Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Juli 2017

Sai ipasaud Jahowa ma sura-suramu

Sai ipasaud Jahowa ma sura-suramu

“Hamalaskon ma Jahowa, jadi bereon-Ni ma hubam harosuh ni uhurmu.”​—PSALMEN 37:4.

DODING: 89, 140

1. Aha do na maningon ibahen na maposo ibagas goluhni? Aha do na mangurupi sidea ase ulang mabiar? (Idah gambar i atas.)

TONTU topat do pangahap na maposo anggo sihol mardalani maningon do ibotoh tinuju ni pardalanan ai. Usih sonai ma hagoluhan on, maningon botohonmu do na laho bahenonmu ibagas goluhmu. Tongon lang urah on. Sada botou na margoran si Heather mangkatahon, “Haru do uhur. Ho maningon mambahen haputusan pasal aha na laho bahenonmu ibagas goluhmu.” Anggo sonai do pangahapmu, dingat ma na ihatahon Jahowa, ‘Ulang ho mabiar, ai Ahu do Naibatamu. Hupargogohi pe ho, tongon Huurupi pe ho.’​—Jes. 41:10.

2. Jahowa sihol ase ho marsura-sura na dear, hunja ibotoh ho?

2 Iojur Jahowa do ho ase mambahen sura-sura na dear ibagas goluhmu. (Par. 12:1; Mat. 6:20) Anggo ipardiatei ho tompaon ni Jahowa, iarusi ho ma sihol do Ia ase martuah ho. Isarihon Jahowa do homa ho. Ibere do podah ampa pangajarion ase ibotoh ho dalan na sidearan.  Jadi anggo lang itangihon halak podah-Ni, sogam ma uhur-Ni. Ia mangkatahon, “Ipilih hanima na so Huharosuhkon. . . . Tonggor ma, marmalas ni uhur do juakjuak-Ku, tapi bador do hanima. Tonggor ma, marolob-olob do juakjuak-Ku halani malas ni uhurni.” (Jes. 65:12-14) Pasangapkon Jahowa do hita anggo mambahen haputusan na maruhur.​—Pod. 27:11.

SURA-SURA NA PAROHKON HATUAHON

3. Aha do na iharosuhkon Jahowa bahenonmu?

3 Sura-sura na sonaha do iharosuhkon Jahowa bahenonmu? Ase martuah ho, maningon do itanda ho Jahowa janah idangi ma Ia. Halani ai ma ase itompa jolma. (Ps. 128:1; Mat. 5:3) Anggo binatang, pitah mangan, minum, pakon maranak. Tapi Jahowa sihol ase ibahen ho sura-sura na dear na mambahen ho martuah. “Naibata parholong” ampa “Naibata na martuah” do Panompa ai, na manompa manisia ‘songon rupa-Ni’. (2 Kor. 13:11; 1 Tim. 1:11; 1 Mus. 1:27) Martuah do ho anggo mangusihi Naibata na parholong in. Bibel mangkatahon, “Martuahan do na mambere ase na manjalo.” (Lah. 20:35) Ai sonai do pangahapmu? Sasintongni, ai ma na boi mambahen hita martuah. Jadi, Jahowa marosuh anggo ibahen ho sura-sura na pataridahkon holongmu Bani ampa halak na legan.​—Basa Mateus 22:36-39.

Martuah ma hanima anggo pataridahkon holong

4, 5. Aha do na mambahen martuah Jesus?

4 Jesus do siusihan na gokan dear bani na maposo. Sanggah dakdanak, tontu marguro-guro do ia. Songon na ihatahon Bibel dong do “panorang tartawa” pakon “manortor”. (Par. 3:4) Iparlajari Jesus do homa Surat in na mambahen orot parhasomananni dompak Jahowa. Sanggah ia marumur 12 tahun, longang do guru-guru na i rumah panumbahan mangidah pangarusion atap ‘torus ni uhurni ampa balosni’.​—Luk. 2:42, 46, 47.

