Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Juni 2017

Totap ma Pingkirhon Hak ni Jahowa Mamarentah

Totap ma Pingkirhon Hak ni Jahowa Mamarentah

“Andohar ibotoh sidea, pitah Ham do na margoran Jahowa, Na Tang Sitimbulan i sab tanoh on.”PSALMEN 83:19.

DODING: 46, 136

1, 2. (a) Aha do namin na siporlunan bani ganup manisia? (b) Mase ponting ai?

SONARI, bahat do halak na mamingkirhon duit tumang janah ai do na siporlunan bani sidea. Sai lalab do ai na ipindahi sidea. Bani na legan, kaluarga do na siporlunan, sonaha ase totap sehat, atap sonaha ase saud sura-sura ni sidea.

2 Tapi, adong do na siporlunan marimbangkon haganupan ai, ai ma laho mangapiti hak ni Jahowa mamarentah. Maningon ai ma namin na ipingkirhon hita. Mase? Halani masibuktu marhorja atap haru halani dong parsoalan, ra do gabe lupa hita mamingkirhon na siporlunan ai. Tapi anggo hak ni Jahowa mamarentah do na iapiti hita, iurupi ma hita ase martahan sanggah dong parsoalan, janah mambahen hita lambin dohor hu Bani.

PARSOALAN NA PONTING TUMANG

3. Aha na ihatahon Sibolis pasal pamarentahan ni Naibata?

3 Sibolis mangkatahon lang adong hak ni Jahowa  mamarentah. Marosuh do ia ase manisia marpingkir Sipanggomgom na jahat do Jahowa ai janah lang membere na dear bani manisia. Anjaha martuahan do jolma anggo mamarentah dirini sandiri. (1 Mus. 3:1-5) Dob ai ihatahon homa lang dong jolma na setia hubani Jahowa sanggah marsitaronon. (Job 2:4, 5) Halani ai, ibere Jahowa ma panorang ase tangkas taridah sambor do hagoluhan anggo lang Jahowa na mamarentah.

4. Mase maningon iparhatongon hak ni Jahowa mamarentah?

4 Sasintongni, ibotoh Jahowa do marladung Sibolis ai. Anggo sonai, mase ibere Jahowa panorang bani Sibolis laho pararatkon ladungni ai? Halani mangkorhon do balosni ai bani malekat na i surga ampa manisia. (Basa Psalmen 83:19.) Dobkonsi si Adam pakon si Hawa manlawan pamarentahan ni Jahowa, bahat ope na mangirikkon sidea. On mambahen adong halak na marpingkir sintong do Sibolis ai. Sadokah lape ibalosi ise do na sintong, ai ma lalab na dong ibagas pingkiran ni manisia ampa malekat, janah lang dong be hadameion ampa hasadaon. Tapi dobkonsi iparhatongon Jahowa hak-Ni mamarentah, mardamei janah marmalas ni uhur ma haganup na itompa Jahowa, na i nagori atas pakon na i tanoh on.Ep. 1:9, 10.

5. Mase parsoalan pasal hak ni Jahowa mamarentah mangkorhon hubanta?

5 Sanggah iparhatongon Jahowa hak-Ni mamarentah, iripaskon ma pamarentahan ni Sibolis ampa manisia. Marhasil ma pamarentahan ni Naibata marhitei Harajaon Mesias. Jadi, halak na setia boi patuduhkon anggo sidea mangapiti pamarentahan ni Naibata. (Jes. 45:23, 24) Ai ra do hita tarmasuk hubani halak na setia ai? Tontu! Halani ai porlu do hita mangarusi hak ni Jahowa mamarentah.

AHA DO NA SIPONTINGAN HUMBANI HALUAHONTA?

6. Aha do na siporlunan marimbangkon hatuahonta?

6 Porlunan do hak ni Jahowa mamarentah iparhatongon marimbangkon hatuahonta. Tapi on lang mararti anggo haluahonta lang porlu atap Jahowa seng parduli hubanta. Hunja ai ibotoh hita?

Porlunan do hak ni Jahowa mamarentah iparhatongon marimbangkon hatuahon ampa haluahonta

7, 8. Aha do gunani hubanta anggo hak ni Jahowa mamarentah iparhatongon?

7 Holong tumang do Jahowa hubani manisia. Halani ai ma ibere do Anak-Ni ase boi hita manggoluh sadokah ni dokahni. (Joh. 3:16; 1 Joh. 4:9) Anggo lang ipasaud Jahowa bagah-bagah-Ni, gabe sintong ma na ihatahon Sibolis pakon na mangihutkonsi. Sibolis mangkatahon parladung do Jahowa ai, janah lang mambere na dear hubani manisia ampa lang pintor  pamarentahan-Ni. Buei do panrisai mangkatahon, “Ija do bagah-bagah pasal parroh-Ni ai? Ai dob matei ompung-ompungta, totap do haganup songon humbani panompaon ni dunia on.” (2 Ptr. 3:3, 4) Tapi, maningon pasaudon ni Jahowa do bagah-bagah-Ni. Sanggah iparhatongon Jahowa hak-Ni mamarentah, maluah ma jolma na ra unduk hu Bani. (Basa Jesaya 55:10, 11.) Jadi pos ma uhurta tongtong do Jahowa mangkaholongi janah mangkargai juakjuak-Ni na setia halani ibagas holong do Ia mamarentah.2 Mus. 34:6.

