Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Juli 2017

Pindahi ma Arta na Tongon

Pindahi ma Arta na Tongon

“Pindahi hanima ma bannima huan-huan marhitei mammon na geduk in.”​—LUKAS 16:9.

DODING: 32, 154

1, 2. Bani dunia on, mase tongtong adong halak na masombuh?

SONARI, jahat tumang do sistem ekonomi i dunia on. Umpamani, buei tumang do na maposo na sunsah mangindahi horja. Dong piga-piga na pindah hu nagori na bayak. I nagori na bayak pe bahat do na masombuh. Humbani piga-piga laporan na baru-baru on patugahkon, 1 porsen arta ni halak na bayak dos do bahatni pakon arta ni 99 porsen halak na legan. Jadi, torang ma piga-piga halak bahat do artani tapi marmiliar halak sombuh tumang. Domu songon na ihatahon Jesus, “Tongtong do adong na masombuh i tongah-tongahnima.” (Mrk. 14:7) Mase boi sonai?

2 Ibotoh Jesus pitah Harajaon ni Naibata hansa na boi manggantihon sistem perdagangan ni dunia on. Bibel patugahkon “partiga-tiga” atap pe sistem perdagangan, politik ampa ugama ai ma bagian humbani dunia ni Sibolis. (Pangk. 18:3) Juakjuak ni Naibata boi do padaohkon diri humbani politik ampa ugama na ladung. Hassi pe sonai, bahat do humbani sidea lang  boi tongon-tongon padaohkon dirini humbani perdagangan ni dunia ni Sibolis.

3. Aha do na laho iulas hita?

3 Porlu do ipareksa hita sonaha pangahapta bani habayakon ni dunia on. Sungkun ma dirinta, ‘Sonaha ahu patuduhkon haporsayaon bani Jahowa sanggah manggunahon artangku? Aha na boi hubahen ase ulang pitah mangindahi habayakon ni dunia on hansa? Pangalaman aha do na pataridahkon anggo juakjuak ni Naibata tongon-tongon porsaya hu Bani?’

SARITA PASAL JABOLON NA GEDUK

4, 5. (a) Aha do na masa bani jabolon na isaritahon Jesus? (b) Aha na ipatugah Jesus ase ihorjahon susianni?

4 Basa Lukas 16:1-9. Porlu ma irimangi hita sarita ni Jesus pasal sijolom anakkunsi atap pe jabolon na geduk. Tarbogei ma jabolon ai rosuh mambois-boiskon artani. Halani ai sihol padaraton ni bosni ma ia humbani parhorjaan. * (Idah surat partoruh.) Tapi “pentar” do jabolon ai. Sanggah lape ipadarat, marhasoman ma ia pakon halak na boi mangurupisi i pudian ni ari. Bani sarita on, seng dong ihatahon Jesus anggo susianni boi mangkorjahon na geduk laho mansarihon dirini. Tapi, sihol mambere pangajarion na ponting do Jesus.

5 Ibotoh Jesus do usih songon jabolon ai, ra do homa halak Kristen sompong manaron hasunsahan i dunia na geduk on. Halani ai ma ase nini Jesus, “Pindahi hanima ma bannima huan-huan marhitei mammon na geduk in.” Jadi, anggo bois holi artani, Jahowa pakon Jesus, huan-huan ni sidea ‘manjalo sidea hubagas ianan sisadokah ni dokahni’. Aha do na boi iparlajari hita humbani podah ni Jesus on?

6. Hunja ibotoh hita lang marosuh Naibata mangidah paruhur haut?

6 Hassi pe lang ipatorang Jesus mase ihatahon na “geduk” do habayakon ai, tapi tangkas do ipatugah Bibel seng marosuh Naibata mangidah paruhur haut. Umpamani, ibere Jahowa do bani si Adam pakon si Hawa i pohon Eden lobih humbani na ihaporluhon sidea. (1 Mus. 2:15, 16) Dob ai, sanggah ibere Naibata tonduy na pansing bani halak na mininakan, “seng dong humbani sidea na mangkatahon ia sandiri simada na dong bani, tapi parbagianan rup do ai ihira”. (Lah. 4:32) Nabi Jesaya patugahkon dong do holi panorangni bani jolma ase marmalas ni uhur halani hasil ni tanoh on. (Jes. 25:6-9; 65:21, 22) Tapi sanggah lape saud ai, halak Kristen porlu do “pentar” manggunahon habayakon ni dunia on janah totap pamalaskon uhur ni Jahowa.

