Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Januari 2018

Jahowa do “na Mambere Gogoh bani Halak na Loja”

Jahowa do “na Mambere Gogoh bani Halak na Loja”

Ayat tahunan bani 2018: Sai dapotan gogoh do halak na martenger ni uhur bani Jahowa.​—JES. 40:31.

DODING: 3, 47

1. Sitaronon aha do na iahapkon hita, anjaha mase malas uhur ni Jahowa mangidah hita? (Tonggor ma gambar bani alm. 9.)

BAHAT do sitaronon ibagas goluhta. Umpamani, bahat do sanina-botou na boritan, na matua janah sunsah mansari duit. Dong do homa na maningon mangurus kaluargani na matua. Janah dong do homa lang pitah sada parsoalanni tapi bahat tumang. Haganupan ai boi do mambahen nasiam gabe loja atap pe galek. Hassi pe sonai, totap do porsaya nasiam anggo Jahowa sihol mangurupi nasiam. Janah porsaya do nasiam, na laho sasapon ni Jahowa do ganup sitaronon. Halani porsaya nasiam bani Jahowa, on mambahen malas uhur-Ni!

2. Sonaha do Jesaya 40:29 boi mangapoh hita, tapi hasalahan aha do sipata na ibahen hita?

2 Sipata halani mabahattu parsoalanta, songon na borat tumang ma iahap hita manaron ai. Juakjuak ni Naibata sapari pe ongga do mangahapkon sisonai. (1 Raj. 19:4; Job 7:7) Tapi aha do na mambahen sidea totap toguh? Marpangunsandeian do sidea bani Jahowa. Bibel  mangkatahon anggo Jahowa “mambere gogoh bani halak na loja”. (Jes. 40:29) Sanggah dong parsoalan, dong piga-piga juakjuak ni Naibata na marpangahap anggo na mangidangi Jahowa ai, mambahen sidea lambin sunsah. Halani ai, dong do na gabe lang martumpu, lang mambasa Bibel ampa marbarita. Gabe malas ma uhur ni Sibolis halani ai.

3. (a) Sonaha do hita boi patoguhkon haporsayaonta? (b) Aha do na sihol iulas hita bani artikel on?

3 Seng marosuh Sibolis anggo haporsayaonta totap toguh bani Naibata. Janah ibotohni do homa anggo ringgas hita marbarita, ai boi mambahen haporsayaonta lambin toguh. Halani ai anggo dong parsoalan, ulang ma mandaoh humbani Jahowa. Bibel mangkatahon, “Pargogohan-Ni anjaha pajonamon-Ni do nasiam.” (1 Ptr. 5:10; Jak. 4:8) Bani artikel on, ulas hita ma Jesaya 40:26-31. Ayat ai patuduhkon sonaha do Jahowa boi mampargogohi hita. Dob ai iulas hita homa dua situasi aha do na boi mambahen hita galek. Anjaha sonaha hita boi mandalankon podah hun Bibel, na mangurupi hita ase boi martahan.

NA MARTENGER NI UHUR BANI JAHOWA DAPOTAN GOGOH

4. Aha do na iparlajari hita humbani Jesaya 40:26?

Sihol do Jahowa mangurupi hita ase boi toguh haporsayaonta Bani

4 Basa Jesaya 40:26. Lang dong halak na mambotoh sadia do bilangan ni bintang i langit. Pitah bani galaksinta tumang, porsaya do ilmuwan dong 400 miliar bintang. Tapi, ibahen Jahowa do ganup goran ni bintang ai. Jadi aha do parlajaranni hubanta? Gari bintang ipardiateihon Jahowa do, tarlobih ma hita na mangidangi-Si, sedo halani tarpaksa tapi halani holong. (Ps. 19:2, 4, 15) Bibel mangkatahon, “Gari haganup jambulan na bani ulunima in, domma ibilangi.” (Mat. 10:30) Halani ai, ibotoh Jahowa do sonaha hita sasintongni. Anjaha “ibotoh Jahowa do ari ni halak na daulat”. (Ps. 37:18) On patuduhkon, ibotoh Jahowa do ganup parsoalanta anjaha sihol do Ia mambere hagogohon banta ase boi martahan.

