na legan “mangindahi Jahowa”. Sonai homa hita, urupi ma na legan ase manombah Jahowa. Ipardiateihon Jahowa do anggo ipatugah hita pasal Ia bani na legan. Malas do uhur-Ni anggo hita marbarita halani mangkaholongi-Si janah parduli bani na legan!

IPINDAHI SI JOSAFAT DO JAHOWA

10, 11. Sonaha hita boi mangusihi si Josafat?

10 Si Josafat, “mardalan do ia bani dalan ni bapani, si Asa”. (2 Kron. 20:31, 32) Aha na ibahenni? Usih songon bapani, si Josafat mangojur ase bangsani totap manombah Jahowa. Isuruh do piga-piga halak hu huta-huta na  dong i Juda laho mangajarhon “buku titah ni Jahowa”. (2 Kron. 17:7-10) Ia sandiri pe laho do hu harajaon Israel Utara mangojur halak na i Efraim ase ‘iarahkon sidea mulak hubani Jahowa’. (2 Kron. 19:4) Raja “na mangindahi Jahowa humbani bulat ni uhur” do si Josafat.2 Kron. 22:9.

Si Josafat mangojur ase bangsani totap manombah Jahowa

11 Sonari, sihol do Jahowa ase ganup halak i sab dunia on iajari pasal Ia, janah hita pe boi dihut bani horja ai. Ai taratur do nasiam marbarita? Hassi pe porei, ai ra do nasiam mangajarhon pasal Bibel bani na legan ase ra sidea manombah Jahowa? Ongga do itonggohon nasiam pasal ai? Anggo marusaha nasiam, iurupi Jahowa do nasiam ase boi mamungkah parlajaran Bibel. Songon si Josafat, hita pe boi mangurupi sidea na lang aktif. Anjaha sintua i kuria pe boi manjumpahi janah mangurupi halak na ipakaluar hun kuria na dob mambahen hamubahon.

12, 13. (a) Mase mabiar si Josafat, janah aha do na ibahenni? (b) Mase maningon iusihi hita si Josafat?

12 Songon si Asa, bapani, marpangunsandeian do si Josafat bani Jahowa sanggah bahat tentara roh laho mamorangi Juda. (Basa 2 Kronika 20:2-4.) Mabiar do ia, tapi ipindo do pangurupion bani Jahowa. Sanggah martonggo, ihatahon do anggo sidea lang boi manlawan munsuhni ai, janah lang ibotoh aha do na laho bahenon. Porsaya do si Josafat anggo Jahowa boi mangurupi sidea. Ia mangkatahon, “Mangkawah dompak Ham do matanami.”2 Kron. 20:12.

13 Songon si Josafat, ra do hita mabiar sanggah adong parsoalan anjaha lang ibotoh hita aha do na laho bahenonta. (2 Kor. 4:8, 9) Tapi dingat ma na ibahen si Josafat. Sanggah martonggo i lobei ni buei halak, lang maila ia mangkatahon na galek do sidea. (2 Kron. 20:5) Kopala kaluarga boi do homa mangusihi si Josafat. Pindo ma bani Jahowa ase nasiam sakaluarga iurupi sanggah adong parsoalan janah mambotoh aha do na laho bahenon. Anggo lang maila nasiam rap martonggo, ibotoh sidea ma na porsaya do nasiam bani Jahowa. Iurupi Jahowa ma nasiam usih songon Ia mangurupi si Josafat.

TOTAP DO SI HISKIA MANGKORJAHON NA SINTONG

14, 15. Sonaha si Hiskia marpangunsandeian hubani Naibata?

14 Raja na tongtong ‘marsijoloman uhur bani Jahowa’ do si Hiskia, hassi pe jahat bapani janah manombah gana-gana. Si Hiskia do na ‘pasedahon panumbahan na i atas buntu-buntu, na mambolahi gana-gana, na manroboh Ashera pakon na manrosaki ulog tombaga, na pinauli ni si Musa’ halani isombah halak Israel ai. Humbani gok ni uhur do si Hiskia mambalosi Jahowa. “Iramotkon do tonah-Ni, na binerehon ni Jahowa hu bani si Musa.”2 Raj. 18:1-6.

15 Sanggah manrajai si Hiskia, roh ma tentara Assur laho marumbakkon  Jerusalem. Si Sanherib, raja ni halak Assur, ipahiri do Jahowa anjaha marusaha do ia mambahen si Hiskia mangondoskon diri. Hassi pe sonai, porsaya do ia bani Jahowa janah martonggo ase iurupi. Ibotoh si Hiskia, gogohan do Jahowa marimbangkon halak Assur janah boi paluahkon sidea. (Basa Jesaya 37:15-20.) Ibalosi Jahowa ma tonggoni. Isuruh ma sada malekat mamunuh 185,000 tentara ni Assur.Jes. 37:36, 37.

16, 17. Sonaha hita boi mangusihi si Hiskia?

16 Boritan ma si Hiskia janah laho matei. Sanggah ai, ipindo si Hiskia ma ase idingat janah iurupi Jahowa ma ia. (Basa 2 Raja-raja 20:1-3.) Itangar Jahowa ma tonggoni janah ipamalum ma ia. Tapi, domma iparlajari hita humbani Bibel anggo hita lang boi be mangarap ase Jahowa mambahen halongangan laho pamalumkon hita atap paganjangkon umurta. Tapi songon si Hiskia porsaya ma hita bani pangurupion ni Jahowa. Pindo hita ma hu Bani, ‘Dingat Ham ma Jahowa, naha ahu marparlahou i lobei-Mu ibagas hasintongan pakon gok ni paruhuran.’ Ai porsaya do nasiam anggo Jahowa parduli bani nasiam hassi pe boritan?Ps. 41:4.

