Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Juni 2017

Apiti ma Pamarentahan ni Jahowa!

Apiti ma Pamarentahan ni Jahowa!

“Ham Tuhan Naibatanami, na talup do Ham manjalo hasangapon, hamuliaon pakon hagogohon, ai Ham do na manompa sagala na dong.”PANGUNGKABON 4:11.

DODING: 112, 133

1, 2. Aha do na porlu iparimbagaskon hita? (Idah gambar bani alaman 21.)

BANI artikel na salpu domma iulas hita, Sibolis mangkatahon anggo Jahowa lang talup mamarentah. Anjaha lang ibagas hapintoron Ia mamarentah. Dob ai ihatahon do homa, martuahan do jolma anggo sidea sandiri na mamarentah dirini. Sintong do ai? Pingkirhon ma, porini jolma boi mamarentah dirini sandiri janah manggoluh sadokah ni dokahni, martuahan do hagoluhan ni sidea marimbangkon anggo iparentah Naibata? Martuahan do nasiam anggo lang iparentah Naibata?

2 Maningon hita sandiri ma na marimbagaskon balosni ai. Jadi, porlu do iparlajari hita Bibel ase torang ibotoh hita pamarentahan ni Jahowa do na sidearan janah talup do hita mangapiti pamarentahan-Ni humbani gok ni uhurta. Eta ulas hita ma aha do na iajarhon Bibel pasal hak ni Jahowa mamarentah.

 JAHOWA DO NA TALUP MAMARENTAH

3. Mase pitah Jahowa na talup mamarentah?

3 Pitah Jahowa do na talup mamarentah halani Ia do Na Tang Sitimbulan ampa Panompa haganup. (1 Kron. 29:11; Lah. 4:24) Bani sada panonggoran, 144.000 halak na mamarentah pakon Jesus mangkatahon, “Ham Tuhan Naibatanami, na talup do Ham manjalo hasangapon, hamuliaon pakon hagogohon, ai Ham do na manompa sagala na dong; humbani rosuh-Mu do ase manjadi in haganup anjaha tartompa.”Pangk. 4:11.

4. Bahen aha do ibere banta hak laho mamilih?

4 Lang adong na itompa Sibolis, halani ai seng dong hak-ni mamarentah. Sanggah Sibolis ampa manisia na parlobei seng unduk bani Naibata, ai pataridahkon anggo sidea manlawan pamarentahan ni Jahowa. (Jer. 10:23) Ibere do bani manisia hak na laho mamilih, tapi ai ipakei laho mambahen haputusan, sedo laho manlawan Naibata. Anggo jolma manlawan dompak Jahowa, artini domma lepak sidea manggunahon hak ai. Sasintongni porlu do jolma iparentah janah itogu-togu Naibata.

Sintong do ganup uhum, prinsip, ampa haputusan na binahen ni Jahowa

5. Mase aturan ni Jahowa ai pintor?

5 Pingkirhon ma alasan na legan mase Jahowa na talup mamarentah. Jahowa mandalankon kuasa-Ni ibagas hapintoron. Nini do, “Ahu do Jahowa na mandalankon idop ni uhur, hasintongan ampa hapintoron i tanoh on.” Ai ma na iharosuhkon Jahowa. (Jer. 9:24) Jadi, seng porlu bani Jahowa uhum ni jolma laho manontuhon aha na sintong. Halani ai, marhitei hapintoran-Ni sandiri do ibahen uhum bani jolma. Panurat ni psalmen mangkatahon, “Hapintoron pakon uhum do onjolan ni hotak-Mu.” Jadi sintong do ganup uhum, prinsip, ampa haputusan na binahen ni Jahowa. (Ps. 89:15; 119:128) Ihatahon Sibolis do anggo pamarentahan ni Jahowa seng pintor, hape ia do na lang boi mambahen na pintor i dunia on.

