“Martuah ma bangsa, na mar-Naibatahon Jahowa”—PS. 144:15.

DODING: 111, 109

1. Mase boi ihatahon na masa sonari on legan pakon na hinan?

NA MASA sonari on legan tumang do pakon na hinan. Songon na ipatugah bani Bibel, ipatumpu Naibata do sonari humpulan na banggal “humbani ganup bangsa, suku, marga, ampa hata”. Sidea ihatahon do homa “bangsa na gogoh” janah bilanganni ni sidea sonari dong lobih ualuh juta halak. Malas do uhur ni sidea “marugas Bani [Naibata] arian pakon borngin”. (Pangk. 7:9, 15; Jes. 60:22) Lape ongga sonai bahatni halak na mangkaholongi Naibata pakon hasomanni sahaporsayaon.

2. Aha do na ihaholongi bueinan halak bani panorang parpudi? (Tonggor ma gambar bani alm. 21.)

2 Tapi dong homa ipatugah Bibel anggo bani panorangta sonari on, bahat do halak na lang mangkaholongi Naibata. Pitah dirini sandiri do na ipingkirhon sidea. Sosok do on songon na ihatahon apostel Paulus. Ia mangkatahon buei do jolma bani panorang parpudi na ‘mangkaholongi dirini, paruhur duit’, ampa “holongan bani hisap ni daging ase bani Naibata”.  (2 Tim. 3:1-4) Lang martuah halak sisonai, anjaha boi do mambahen sunsah halak na legan.

3. Bani artikel on, aha do na sihol iulas hita? Mase?

3 Domma ibotoh si Paulus bahat do holi halak na lang mangkaholongi Naibata. Halani ai ma, ipasingat si Paulus do hita ase ‘manimbili’ atap padaohkon diri humbani halak sisonai. (2 Tim. 3:5) Tontu lang sai urah mangkorjahon ai. Halani ai, aha do na boi ibahen hita ase ulang songon sidea, janah sonaha do hita boi mambahen malas uhur ni Jahowa? Bani artikel on, ipareksa hita ma sonaha do halak na mangkaholongi Naibata ampa na lang, songon na ipatugah bani 2 Timoteus 3:2-4. Anjaha hita pe boi mamareksa diri ase mambotoh aha do na sasintongni ihaholongi hita, janah ise do na maningon ihaholongi hita ase martuah.

MANGKAHOLONGI NAIBATA DO ATAP DIRI SANDIRI?

4. Mase lang salah anggo hita mangkaholongi dirinta sandiri?

4 Ipatugah si Paulus do nongkan bani panorang parpudi “mangkaholongi dirini ma jolma ijai.” Jadi, ai salah do anggo hita mangkaholongi dirinta sandiri? Lang. Sasintongni maningon holong do hita bani dirinta sandiri, halani sonai do hita itompa Jahowa. Jesus pe mangkatahon, “Maningon haholonganmu do hasomanmu doskon dirimu.” (Mrk. 12:31) Jadi anggo lang ihaholongi hita dirinta, hita pe lang boi mangkaholongi halak na legan. Ipatugah Bibel do homa hubanta, “Haholongan ni paramangon parinangonni bei, songon angkulani sandiri. Na mangkaholongi parinangonni, dirini do hinaholonganni ijai. Seng ongga isogami jolma dagingni, tapi iparmudu-mudu anjaha isarihon do ai.” (Ep. 5:28, 29) Jadi torang ma ibotoh hita maningon ihaholongi hita do dirinta sandiri.

5. Sonaha do halak na lalab mamingkirhon dirini sandiri?

5 Tapi halak na mangkaholongi dirini sandiri songon na ipatugah bani 2 Timoteus 3:2, ai ma halak na lalab mamingkirhon dirini sandiri. (Basa Rom 12:3.) Anjaha lang parduli ia bani halak na legan. Anggo dong parsoalan, halak na legan do na isalahkon janah lang ra ia mangakui salahni. Lang martuah halak sisonai.