17 Sonaha do use hita boi mangusihi si Hiskia? Ra do adong na mambahen hita daoh hun Jahowa atap lang be bahat panorangta laho mangidangi-Si. Umpamani, bahat do halak na mambahen jolma gabe iparnaibata songon mamuji-puji selebriti. Bahat do bois panorangni laho mambasa atap mangidah poto ni sidea. Bahat do homa halak na gati marsahapi marhitei internet. Tongon malas do uhur anggo boi marsahapi pakon kaluarga atap hasomanta marhitei internet. Tapi bahat do bois panorang halani ai. Sipata megah do pangahapta anggo adong na mangidah atap mambahen komentar bani poto na ipamasuk hita hu internet. Atap ra do homa borit uhurta anggo ibotoh hita lang be ididah sidea ai. Tapi tiru hita ma si Paulus, si Akila, pakon si Priskilla. Pandapot ni nasiam, ai ra do sidea mamboiskon panorangni laho mambotoh aha na ihorjahon bahat halak na lang manombah Jahowa? Bibel mangkatahon “igogohi si Paulus ma marambilan”. Anjaha igunahon si Priskilla pakon si Akila do panorangni laho marambilan janah dear do ipatorang sidea “pasal dalan ni Naibata” bani na legan. (Lah. 18:4, 5, 26) Sungkun ma dirinta: ‘Ai jaga do ahu ase ulang huparnaibata sasada halak? Ai maruhur do ahu manggunahon panorang laho mangkorjahon na porlu?’Basa Epesus 5:15, 16.

IDALANKON SI JOSIA DO PARENTAH NI JAHOWA

18, 19. Sonaha do hita boi mangusihi si Josia?

18 Pahompu ni si Hiskia, ai ma Raja Josia, tongtong do ia mambalosi parentah ni Jahowa “humbani gok ni uhurni”. (2 Kron. 34:31) Sanggah poso ope ia, “ipungkah ma mangindahi Naibata ni si Daud”.  Dob marumur 20 tahun, iparseda do ganup gana-gana i Juda. (Basa 2 Kronika 34:1-3.) Lobihan do na ibahen si Josia laho pasonangkon Jahowa marimbangkon raja-raja na legan hun Juda. Bani sada panorang, jumpah sintua ni malim ma Titah ni Naibata i rumah panumbahan. Ra do si Musa na manuratkon ai! Dob ibasahon Titah ai, ibotoh ma adong na porlu bahenonni ase boi mangidangi Jahowa humbani gok ni uhur. Iojur do na legan ase mangkorjahon na sarupa. Ujungni, “seng surut sidea humbani Jahowa” sadokah manggoluh si Josia.2 Kron. 34:27, 33.

Gabe ringgas ma si Josia laho pasonangkon Jahowa janah mintor mambahen hamubahon

19 Na maposo pe boi do mangusihi si Josia ase lambin mananda Jahowa. Ra do si Josia marlajar humbani Raja Manasse, ompungni, na dob mambahen hamubahon, anggo Jahowa ra manasap hasalahan. Nasiam pe boi marlajar humbani halak na matua i kuria atap pe ibagas kaluarga ase ipatugah sidea sonaha Jahowa mangurupi sidea. Dingat ma, dob itangar si Josia Titah ai ibasahon, gabe ringgas ma ia laho pasonangkon Jahowa janah mintor mambahen hamubahon. Nasiam pe, lambin tarojur laho mambalosi Jahowa anggo mambasa Bibel. Lambin orot ma nasiam pakon Naibata janah martuah. Janah tarojur patugahkon pasal-Si bani na legan. (Basa 2 Kronika 34:18, 19.) Sanggah marlajar Bibel, ra do iahap nasiam adong na porlu bahenon ase lambin pandei ibagas pangidangion. Marusaha ma mambahen hamubahon songon na ibahen si Josia.

BALOSI MA JAHOWA HUMBANI GOK NI UHUR!

20, 21. (a) Aha do na sarupa ibahen ompat raja hun Juda na dob iulas hita? (b) Aha na laho iulas hita bani artikel na mangihut?

20 Aha do na boi iparlajari hita humbani ompat raja hun Juda na mambalosi Jahowa humbani gok ni uhur? Sadokah goluhni, tongtong do sidea pamalaskon uhur ni Jahowa janah manombah-Si. Sanggah adong na laho mamorangi, totap do sidea marpangunsandeian bani Jahowa. Na siporlunan, ibalosi sidea do Jahowa halani holong.

21 Hassi pe ompat raja ai ongga mambahen hasalahan, tapi malas do uhur ni Jahowa halani mangidah paruhuran ni sidea, janah mambotoh anggo sidea mangkaholongi-Si. Hassi pe hita mambahen hasalahan, malas do uhur ni Jahowa mangidah hita anggo marusaha hita mambalosi-Si humbani gok ni uhurta. Bani artikel na mangihut, ulas hita ma aha na boi iparlajari hita humbani hasalahan ni ompat raja ai.