Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Februari 2017

Tobusan—“Silayak-layak na Gokan Dear” humbani Naibata

Tobusan—“Silayak-layak na Gokan Dear” humbani Naibata

“Haganup sibere-bere na madear, anjaha haganup silayak-layak na gokan dear, ai ma na roh hun . . . Bapa.”JAKOBUS 1:17.

DODING: 148109

1. Aha do guna ni tobusan hubanta?

BUEI do pasu-pasu na adong marhitei tobusan ni Jesus Kristus. Umpamani, marhitei tobusan, i lobei ni ari ganup ginompar ni si Adam na pintor boi use gabe kaluarga ni Naibata. Pasu-pasu na legan ai ma hita pe boi manggoluh sadokah ni dokahni. Na sipontingan, markaitan do tobusan ai bani ganup tompaon na i nagori atas ampa na i tanoh on.Heb. 1:8, 9.

2. (a) Aha do na iajarhon Jesus ase itonggohon hita? (Idah gambar i atas.) (b) Sungkun-sungkun aha do na laho iulas hita bani parlajaran on?

2 Hira-hira dua tahun paima matei Jesus, iajari do susianni martonggo, “Ham Bapanami na i nagori atas. Sai napapansing ma Goran-Mu. Sai roh ma Harajaon-Mu. Sai saud ma harosuh ni uhur-Mu i nagori tongah on songon na i nagori atas.” (Mat. 6:9, 10) Aha do kaitan ni tobusan bani hapansingon goran ni Naibata, Harajaon-Ni, ampa harosuh-Ni? Ulas hita ma ai.

 “SAI NAPAPANSING MA GORAN-MU”

3. Aha do na ipataridahkon goran ni Jahowa? Sonaha do Sibolis mangkatahon na lang tongon pasal Jahowa?

3 Parlobei, itonggohon Jesus do ase ipapansing goran ni Jahowa. Goran ai pataridahkon sonaha do Ia sasintongni. Pargogoh na so tarimbang do Ia anjaha pintor. Idilo Jesus do Ia “Bapa na mapansing”. (Joh. 17:11) Halani pansing do Jahowa ai, ganup pambahenan-Ni ampa uhum-Ni pe pansing. Tapi sanggah i pohon Eden, isangsihon Sibolis do hak ni Jahowa mambahen aturan bani manisia. Ihatahon do homa na lang tongon pasal Jahowa.1 Mus. 3:1-5.

4. Sonaha Jesus papansingkon goran ni Naibata?

4 Halani holong tumang bani Bapani, aha pe ibahen Jesus laho papansingkon goran ni Jahowa. (Joh. 17:25, 26) Sonaha carani? Marhitei parlahou ampa pangajarionni, iurupi Jesus do halak na legan ase mangarusi dear do aturan ni Jahowa janah marguna hubanta. (Basa Psalmen 40:9-11.) Hassi pe marsik sitarononni halani Sibolis, tongtong do Jesus setia ronsi matei. Marhitei ai, taridah ma anggo manisia na sempurna boi tongtong manangihon Naibata.

5. Sonaha hita papansingkon goran ni Jahowa?

5 Sonaha hita boi papansingkon goran ni Jahowa? Marhitei parlahounta na pansing. Ai do na ipindo Jahowa. (Basa 1 Petrus 1:15, 16.) Halani ai pitah Jahowa do na itangihon hita humbani gok ni uhur. Hassi pe iparburu, totap ma hita manangihon-Si. Anggo ihorjahon hita ganup titah ni Jahowa, ipuji ma goran-Ni. (Mat. 5:14-16) Janah taridah ma dear do aturan-Ni anjaha Sibolis do na parladung. Halani manisia na mardousa do hita janah urah mambahen hasalahan, mubah ma hita humbani dousanta janah horjahon ma aha na pasangapkon goran ni Jahowa.Ps. 79:9