Halak na mangkaholongi Naibata, dear do parlahou ni sidea

6. Sonaha do parlahou ni halak na mangkaholongi Naibata?

6 Piga-piga pakar Alkitab patorangkan mase si Paulus parlobei mangkatahon pasal halak na mamingkirhon dirini sandiri. Halani anggo sasada halak domma mangkaholongi dirini sandiri, gabe lambin sambor ma parlahouni. Ai ma mungkahni ia gabe marparlahou na sambor songon na isuratkon bani buku 2 Timoteus Bindu 3 ai. Tapi anggo halak na mangkaholongi Naibata, dear do parlahou ni sidea. Marmalas ni uhur do sidea, damei, marlumbang ni uhur, basar, marlayak-layak atap marsibere-bere, marhaporsayaon, lamlam, ampa boi manrajai diri. (Gal. 5:22, 23) Panurat ni buku Psalmen mangkatahon, “Martuah ma bangsa, na mar-Naibatahon Jahowa.” (Ps. 144:15) Halani Naibata na martuah do  Jahowa, juakjuak ni pe gabe martuah do homa. Tapi anggo halak na mamingkirhon dirini sandiri lang martuah, halani pitah manjalo dassa sidea. Anggo juakjuak ni Naibata martuah do sidea halani ra mambere bani halak na legan.​—Lah. 20:35.

Aha do na porlu ibahen hita ase ulang gabe mamingkirhon diri sandiri? (Tonggor ma paragrap 7)

7. Sungkun-sungkun aha do na porlu irimangi hita laho mambotoh ise do na ihaholongi hita?

7 Ai holongan do hita bani dirinta sandiri marimbangkon bani Naibata? Ase ibotoh hita aha do na ihaholongi hita, pingkirhon ma podah on, “Ulang ma maruhur haut atap marhasangapon na lumei, tapi ibagas toruh ni uhur hira nasiam ma hasoman nasiam lobihan humbani nasiam sandiri! Ulang ma na porlu bani nasiam paruhurhon nasiam, tapi dihut ma na bani hasoman!” (Pil. 2:3, 4) Anjaha sungkun ma dirimu, ‘Ai hudalankon do podah ai? Ai marusaha do ahu mangkorjahon aha na iharosuhkon Naibata? Ai marusaha do ahu mangurupi sanina-botou? Ai ringgas do ahu marbarita?’ Tongon lang sai urah mangkorjahon ganupan ai. Ra do adong horja na maningon itadingkon hita, ase boi mangurupi halak na legan. Tapi anggo marusaha hita mandalankon podah ai, gabe marmalas ni uhur ma hita anjaha Naibata pe marmalas ni uhur hubanta!

8. Aha do na ibahen piga-piga halak Kristen halani mangkaholongi Naibata?

8 Halani mangkaholongi Naibata Jahowa, dong do piga-piga halak Kristen na manadingkon horjani. Umpamani dong sada botou na margoran si Ericka, dokter do ia. Hassi pe sonai marintis do ia. Botou ai pakon paramangonni domma mangidangi bani piga-piga nagori. Ia mangkatahon, “Bahat tumang do pangalaman na idapot hanami halani marbarita mamakei bahasa na legan. Janah gabe bahat do homa hasomannami.  On ma mambahen malas tumang uhurnami.” Totap ope botou ai marhorja gabe dokter. Tapi bahatan do panorangni ibahen laho mangurupi halak ase mananda Jahowa, ampa mangurupi sanina-botou.

ARTA NA I SURGA DO ATAP I TANOH ON?

9. Mase halak na mangkaholongi duit lang boi martuah?

9 Ihatahon si Paulus bahat do holi halak na “paruhur duit”, atap na mata duitan. Bani piga-piga tahun na salpu, dong sada parintis i Irlandia, marbarita bani sada dalahi. Ipakaluar dalahi ai ma duitni humbani dompetni, janah nini ma, “On do Naibatangku!” Tongon jarang do halak na mangkatahon songon dalahi ai. Tapi humbani parlahou ni sidea, taridah ma duit do sasintongni naibata ni sidea. Pitah duit dassa na ipingkirhon sidea. Hassi pe sonai ipasingat Bibel do, “Halak na marsinta-sintahon pirak, seng anjai bosur ia humbani pirak; anjaha barang ise na gok uhurni bani habayakon, seng sombuh homa halani pansarianni.” (Par. 5:9) Jadi halak na mangkaholongi duit, lang ongga marnasungkup pangahapni duit ai. Anjaha seng marnaloja ia mangindahi duit. Parohkon “buei sitaronon” do ai bani halak sisonai.​— 1 Tim. 6:9, 10.

10. Aha do na ihatahon Bibel pasal habayakon ampa hamiskinon?

10 Sasintongni porlu do duit. Halani boi do ai gabe parlinggoman banta. (Par. 7:12) Tapi porini pargoluhan ni sasada halak sungkup-sungkup mangan dassa, ai boi do ia martuah? Boi! (Basa Parambilan 5:11.) Pardiateihon ma aha na isuratkon si Agur, anak ni si Jeke, “Ulang ma bere Ham bangku hamiskinon atap habayakon, tapi bere Ham ma bangku sipanganon ansa na porlu.” Jadi ipindo dalahi ai ase ulang ma ia gabe miskin. Halani pangahapni anggo miskin ia, boi gabe panangko ma holi ia. Halani ai, gabe tarbador ma goran ni Jahowa. Tapi mase lang ipindoni habayakon? On ma balosni, “Ase ulang, anggo marlobih-lobih ahu, huporsou Ham, anjaha huhatahon: Ise Jahowa?” (Pod. 30:8, 9) Tapi, ra do ongga jumpah ham halak na porsayanan bani arta marimbangkon Naibata.

