Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Juni 2017

Ai Iparayak Nasiam do Hadameion?

Ai Iparayak Nasiam do Hadameion?

NAIBATA JAHOWA marosuh ase juakjuak-Ni mangahapkon hadameion, halani ai ma isuruh do ase sidea mardamei samah sidea. Anggo idalankon sidea ai, dong ma hadameion ibagas kuria. Janah halak na legan pe gabe marosuh roh hu partumpuan.

Umpamani, sanggah ididah sahalak datu i Madagaskar dong hadameion bani juakjuak ni Jahowa, ninuhurni ma, ‘Porini isuruh ahu mamilih sada ugama, na sada on do na hupilih.’ Jadi lang be ia mangidangi setan-setan, janah mambahen hamubahon ibagas parhajabuanni ampa manombah Jahowa, Naibata Sipardamei in.

Songon dalahi ai, dong marribu halak tiap tahun na ra mangidangi Jahowa janah mangahapkon hadameion. Tapi, Bibel mangkatahon “parsimburuon na mapaet” boi pasedahon parhasomanan ampa mambahen parsoalan. (Jak. 3:14-16) Podah hun Bibel mangurupi hita ase daoh humbani parsoalan sisonai, janah totap ma adong hadameion i kuria. Eta pareksa hita ma sonaha hita boi mandalankon podah ai.

PASALOSEIHON PARSOALAN

“Dong parsalisihanku pakon sada sanina na marhorja pakon ahu. Sompat do gogoh soranami maringori, jadi dong ma dua halak roh mangidah hanami.”—Si CHRIS.

“Dong sada hasomanku, sompong lang be ra marbarita rap pakon ahu. Janah seng ra be marsahap pakon ahu. Lang hubotoh mase sonai ia.”—Si JANET.

“Marsiteleponan do ahu pakon dua hasomanku na legan. Na sada mangkatahon, ‘Jumpah use da,’ huagan ma domma itutup taleponni. Jadi huhatahon ma na lang madear pasalsi hubani hasomanku na sada nari, hape lape ipamatei taleponni.”—Si MICHAEL.

“Dong dua parintis na marsalisih i kurianami. Na sada manggila bani na legan. Parsalisihan ai mambahen halak na legan gabe tartolsu.”—Si GARY.

Somal do tarjadi parsoalan sisonai. Tapi anggo ipaturut sonin, boi do ai paboritkon uhur janah pasedahon hadameion i kuria. Untung ma, idalankon sanina-botou on podah ni Bibel, janah mardamei ma sidea use. Pandapotmu, podah ni Bibel na ija do na mangurupi sidea?

“Ulang ma maringori nasiam i tongah dalan.” (1 Mus. 45:24) Ai do na ihatahon si Josep bani saninani na mulak hu huta manjumpahi bapani. Lambin parah do parsoalan anggo sasada halak urah manggila bani hasomanni janah lang boi manrajai diri. Hasomanni ai pe boi dihut gabe marah. Iarusi si Chris sunsah do sipata martoruh ni uhur mandalankon podah on. Tapi sihol do ia mubah, jadi mangaku salah ma ia bani hasomanni  ai. Dob ai, marusaha ma ia manrajai dirini. Hasomanni ai pe mambahen hamubahon do homa halani mangidah si Chris. Sonari, domma mardamei sidea janah rap manombah Jahowa.

“Sundat do ranggian anggo hurang panriahan.” (Pod. 15:22) Sanggah lang ra be hasomanni marsahap hu bani, iirikkon si Janet ma podah on. Ijumpahi ma hasomanni ai, janah marsahap pakonsi. Isungkun si Janet ma atap adong do na mambahen sogam uhur ni hasomanni ai. Mulani, songon na maila do haduasi sidea sanggah marsahap ai. Tapi, halani lamlam do marsahap, gabe dear ma pangahap ni sidea. Ibotoh hasomanni ai ma hape lang dong maksud ni si Janet mambahen borit uhurni. Domma salah sangka ia. Jadi mangaku salah ma ia janah marhasoman ma sidea use, anjaha rap mangidangi Jahowa.