5 Dob magodang Jesus, ihorjahon do harosuh ni Bapani. Isuruh Naibata do ia “mangambilankon Ambilan Na Madear bani halak na masombuh” ampa “mambahen marpangidah use na mapitung”. (Luk. 4:18) Psalmen 40:9 patugahkon pangahap ni Jesus, “Mangkorjahon rosuh-Mu ai do na huharosuhkon.” Dob marbarita bani sada naboru pasal panumbahan na sintong, nini ma bani susianni, “Sipanganon do ai Bangku, mangkorjahon rosuh ni na marsuruh Ahu ampa mandobkon lahoan-Ni.” (Joh. 4:31-34) Taridah ma rosuh tumang do ia patugahkon pasal Bapani hubani na legan. (Basa Lukas 10:21.) Martuah do Jesus halani mangkaholongi Naibata pakon  na legan. Martuah do homa ho anggo mangusihisi.

6. Mase dear anggo isaritahon ho sura-suramu bani na legan?

6 Bahat do halak na martuah halani marintis sanggah poso ope. Jadi, patugah ma bani sidea anggo dong sura-suramu laho marintis. Bibel mangkatahon, “Sundat do ranggian anggo hurang panriahan, tapi saud do ai anggo buei sipamodahi.” (Pod. 15:22) Jadi, ra do isaritahon sidea pangalamanni na boi mangurupi ho pasaudkon sura-suramu ai. Marlajar do Jesus humbani Bapani sanggah ia i surga. Dob ai, sanggah i tanoh on pe totap do ia marlajar. Martuah do ia halani padaskon ambilan na madear janah totap do ia martahan ibagas hasunsahan. (Basa Jesaya 50:4; Heb. 5:8; 12:2) Ulas hita ma mase hita boi martuah anggo mambere gok panorang laho mangidangi.

MAMBAHEN SUSIAN HORJA NA SIDEARAN

7. Mase bahat na maposo martuah halani mangajari na legan?

7 Isuruh Jesus do hita ase mambahen halak “gabe susian” janah mangajari sidea. (Mat. 28:19, 20) Anggo ibahen ho horja sisonai gabe sura-suramu, martuah ma ho halani dihut pasangapkon Naibata. Somalni, lambin dokah hita marhorja, lambin pandei ma hita. Si Timothy na marintis sanggah marumur 19 tahun mangkatahon, “Ahu marintis halani mangkaholongi Jahowa. Mulani, lang dong parlajar Bibelhu. Tapi dob pindah ahu hu ianan na legan, dong ma piga-piga na ra marlajar Bibel janah roh hu partumpuan. Dob dihut ahu bani Sekolah Alkitab bagi Saudara Lajang, itugaskon ma ahu hu ianan na baru. Ijai dong ma ompat na huajari marlajar Bibel. Marosuh tumang ahu bani horja sisonon, halani huidah sidea mambahen hamubahon marhitei pangurupion tonduy na pansing.” * (Idah surat partoruh.)—1 Tes. 2:19.

8. Aha do na ibahen na maposo ase boi mangajari bahat halak?

8 Buei do homa na maposo na marlajar bahasa na legan. Umpamani si Jakob hun Amerika Utara, mangkatahon, “Sanggah marumur pitu tahun, bahat do halak Vietnam hasoman sakalasku. Sihol do ahu marbarita bani sidea. Jadi, huparlajari ma bahasa ni sidea. Gati do hubandingkon Ambilan na Madear bahasa Inggris pakon bahasa Vietnam. Marhasoman do homa ahu pakon sanina na martumpu i kuria bahasa Vietnam. Dob marumur 18 tahun, marintis ma ahu. Dob ai, dihut ma ahu bani Sekolah Alkitab bagi Saudara Lajang. Itugaskon ma ahu hu sada kalompok na marbahasa Vietnam. Sasada ahu do sintua ijai. Buei do halak Vietnam na longang mangidah ahu halani hubotoh bahasa ni sidea. Iontang sidea ma ahu hu rumahni janah buei do na ra marlajar Bibel. Dong homa na ididi.”​—Bandingkon Lah. 2:7, 8.

