Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Februari 2017

Pasaudkonon ni Jahowa do Sura-Sura-Ni!

Pasaudkonon ni Jahowa do Sura-Sura-Ni!

“Songon na dob Huhatahon, sonai do pamasaon-Ku, aha na dob Huranggihon, ai do bahenon-Ku.”JESAYA 46:11.

DODING: 147149

1, 2. (a) Aha do na ipatugah Naibata Jahowa hubanta? (b) Aha do janji ni Naibata Jahowa na isuratkon bani buku Jesaya 46:10, 11 pakon 55:11?

SONON ma hata na parlobei na isurat ibagas Bibel, “Bani mula ni mulani itompa Naibata ma langit pakon tanoh.” (1 Mus. 1:1) Otik do hansa na boi iarusi hita pasal na tinompa ni Jahowa. Sontohni angkasa, lihar, ampa hukum gravitasi. (Par. 3:11) Tapi torang do ipatugah Jahowa pasal harosuh-Ni bani manisia ampa tanoh on. Hita itompa usih songon rupa-Ni, anjaha rosuh do Ia ase manisia boi manggoluh i tanoh on janah martuah. (1 Mus. 1:26) Sihol do Ia ase hita gabe anak-Ni, anjaha Ia gabe Bapanta.

2 Humbani buku 1 Musa bindu tolu, ibotoh hita adong na lang marosuh anggo saud sura-sura-Ni ai. (1 Mus. 3:1-7) Tapi seng dong na boi manlanglangi Jahowa. (Jes. 46:10, 11; 55:11) Pos do uhurta anggo Jahowa boi pasaudkon sura-sura-Ni domu bani panorangni!

3. (a) Hasintongan aha do na iparlajari hita ibagas Bibel? (b) Mase porlu iulas hita on? (c) Sungkun-sungkun aha do na laho ibalosi?

 3 Domma ibotoh hita aha do sura-sura ni Naibata bani manisia pakon tanoh on, janah sonaha do ai saud marhitei Jesus. On do hasintongan na parlobei na iparlajari hita ibagas Bibel. Halani ai, sihol do hita ase halak na legan pe mambotoh on. On ma panorang na topat hita boi mangontang sidea hu Pardingatan Hamatean ni Jesus bani tahun on. (Luk. 22:19, 20) Anggo sidea roh hu acara ai, lambin bahat ma na ibotoh sidea pasal sura-sura ni Naibata hubanta. Jadi pingkirhon ma sonaha hita mangojur sidea ase roh hu Pardingatan ai. Bani artikel on, iulas hita ma tolu sungkun-sungkun on: Aha do sura-sura ni Naibata bani manisia ampa tanoh on? Mase lape saud ai? Janah mase hamatean ni Jesus porlu tumang laho pasaudkon harosuh ni Naibata?

AHA DO SURA-SURA NI NAIBATA?

4. Sonaha na tinompa boi “mambaritahon hamuliaon ni Naibata”?

4 Sitompa na pentar tumang do Jahowa ai. Ganup na itompa-Ni dear tumang. (1 Mus. 1:31; Jer. 10:12) Aha do na boi iparlajari hita humbani tompaon? Ganup na ibahen Jahowa taratur, adong gunani, janah mambahen longang uhurta. Ambah ni ai, pingkirhon ma sel na dong bani angkulanta, anak na baru tubuh, ampa jengesni sundut mata ni ari. Ganupan ai mambahen hita longang. Mase? Halani hita itompa boi mambotoh aha na jenges atap na lang.Basa Psalmen 19:2; 104:24.

