Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Juli 2017

Mase Jahowa Talup Ipuji?

Mase Jahowa Talup Ipuji?

“Haleluya. . . . Tongon, jenges anjaha talup do puji-pujian sisonai.”​—PSALMEN 147:1.

DODING: 104, 152

1-3. (a) Sadihari do buku Psalmen 147 isuratkon? (b) Aha na boi iparlajari hita humbani Psalmen 147?

SOMAL do hita mamuji sasada halak halani parsahap atap pe parlahouni. Tarlobih ma Jahowa, talup do Ia ipuji! Sihol do uhurta mamuji-Si halani hagogohan-Ni na ipataridah marhitei tompaon-Ni ampa holong-Ni na ipataridah marhitei tobusan.

2 Sanggah ibasa hita Psalmen 147, taridah ma anggo panuratni sihol tumang mamuji Jahowa anjaha mangojur na legan ase mamuji Naibata rap pakonsi.​—Basa Psalmen 147:1, 7, 12.

3 Lang ibotoh hita ise na manuratkon Psalmen 147. Tapi ra do ai isuratkon dobkonsi halak Israel ipaluah Jahowa ase mulak hu Jerusalem hun Babel. (Ps. 147:2) Sihol do ia mamuji Jahowa halani boi use halak Israel mamuji-Si i huta ni sidea. Tapi, buei ope alasan na legan na ipatugahni mase Jahowa talup ipuji. Aha deba ai? Janah aha do  alasan ni nasiam mangkatahon “Haleluya” atap ‘Puji ma Jahowa’?

JAHOWA PAMALUMKON UHUR NA MAROSAK

4. Sanggah Raja Kores paluahkon halak Israel, sonaha pangahap ni sidea, janah mase?

4 Pingkirhon ma sonaha pangahap ni halak Israel sanggah i Babel. Irisai do sidea ijai janah ihatahon do bani sidea, “Dodingkon hanima ma bennami sada doding Sion!” Tapi seng marosuh halak Israel mandoding halani Jerusalem na mambahen sidea marmalas ni uhur domma irumbakkon. (Ps. 137:1-3, 6) Pusok do uhur ni sidea. Halani ai, porlu do sidea iapoh. Tapi domma ipatugah Naibata anggo Ia sihol mangurupi juakjuak-Ni marhitei Raja Kores hun Parsi na dob manaluhon Babel. Si Kores mangkatahon pasal Jahowa, ‘Isuruh do ahu pajongjong sada rumah Bani i Jerusalem. Barang ise humbani nasiam, na masuk hubani bangsa-Ni, sai ihasomani Jahowa, Naibatani ai ma ia. Tangkog ma ia!’ (2 Kron. 36:23) Tontu malas tumang ma uhur ni halak Israel na i Babel manangar ai!

5. Aha do bahenon ni Jahowa bani paruhur na marosak?

5 Ganupan do halak Israel iapoh Jahowa marsada-sada. Sonai do homa ibahen Jahowa sonari on. Panurat ni psalmen mangkatahon anggo Naibata ai ‘pamalumkon uhur na marosak, anjaha mambaluti ugah ni sidea’. (Ps. 147:3) Jadi, sanggah boritan atap pe pusok uhurta, sirsir do Jahowa mangapoh janah mangurupi hita. (Ps. 34:19; Jes. 57:15) Ibere do gogoh ampa hapentaran ase tartaron hita hasunsahan aha pe na masa hubanta.​—Jak. 1:5.

Sirsir do Jahowa mangapoh janah mangurupi hita

6. Parlajaran aha do na dapot hita humbani Psalmen 147:4? (Idah gambar bani alaman 15.)

6 Dob ai, ikawahkon panurat ni psalmen ma langit janah mangkatahon Jahowa do “manotapkon bilangan ni bintang anjaha idilo do ganup bani goranni”. (Ps. 147:4) Boi do ia mangidah bintang i langit tapi lang ibotoh sadiha bilanganni. Sonari, ibotoh ilmuwan do adong marmiliar bintang i galaksi, janah ra do adong martriliun galaksi i hasiangan on! Seng mangasup manisia mangetong bilangan ni bintang, tapi Panompa boi do. Sasintongni, itanda Jahowa do ganupan bintang ai janah ibere do ganup goranni bei. (1 Kor. 15:41) Gari bintang ibotoh Jahowa ija ganupan, sonai homa nasiam. Ibotoh Jahowa do ija nasiam, pangahapmu, ampa haporluanmu!

7, 8. (a) Aha do na ibotoh Jahowa pasal hita? (b) Bere ma sada contoh na pataridahkon idop ni uhur ni Jahowa.