PENTAR MA MANGGUNAHON ARTANTA

7. Podah aha do na ibere Jesus bani Lukas 16:10-13?

7 Basa Lukas 16:10-13. Jabolon  bani sarita ni Jesus ai ra marhasoman halani mangindahi na porlu bani dirini sandiri. Tapi sihol do Jesus ase halak Kristen ulang sonai ibagas na marhasoman dompak Jahowa pakon Jesus. Ia sihol ase iarusi hita sonaha manggunahon habayakon ni dunia on laho pataridahkon haporsayaonta bani Naibata. Sonaha carani?

8, 9. Patugah ma piga-piga contoh na pentar ibagas manggunahon arta.

8 Sada cara ai ma mambere tumpak bani horja parambilanon na ipatugah Jesus bani Mateus 24:14. Songon sada dakdanak i India, lang pala mahua pangahapni hassi pe lang mamboli guro-guro ase boi patumpuhon duitni hubagas celengan, laho manumpaki horja parambilanon. Dong homa sada sanina ijai na adong kobun kalapani. Halani ibotoh porlu do kantor penerjemahan bahasa Malayalam mamboli kalapa, jadi ibere ma buei kalapa hujai. Nini uhurni dearan do sonai marimbangkon mambere duit. Contoh na legan, dong sanina-botou i Junani na tongtong mambere minak jetun, keju, ampa sipanganon hu Betel.

9 Dong homa sanina i Sri Lanka na mambere tanoh ampa rumahni bahen ianan partumpuan pakon kebaktian ampa ianan parbornginan bani sanina-botou na marintis. Marguna tumang do on bani sanina na sunsah ibagas parduiton. Bani sada pulou na lang sai bebas marbarita, dong sanina na mambere rumahni bahen ianan martumpu. Halani ai, parintis ampa sanina-botou na legan lang pala manewa ianan laho martumpu. Usih sonai ma cara na “pentar” manggunahon artanta.

Igunahon juakjuak ni Naibata do artani laho mangurupi na legan

10. Aha do gunani anggo hita ringgas marsibere-bere?

10 On ma piga-piga contoh na pataridahkon “hatengeran ni uhur [juakjuak ni Naibata] bani na otik”. (Luk. 16:10) Igunahon sidea do artani laho mangurupi na legan. Jadi, sonaha ma pangahap ni sidea na marhasoman pakon Jahowa halani mangkorjahon sisonai? Malas tumang do uhur ni sidea halani ringgas marsibere-bere, dapot sidea ma arta na “tongon” i surga. (Luk. 16:11) Dong sada botou na tongtong manumpaki horja parambilanon, mangahapkon marguna tumang do ai bani. Ia mangkatahon, “Halani ringgas marsibere-bere, lambin dear ma paruhuranku bani na legan. Gabe lambin urah ma ahu manalpuhon hasalahan,  lambin sabar manaron hasunsahan janah urah manjalo podah.” Jadi buei tumang do gunani iahap sidea halani ringgas marsibere-bere.​—Ps. 112:5; Pod. 22:9.

11. (a) Sonaha hita “pentar” manggunahon artanta? (b) Aha do na masa bani juakjuak ni Naibata sonari on? (Idah gambar bani alaman 3.)

11 Anggo igunahon hita artanta laho mangurupi horja parambilanon, ai pataridahkon “pentar” do hita. Hassi pe lang boi hita gabe parintis atap pindah hu ianan na mamorluhon, tongtong do hita boi mangurupi na legan. (Pod. 19:17) Umpamani, marhitei tumpak na ibere hita, on boi mangurupi pasirsirhon publikasi bani sidea na masombuh ampa na ra manjalo hasintongan. Songon i Kongo, Madagaskar, pakon i Rwanda, mahal tumang do ijai arga ni Bibel. Ra do argani dos pakon upah na marhorja saminggu atap sabulan. Halani ai, sompat do martahun-tahun, sidea maningon mamilih laho mamboli Bibel do atap sipanganon. Tapi, tumpak na ibere mambahen ‘na lobih manggoki na hurang’. Jadi boi ma organisasi manerjemahkon ampa pasirsirhon Bibel bani kaluarga ampa parlajar Bibel. (Basa 2 Korint 8:13-15.) Jadi sidea na mambere ampa na manjalo boi gabe hasoman ni Jahowa.