5. Mase hita porsaya anggo Jahowa boi mangurupi hita sanggah dong sitarononta?

5 Basa Jesaya 40:28. Jahowa do Harohan ni gogoh atap pe tenaga. Rimangi ma pasal tenaga ni mata ni ari. Dong sada ilmuwan na margoran David Bodanis mangkatahon, tiap sadetik tenaga ni mata ni ari sarupa ma ai songon marjuta-juta tenaga ni bom atom na mapultak. Ilmuwan na legan mangkatahon, tiap sadetik tenaga mata ni ari boi do mambere tenaga listrik bani manisia sadokah 200.000 tahun! Parlajaranni, halani Jahowa do na manompa mata ni ari ai, tontu Ia boi do mambere hita hagogohon sanggah dong sitaronon.

6. Mase boi ihatahon pasangan atap kuk ni Jesus ai hampung?

 6 Basa Jesaya 40:29. Parrohkon malas ni uhur do mangidangi Jahowa. Ongga Jesus do mangkatahon bani susianni, “Jalo nasiam ma pasangan-Ku.” Janah nini use, ‘Ase dapotan hasonangan nasiam. Ai lamlam do pasangan-Ku, anjaha hampung do na Hupaporsankon.’ (Mat. 11:28-30) Ai tongon do ai? Sipata ra do songon na marayoh hita laho martumpu atap pe marbarita. Tapi dobkonsi hita mulak hunjai, gabe malas ma uhurta. Jadi, ai do artini na hampung do pasangan atap kuk ni Jesus ai.

7. Saritahon ma sada pangalaman na patuduhkon sintong do na ihatahon Mateus 11:28-30?

7 Dong sada botou na bahat na boritni, halani ai gabe sunsah ma ia roh hu partumpuan. Tapi, sanggah roh ia martumpu, itangarni ma sada ambilan na mangojursi. Nini botou ai ma, “Ambilan ai mangulas pasal na maretek ni uhur. Tarapoh tumang huahap. Halani ai, gabe tariluh ma ahu. Jadi hubotoh ma ponting tumang do hape partumpuan ai.” Malas tumang uhurni halani marusaha ia nongkan ai roh hu partumpuan!

8, 9. Aha do artini sanggah si Paulus mangkatahon “Ibagas hagalekon do gabe gok hagogohon”?

8 Basa Jesaya 40:30. Ra do bahat na boi ibahen nasiam. Tapi tong do adong na lang boi tarbahen nasiam. Maningon idingat hita ma ai. Sonai homa ma na iahapkon si Paulus. Sanggah ia patugahkon na ibagas uhurni bani Jahowa, ihatahon Jahowa ma bani, “Ibagas hagalekon do gabe gok hagogohon.” Jadi iarusi si Paulus do aha na ihatahon Jahowa ai hubani. Halani ai ihatahon si Paulus ma, “Sanggah galek ahu, ijai do ahu margogoh.” (2 Kor. 12:7-10) Aha do artini ai?

9 Ibotoh si Paulus dong do na lang boi tarbahensi. Halani ai ma, porlu do ia pangurupion. Jadi ibere Naibata ma hu bani hagogohon sanggah galek ia. Anjaha marhitei hagogohon ni Naibata, si Paulus pe gabe boi do mangkorjahon aha na lang boi tarbahensi. Sonai homa ma hita, anggo ibere Naibata hagogohon hubanta, hita pe boi do gabe toguh!

10. Sonaha do Jahowa mangurupi si Daud?

10 Gati do si Daud iurupi Naibata marhitei tonduy na pansing. Halani ai ma ihatahon si Daud, “Marhasoman Ham tardorab ahu do hulanan ni bala, mangunsagahkon Naibatangku tarlumpat ahu do tembok.” (Ps. 18:30) Sipata sitarononta usih do songon tembok na ginjang na lang tarlumpati. Jadi, porlu do pangurupion ni Jahowa.

11. Sanggah dong sitaronon, sonaha do tonduy na pansing boi mangurupi hita?

11 Basa Jesaya 40:31. Haluhuy atap pe leto na banggal, seng boi dokah habang anggo pitah mamakei gogohni sandiri. Tapi halani dong logou na mangurupi leto ai, gabe boi ma ia habang gijang janah dokah. Sonai homa ma, anggo nasiam ibagas sitaronon, rimangi ma sonaha do haluhuy habang. Tongtong ma pindo pangurupion ni Jahowa. Jahowa pe ra do mambere tonduy na pansing hubanta sanggah  ihaporluhon hita, tarlobih ma sanggah dong parsalisihan pakon sanina-botou i kuria. (Joh. 14:26) Tapi, ai mase ma boi adong parsalisihan i kuria?