6. Aha ope alasan na mambahen Jahowa talup mamarentah?

6 Alasan na legan mase Jahowa talup mamarentah, halani dong do Bani habotohan ampa hapentaran laho mangurus hasiangan on. Taridah do on humbani kuasa na ibere-Ni bani Jesus laho pamalumkon naborit, na so boi ipamalum dokter. (Mat. 4:23, 24; Mrk. 5:25-29) Hassi pe halongangan do ai banta, tapi seng halongangan ai bani Jahowa. Halani Jahowa do mambotoh sonaha do sasintongni angkulanta, jadi Ia ma na boi pamalumkon ai. Anjaha boi do homa Ia pagoluhkon na matei ampa pasohkon parmaraan.

7. Mase pitah pamarentahan ni Jahowa na boi parohkon hadameion?

7 Seng ongga dong hadameion ibagas dunia na iparentah Sibolis. Tapi,  pitah hapentaran ni Jahowa do na parohkon hadameion i sab tanoh on. (Jes. 2:3, 4; 54:13) Dos ma pangahapta songon ihatahon si Paulus, “Bagasni in tene habayakon, hapentaran ampa habotohon ni Naibata! Na so tarpareksa do uhum-Ni, anjaha na so taririk-irik do dalan-Ni!”Rom 11:33.

PAMARENTAHAN NA SIDEARAN

8. Sonaha do pandapotmu pasal pamarentahan ni Jahowa?

8 Domma iulas hita hun Bibel mase pitah Jahowa na talup mamarentah. Sonari ulas hita ma mase pamarentahan ni Jahowa do na sidearan. Sada alasan ai ma ibagas holong do Ia mamarentah. Pingkirhon ma, ‘pardear layak do Jahowa anjaha paridop ni uhur, nanget marringis, anjaha gok holong ni uhur-Ni pakon habonaran-Ni”. Mambotoh on, tontu lambin sihol ma hita dohor hu Bani. (2 Mus. 34:6) Jadi, ladung do ai sanggah Sibolis mangkatahon lang ibere Jahowa na madear bani juakjuak-Ni. Arga do hita i lobei ni Jahowa. Ibere do Anak-Ni hubanta ase boi hita manggoluh sadokah ni dokahni. Sasintongni, sarinan do Ia hubanta marimbangkon dirinta sandiri.Basa Psalmen 84:12; Rom 8:32.

Sarinan do Jahowa hubanta marimbangkon dirinta sandiri

9. Hunja ibotoh hita na parduli do Jahowa hubanta marsada-sada?

9 Ihaholongi Jahowa do ganup juakjuak-Ni. Hassi pe sonai, ipardiateihon do sidea marsada-sada. Pingkirhon ma na masa bani halak Israel hinan. Hira-hira tolu ratus tahun, igunahon Jahowa do panguhum laho manogu-nogu janah paluahkon sidea. Tapi bani panorang ai pe, ipardiatei do sidea marsada-sada. Umpamani si Rut, sedo halak Israel ia. Tapi rosuh tumang ia manombah Jahowa. Halani ai, ipasu-pasu Jahowa ma ia. Bereon-Ni ma paramangon pakon anak bani si Rut. Legan ni ai, humbani ginompar ni si Rut do harorohan ni Mesias. Dob ai, isuratkon do homa pangalaman ni si Rut ibagas Bibel. Bayangkon nasiam ma sonaha holi pangahap ni si Rut sanggah ipapuho janah mambotoh pasal on!Rut 4:13; Mat. 1:5, 16.

10. Mase ihatahon hita lang kejam pamarentahan ni Jahowa?

10 Lang ongga kejam pamarentahan ni Jahowa, tapi halak na unduk hu Bani dapotan haluahon ampa malas ni uhur do. (2 Kron. 3:17) Pasal Jahowa, nini si Daud do, “[Hasangapon] pakon hamuliaon do i lobei-Ni; hagogohon pakon malas ni uhur bani ianan-Ni.” (1 Kron. 16:7, 27) Si Etan manuratkon, “Martuah ma bangsa na mambotoh marolob-olob, na mardalan ibagas sondang ni bohi-Mu, Ham Jahowa. Marhitei goran-Mu do marolob-olob sidea ganup ari, anjaha marhitei hapintoron-Mu timbul sidea.”Ps. 89:16, 17.