5. Aha do na ibahen Jahowa ase ganup tompaon-Ni boi mardalan taratur?

5 Ibahen Jahowa do aturan bani ganup tinompa-Ni ase mardalan taratur. (Ps. 19:7-9) Sontohni dong aturan bani hasiangan on pakon aturan pasal parlahou bani manisia. Dong bei do ianan ampa gunani ganup na itompa i hasiangan on. Songon hukum gravitasi boi mambahen udara totap adong i tanoh on ampa bah na i laut boi pasang surut. Ganupan ai porlu do bani hagoluhan on. Anggo lang adong hukum gravitasi, lang adong hagoluhan i tanoh on. Hunjai taridah dear do sura-sura ni Naibata bani tanoh on ampa manisia. Sanggah marbarita, hita boi mangurupi na legan ase mananda Sitompa hita.Pangk. 4:11.

6, 7. Aha do sibere-bere ni Naibata bani si Adam pakon si Hawa?

6 Sihol do Jahowa ase manisia manggoluh sadokah ni dokahni i tanoh on. (1 Mus. 1:28; Ps. 37:29) Bahat do sibere-bere ni Naibata hubani si Adam ampa si Hawa (Basa Jakobus 1:17.) Ibere Jahowa do bani sidea habebason mamilih. Ibahen do homa sidea boi mangkaholongi, janah boi martuah sanggah marhasoman. Ipatugah Jahowa do bani sidea sonaha mangkorjahon na madear. Iajari do si Adam mangurus dirini sandiri, mangurus pinahan-pinahan, ampa tanoh on. (1 Mus. 2:15-17, 19, 20) Ibere do pangidah, pandai, panganggoh, ampa panangar ase boi iahapkon sidea ganup na  madear na ibahen Jahowa. Ganupan on mambahen sidea marmalas ni uhur manggoluh i tanoh on. Buei do horja na dear bani sidea. Anjaha tongtong do adong na baru na boi iparlajari sidea.

7 Aha ope na iharosuhkon Jahowa? Jahowa marosuh ase si Adam ampa si Hawa, marginompari janah manggoki tanoh on. Ia sihol ase namatoras mangkaholongi niombahni, usih songon Jahowa mangkaholongi si Adam pakon si Hawa. Ibere do tanoh on gabe ianan na jenges bani manisia sadokah ni dokahni.Ps. 115:16.

MASE LAPE SAUD AI?

8. Mase ibere Naibata titah bani si Adam pakon si Hawa?

8 Tapi na tarjadi lang songon na iharosuhkon Jahowa. Aha na masa? Ibere do titah bani si Adam pakon si Hawa ase ibotoh dong do batas bani habebason ni sidea. Ia mangkatahon, “Boi do panganonmu humbani ganup hayu na i pohon on, tapi anggo humbani hayu pambotohan ni na madear ampa na masambor in, seng bulih panganonmu; halani ijin ipangan ho hunjai, maningon matei do ho.” (1 Mus. 2:16, 17) Sasintongni lang payah mandalankon parentah ai, halani bahat tumang do buah na boi ipangan ijai.

9, 10. (a) Aha do na ihatahon Sibolis pasal Naibata Jahowa? (b) Aha do na ipilih manisia na parlobei ai ma si Adam pakon si Hawa? (Idah gambar bani alaman 3.)

9 Marhitei ulog, Sibolis mambahen si Adam pakon si Hawa ase lang manangihon Jahowa. (Basa 1 Musa 3:1-5; Pangk. 12:9) Halani Jahowa mangkatahon sidea lang boi mangankon ‘sagala buah ni hayu na i pohon ai’, ai ma dalan na ibahen Sibolis laho pakahouhon sidea. Sarupa do songon na laho mangkatahon on Sibolis, ‘Ninuhurmu, lang boi ibahen ho na iharosuhkonmu?’ Dob ai nini use, “Seng tongon matei nasiam.” Ibahen ma si Hawa ase porsaya anggo Naibata lang porlu itangar. Nini Sibolis, “Ibotoh Naibata do, anggo ipangan nasiam hunjai, gabe buha ma mata nasiam.” Sihol do Sibolis ase sidea porsaya anggo Jahowa lang mambere sidea mangankon buah ai ase sidea lang mandapot habotohon. Dob ai ihatahon do, “Doskon Naibata ma nasiam mambotoh na madear pakon na masambor.”