7 Ibotoh Jahowa do aha na masa bani nasiam, anjaha margogoh do Ia laho mangurupi nasiam. (Basa Psalmen 147:5.) Ra do pangahapmu sunsah tumang pasaloseihon parsoalanmu. Tapi ibotoh Jahowa do sonaha  gogohta, janah “idingat do, orbuk do anggo hita”. (Ps. 103:14) Halani lang gokan dear, gati do hita lepak, janah ra do etek uhurta halani ai. Tontu isolsoli hita do parsahap ampa harosuhta na lepak, atap sanggah simburu hita! Hassi pe Jahowa gokan dear, tapi iarusi do sonaha sasintongni pangahapta.​—Jes. 40:28.

8 Ongga do iahapkon ham anggo Jahowa marhagogohon laho mangurupi parsoalanmu? (Jes. 41:10, 13) On ma na masa bani sada parintis na margoran si Kyoko. Sanggah pindah tugas ia, pusok do uhurni. Tapi hunja do ibotoh si Kyoko anggo Jahowa mangarusi pangahapni? Bani kuria na baru bahat do na mangurupisi. Pangahapni songon na mangkatahon on do Jahowa hu bani, “Holong do Ahu bamu, sedo halani parintis ho, tapi halani borung-Ku do ho na ra mandalankon harosuh-Ku. Sihol do Ahu ase ho marmalas ni uhur gabe saksing-Ku!” Sonaha Jahowa pataridahkon bamu anggo “seng tarsibar hapentaran-Ni”?

IPASIRSIR JAHOWA DO HAPORLUANTA

9, 10. Pangurupion aha do na siporlunan na ibere Jahowa? Bere ma contoh.

9 Ganup hita mamorluhon sipanganon, pakeian, atap pe rumah. Ra do haru uhurta pasal mansarihon sipanganonta. Tapi itompa Jahowa do tanoh on ase boi mambere buei sipanganon hubanta sonai homa bani “anak ni kawak, na siok-siok hu Bani”. (Basa Psalmen 147:8, 9.) Anggo kawak pe ipardiatei Jahowa, pos ma uhurta isarihon Jahowa do haganup haporluanta.​—Ps. 37:25.

10 Sipontingan, iurupi Jahowa do hita ase totap toguh haporsayaonta janah ibere do “damei ni Naibata, na mangatasi haganup paruhuron”. (Pil. 4:6, 7) Sada sanina na margoran si Mutsuo pakon parinangonni mangidah sonaha Jahowa mangurupi sidea. Sanggah masa tsunami i Japang bani tahun 2011, marusaha ma sidea manangkih tayub ni rumahni ase maluah. Ijia, bahat do magou arta ni sidea. Ibagas na saborngin ai, i loteng ma sidea, borgohan janah golapan. Sogodni, ipindahi sidea ma aha na boi mangojur sidea. Pitah Buku Kegiatan Saksi-Saksi Yehuwa 2006 do na dapot sidea. Sanggah ibuha si Mutsuo buku ai, ididah ma judul “Tsunami Terdahsyat yang Pernah Dicatat”. Bagian ai mangulas pasal lalou na masa i Sumatra bani tahun 2004, ai ma tsunami na siparahan na ongga masa. Tangis do sidea dob mambasa pangalaman ni sanina-botou ijai. Topat tumang do pangapohon ni Jahowa on bani sidea. Iurupi do homa sidea marhitei sanina-botou na pasirsirhon sipanganon ampa pakeian bani sidea. Tapi na mangojur tumang ai ma isuruh organisasi ma piga-piga sanina manrohi kuria ni sidea. Si Mutsuo mangkatahon, “Songon na dong Jahowa i tongah-tongahnami janah isarihon do hanami. Tarapoh tumang uhur!” Jadi, na siporlunan ipasirsir Naibata ai ma sonaha ase totap toguh haporsayaonta, dob ai pe ipasirsir ma haporluan siganup ari.

 MANDAPOT PANGURUPION NI NAIBATA

11. Aha do na porlu bahenonta ase mandapot pangurupion ni Naibata?

11 Jahowa “patoguhkon na lamlam” atap na toruh maruhur. Holong do Ia hubanta janah sirsir mangurupi hita. (Ps. 147:6a, Terjemahan Dunia Baru) Sonaha hita boi mandapot pangurupion ni Jahowa? Porlu do hita toruh maruhur ase toguh parhasomananta dompak Jahowa. (Sep. 2:3) Halak na toruh maruhur porsaya anggo Jahowa boi pasaloseihon ganup na geduk janah manasap ganup sitaronon ni sidea. Iharosuhkon Jahowa do halak sisonai.

12, 13. (a) Ase mandapot pangurupion ni Naibata, aha do na porlu isimbili hita? (b) Bani ise do Jahowa marosuh?

12 Dob ai, “ipatoruh [Jahowa] do halak parjahat das hu tanoh”. (Ps. 147:6b) Tontu lang ra hita ibahen sonai hubanta! Marosuh do hita ase mandapot idop  ni uhur-Ni. Jadi, hagigihon ma aha na ihagigihon-Si. (Ps. 97:10) Umpamani, halani magigi hita bani parriah-riahon, simbili ma aha pe na boi mambahen hita mangkorjahon sisonai, songon mangidah pornografi. (Ps. 119:37; Mat. 5:28) Sipata seng sai urah mandalankon na sintong. Tapi anggo marusaha hita, parohkon pasu-pasu do ai.