11. Sonaha hita boi lambin porsaya anggo pamarentahan ni Jahowa do na sidearan?

 11 Lambin gati iparimbagaskon hita pasal habujuron ni Jahowa, lambin pos ma uhurta anggo pamarentahan-Ni do na sidearan. Dos ma pangahapta songon na ihatahon bani ayat on, “Dearan do sadari i alaman-Mu ase saribu ari bani ianan na legan.” (Ps. 84:11) Jahowa do sitompa hita, halani ai Ia do na mambotoh sonaha ase martuah hita. Bereon-Ni do ganup haporluanta. Ganup parentah ni Jahowa bahen hadearon do ai banta. Hassi pe sipata sunsah mandalankon ai, tapi martuah do tongtong hagoluhanta anggo manangihon Jahowa.Basa Jesaya 48:17.

12. Mase ra hita mangapiti pamarentahan ni Jahowa?

12 Bibel patugahkon dob saribu tahun Jesus mamarentah, bahat ope na manlawan dompak Jahowa. (Pangk. 20:7, 8) Mase sonai? Halani ipaluah do Sibolis tongkin janah songon na somal, bahenonni do ase porsaya manisia anggo sidea boi manggoluh sadokah ni dokahni, hassi pe lang manangihon Jahowa. Tapi domma tangkas ibotoh hita ladung do ai. Halani ai, sungkun hita ma dirinta, ‘Ai porsaya do ahu bani ladung sisonai?’ Anggo holong do hita bani Jahowa janah porsaya pitah pamarentahan-Ni do na sidearan, gabe magigi ma hita manangar ai. Pitah hubani pamarentahan ni Jahowa do hita marosuh, halani ibagas holong do Ia mamarentah.

TONGTONG MA APITI PAMARENTAHAN NI JAHOWA

13. Sonaha hita boi mangapiti pamarentahan ni Naibata?

13 Songon na dob iulas hita, pitah Jahowa do na talup mamarentah janah pamarentahan-Ni do na sidearan. Halani ai, maningon do iapiti hita ai marhitei setia hu Bani janah mangusihi-Si. Anggo sonai ibahen hita, taridah ma holong do hita bani pamarentahan-Ni.Basa Epesus 5:1, 2.

14. Sonaha kopala kaluarga pakon sintua boi mangusihi Jahowa?

14 Domma iparlajari hita hun Bibel ibagas holong do Jahowa manggunahon kuasa-Ni. Halani ai, iusihi kopala kaluarga pakon sintua ma Jahowa janah ulang ma kasar mandalankon kuasa. Apostel Paulus pe marusaha do mangusihi Jahowa pakon Anak-Ni. (1 Kor. 11:1) Lang ongga paksaonni halak na legan mangkorjahon na sintong. Tapi ibagas holong do ia mangojur sidea ase mangkorjahon ai. (Rom 12:1; Ep. 4:1; Pilem. 8-10) Jadi, anggo hita mangkaholongi na legan, dos do ai hita mangapiti pamarentahan ni Jahowa.

15. Aha ope na boi ibahen anggo hita mangkaholongi pamarentahan ni Jahowa?

15 Anggo hormat janah rup marhorja hita pakon sidea na ibere Naibata tanggung jawab, hassi pe sipata ra do lang iarusi hita haputusan na ibahen sidea, ai pe patuduhkon hita mangapiti pamarentahan ni Jahowa. Legan do hita humbani dunia on na lang ra manjalo Jahowa gabe Sipanggomgom.  (Ep. 5:22, 23; 6:1-3; Heb. 13:17) Anggo unduk hita bani Naibata, tontu martuah ma hita halani rosuh do Ia mambere na sidearan hubanta.

