Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Januari 2018

Acara Pardingatan na Pasadahon Hita

Acara Pardingatan na Pasadahon Hita

“Tonggor ma, naha dearni ampa naha jengesni, anggo rap hundul na marsanina!”​—PS. 133:1.

DODING: 18, 14

1, 2. Bani tahun 2018, acara aha do na mambahen juakjuak ni Naibata marsada, anjaha mase? (Tonggor ma gambar bani alm. 9.)

BANI tanggal 31 Maret 2018, marjuta halak i sab tanoh on roh bani acara Pardingatan Hamatean ni Jesus na ibahen sahali satahun. Acara ai ipungkah dobkonsi sundut mata ni ari. Lang dong acara sisonai i tanoh on, halani marhitei acara ai, ganup juakjuak ni Jahowa boi marsada.

2 Tontu malas do uhur ni Jahowa pakon Jesus mangidah marjuta halak i sab tanoh on, roh bani acara Pardingatan Hamatean ni Jesus. Sidea na roh ai igambarhon do songon “humpulan na banggal, na so boi bilangan ni atap ise, humbani ganup bangsa, suku, marga, ampa hata” na marsurak: “Bani Naibatanta, na hundul bani paratas in do haluahon, ampa bani Anak ni biribiri in!” (Pangk. 7:9, 10) Tontu acara na ponting do on, halani bani panorang ai bahat do halak na martarimakasih bani Jahowa pakon Jesus halani pambahenan ni sidea!

3. Sungkun-sungkun aha do na laho iulas hita bani artikel on?

3 Bani artikel on iulas hita ma sungkun-sungkun on:  (1) Aha do na porlu hubahen ase boi mandapot guna humbani acara Pardingatan? (2) Sonaha do acara Pardingatan ai boi pasadahon juakjuak ni Naibata i sab tanoh on? (3) Aha do na boi hubahen laho mardamei pakon sanina-botou? (4) Ronsi attigan do hita mambahen acara Pardingatan ai?

NA PORLU IBAHEN HITA ASE MANDAPOT GUNA HUMBANI ACARA PARDINGATAN

4. Mase ponting ase hita roh hu acara Pardingatan?

Ipardiateihon Jahowa pakon Jesus do halak na marusaha roh hu acara Pardingatan

4 Mase ponting ase hita roh hu acara Pardingatan ai? Halani ijai do hita manombah Jahowa. Ipardiateihon Jahowa pakon Jesus do halak na marusaha roh hu acara Pardingatan. Tongon sipata halani situasi, adong do na lang boi roh. Tapi anggo marusaha hita roh hu partumpuan ai, isuratkon Jahowa ma goranta bani “buku pardingatan” atap pe “buku hagoluhan”. Goran-goran na isuratkon bani buku ai, ai ma sidea na laho mandapot hagoluhan sadokah ni dokahni.​—Mal. 3:16; Pangk. 20:15.

5. Bani minggu-minggu paima Pardingatan, aha do na maningon irimangi hita?

5 Apostel Paulus mangkatahon, “Lajou nasiam ma diri nasiam, atap na ibagas haporsayaon do nasiam.” Jadi bani piga-piga minggu paima acara Pardingatan, ponting do ase hita gati martonggo janah mamingkirhon sonaha do parhasomananta pakon Jahowa. (Basa 2 Korint 13:5.) Sungkun hita ma dirinta: ‘Ai porsaya do ahu pitah on dassa organisasi na ipilih Jahowa laho mangkorjahon harosuh-Ni? Ai marusaha do ahu marbarita ampa mangajarhon hasintongan bani halak na legan? Ai porsaya do ahu anggo sonari hita domma manggoluh bani panorang parpudi, anjaha laho iripaskon do dunia na jahat on?’ Ai totap ope toguh haporsayaonku bani Jahowa songon mungkahni sanggah ahu ididi? (Mat. 24:14; 2 Tim. 3:1; Heb. 3:14) Anggo ipingkirhon hita balosni ai, taridah ma na toguh do atap lang haporsayaonta bani Jahowa.

6. (a) Aha do na porlu ibahen hita ase mandapot hagoluhan na sadokah ni dokahni? (b) Aha do na ibahen sada sintua laho pasirsirhon uhurni paima acara Pardingatan, anjaha sonaha hita boi mangusihisi?

