Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Juli 2017

Jaga ma Pingkiranmu

Jaga ma Pingkiranmu

ADONG na laho mamorangi nasiam! Ai ma Sibolis. Igunahonni ma sada sinjata na boi pakahouhon pingkiran ni nasiam. Aha ma ai? Marhitei hatorangan na lepak!

Ibotoh si Paulus marbahaya tumang do ladung ni Sibolis. Tapi buei do halak Kristen na lang mambotoh ai. Umpamani, piga-piga halak Kristen i Korint marpangahap toguh do sidea ibagas partonduyon janah iagan sidea lang boi Sibolis pakahouhon sidea. (1 Kor. 10:12) Ai ma ase ibere si Paulus sipasingat bani sidea, “Tapi biar do uhurhu songon si Hawa nasiam, na pinaoto-oto marhitei akal-akal ni ulog, gabe seda pingkiran nasiam, anjaha manirpang humbani bulus ni uhur dompak Kristus.”​—2 Kor. 11:3.

Sipasingat si Paulus pataridahkon ase ulang marpangahap toguh do dirinta. Ase ulang kahou hita bani ladung ni Sibolis, maningon ibotoh ma bahayani ladung ni Sibolis anjaha sonaha carani manjaga pingkiranta.

SONAHA DO PANGKORHON NI HATORANGAN NA LEPAK AI?

Somalni ipakei do hatorangan na lepak laho pakahouhon atap pe mangoto-otoi halak. Bani buku Propaganda and Persuasion, ihatahon ma “sambor janah geduk” do hatorangan na lepak ai. Pasal on, gati do iahap halak artini ‘ladung, akal-akal, ampa na pakahouhon.”

Marbahaya tumang do hatorangan na lepak ai halani boi pakahouhon pingkiran, tapi lang ibagas pambotohonta. Usih ma ai songon gas na marracun na lang taridah janah lang marbau. Sahalak ilmuwan na manangkasi pasal parlahou ni jolma, margoran si Vance Packard mangkatahon banggal do pangkorhon ni hatorangan ai “lobih humbani na ipingkirhon hita”. Ilmuwan na  legan mangkatahon, halani hatorangan na lepak, boi do sasada halak gabe mangkorjahon na jahat songon genosida (mamunuh sada suku), marporang ampa mangarsik-arsik halak halani suku atap ugama.​—Easily Led—A History of Propaganda.

Anggo manisia pe boi pakahouhon na legan, tarlobih ma Sibolis. Halani domma iarusi ia sonaha jolma humbani masa ni si Adam. Anjaha, ia do use “na manrajai tanoh on. Halani ai, ipakei do dunia on laho pararatkon ladungni. (1 Joh. 5:19; Joh. 8:44) Sibolis do na “pakahouhon haganup dunia on” janah ‘ipapitung do pingkiran’ ni buei halak. (2 Kor. 4:4; Pangk. 12:9) Jadi, aha ma na boi ibahen nasiam ase ulang ipakahou?

PATOGUH MA HAPORSAYAON NI NASIAM

Iajari Jesus do hita ase ulang kahou halani hatorangan na lepak, “Tandaon nasiam ma hasintongan in, anjaha paluahon ni hasintongan in ma nasiam.” (Joh. 8:31, 32) Sada tantara i parporangan, porlu do mambotoh hatorangan na sintong, halani ra do munsuh pararatkon ladung laho pakahouhon sidea. Jadi, ija ma boi dapot hita hatorangan na sintong? Ipasirsir Jahowa do ai marhitei Bibel. Ijai ma boi ibotoh hatorangan na mangurupi hita ase ulang kahou bani ladung ni Sibolis.​—2 Tim. 3:16, 17.