“Anggo iboan ho galanganmu hu anjapanjap, anjaha taringat uhurmu bani sogam ni uhur ni saninamu bam, tadingkon ma galanganmai i lobei ni anjapanjap ai, laho ma ho lobei mardear ampa saninamai.” (Mat. 5:23, 24) On ma podah ni Jesus sanggah marambilan i atas dolog. Dob ihatahon si Michael na lang dear pasal hasomanni ai, gabe sunsah ma pangahapni. Jadi, sihol padearonni ma parsoalan ai. Ijumpahi ma hasomani ai, janah mangaku salah ma ia. Sonaha ujungni? Nini si Michael, “Ra do hasomankai manasap salahku.” Jadi marhasoman ma use sidea.

“Marsianju-anjuan anjaha marsisasapan dousa, anggo marpangkurangi uhur ni na sada dompak hasomanni.” (Kol. 3:12-14) Dingat nasiam ope dua parintis ai, na marsalisih sanggah marbarita? Iurupi sada sintua ma sidea mangarusi anggo parsalisihan ni sidea ai lang mangojur hubani na legan. Ipasingat do sidea ase marsabar ni uhur dompak na legan janah totap manjaga hadameion i kuria. Ra do sidea mandalankon podah ai. Sonari, rup marhorja do sidea mambaritahon ambilan na madear.

Podah na dong bani Kolosse 3:12-14 on, boi do homa mangurupi hita ase toruh maruhur manasap salah ni hasoman na paboritkon uhurta, anjaha manalpuhon parsoalan ai humbani pingkiran. Sonaha anggo domma marusaha hita, tapi lalab lang boi? Podah bani Mateus 18:15 boi mangurupi hita. Hassi pe podah ni Jesus on ibahen laho pasaloseihon dousa na banggal, tapi marguna do homa on laho pasaloseihon parsoalan pakon sanina-botou. Marhitei toruh ni uhur, jumpahi hita ma hasomanta na marsalisih ai, laho pasaloseihon parsoalan ai.

Dong ope podah na legan bani Bibel. Umpamani, marpangunsandeian ma bani Jahowa ase  boi hita pataridahkon “buah ni Tonduy” songon “holong, malas ni uhur, damei, lumbang ni uhur, habasaron, halayakon, haporsayaon, halamlamon, ampa panrajaion diri”. (Gal. 5:22) Pingkirhon ma limbaga on. Boi do masin totap dear marhorja anggo ibere oli. Sonai homa hita, lambin urah ma hita pasaloseihon parsoalan anggo ipataridah hita buah ni tonduy ai.

PARAYAK MA HADAMEION I KURIA AGE PE LANG DOS PARUHURAN

Ganup halak lang sarupa paruhuranni. Legan-legan do cara ni sasada halak marpingkir ampa marsahap. Hassi pe sonai, on boi mambahen hita marmalas ni uhur ibagas parhasomanan. Tapi, boi do homa on mambahen parsalisihan ampa lang marsiarusan. Sada sintua na marpangalaman mangkatahon, “Sipata sunsah do halak na parmaila marsaor pakon halak na mabasartu. Boi do pangahapta lang pala mahua on. Hape anggo ipaturut sonin, boi do gabe parsoalan ujungni.” Dong na marpandapot, lang boi rup marhorja sidea na lang dos paruhuranni. Tongon do ai? Pingkirhon ma contoh humbani dua apostel on. Si Petrus, aha na dong ibagas pingkiranni, mintor ai do na isahapkonni. Tapi legan do anggo si Johannes, parholong do ia janah ipingkiri do lobei paima marsahap atap pe mambahen haputusan. Hassi pe lang dos paruhuran ni sidea, boi do sidea totap rup marhorja ibagas na mangidangi Jahowa. (Lah. 8:14; Gal. 2:9) Sonai homa sonari, hassi pe lang dos paruhuran ni juakjuak ni Jahowa, tapi boi do sidea totap marsada.