SONAHA ASE HITA ULANG TARALIT BANI HABAYAKON NI DUNIA ON?

12. Sonaha do si Abraham patuduhkon haporsayaonni bani Naibata?

12 Hita pe boi do gabe hasoman ni Jahowa anggo mangindahi arta na “tongon” sedo habayakon ni dunia on. Sonai ma na ibahen si Abraham. Unduk do ia bani Jahowa laho manadingkon habayakonni i huta Ur janah tading i lampo-lampo. (Heb. 11:8-10) Tongtong do ia porsaya bani Jahowa sedo bani arta. (1 Mus. 14:22, 23) Jesus pe mangojur na legan ase mangusihi si Abraham. Bani sada garama na bayak, nini ma, “Anggo sihol uhurmu gok dear ho, laho ma, jual ma haganup na dong bam, pambere ma bani na masombuh, ase mararta ho i nagori atas. Dob ai roh ma ho mangirikkon Ahu.” (Mat. 19:21) Haporsayaon ni garama ai seng songon si Abraham. Tapi, bahat do halak na porsaya bani Naibata.

13. (a) Podah aha do na ibere si Paulus bani si Timoteus? (b) Sonaha hita mangihutkon podahni ai sonari on?

13 Halak na marhaporsayaon do si Timoteus. Dob si Timoteus ihatahon “tentara ni Kristus Jesus na bujur” nini si Paulus ma hu bani, “Sada tentara na mandalankon tugas, seng ra ia taralit bani urusan-urusan goluh siganup ari, ase harosuh ia bani kopalani.” (2 Tim. 2:3, 4) Jadi halak Kristen sonari on pe age sidea na mambere gok panorang laho mangidangi, idalankon do podah ni si Paulus ai. Seng ra sidea taralit bani habayakon ni dunia on.  Idingat sidea ma podah on, “Sipanginjam gabe jabolon ni na painjamkonsi.” (Pod. 22:7) Marosuh do Sibolis ase ipindahi hita habayakon ni dunia on. Dong piga-piga na manginjam laho mamboli rumah, motor, marsikolah atap mambahen pesta parhajabuan. Anggo lang jaga hita, boi ma gabe lalab hita marutang. Tapi anggo pentar do hita, lang iparbois-bois hita artanta. Anggo sonai, bahat ma panorangta mangidangi Jahowa anjaha lang be mangayaki habayakon ni dunia on.​—1 Tim. 6:10.

14. Aha ma namin na maningon ibahen hita? Bere ma contohni.

14 Ase ulang marlobih-lobih hagoluhanta, maningon bahenonta ma Harajaon ni Naibata na siporlunan. Dong sada kaluarga na banggal usahani. Tapi sihol do sidea ase marintis use. Jadi ijual sidea ma usahani, kapal ampa artani na legan. Dob ai dihut ma sidea pajongjongkon kantor pusat i Warwick, New York. Hasurungan do on bani sidea halani boi rap marhorja pakon boruni, helani pakon simatua sadokah piga-piga minggu ijai. Dong use parintis hun Kolorado, AS, na marhorja satongah ari i bank. Halani dear horjani, ipindo bosni ma ia ase marhorja sadari bod janah ibere ma bani tolu lompit gajini. Tapi halani horja ai manlanglangi ia marbarita, seng ijalo horja ai. On ma piga-piga siusihan humbani juakjuak ni Naibata. Anggo ibahen hita Harajaon ni Naibata na siporlunan, taridah ma harganan do banta parhasomanan dompak Jahowa pakon arta na tongon ai marimbangkon habayakon ni dunia on.