Tontu ibotoh Sibolis do on. Halani ai igunahon ia ma dunia on ase marayoh hita mambasa janah marimbagaskon isi ni Bibel. Jadi, ulang ma ra ipakahou “akal-akal ni sibolis”! (Ep. 6:11) Sobali ai, lang sungkup pitah mambotoh ajaran dasar hun Bibel. Tapi maningon bagas do pangarusionta bani ajaran ni Bibel. (Ep. 3:18) Sada panurat na margoran si Noam Chomsky mangkatahon, “Humbani tubuh, lang mintor adong hasintongan ai ibagas uhurmu. Maningon pindahonmu do ai.” Jadi maningon ipindahi hita ma ai ‘ganup ari manangkasi Surat in.’​—Lah. 17:11.

Ase ulang kahou hita bani ladung ni Sibolis, maningon ibotoh ma bahayani ladung ni Sibolis anjaha sonaha carani manjaga pingkiranta.

Lang marosuh Sibolis anggo iarusi atap ipingkirhon hita hasintongan ai. Mase? Lambin urah ma kahou hita anggo “lang bagas pangarusionta”. (Media and Society in the Twentieth Century) Halani ai, ulang ma maurahtu porsaya bani sada hatorangan. Tapi dear ma lobei ipingkirhon. Anjaha ibere Naibata do banta “uhur hapantason” ampa “partimbangon”. Jadi gunahon ma ai  laho patoguhkon haporsayaon ni nasiam.​—Pod. 2:10-15; 3:21.

JAGA MA HADAMEION

Halani manangar hatorangan na lepak, ganup tantara boi do gabe mabiar janah lang ra marporang. Anjaha sidea samah sidea pe boi do gabe maringori atap pe papuligkon dirini humbani hasomanni. Bani sada surat kabar i Jerman, mangkatahon talu do tantara Jerman sanggah Porang Dunia I halani manangar hatorangan na lepak, songon na hona hipnotis do sidea. Sonai homa ma ibahen Sibolis laho mamosah kuria. Marusaha ma ia ase maringori sanina-botou. Atap ibahen do homa ase halak na i kuria marpingkir na geduk do organisasi ni Jahowa janah lang sintong, anjaha itadingkon sidea ma ai.

Halani ai ulang ma ra ipakahou! Tapi irikkon ma podah hun Bibel anjaha jaga ma hadameion i kuria. Umpamani, iojur Bibel do hita ase “marsisasapan dousa” anjaha podas pasaloseihon parsalisihan. (Kol. 3:13, 14; Mat. 5:23, 24) Sobali ai, ipasingat do hita ase ulang papuligkon diri humbani kuria. (Pod. 18:1) Halani ai pingkirhon ma sonaha ase ulang kahou nasiam bani ladung ni Sibolis. Rimangi ma, ‘Porini dong sanina atap pe botou na mambahen borit uhurmu, sonaha do bahenonmu? Ise do na ipasonang ham, Jahowa do atap Sibolis?’​—Gal. 5:16-26; Ep. 2:2, 3.

TOTAP MA TENGER UHURMU

Tantara na lang setia bani kopalani, boi do gabe lang be dear ia marporang. Marusaha do munsuhni padaskon hatorangan na lepak ase lang ihaporsayai sidea be kopalani. Umpamani, anggo kopalani lepak, nini munsuh ai bani sidea, “Ulang ma porsayai sidea, anjaha ulang ma halani sidea gabe magou ho!” Sonai homa ma na ibahen Sibolis. Marusaha do ia ase lang porsaya nasiam bani pambobai na ipilih Jahowa.

Sonaha do nasiam boi manjaga pingkiran? Totap ma setia bani organisasi ni Jahowa. Tongtong ma tangihon pambobai na ipilih Naibata hassi pe lang gokan dear sidea. (1 Tes. 5:12, 13) Gati do halak na murtad atap pe panipu pabajan-bajankon organisasi ni Jahowa. (Tit. 1:10) Hassi pe songon na tongon hata ni sidea ai, tapi ulang ma “urah idugur nasiam”. (2 Tes. 2:2) Tapi dalankon  ma podah ni si Paulus bani si Timoteus, “Totap ma ham bani na dob ginuruhonmu” anjaha dingat ma “ise na mangajarhonsi bamu.” (2 Tim. 3:14, 15) Halani ai pingkirhon ma buktini na mambahen porsaya nasiam bani juakjuak na maruhur na ipilih Jahowa, na dob mangajarhon hasintongan hira-hira saratus tahun.​—Mat. 24:45-47; Heb. 13:7, 17.