11. Aha do na ihatahon Jesus pasal duit?

11 Halak na holong bani duit, lang boi pamalaskon uhur ni Naibata. Sosok ma on songon na ihatahon Jesus, “Seng tarbalosi sada halak dua tuan. Sai sogam do uhurni bani na sada, haholonganni na sada nari, hombaranni do na sada, anjaha mapas uhurni bani na sada nari. Seng tarbalosi nasiam Naibata rap pakon Mammon!” Ihatahonni do use, “Ulang ma patumpu-tumpu hanima arta bennima i tanoh on, bani ianan na targagat tasik ampa ngitngit, bani ianan na tarhurak anjaha tartangko panangko! Tapi patumpu-tumpu hanima ma arta bannima i nagori atas, bani ianan na so targagat tasik ampa ngitngit, bani ianan na so tarhurak anjaha tartangko panangko.”​—Mat. 6:19, 20, 24.

12. Aha do gunani anggo hita lang patumpu-tumpuhon bahat arta? Saritahon ma sontohni.

12 Bahat do juakjuak ni Naibata na lang patumpu-tumpuhon bahat arta, ase boi mambere gok panorang laho mangidangi Jahowa. Halani ai do na mambahen malas uhur ni sidea. Umpamani, dong sada sanina na margoran si Jack na tading i Amerika Serikat. Ijualni ma rumah ampa partapakanni ase ia pakon parinangon boi marintis. Ia mangkatahon, “Mungkahni lang urah huahap  laho manjual partapakan ampa rumahnami na jenges. Tapi hudingat use daskonsi i rumah pe ahu, totap ope pusok uhurhu halani masalah i parhorjaan. Tapi anggo parinangonku, tongtong do malas uhurni halani marintis. Nini parinangonku do, ‘Malas do uhurhu boi marhorja bani bos na sibujuran!’ On ma na mangojur ahu ase marintis. Sonari on, malas do uhurnami halani rap mangidangi Jahowa.”

‘Ai boi do taridah humbani parlahouku anggo ahu porsaya bani podah ni Bibel pasal duit?’

Aha do na porlu ibahen hita ase ulang gabe mata duiton? (Tonggor ma paragrap 13)

13. Hunja ibotoh hita anggo hita na mata duitan do atap lang?

13 Hunja ibotoh hita anggo hita na mata duitan do atap lang? Sungkun hita ma dirinta: ‘Ai boi do taridah humbani parlahouku anggo ahu porsaya bani podah ni Bibel pasal duit? Ai duit do na siporlunan ibagas goluhku? Ai arta do na siporlunan bangku marimbangkon Jahowa pakon sanina-botou? Ai porsaya do ahu sai bereon ni Jahowa do ganup haporluanku?’ Pos ma uhurta sai bereon ni Jahowa do haporluanta anggo hita marpangunsandeian hu Bani!​—Mat. 6:33.

MANGKAHOLONGI NAIBATA DO ATAP HASONANGAN?

14. Ai salah do anggo hita sihol pasonangkon dirinta? Mase?

14 Ipatugah Bibel do bani panorang parpudi bahat do holi halak “na holongan bani hisap ni daging”, atap pitah mamingkirhon hasonangan. Songon na dob iulas hita, lang salah anggo hita mangkaholongi dirinta atap pe mansari duit, tapi ulang ma ai na gabe siporlunan. Sonai homa ma, lang salah anggo hita sihol pasonangkon dirinta. Tapi dong do piga-piga halak na marpandapot anggo sidea lang boi pasonangkon dirini. Sasintongni ihatahon Bibel do bani juakjuak ni Naibata, “Laho ma, pangan ma rutimu ibagas malas ni uhur, anjaha inum ma anggurmu ibagas sonang ni uhur.”​—Par. 9:7.