12, 13. (a) Mase sipata dong parsalisihan pakon sanina-botou? (b) Humbani na masa bani si Josep, parlajaran aha do na boi dapot hita?

12 Sipata dong parsalisihan halani hita ganupan domma mardousa. Halani ai, ra do adong halak na legan na mambahen borit uhurta, anjaha hita sandiri pe ra do mambahen borit uhur ni sidea. Ra do on mambahen sunsah pangahapta. Tapi ai ma panorangni hubanta laho patuduhkon anggo hita setia bani Jahowa. Sonaha carani? Maningon marusaha ma hita mardear pakon sanina-botou. Dingat ma hassi pe lang gokan dear sidea, tapi holong do Jahowa bani sidea. Halani ai, hita pe maningon mangkaholongi sidea.

Seng itadingkon Jahowa si Josep, sonai homa do nasiam (Tongor ma paragrap 13)

13 Ipaturut Jahowa do juakjuak-Ni manaron sitaronon. Sonai ma na masa bani si Josep. Sanggah poso ope ia, bahat do saninani na simburu bani. Halani ai ma, ijual sidea do si Josep gabe jabolon anjaha iboban hu tanoh Masir. (1 Mus. 37:28) Tontu borit do uhur ni Jahowa mangidah hasoman-Ni na setia ibahen sonai. Tapi ipaturut Jahowa do sitaronon ai masa bani si Josep. Dobkonsi piga dokah ihatahon do use si Josep laho mansedai parinangon ni si Potipar, gabe ipamasuk ma ia hu penjara. Sahali nari ipaturut Jahowa do ganup na masa ai bani si Josep. Hassi pe sonai lang itadingkon Jahowa si Josep. Bibel mangkatahon “ihasomani Jahowa do ia, anjaha aha na hinorjahonni itumpaki Jahowa do.”​—1 Mus. 39:21-23.

14. Aha do gunani anggo hita lang urah manringis?

14 Siusihan na legan ai ma si Daud. Bahat do halak lang ongga mangahapkon sitaronon songon na iahapkon si Daud. Anggo hita hasoman ni Naibata lang dear anggo hita mardomdom. Si Daud mangkatahon, “Ampogi [padaoh] ma ringis, tadingkon gila, ulang marsogam ni uhur, ai mambobai huhajahaton do hansa in.” (Ps. 37:8) Jadi,  ponting do padaohkon ringis halani hita sihol mangusihi Naibata Jahowa. Nini si Daud use, “Seng ibahen hu banta romban hubani dousanta”, tapi isasap Jahowa do. (Ps. 103:10) Dong do homa gunani anggo hita lang maringis. Umpamani, lang be hona darah tinggi, panahit lever, borit boltok pakon na legan. Anjaha anggo hita manringis, lang dear be hita marpingkir, parsahap atap parlahounta pe boi mambahen borit uhur ni hasoman. Jadi parlahou sisonai boi mambahen pusok uhurta. Halani ai, dearan ma totap lamlam. Bibel mangkatahon, “Sipahisar angkula do uhur na lamlam.” (Pod. 14:30) Jadi, aha do bahenonta anggo dong na mambahen borit uhurta, anjaha aha na porlu bahenonta ase boi mardamei? Hita boi mandalankon podah ni Bibel.

SANGGAH SANINA-BOTOU MAMBAHEN BORIT UHURTA

15, 16. Aha do na boi bahenonta anggo do halak na mambahen borit uhurta?

15 Basa Epesus 4:26. Anggo dong halak na lang sisombah Jahowa mambahen borit uhurta, ra do domma somal pangahapta ai. Tapi anggo dong sanina-botou na mambahen borit uhurta, on mambahen sunsah tumang pangahapta. Ai urah do hita manalpuhon ai? Ai totap do hita mardomdom? Atap mintor idalankon hita do podah hun Bibel laho pasaloseihon parsualan ai? Anggo lalab hita sipsip, ai boi mambahen hita lambin susah mardear pakon sidea.