6 Sada cara na boi ibahen hita laho pasirsirhon uhur bani acara Pardingatan, ai ma marhitei mambasa ampa mamingkirhon artikel na patorangkon mase acara ai ponting. (Basa Johannes 3:16; 17:3.) Anggo hita sihol mandapot hagoluhan na sadokah ni dokahni, maningon itanda hita ma Jahowa anjaha porsaya bani Jesus. Jadi paima acara Pardingatan, parlajari ma artikel na mambahen nasiam lambin mangkaholongi Jahowa. On ma na ibahen sada sintua. Sadokah martahun-tahun, ipatumpuni do majallah Menara Pengawal na mangulas mase acara Pardingatan  ai ponting. Jadi bani piga-piga minggu paima acara ai, ibasani ma use artikel-artikel ai janah mamingkirhon parlajaranni. Sipata anggo dong sada atap dua majallah na mangulas pasal acara ai, isimpanni do ai use. Halani sonai ibahenni, sai tong do adong parlajaran na baru na idapotni. Na siporlunan, lambin toguh ma holongni bani Jahowa pakon Jesus. Anggo iusihi hita sanina ai, lambin toguh ma homa holongta bani Jahowa pakon Jesus. Anjaha lambin martarimakasih ma hita bani aha na dob ibahen sidea. Marhitei na marlajar ai, bahat do guna na idapot hita sanggah roh hu acara ai.

ACARA PARDINGATAN BOI PASADAHON HITA

7. (a) Aha do na itonggohon Jesus bani borngin paima matei ia? (b) Aha do buktini anggo Jahowa mambalosi tonggo ni Jesus?

7 Bani borngin paima matei Jesus, martonggo do ia ase susianni boi marsada songon ia na dob marsada pakon Jahowa, Bapani. (Basa Johannes 17:20, 21.) Ibalosi Jahowa do tonggo ni Anak-Ni ai. Taridah do balos ni tonggo ni Jesus ai, humbani hasadaon ni juakjuak ni Naibata sonari on. Bani acara Pardingatan, marjuta halak i sab tanoh on, hassi pe legan do sukuni, tapi roh do sidea bani acara ai, janah porsaya do sidea anggo Jahowa do na manuruh Jesus roh hu tanoh on. Bani piga-piga ianan lang somal anggo halak na marlegan-legan suku rap martumpu. Janah dong homa na lang marosuh bani suku na legan. Tapi legan do anggo Jahowa pakon Jesus. Malas do uhur ni sidea mangidah juakjuak-Ni marsada bani acara ai.

8. Aha do na ipatugah Jahowa bani si Hesekiel?

8 Pasal hasadaon ni juakjuak ni Naibata, domma dokah ipatugah Jahowa marhitei si Hesekiel. Isuruh Jahowa ma si Hesekiel mambuat dua tungkot. Bani tungkot na sada isuratkon ma “Juda” pakon na sada nari “Josep”. Dob ai, ipasada ma haduasi tungkot ai. (Basa Hesekiel 37:15-17.) Bani Menara Pengawal bulan Juli 2016 i bagian “Pertanyaan Pembaca” ihatahon, “Marhitei nabi Hesekiel ipatugah Jahowa do na laho mulak do use juakjuak-Ni hu Tanoh Parpadanan, anjaha marsada ma sidea gabe sada bangsa. Ihatahon use anggo juakjuak ni Naibata, marsada do holi sidea bani ari parpudi.”

9. Bani acara Pardingatan, sonaha do juakjuak ni Naibata boi marsada songon na ipatugah si Hesekiel hinan?

9 Bani mungkahni tahun 1919, iatur ampa ipasada Jahowa ma halak na iminaki. Sidea ai ma na ihatahon tungkot bani “Juda”. Dob ai lambin buei ma halak na marpangarapan laho manggoluh i tanoh on. Sidea ihatahon do tungkot bani “Josep”. Marjanji do Jahowa laho mambahen haduasi tungkot ai “gabe sada tungkot” bani tangan-Ni. (Hes. 37:19) Ibahen Jahowa ma halak na iminaki pakon ‘biribiri na legan’ gabe “sada hulanan”. (Joh. 10:16; Sak. 8:23) Anjaha taridah do ai sonari, halani rap do sidea mangidangi Jahowa. Anjaha Jesus do na gabe Raja ni sidea, na igambarhon si Hesekiel songon si Daud. (Hes. 37:24, 25) Bani  acara Pardingatan, taridah do halak na iminaki pakon biribiri na legan rap martumpu janah marsada. Saud do on songon na ihatahon Jahowa marhitei si Hesekiel. Tapi sonaha do hita marsada-sada boi manjaga hasadaon pakon sanina-botounta?