10 Maningon do ipilih si Adam pakon si Hawa aha na laho ibahen. Ise do na laho itangihon sidea, Jahowa do, atap ulog ai? Sidea lang manangihon Jahowa. Halani Sibolis do na itangihon, itadingkon sidea ma Jahowa. Halani ai lang be isarihon Jahowa sidea.1 Mus. 3:6-13.

11. Mase lang ipaturut Naibata hajahaton ni si Adam pakon si Hawa?

11 Sanggah ilanggar sidea titah ni Naibata Jahowa, gabe lang sempurna ma sidea. Janah gabe munsuh ni Naibata ma sidea, halani magigi do Ia bani hajahaton. Bibel mangkatahon, ‘Parmata na pitah do Jahowa, gabe seng tarpaidah-idah na masambor.’ (Hab. 1:13) Anggo ipaturut Naibata hajahaton ni si Adam pakon si Hawa, gabe dong use parsolan bani ganup tompaon.  Malekat ampa manisia lang be porsaya bani hata ni Naibata. Tapi, lang ongga ilanggar Naibata titah-Ni, janah tongtong do Ia pasaudkon hata-Ni. (Ps. 119:142) Tongon, si Adam pakon si Hawa bebas do mambahen pilihan. Tapi halani mamilih lang manangihon Naibata Jahowa, gabe matua ma sidea, matei janah mulak gabe orbuk.1 Mus. 3:19.

12. Aha do na masa bani haganup ginompar ni si Adam?

12 Sanggah ipangan si Adam pakon si Hawa buah ai, sidea lang be gabe anak ni Naibata. Iusir Naibata ma sidea hun pohon Eden, janah seng boi be mulak hujai. (1 Mus. 3:23, 24) Pilihan ni sidea mambahen sunsah hagoluhanni. (Basa 5 Musa 32:4, 5.) Halani ai, lang boi be sempurna si Adam mangusihi biak ni Jahowa. Ganup ginomparni pe dihut do homa mardousa, matua, janah matei usih songon si Adam. (Rom 5:12) Halani si Adam lang be sempurna, sonai ma homa ganup ginomparni. Halani ai, ganup ginomparni lang boi manggoluh sadokah ni dokahni. Dobkonsi mardousa si Adam pakon si Hawa ibahen Sibolis, marusaha do homa ia ase haganup ginomparni manlawan dompak Naibata.Joh. 8:44.

HALANI TOBUSAN HITA BOI MARHASOMAN PAKON NAIBATA

13. Aha do harosuh ni Naibata Jahowa bani manisia?

13 Tongtong do Jahowa mangkaholongi manisia, hassi pe Ia itadingkon si Adam pakon si Hawa. Sihol do Ia ase manisia marhasoman pakon-Si. Anjaha Jahowa lang marosuh anggo sidea matei. (2 Ptr. 3:9) Jadi, ibahen Jahowa ma dalan ase manisia boi marhasoman use pakon-Si. Sonaha Naibata pasaudkon ai tapi lang manlanggar titah-Ni? Eta ulas hita.

Dobkonsi si Adam pakon si Hawa manadingkon-Si, mintor ibahen Jahowa do dalan ase manisia boi marhasoman use pakon-Si

14. (a) Sonaha Jahowa paluahkon manisia humbani dousa ampa hamatean domu bani Johannes 3:16? (b) Aha do na boi iulas hita pakon na legan?

14 Basa Johannes 3:16. Bahat do halak na iontang hita hu Pardingatan mambotoh ayat ai. Tapi sonaha hamatean ni Jesus boi mambahen manisia manggoluh sadokah ni dokahni? Hita boi mangurupi halak mangarusi balosni ai sanggah hita mangontang sidea hu Pardingatan, sanggah sidea roh hu acara ai, atap pe sanggah manrohi use. Lambin bahat na ibotoh sidea pasal tobusan, lambin iarusi ma holong tumang do Jahowa bani manisia. Anjaha ibotoh ma Naibata na maruhur do Ia. Pasal tobusan, aha do na boi ipatorang hita bani sidea?