16. Sonaha haputusanta pataridahkon anggo hita mangapiti Naibata?

16 Humbani haputusan na ibahen hita pe, boi do patuduhkon anggo hita mangapiti pamarentahan ni Naibata. Lang ipatugah Jahowa ganupan na boi atap pe na lang boi ihorjahon hita. Tapi ibere do prinsip na mangurupi hita mambahen haputusan na madear. Umpamani, lang ibahen Jahowa daptar pasal pakeian na boi atap lang boi ipakei. Tapi patugahon-Ni do sonaha parpakeian na pataridahkon anggo hita Saksi-Ni. (1 Tim. 2:9, 10) Rosuh do Ia ase ipingkirhon hita pangkorhon ni haputusanta hubani na legan. (1 Kor. 10:31-33) Anggo romban hubani harosuh ni Jahowa do haputusanta, taridah ma hita mangkaholongi janah mangapiti pamarentahan-Ni.

Apiti ma pamarentahan ni Naibata sanggah mambahen haputusan ampa ibagas kaluarga (Idah paragrap 16-18)

17, 18. Sonaha na marhajabuan boi mangapiti pamarentahan ni Jahowa?

17 Pingkirhon ma sonaha na marhajabuan boi mangapiti pamarentahan ni Jahowa. Ra do parhajabuan ai lang songon na niarapkon sidea halani dong parsoalan na borat. Anggo sonai na masa, pingkirhon ma aha na  ibahen Jahowa bani halak Israel hinan. Ipausih Jahowa do diri-Ni songon paramangon bani sidea. (Jes. 54:5; 62:4) Gati do halak Israel mambahen borit uhur-Ni. Ra do homa sonai ibagas parhajabuan. Hassi pe sonai lang mintor itadingkon Jahowa halak Israel. Isalpuhon Jahowa do dousa ni sidea janah totap do Ia manggoki padan-Ni bani sidea.Basa Psalmen 106:43-45.

18 Sonai ma namin na marhajabuan mangusihi Jahowa. Sanggah adong parsoalan, ulang mintor marsirang. Dingat ma ponting tumang do padan parhajabuan ai i lobei ni Jahowa janah sihol do Ia ase paramangon pakon parinangon “padomuhon” dirini bei. Bibel patugahkon, pitah halani parbangkison do ase boi marsirang janah marhajabuan use. (Mat. 19:5, 6, 9) Anggo marusaha do halak Kristen patoguhkon parhajabuanni, taridah ma anggo sidea mangapiti pamarentahan ni Jahowa.

19. Aha do na maningon ibahen anggo mardousa hita?

19 Halani ganup hita lang gokan dear, sipata ra do hita mambahen borit uhur ni Jahowa. Hassi pe sonai, ibere Jahowa do Kristus bahen tobusan hubanta. Jadi, anggo mardousa hita, pindo ma hasasapan ni dousa bani Jahowa. (1 Joh. 2:1, 2) Janah ulang lalab maretek ni uhur halani hasalahan ai, tapi marusaha ma mambahen hamubahon. Padohor hita ma dirinta bani Jahowa, na ra manalpuhon dousanta janah mangurupi hita ase tongtong mangidangi-Si.Ps. 103:3.

20. Mase maningon iapiti hita pamarentahan ni Jahowa sonari

20 Bani dunia na baru pitah Jahowa do na mamarentah ganup halak janah marlajar pasal hapintoron-Ni. (Jes. 11:9) Tapi sonari pe, boi do iparlajari hita prinsip-Ni ase boi mandalankon harosuh-Ni. Lang piga dokah nari, iparhatongon ma hak ni Jahowa mamarentah. Halani ai, eta hita mangapiti pamarentahan ni Jahowa marhitei manangihon-Si, tongtong mangidangi-Si, janah marusaha mangusihi-Si.