9. Parlajaran aha do na dapot hita halani marintis?

 9 Bahat do na iparlajari halani marintis. Umpamani, lambin dear ma paruhuran, pandei marsahap, pangkar janah maruhur. (Pod. 21:5; 2 Tim. 2:24) Tapi na mambahen malas tumang uhurmu ai ma boi ho patuduhkon bani halak aha na sasintongni iajarhon Bibel. Lambin dohor do homa ho bani Jahowa halani boi rup marhorja pakon-Si—1 Kor. 3:9.

10. Sonaha ase totap malas uhurmu hassi pe otik na ra marlajar Bibel bani iananmu?

10 Hanima pe boi do totap marmalas ni uhur hassi pe otik na ra marlajar Bibel. Rap marhorja do hita mangurupi halak ase gabe susian. Hassi pe pitah sada sanina atap botou na dong parlajar Bibelni, tapi malas do uhurta halani dihut do hita bani horja ai. Umpamani si Brandon marintis sadokah siah tahun bani sada ianan na lang bahat halak ra marlajar Bibel. Tapi ia mangkatahon, “Malas do uhur marbarita halani ai do parentah ni Jahowa. Dobkonsi tamat sikolah, marintis ma ahu. Malas do homa uhur halani boi mangojur na maposo mambahen hamajuon. Dob ai dihut ma ahu bani Sekolah Alkitab bagi Saudara Lajang. Itugaskon ma ahu bani sada ianan. Ijai lang adong halak na hujumpahi na ra mambahen hamajuon ronsi ididi, tapi sanina na legan adong. Hassi pe sonai malas do uhurhu halani boi dihut bani horja on.”​—Par. 11:6.

AHA OPE NA DAPOT ANGGO MARINTIS?

11. Horja aha ope na mambahen na maposo marmalas ni uhur?

11 Adong bahat horja ibagas organisasi ni Jahowa. Umpamani, bahat do Balei Harajaon na porlu ipajongjong. Jadi bahat do na maposo na dihut bani horja ai. Halani ianan ai boi pasangapkon goran ni Jahowa, ho pe boi do marmalas ni uhur dihut bani horja ai. Ho pe boi rap marhorja pakon sanina-botou. Janah bahat do na boi iparlajari ho halani mangihutkon tugah-tugah na ibere pengawas.

Sidea na mambere gok panorang laho mangidangi manjalo buei pasu-pasu (Idah paragrap 11-13)

12. Horja aha do na sirsir anggo marintis?

12 Sada sanina na margoran si Kevin mangkatahon, “Humbani na etek, domma marsura-sura ahu mambere gok panorang laho mangidangi Jahowa. Jadi, dob marumur 19 tahun, marintis ma ahu. Laho manggoki haporluanku, martukang ma ahu pakon sada sanina. Huparlajari ma sonaha padearhon tayub, jandela, pakon labah. Dob ai, sadokah dua tahun dihut ma ahu mangurupi padearhon Balei Harajaon ampa rumah ni sanina-botou na hona haba-haba. Dob hutangar  dong haporluan laho pajongjongkon Balei Harajaon i Afrika Selatan, huisi ma formulir. Dob ai iontang ma ahu hujai. I Afrika on, tiap piga-piga minggu pindah do hanami hun sada ianan hu ianan na legan laho pajongjongkon Balei Harajaon. Songon sada kaluarga do hanami. Rup marhorja, marlajar Bibel, janah dihut marbarita ijai. Lang husangka sonon malas ni uhurhu halani domma marsura-sura na dear humbani na etek.”