15. Sonaha pambahenan ni Jesus legan pakon si Adam?

 15 Ipasirsir Jahowa do manisia na sempurna laho mambere goluhni gabe tobusan. Manisia na sempurna ai maningon setia do bani Jahowa janah ra mambere hagoluhanni gabe tobusan. (Rom 5:17-19) Marhitei halongangan, ipapindah Jahowa ma hagoluhan ni Jesus hun surga hu tanoh on. (Joh. 1:14) Sempurna do Jesus songon si Adam. Songon na niarapkon ni Jahowa bani manisia na sempurna, tongtong do Jesus mandalankon aturan ni Jahowa, sedo songon si Adam. Hassi pe ibagas parlajouan seng ongga ilanggar titah ni Naibata.

16. Mase porlu tumang tobusan ai bani manisia?

16 Hamatean ni Jesus boi paluahkon manisia humbani dousa ampa hamatean. Ihorjahon Jesus do aha na sasintongni maningon ibahen si Adam. Manisia na sempurna do Jesus janah tongtong do setia bani Naibata. (1 Tim. 2:6) Hamatean ni Jesus paluahkon ganup jolma ase sidea boi manggoluh sadokah ni dokahni. (Mat. 20:28) Porlu tumang do tobusan on ase saud harosuh ni Naibata.2 Kor. 1:19, 20.

IJALO NAIBATA DO USE HITA GABE ANAK-NI

17. Aha do na boi saud marhitei tobusan ni Jesus?

17 Harga do tobusan na ipasirsir Naibata Jahowa. (1 Ptr. 1:19) Halani holong ni Naibata hubanta, ipaturut do matei Anak-Ni na hinaholongan laho  manobus hita. (1 Joh. 4:9, 10) Halani ai, Jesus ma na gabe bapanta sedo si Adam. (1 Kor. 15:45) Marhitei tobusan, ganup manisia lang pitah boi manggoluh sadokah ni dokahni tapi i lobei ni ari, ijalo Naibata do use sidea gabe anak-Ni. Ganupan ai boi ipasaud Naibata tapi lang manlanggar titah-Ni. Tontu malas tumang uhurta sanggah manisia na setia bani Jahowa gabe sempurna! Ujungni, marsada ma ganup malekat ampa manisia gabe sada kaluarga janah igoran ma sidea anak ni Naibata .Rom 8:21.

18. Attigan do Jahowa gabe “haganup ibagas haganup”?

18 Hassi pe ompungta na parlobei, ai ma si Adam pakon si Hawa manadingkon Naibata Jahowa, totap do holong uhur-Ni mangidah hita janah ipasirsir do tobusan. Hassi pe hita lang sempurna, lang boi Sibolis manlanglangi hita setia bani Naibata Jahowa. Marhitei tobusan, iurupi Jahowa do manisia ase boi mardear pakon-Si. Malas tumang uhurta sanggah haganup na porsaya bani Jesus boi manggoluh sadokah ni dokahni! (Joh. 6:40) Jadi tongtong do Bapanta na parholong ampa na maruhur boi pasaudkon harosuh-Ni janah iurupi do manisia ase gabe sempurna. Ujungni, Jahowa gabe “haganup ibagas haganup”.1 Kor. 15:28.

19. (a) Sonaha hita pataridahkon tarima kasih halani tobusan? (Idah kotak “ Pindahi Hita ma Halak na Talup.”) (b) Aha do na laho iulas hita bani artikel na mangihut?

19 Martarima kasih do hita halani tobusan. On mangojur hita ase patugahkon pasal tobusan bani halak na legan. Maningon do ibotoh sidea, marhitei tobusan ibere Jahowa do pangarapan hagoluhan sadokah ni dokahni bani manisia. Humbani tobusan pe, taridah ma ladung do na ihatahon Sibolis i pohon Eden. Mase? Bani artikel na mangihut iulas hita ma pasal ai.