13 Sanggah hita manlawan hagalekonta, ai marosuh do Jahowa anggo bani na legan hita mangindo pangurupion? Lang. Halani ihatahon do, “seng dear uhur-Ni mangidah hagogohon ni huda”. Tapi ai marosuh do homa Ia anggo hita marpangunsandeian bani gogohta atap bani halak na legan? Jahowa “seng ihadearhon hae-hae ni dalahi.” (Ps. 147:10) Halani ai, maningon bani Jahowa ma hita marpangunsandeian. Tongtong ma pindo hu Bani pangurupion marhitei tonggo, halani seng ongga loja Ia manangar tonggonta. “Marosuh do Jahowa bani halak na mangkabiari-Si, na marpangarapan bani idop ni uhur-Ni.” (Ps. 147:11) Halani setia Ia janah mangkaholongi hita, tontu sirsir do Ia mangurupi hita mandalankon harosuh-Ni.

14. Bani aha do pos uhur ni panurat ni psalmen?

14 Jahowa patuduhkon anggo Ia sirsir mangurupi hita ibagas parsoalanta. Sanggah mulak hu Jerusalem halak Israel, panurat ni psalmen mamingkirhon sonaha Jahowa mangurupi sidea. Ia mandoding, “Ia do na patoguh oruk-oruk ni horbanganmu, ipasu-pasu do anakmu i tongah-tongahmu. Ibahen do nagorimu mardamei.” (Ps. 147:13, 14) Sasintongni, damei do pangahapni sanggah ipatoguh Jahowa horbangan ni huta ai. Janah pos do uhurni, ilinggomi Jahowa do juakjuak-Ni.

Sonaha Hata ni Naibata mangurupi sanggah hita holsohan? (Idah paragrap 15-17)

15-17. (a) Sonaha do ra pangahapta sanggah ibagas parsoalan, tapi sonaha Hata ni Naibata mangurupi hita? (b) Bere ma contoh na patuduhkon “doras do mardalan” hata ni Naibata mangurupi hita.

15 Sipata ra do holsohan hita halani dong parsoalan. Tapi ibere Jahowa do  hapentaran hubanta laho pasaloseihon ai. Panurat ni psalmen mangkatahon anggo Jahowa “manongos hata-Ni hu tanoh on, doras do mardalan tonah-Ni”. Dob ai, ipatugah ma pasal salju, namur, pakon udan sira-sira, janah isungkun ma, “Ise do na tahan bani borgohni?” Dob ai ihatahon ma “itongos [Jahowa] do hata-Ni gabe malala ma ai”. (Ps. 147:15-18) Pos ma uhurta urupan ni Jahowa do hita halani Ia mambotoh ganup na masa, boi mangkorjahon aha pe, janah markuasa bani udan sira-sira ampa salju.

Ai iahapkon nasiam do sonaha podasni panogu-noguan ni Jahowa?

16 Sonari, iurupi Jahowa do hita marhitei Bibel. Panurat ni psalmen mangkatahon “doras do mardalan” hata ni Jahowa laho mangurupi hita. Itogu Naibata do hita bani panorang na topat. Pingkirhon ma guna na idapot nasiam humbani Bibel, publikasi na ipasirsir “juakjuak na bujur anjaha na maruhur”, JW Broadcasting, jw.org, sintua, pakon sanina-botou. (Mat. 24:45) Ai iahapkon nasiam do sonaha podasni panogu-noguan ni Jahowa?

17 Sada botou na margoran si Mona, mangahapkon sonaha Hata ni Naibata mangurupisi. Ongga do ia maretek ni uhur janah marpangahap seng iharosuhkon Jahowa ia. Hassi pe sonai, totap do ia martonggo mangindo pangurupion ni Jahowa anjaha marlajar Bibel. Nini ma, “Huahapkon do Jahowa tongtong mangurupi janah manogu-nogu ahu.” On ma na mangurupi si Mona ase lang be maretek ni uhur.

18. Aha na mambahen nasiam dohor bani Jahowa, janah aha do alasan ni nasiam laho mamuji Jahowa?

18 Hinan, humbani ganup bangsa i tanoh on, pitah bangsa Israel do na ipilih Jahowa gabe juakjuak-Ni. Pitah bani bangsa ai ma ibere Naibata “hata-Ni” ampa “paraturan-Ni”. (Basa Psalmen 147:19, 20.) Sonari, sada hasangapon na banggal do hubanta halani boi gabe saksi ni Jahowa. Marmalas ni uhur do hita halani boi mananda Jahowa, itogu-togu marhitei Hata-Ni, janah boi marhasoman orot pakon-Si. Songon panurat ni Psalmen 147, buei do alasan banta laho mangkatahon “Haleluya” janah mangojur na legan ase dihut mamuji Jahowa.