ULANG MA MABIAR

Marusaha do Sibolis ase gabe buraon nasiam. Ai ma sada carani laho pakahouhon nasiam. Boi do halak buraon “halani manangar hatorangan na lang ibotoh sidea hasintonganni”. (Easily Led—A History of Propaganda) Profesor Philip M. Taylor hun Inggris mangkatahon anggo halak Assur, laho manaluhon munsuhni, ipabiar-biar do lobei janah ipararat ma hatorangan na lepak. Sonai homa ma Sibolis. Marusaha do ia ase mabiar hita bani pangarsik-arsikon, hamatean, jolma, ase ulang be hita mangidangi Jahowa.​—Jes. 8:12; Jer. 42:11; Heb. 2:15.

Ulang ma nasiam mabiar! Jesus mangkatahon, “Ulang ma habiari hanima sibunuh angkula, ai legan ni ai aha pe lang tarkahua sidea be.” (Luk. 12:4) Porsaya ma bani janji ni Jahowa na laho mangurupi nasiam, janah bereon-Ni do “hagogohon na sumurung” bani nasiam laho manlawan akal-akal ni Sibolis.​—2 Kor. 4:7-9; 1 Ptr. 3:14.

Tontu, sipata ra do hita galek atap pe mabiar. Tapi dingat hita ma hata ni Jahowa bani si Josua, “Pir ma tonduymu anjaha totap uhurmu, ulang gobir anjaha mabiar, ai Jahowa Naibatamu do hasomanmu, barang huja pe ho laho.” (Jos. 1:9) Sanggah holsohan nasiam, patugah ma ai bani Jahowa ibagas tonggo. Porsaya ma “damei ni Naibata, na mangatasi haganup paruhuron, in ma manramotkon uhur ampa pingkiran nasiam”. Ibere do gogoh bani nasiam ase boi manlawan ladung ni Sibolis.​—Pil. 4:6, 7, 13.

Ai idingat nasiam do ladung na ipadas si Rabsake laho pabiar-biarhon juakjuak ni Naibata? Sihol do ia ase porsaya sidea lang adong na boi manlinggomi sidea hassi pe Jahowa. Anjaha ihatahon ma homa Jahowa do na manuruh halak Assur laho manrumbakkon Jerusalem. Aha ma balos ni Jahowa? “Ulang ho mabiar pasal hata na dob binogeimu, na dob niapaskon ni juakjuak ni Raja Assur hu Bangku.” (2 Raj. 18:22-25; 19:6) Jadi, isuruh Jahowa ma sada malekat laho mamunuh 185.000 halak Assur ibagas saborngin!​—2 Raj. 19:35.

MARUHUR MA—TONGTONG MANANGIHON JAHOWA

Ongga do nasiam manonton sada film, adong sada halak na lang ibotohni, domma ioto-otoi ia. Dob ai nini nasiam ma, ‘Eeh ulang porsaya! Domma ioto-otoi ham!” Jadi bayangkon ma malekat mangkatahon bani nasiam, “Ulang ma ra ham ioto-otoi Sibolis!”

Jadi ulang ma tangihon ladung ni Sibolis. (Pod. 26:24, 25) Tapi tangihon ma Jahowa janah tongtong ma porsaya hu Bani. (Pod. 3:5-7) Holong do Ia bamu janah iojur do ham, “Maruhur ma, ale anakku, anjaha pamalas ma uhurhu.” (Pod. 27:11) Anggo idalankon ham ai, gabe boi ma ham manjaga pingkiranmu!