8 Hassi pe ponting tumang do hak ni Jahowa mamarentah, tapi sedo ai mararti anggo haluahonta seng ponting Bani. Isarihon Jahowa do hita. Halani ai dingat hita ma na siporlunan, ai ma mangapiti pamarentahan ni Jahowa.

IUBAH SI JOB MA PAMINGKIRIONNI

9. Aha do na ihatahon Sibolis pasal si Job? (Idah gambar bani alaman 15.)

9 Porlu do iarusi hita pasal hak ni Jahowa mamarentah. On boi ibotoh hita humbani buku Job. Bani buku ai hita mambasa, Sibolis mangkatahon anggo marsitaronon si Job, tadingkononni ma Naibata. Isuruh Sibolis ma ase si Job ilajou Jahowa. Hape lang ra Jahowa. Tapi ipaturut do Sibolis na manlajou si Job. Nini Jahowa ma, “Ondos bani tanganmu ma ganup na bani ai.” (Basa Job 1:7-12.) Jadi, magou ma ganup jabolon ampa artani. Dob ai matei homa sapuluh niombahni. Ibahen Sibolis songon Naibata do na parohkon ganupan ai. (Job 1:13-19) Dob ai, ibahen Sibolis ma si Job hona puru na parah. (Job 2:7) Anjaha na mambahen lambin parah, parsahap ni parinangon pakon tolu hasomanni mambahen borit uhurni janah maretek ni uhur.Job 2:9; 3:11; 16:2.

10. (a) Sonaha si Job patuduhkon anggo ia setia bani Naibata? (b) Mase si Job porlu ipodahi?

10 Ai sintong do na ihatahon Sibolis ai? Lang. Hassi pe marsitaronon, lang ongga si Job manadingkon Jahowa. (Job 2:3) Tapi, ongga do si Job lupa aha na siporlunan, janah lalab mamingkirhon dirini. Tongtong do ia mangkatahon seng dong lepakni. Janah iahap si Job, maningon do botohonni mase ia marsitaronon. (Job 7:20; 13:24) Boi do iarusi hita mase sonai pangahapni. Hassi pe sonai, lepak do pamingkirion ni si Job ai, janah ibotoh Jahowa do on. Halani ai porlu ma ia ipodahi. Sonaha Jahowa mangurupisi?

11, 12. Sonaha Jahowa mangurupi si Job? Sonaha do pangahap ni si Job?

11 Bani buku Job bindu 38 ronsi 41 ibotoh hita do aha na ihatahon Jahowa hubani si Job. Lang ipatugah Jahowa bani si Job aha na mambahen sitarononni. Tapi, sihol do Jahowa mangurupi si Job ase mangarusi etek tumang do manisia marimbangkon Naibata. Iajarhon do bani si Job parsoalan aha do na siporlunan marimbangkon sitarononni. (Basa Job 38:18-21.) Aha na ihatahon Jahowa boi mangurupi si Job mangubah pamingkirionni.

 12 Ai lang dear Jahowa sanggah marsahap bani si Job dob manaron ganupan ai? Lang sonai. Si Job sandiri pe lang sonai pangahapni. Marhitei si Elihu iurupi Jahowa ma ase mubah pamingkirion ni si Job. (Job 32:5-10) Ijalo si Job do podah ni Jahowa halani arga do ai bani. Ia mangkatahon, “Jora ma ahu, anjaha husolsoli do diringku hundul ibagas orbuk ampa abuan.” (Job 42:1-6) Dob ai, mubah ma si Job. Ipatugah Jahowa do bani halak na legan anggo si Job domma mambahen malas uhur-Ni.Job 42:7, 8.

13. Sonaha podah ni Jahowa boi tongtong marguna bani si Job?

13 Dob ai, “ipasu-pasu Jahowa ma si Job lobih humbani mungkahni hinan”. Anjaha, “tubuh ma use pitu anakni ampa tolu boruni”. (Job 42:12-14) Hassi pe sonai, tontu siholan do ia bani niombahni na matei ai. Anjaha, ra do lang boi ihalupahon si Job sitaronon na masa hu bani pakon kaluargani. Porini ibotoh si Job aha na mambahen ia marsitaronon, sungkun-sungkun do ra ia mase ipaturut Naibata sonai na masa hu bani. Porini sonai pingkiranni, marguna do tongtong podah ni Jahowa ai bani si Job hassi pe domma salpu sitaronon ai. Tarapoh do ia halani mardingat aha na ihatahon Jahowa hu bani. Ai do na mangurupisi ase sintong pangarusianni.Ps. 94:19.