“Lang husangka sonon malas ni uhurhu halani domma marsura-sura na dear humbani na etek”

13. Mase na maposo boi martuah mangidangi i Betel?

13 Buei do na marintis, sonari marhorja i Betel. Bani Jahowa do ganup na ihorjahon ijai, janah buei do hasomanta ijai mangurupi pasirsirhon Bibel ampa publikasi na mangurupi halak marlajar hasintongan. Si Dustin, anggota Betel mangkatahon, “Sanggah marumur siah tahun, marsura-sura ma ahu gabe parintis, dobkonsi tamat sikolah marintis ma ahu. Dob sada satongah tahun iontang ma ahu hu Betel. Ijai, iajari ma ahu sonaha mamakei mesin cetak, dob ai mambahen program komputer. Malas tumang uhur halani hunjon ma boi huidah hamajuon ni organisasi laho mangurupi  halak manandai Jahowa janah marhasoman pakon-Si.”

AHA DO SURA-SURAMU?

14. Aha do na boi bahenonnima anggo sihol mambere gok panorang laho mangidangi?

14 Anggo ho sihol mambere gok panorang laho mangidangi, aha na boi bahenonmu? Marusaha ma pajengeskon parlahoumu. Basa janah parimbagaskon ma isi ni Bibel. Boi do homa mambere komentar i partumpuan. Sanggah sikolah, pasomal ma marbarita hubani na legan. Umpamani, parlajari sonaha cara na dear laho mambahen sungkun-sungkun janah tangar ma balos ni sidea. Boi do homa ho mangurupi kuria, songon paborsihkon ampa padearhon Balei Harajaon. Marosuh do Jahowa bani halak na toruh maruhur anjaha na ra mangurupi. (Basa Psalmen 110:3; Lah. 6:1-3) Songon si Timoteus iontang si Paulus do ia gabe misionaris halani “dear do baritani isaksihon hasoman” i kuria.​—Lah. 16:1-5.

Sanggah sikolah, pasomal ma marbarita hubani na legan

15. Ase dapot horja na boi mangurupi hanima marintis, aha do na porlu bahenonmu?

15 Ase boi marintis porlu do marhorja. (Lah. 18:2, 3) Jadi ase boi dapot horja na sosok, pindahi ma kursus na boi mangurupi pangidangionmu. Anjaha sahapkon ma sura-suramu ai bani sintua kaliling ampa parintis na legan ase ibere sidea podah na dear. Dob ai songon na ihatahon Bibel, “Ondoskon ma bani Jahowa sagala horjamu, ase saud haganup sura-suramu”.​—Pod. 16:3; 20:18.

16. Aha do gunani i pudian ni ari anggo ho marintis?

16 Pos ma uhurmu sihol do Jahowa ase “itangkap” ho hatuahon bani ari na laho roh. (Basa 1 Timoteus 6:18, 19.) Anggo humbani na maposo ho mambere gok panorang laho mangidangi, lambin dear ma paruhuranmu halani rap marhorja pakon parintis na legan. Marguna do homa ai sanggah ho marhajabuan. Halani sidea na domma marintis paima marhajabuan, somalni totap do sidea marintis dobkonsi marjabu.​—Rom 16:3, 4.

17, 18. Aha do na porlu ipingkirhon ho sanggah laho mambahen sura-sura?

17 Psalmen 20:5 mangkatahon, “Sai ibere [Jahowa] ma hu bamu harosuh ni uhurmu, anjaha ipasaud ma sura-suramu.” Sanggah mambahen sura-sura pingkirhon ma aha do harosuh ni Jahowa bamu. Pingkirhon ma homa aha do na ihorjahon Jahowa sonari. Dob ai dalankon ma harosuh-Ni.

18 Anggo igunahon hanima hagoluhanmu laho mangidangi ampa pasangapkon Jahowa, gabe martuah ma hanima. Tongon, “hamalaskon ma Jahowa, jadi bereon-Ni ma hubam harosuh ni uhurmu”.​—Ps. 37:4.

^ par. 7 Sonari gabe Sikolah bani Parbarita Harajaon.