AHA NA BOI IBAHEN HITA LAHO MANJAGA HASADAON?

10. Sonaha hita boi manjaga hasadaon pakon sanina-botou?

10 Aha do na parlobei, na boi ibahen hita laho manjaga hasadaon? Maningon martoruh ni uhur ma hita. Sanggah Jesus i tanoh on, ipasingatni do susianni ase martoruh ni uhur. (Mat. 23:12) Bahat do halak i sab dunia on mangahap dirini lobihan humbani halak na legan. Tapi anggo martoruh ni uhur hita, hormat do hita bani pambobai i kuria anjaha ra mangihutkon tugah-tugah na ipadas sidea. Ai do na mambahen adong hasadaon ibagas kuria. Na siporlunan anggo martoruh ni uhur hita, on boi mambahen malas uhur ni Jahowa, halani “iimbang Naibata do sigijang uhur, tapi ibere do idop ni uhur bani na toruh maruhur”.​—1 Ptr. 5:5.

11. Aha ope na boi mangurupi hita manjaga hasadaon pakon sanina-botou?

11 Aha do na paduahon, na boi ibahen hita laho manjaga hasadaon? Bani  piga-piga minggu paima acara Pardingatan, anjaha sanggah acara ai, pingkirhon ma aha do artini ruti pakon anggur na dong bani acara ai. (1 Kor. 11:23-25) Ruti na so marragi manggambarhon angkula ni Jesus na lang martikas. Anggur manggambarhon daroh ni Jesus. Tapi lang sungkup pitah mambotoh ai. Pingkirhon homa holong ampa pambahenan ni Jahowa pakon Jesus. Halani holong-Ni, Jahowa ra mambere Anak-Ni gabe tobusan. Anjaha halani holong do hubanta ase Jesus ra mambere dirini bahen tobusan. Anggo irimangi hita ai, lambin banggal ma holongta bani sidea. Holongta hubani Jahowa ma na boi mambahen hita manjaga hasadaon pakon sanina-botou.

Manjaga hasadaon do hita anggo ra manalpuhon hasalahan (Tonggor ma paragrap 12, 13)

12. Aha do na iparlajari hita humbani sarita ni Jesus pasal sada raja pakon jabolonni?

12 Aha do na patoluhon, na boi ibahen hita laho manjaga hasadaon? Maningon ra do hita manalpuhon hasalahan ni hasomanta. Anggo ibahen hita sonai, ai patuduhkon anggo hita martarimakasih bani Jahowa, na ra manasap dousanta marhitei tobusan ni Jesus. Ipatugah Jesus ponting tumang do ase hita manalpuhon hasalahan. Laho patorangkon pasal ai, isaritahonni ma pasal sada raja pakon jabolonni. Basa ma Mateus 18:23-34, janah sungkun ma dirimu sandiri: ‘Ai ra do ahu mandalankon aha na iajarhon Jesus? Ai sabar do ahu anjaha ra mangarusi pangahap ni sanina-botou? Ai ra do ahu manalpuhon hasalahan ni halak na mambahen borit uhurhu?’ Tongon sipata adong do dousa na banggal na mambahen hita sunsah manalpuhon ai. Tapi humbani sarita ni Jesus ai, ibotoh hita ma aha do harosuh ni Jahowa hubanta. (Basa Mateus 18:35.) Jesus patugahkon anggo lang ra hita manalpuhon hasalahan ni hasomanta, Jahowa pe seng ra manasap dousanta. Porlu ma ase idingat hita ai. Jadi ase boi marsada pakon sanina-botou, maningon ra ma hita manalpuhon salah ni sidea.