16 Anggo dong sanina-botou na mambahen borit uhurmu, ai totap do idingat-dingat nasiam ai? Aha do na boi ibahen nasiam ase boi mardear pakon sidea? Parlobei, Martonggo ma bani Jahowa ase dear holi parsahapan ni nasiam. Anjaha dingat homa anggo ia pe hasoman ni Jahowa do. (Ps. 25:14) Halani bujur do Naibata bani hasoman-Ni, Ia pe sihol do ase hita mangusih-Si. (Pod. 15:23; Mat. 7:12; Kol. 4:6) Paduahon, pingkirhon ma aha na sihol sahapkononmu. Ulang mintor marpangahap na sangaja do ia mambahen borit uhurmu. Ra do dong parsualan ai halani na lang marsiarusan do nasiam. Halani ai ma, martoruh ni uhur ma nasiam mangkatahon ahu pe dong do na lepak hubahen, dob ai boi do homa ipungkah nasiam parsahapan janah mangkatahon, “Atap ahu do na urah borit uhurhu. Tapi nantuari sanggah ham marsahap, huahap . . . ” Tapi anggo parsahapan nasiam lang dear hasilni, ulang ma mintor mandolei. Tonggohon nasiam ma ai, anjaha pindo ma pangurupion bani Jahowa ase boi nasiam mardingat parlahouni saninamu ai na dear. Anjaha pos ma uhurmu, malas do uhur ni Jahowa anggo nasiam marusaha mardamei pakon ganup sanina-botou ai ma hasoman ni Naibata.

SUNSAH HALANI TOTAP MARDINGAT-DINGAT DOUSA NA DOB SALPU

17. Sanggah hita mambahen dousa na banggal, sonaha do Jahowa mangurupi hita ase mardear pakon-Si? Anjaha mase maningon ra hita iurupi Jahowa?

17 Dong do piga-piga halak na marpangahap lang dong be gunani ia  manombah Jahowa, halani domma mambahen dousa na banggal. Anjaha ai pe boi do homa mambahen ia lang be martuah. Sonai ma na masa bani Raja Daud. Ia mangkatahon, “Ai sadokah huhasipkon dousangku, reong do holi-holingku ibahen tangisku ganup ari. Ai sai idondoni tangan-Mu do ahu arian pakon borngin.” Ujungni ihatahon si Daud use, “Hupabotohkon ma Bamu dousangku” anjaha “isasap Ham do utang ni dousangku”. (Ps. 32:3-5) Jadi, anggo nasiam mambahen dousa na banggal, ra do Jahowa manasap dousamu ai. Anjaha Ia sihol mangurupi nasiam ase mardear pakon-Si. Tapi nasiam pe maningon ra do manjalo pangurupion humbani sintua. (Pod. 24:16; Jak. 5:13-15) Anggo lalap ipadokah-dokah nasiam paponopkon dousamu ai, boi do lang maluah nasiam bani ari ni Jahowa. Tapi, aha do na boi bahenonmu anggo totap susah pangahapmu, hassi pe dousamu domma isasap?

18. Humbani pangalaman ni si Paulus, parlajaran aha do na boi dapot hita?

18 Sipata sunsah do pangahapni si Paulus halani dousani na hinan. Ia mangkatahon, “Ai ahu do sietekan humbani apostel in, na seng talup namin goranon apostel, halani na dob huparburu kuria ni Naibata.” Anjaha ihatahonni use “Tapi halani idop ni uhur ni Naibata do, ase sonon ahu nuan.” (1 Kor. 15:9, 10) Ibotoh Jahowa do anggo si Paulus ai manisia na mardousa, janah domma isalpuhon Jahowa ganupan dousani. Anjaha marosuh do Jahowa ase ibotoh si Paulus ai. Jadi anggo nasiam tongon-tongon mambahen hamubahon, anjaha domma mangakui dousamu ai bani Jahowa ampa sintua, porsaya ma domma isalpuhon Jahowa ai!​—Jes. 55:6, 7.

19. Aha do ayat tahunan bani tahun 2018, anjaha mase ma ayat ai porlu idingat hita?

19 Lambin dohor hamarsikon banggal, lambin bahat do hasunsahan. Tapi dingat hita ma anggo Naibata Jahowa “mambere gogoh bani halak na loja, anjaha halak na so margolle ibahen do hinsah”. Jadi boi do ipargogohi Jahowa nasiam ase totap setia hu Bani. (Jes. 40:29; Ps. 55:23; 68:20) Sadokah tahun 2018, tiap hali roh hita martumpu hu Balei Harajaon ididah anjaha idingat hita ma ayat tahunan on: Sai dapotan gogoh do halak na martenger ni uhur bani Jahowa.​Jes. 40:31.