SALPU MANDO HABAYAKON NI DUNIA ON

15. Arta aha do na boi mambahen hita marmalas ni uhur?

15 Sedo artini na marosuh Jahowa hubanta anggo bahat artanta. Tapi halak na “bayak bani horja na madear” do na ipasu-pasu Jahowa. (Basa 1 Timoteus 6:17-19.) Umpamani, dong sada botou na margoran si Lucia na manangar iporluhon do bahat parbarita i Albania. * (Idah surat partoruh.) Halani ai, pindah ma ia hun Italia bani tahun 1993. Lape dong horjani ijia. Tapi pos do uhurni ipasirsir Jahowa do haporluanni. Marlajar bahasa Albania ma ia janah dong lobih humbani 60 halak na iurupi mangondoskon diri bani Jahowa. Ra do lang sonai hasil ni pangidangionta i nagorinta. Tapi sagala na ibahen hita laho mangurupi na legan marlajar pasal Jahowa, on ma na gabe artanta na so ra bois.​—Mat. 6:20.

Aha pe na ibahen hita bani Naibata ampa Harajaon-Ni, ai do na mambahen malas uhurta

16. (a) Aha do na laho masa bani habayakon ni dunia on? (b) Sonaha ma namin pangahapta bani arta?

16 Bani Lukas 16:9 sanggah ihatahon Jesus anggo bois arta in, sasintongni ia mangkatahon laho salpu ma ganup habayakon ni dunia on. Bani piga-piga nagori, bahat do bank na itutup halani krisis ekonomi. Tapi lambin parah  do holi situasini. Salpu mando politik, ugama, ampa sistem perdagangan ni dunia on. Ipatugah nabi Hesekiel pakon si Sepania, holi soya-soya do omas pakon pirak na iahap ponting bani perdagangan ni dunia on. (Hes. 7:19; Sep. 1:18) Jadi bayangkon ma porini domma matua hita janah ibotoh hita pitah mangindahi habayakon ni dunia on do hape hita sadokah on, sedo arta na tongon ai, sonaha ma pangahapta? Ra do pangahapta songon dalahi na manggunahon hagoluhanni laho patumpuhon duit tapi ujungni soya-soya do ai. (Pod. 18:11) Laho salpu do habayakon ni dunia on. Jadi gunahon ma arta ni nasiam laho mambahen parhasomanan dompak Jahowa. Aha pe na ibahen hita bani Naibata ampa Harajaon-Ni, ai do na mambahen malas uhurta.

17, 18. Aha do pasu-pasu na laho ijalo hasoman ni Naibata?

17 Sanggah roh Harajaon ni Naibata, seng porlu be jolma mamboli atap pe manginjam. Halani bahat do holi ijai sipanganon janah seng porlu iboli. Anjaha lang be ihaporluhon dokter. Marmalas ni uhur ma ganup juakjuak ni Naibata halani hasil ni tanoh on. Pirak, omas, pakon permata, igunahon do holi on gabe golang, tintin, pakon na legan sedo gabe habayakon. Hayu, bosi, pakon batu, ipasirsir do on laho pajongjongkon rumah na jenges. Marsiurupan ma hita ijai sedo halani igalar tapi halani rosuhta. Ganup halak ra marbagi hasil ni tanoh on.

18 On ma deba pasu-pasu na laho jaloon ni sidea na marhasoman pakon Jahowa. Malas ma uhur ni juakjuak ni Jahowa sanggah manangar sora ni Jesus na mangkatahon, “Roh ma nasiam na pinasu-pasu ni Bapa, jalo nasiam ma harajaon in, na dob pinasirsir bani nasiam humbani mula ni tanoh on!”​—Mat. 25:34.

^ par. 4 Seng dong ihatahon Jesus tongon do atap lang jabolon ai mamboiskon arta ni bosni. Tapi bani Lukas 16:1 ihatahon “tarbogei” bosni ai do na bajan pasal jabolonni. On pataridahkon ra do adong na marladung pasal ai. Jadi, ijon Jesus sihol mangajarhon pasal pambahenan ni jabolon ai, sedo mase ia ipakaluar hun parhorjaan.

^ par. 15 Pangalaman ni si Lucia Moussanett boi ididah bani Sedarlah! 22 Juni 2003 alm. 18-22