13. Mase hita porlu mardamei pakon sanina-botou?

13 Anggo hita ra manalpuhon salah ni hasomanta, ai patuduhkon anggo hita manjaga hadameion pakon sanina-botou. Jadi ipatugah si Paulus do ase hita marusaha manjaga hasadaon ampa hadameion. (Ep. 4:3) Bani minggu-minggu paima acara Pardingatan, ampa sanggah acara ai, rimangi ma sonaha do pambahenanta bani sanina-botou. Pingkirhon ma on, ‘Ai boi do ididah halak anggo ahu lang mardomdom bani halak na mambahen borit uhurhu?’ Ai boi do ididah halak anggo ahu marusaha mardamei ampa marsada pakon na legan?’

14. Sonaha do hita boi ‘marsianjuan ibagas uhur na holong’?

14 Aha do na paompathon, na boi ibahen hita laho manjaga hasadaon? Ai ma mangusihi sonaha do Jahowa pataridahkon holong. (1 Joh. 4:8) Ulang ma ihatahon hita, “Maningon sabar do namin ahu bani sanina-botou, tapi lang pala maningon huhaholongi sidea.” Anggo sonai do pangahapta, hita lang mandalankon podah na ihatahon si Paulus ase “marsianjuan ma nasiam ibagas uhur na holong”. (Ep. 4:2) Ijon  si Paulus lang pitah mangkatahon “marsianjuan ma nasiam”, tapi maningon idalankon do ai “ibagas holong”. I kuria, marlegan-legan do sifatni sanina-botou. Hassi pe sonai, holong do Jahowa bani sidea janah itogu do sidea hu hasintongan. (Joh. 6:44) Halani ihaholongi Jahowa sidea, hita pe maningon do mangkaholongi sidea.​—1 Joh. 4:20, 21.

RONSI ATTIGAN DO HITA MAMBAHEN ACARA PARDINGATAN?

15. Ai tongtong do hita mambahen acara Pardingatan Hamatean ni Jesus?

15 Ai tongtong do hita mambahen acara Pardingatan Hamatean ni Jesus? Lang. Halani ihatahon si Paulus do bani halak Kristen na iminaki anggo sidea mambahen acara Pardingatan, artini ai sidea patugahkon ‘parmatei ni Jesus ronsi roh Ia’. (1 Kor. 11:26) Anjaha sanggah Jesus mansaritahon pasal ari parpudi, ipatugahni do homa pasal parrohni. Ipatugah Jesus do homa aha na masa sanggah hamarsikon banggal, ‘Taridah ma i langit tanda ni Anak ni Jolma in, gabe mandoruhi ma ganup bangsa na i tanoh on, ai idahon ni sidea ma Anak ni Jolma in roh i atas ni hombun ni langit, marhasoman hagogohon ampa hasangapon banggal. Anjaha suruhonni ma malekatni martarompit na gogoh parsorani, jadi patumpuon ni sidea ma halak na dob pinilih ai humbani desa na ualuh in, hun ujung ni langit na sada das hubani na sada nari.’ (Mat. 24:29-31) Humbani ayat on, ibotoh hita laho patumpuhon ni Jesus do hu surga “halak na dob pinilih”, ai ma halak na iminaki na dong ope i tanoh on. On masa dobkonsi hamarsikon banggal ipungkah, tapi paima porang Harmagedon. Bani porang ai, lang pitah Jesus mamorangi raja-raja na i tanoh on, tapi dihut do 144.000 halak na iminaki. Anjaha monang do sidea. (Pangk. 17:12-14) Jadi hita mambahen acara Pardingatan ronsi “roh” Jesus laho patumpuhon halak na iminaki hu surga.

16. Mase marusaha hita ase boi roh hu acara Pardingatan bani tahun on?

16 Dingat ma lang tongtong hita mambahen acara Pardingatan ai. Jadi marusaha ma hita ase roh hu acara Pardingatan bani tanggal 31 Maret 2018. Martonggo ma bani Jahowa ase nasiam ibere pangurupion laho manjaga hasadaonta. (Basa Psalmen 133:1.) Maharga tumang do hasadaonta bani acara Pardingatan. Halani ai, jaga hita ma hasadaonta ai.