Tapi, sonaha anggo adong parsahap ni sasada halak i kuria na paboritkon uhurmu? Dear do anggo idingat ham lang pitah bamu Jesus matei,  dihut do bani hasomanmai. Halani ai, maningon do ihaholongi hita hasomanta. (Joh. 13:34, 35; Rom 5:6-8) Jadi, lang dear anggo mintor lang iparsahapkon ham ia atap mandaoh hun bani. Sungkun ma dirimu, ‘Ai dong do titah ni Jahowa na ilanggar sanina-botouhu ai? Ai sangaja do ia paboritkon uhurhu? Atap pitah halani legan do paruhurannami ase marsoal? Sasintongni, ai adong do biaknami na sarupa?

Umpamani, hasomanmai basar tapi ham parsip, mahua anggo rup nasiam marbarita, ase boi ham marlajar hun bani? Sonaha anggo hasomanmai bujuran marsibere-bere? Boi do ididah ham malas ni uhurni sanggah mangurupi na matua, na boritan, atap sidea na marhahurangan? Boi do iusihi ham ia ase ringgas marsibere-bere? Parlajaranni, hassi pe lang dos paruhuranmu pakonsi, biak na dear humbani hasomanmai ma na ipindahi ham. Hassi pe nasiam lang boi gabe huan-kuan, tapi boi do lambin dohor nasiam. On ma na boi mangurupi ase dong hadameion i tongah-tongah ni kuria.

Bani abad na parlobei, dong dua hasomanta na margoran si Oiodia ampa si Sintike. Ra do legan paruhuran ni sidea, tapi iojur apostel Paulus do sidea ase “marsada ni uhur ibagas Tuhan in”. (Pil. 4:2) Hita pe sihol manombah Jahowa rap pakon sanina-botounta janah marayak hadameion i kuria.

PODAS MA SALOSEIHON PARSALISIHAN

Anggo ra hita mardamei, tarsonggot do hita mangidah dear do hape hasilni

Mase lang boi hita lalab marsogam ni uhur bani hasomanta? Pingkirhon ma limbaga on. Porini adong poyon-poyon i taman bunga na jenges janah lang mintor isamot, gabe manrarat ma ai. Sonai homa anggo lalab hita marsogam ni uhur, ai boi mambahen hasedaon ibagas kuria. Tapi  anggo ihaholongi hita Jahowa pakon sanina-botounta, tontu ijaga hita do hadameion ibagas kuria.

Anggo marusaha hita manjaga hadameion, tarsonggot do ra hita mangidah dear do hape hasilni. Adong sada botou na mansaritahon pangalamanni: “Adong sada hasoman na mambahen ahu songon dakdanak. Gabe lang sodap huahap. Lambin dokah lambin sogam ma uhurhu mangidahsi janah mulai ma ahu kasar hu bani. Ninuhurhu, ‘Bahen aha pala hormat diri hu bani anggo ia pe lang hormat bangku.’”

Tapi irimangi botou on ma parlahouni ai. “Hubotoh ma bajan do hape parlahouku sadokah on, jadi manosal tumang ahu. Halani ai mubah ma ahu. Hutonggohon ma parsoalan on bani Jahowa. Dob ai huboli ma kado ampa kartu, janah husuratkon ma bani kartu ai anggo ahu domma lepak halani parlahouku. Ujungni marsidahopan ma hanami, anjaha isalpuhon hanami ma parsoalan ai. Sonari domma mardamei hanami.”

Marosuh do ganup halak adong hadameion. Tapi anggo adong halak na bulinsah atap margijang ni uhur, boi do seda hadameion ai. Bahat do jolma sisonai i dunia on. Tapi, Jahowa marosuh ase juakjuak-Ni legan humbani sidea. Jadi, maningon do adong hasadaon ampa hadameion bani Saksi-Saksi Jahowa. Isuratkon si Paulus ma bani halak Kristen ase ‘marparlahou na talup’ sidea. Anjaha iojur do homa ase sidea ‘martoruh ni uhur, marlamlam anjaha marlumbang ni uhur, marsianjuan ibagas uhur na holong. Porlu manramotkon hasadaon ni tonduy marhitei panrahut ni damei’. (Ep. 4:1-3) Jadi maharga tumang do “panrahut ni damei” na adong bani juakjuak ni Jahowa. Halani ai, jaga hita ma hadameion ai. Anggo adong parsoalan pakon sanina-botou, mintor isaloseihon hita ma ai.