15. Aha do artini halak na “holongan bani hisap ni daging” atap pitah mamingkirhon hasonangan?

15 Na ipatorang bani 2 Timoteus 3:4 ai ma halak na pitah mamingkirhon hasonangan anjaha lang be mamingkirhon Naibata. Bani ayat ai dong do ihatahon, holongan do halak bani hisap ni daging atap hasonangan, “ase bani Naibata”. Hassi pe sonai, ayat ai lang mangartihon banggalan holong ni sidea bani hasonangan marimbangkon Naibata. Songon na ihatahon sahalak pakar Alkitab, ayat ai “mangartihon lang dong otik pe holong ni sidea bani Naibata”. Porlu tumang do on ase ipingkirhon halak na pitah mamingkirhon hasonangan. Jadi ipatugah Bibel anggo halak na pitah mamingkirhon hasonangan, ai ma halak na lalab marsonang-sonang ibagas goluhni.​—Luk. 8:14.

16, 17. Sonaha do Jesus patuduhkon lang salah anggo sihol pasonangkon diri?

16 Jesus pe patuduhkon banta lang salah anggo sihol pasonangkon diri. Umpamani, ongga do ia roh hu pesta parhajabuan ampa “pesta mangan-mangan na banggal”. (Joh. 2:1-10; Luk. 5:29) Sanggah i pesta parhajabuan ai, bois ma anggur ni sidea. Jadi iubah Jesus ma bah gabe anggur. Bani panorang na legan, halani ra Jesus mangan ampa minum pakon halak na legan,  ihata-hatai halak ma ia. Tapi ipatugah Jesus ma na salah do pamingkirion ni sidea ai.​—Luk. 7:33-36.

17 Hassi pe sonai lang hasonangan na siporlunan bani Jesus. Tapi mangkorjahon harosuh ni Jahowa ampa mangurupi halak na legan, ai do na siporlunan bani. Anjaha ra do ia matei laho mangkopkop jolma. Ihatahon Jesus do bani sidea na sihol mangirikkonsi, “Martuah ma hanima anggo irehei halak hanima barang iparburu, barang ipatubuh-tubuh bagei ni hata na masambor, na so tongon dompak hanima halani Ahu! Malas ma uhurnima anjaha marolob-olob, ai banggal do upahnima i nagori atas, ai sonai do iparburu nabi-nabi na parlobei hun bennima.”​—Mat. 5:11, 12.

Aha do na porlu ibahen hita ase ulang gabe pitah mamingkirhon hasonangan? (Tonggor ma paragrap 18)

18. Hunja ibotoh hita anggo hita lang mambahen hasonangan na gabe siporlunan?

18 Hunja ibotoh hita anggo hita lang mambahen hasonangan na gabe siporlunan? Sungkun ma dirimu: ‘Ai hiburan do na siporlunan bangku marimbangkon martumpu atap pe marbarita? Na ija do siporlunan, na huharosuhkon do atap mangidangi Jahowa? Sonaha do pangahap ni Jahowa bani hiburan na hupilih on?’ Halani holongta bani Naibata, sihol do hita padaohkon diri humbani aha pe na ibotoh hita lepak, janah padaohkon diri humbani aha pe na iahap hita mambahen pusok uhur ni Jahowa.​—Basa Mateus 22:37, 38.

CARANI ASE BOI MARTUAH

19. Halak na sonaha do na tongon-tongon martuah?

19 Domma dong hira-hira 6.000 tahun ibahen Sibolis manisia gabe sunsah. Bani panorang parpudi on, bahat tumang do halak na mangindahi na porlu bani dirini sandiri, mata duitan, ampa pitah marsonang-sonang. Anjaha pitah mamingkirhon untung bani dirini sandiri do sidea. Lang martuah halak sisonai! Tapi ihatahon Bibel do, “Martuah ma halak, na mambahen Naibata ni si Jakob gabe pangurupini, na marpangarapan bani Jahowa Naibatani.”​—Ps. 146:5.

20. Aha do na iahapkon nasiam halani mangkaholongi Naibata?

20 Juakjuak ni Naibata tongon-tongon do mangkaholongi Jahowa. Tiap tahun bahat do halak na sihol mananda Jahowa anjaha mangkaholongi-Si. On patuduhkon anggo Harajaon ni Naibata domma mamarentah, anjaha lang piga dokah nari laho ibere Naibata ma bahat pasu-pasu hubanta. Anggo ihorjahon hita na iharosuhkon Jahowa, gabe marmalas ni uhur ma Ia, anjaha hita pe marmalas ni uhur do homa. Tongtong do marmalas ni uhur halak na mangkaholongi Jahowa! Bani artikel na mangihut, iulas hita ma use sonaha do parlahou ni halak na mamingkirhon dirini sandiri. Anjaha iulas hita homa sonaha parlahou ni juakjuak ni Naibata legan pakon sidea.