Ija do na siporlunan ipingkirhon, hak ni Jahowa mamarentah do, atap parsoalnta sandiri? (Idah paragrap 14)

14. Humbani na masa bani si Job, aha do na boi iparlajari hita?

14 Marguna tumang do isuratkon buku Job bani Bibel laho ‘mamodahi hita, ase marpangarapan hita halani hasabaron ampa apoh-apoh na ibagas Surat in’. (Rom 15:4) Anggo iparimbagaskon hita aha na masa bani si Job, on mangurupi hita ase sintong pangarusionta janah boi do homa ai mangapoh hita. Dob ai, hita pe marlajar ase ulang lalab mamingkirhon parsoalanta  halani ai boi mambahen hita gabe lupa bani hak ni Jahowa mamarentah. Songon si Job, hassi pe marsitaronon totap ma hita setia, halani on patuduhkon na hampit Jahowa do hita.

15. Aha do gunani anggo totap setia hita ibagas sitarononta?

15 Humbani na masa bani si Job, iarusi hita ma sanggah marsitaronon hita sedo artini manggila Jahowa hubanta. Tapi sanggah marsitaronon, ai do panorang banta laho patuduhkon hampit Jahowa do hita. (Pod. 27:11) Malas do uhur ni Jahowa anggo totap setia hita, janah lambin toguh ma pangarapanta. (Basa Rom 5:3-5.) Humbani pangalaman ni si Job, taridah ma parholong atap “parontou ni uhur banggal do [Jahowa] in anjaha paridop ni uhur”. (Jak 5:11) Anggo hampit Jahowa do hita, ibotoh hita dong do pasu-pasu-Ni. On ma na mangurupi hita ase ‘martahan marhasoman malas ni uhur’.Kol. 1:11.

TOTAP MAMINGKIRHON NA SIPORLUNAN

16. Mase porlu ipasingat hita dirinta anggo mangapiti hak ni Jahowa mamarentah ai do na siporlunan?

16 Sanggah ibagas sitaronon, tontu lang sai urah hubanta totap mangapiti hak ni Jahowa mamarentah. Hassi pe etek parsoalanta, anggo lalab ai na ipingkirhon, boi do gabe banggal ai idahon. Halani ai, tongtong ma ipasingat hita dirinta ponting tumang do mangapiti hak ni Naibata mamarentah, lang soal aha pe na masa hubanta.

Anggo ringgas hita ibagas horja partonduyon, ai do na mangurupi hita laho mardingat aha na siporlunan

17. Anggo ringgas hita ibagas horja partonduyon, mase ai mangurupi hita mardingat aha na siporlunan?

17 Anggo ringgas hita ibagas horja partonduyon, ai do na mangurupi hita laho mardingat aha na siporlunan. Umpamani, dong sada botou na margoran si Renee na hona stroke ampa kanker. Sanggah i rumah sakit, totap do ia marbarita hubani parhorja ijai,  pasien na legan, ampa halak na roh hujai. Ongga do ia marbarita sadokah 80 jam sanggah i rumah sakit dua satongah minggu. Hassi pe ibotoh na laho matei ma ia, tapi lang ihalupahon na siporlunan. Damei do pangahapni halani mangapiti hak ni Jahowa mamarentah.

18. Humbani pangalaman ni si Jennifer, aha do na boi iparlajari hita?

18 Sai tong do adong parsoalan ibagas hagoluhanta. Tapi totap do hita boi mangapiti hak ni Jahowa mamarentah. Umpamani, adong sada botou na margoran si Jennifer. Sadokah tolu ari ma ia paimahon i bandara halani pesawatni lalab lang bingkat. Gabe lungunan ma ia, holsohan janah loja ma pangahapni. Tapi martonggo ma ia bani Jahowa ase iurupi laho patugahkon barita na madear bani halak na legan na dihut paimahon ijai. Ujungni, marbarita ma ia bani buei halak janah bahat publikasi na ibagihon. Nini si Jennifer, “Ipasu-pasu janah ipargogohi Jahowa do ahu ase boi pasangapkon goran-Ni, hassi pe sonon situasingku.”

19. Aha do na pataridahkon anggo sasada halak panombah na sintong?

19 Pitah juakjuak ni Jahowa do na mangarusi pontingni hak ni Jahowa mamarentah. Hunjon taridah ma ise do panombah na sintong. Jadi, totap ma hita mangapiti hak ni Jahowa mamarentah.

20. Sonaha do pangahap ni Jahowa anggo nasiam mangapiti Ia?

20 Sanggah ibagas sitaronon, ipardiatei janah maharga do bani Jahowa anggo totap nasiam mangapiti hak-Ni mamarentah. (Ps. 18:26) Artikel na mangihut mangulas mase maningon iapiti nasiam hak ni Jahowa mamarentah janah sonaha nasiam patuduhkon ai humbani gok ni uhur.