6. Mase hita boi marhasoman pakon Jahowa hassi pe mardousa?

6 Lang soal hita na mininakan atap pe ‘biribiri na legan’, ra do Jahowa manasap dousanta anggo porsaya hita bani tobusan. Ijalo do ganup na mangondoskon diri hu Bani. Sidea na mininakan ijalo Jahowa gabe anak-Ni, janah ‘biribiri na legan’ gabe hasoman-Ni. (Joh. 10:16; Rom 5:1, 2; Jak. 2:21-25) Halani ai, marhitei tobusan hita boi marhasoman pakon Jahowa janah papansingkon goran-Ni.

“SAI ROH MA HARAJAON-MU”

7. Pasu-pasu aha do na dong halani tobusan?

7 Bani tonggo na iajarhon Jesus ihatahon do, “Sai roh ma Harajaon-Mu.” Aha do kaitan ni tobusan pakon Harajaon ni Naibata? Harajaon ni Naibata ai ma sada pamarentahan na iparentah Jesus pakon 144.000 halak na ipilih humbani manisia. Marhitei tobusan, ipapuho do sidea hu surga. (Pangk. 5:9, 10; 14:1) Gabe raja ampa malim do sidea mamarentah i atas tanoh on rap pakon Jesus sadokah saribu tahun. Marhitei Harajaon ai, ibahen Jahowa ma tanoh on gabe paradeiso janah manisia gabe sempurna. Dob ai gabe sada  kaluarga ma tompaon na i tanoh on ampa na i surga. (Pangk. 5:13; 20:6) Boiskonon ni Jesus ma Sibolis ampa hajahatonni.1 Mus. 3:15.

8. (a) Sonaha Jesus mangurupi susianni ase mangarusi porlu do Harajaon ni Naibata? (b) Sonaha hita pataridahkon anggo hita setia bani Harajaon ai?

8 Iurupi Jesus do susianni ase mangarusi porlu tumang do Harajaon ai. Sonaha carani? Dobkonsi ididi ia, mintor baritahononni ma “Ambilan Na Madear pasal Harajaon ni Naibata” bai ganup ianan. (Luk. 4:43) Iajari Jesus do homa susianni ase mambaritahon pasal Harajaon ai “das hu ujung ni tanoh on”. (Lah. 1:6-8) Jadi sanggah marbarita, hita mangajarhon pasal tobusan ai bani halak ase sidea boi gabe rayat ni Harajaon ni Naibata. Anggo iurupi hita sidea na mininakan mambaritahon pasal Harajaon ai i sab dunia on, ai pataridahkon setia do hita bani Harajaon ai.Mat. 24:14; 25:40.

“SAI SAUD MA HAROSUH NI UHUR-MU”

9. Mase pos uhurta anggo Jahowa tongtong do pasaudkon harosuh-Ni?

9 Aha do artini sanggah ihatahon Jesus, “Sai saud ma harosuh ni uhur-Mu”? Ganup na ihatahon Jahowa, tongtong do ai saud. (Jes. 55:11) Jadi Sibolis pe lang boi manlanglangi Jahowa pasaudkon harosuh-Ni. Aha do harosuh ni Naibata bani tanoh on? Naibata marosuh ase si Adam pakon si Hawa manggompari janah manggoki tanoh on. (1 Mus. 1:28) Anggo mintor ipamatei si Adam, gabe lang saud ma harosuh ni Naibata. Jadi ipaturut Jahowa ma sidea marniombah ase ginomparni na porsaya bani tobusan, boi gabe sempurna janah manggoluh sadokah ni dokahni. Ganupan ai ibahen Jahowa halani holong-Ni bani manisia janah sihol ase martuah hita i tanoh on.

10. Aha do guna ni tobusan bani na matei?

10 Aha do pangarapan bani marmiliar halak na matei na lape mananda Jahowa? Sihol do Jahowa ase sidea pe manggoluh. Halani ai ipapuho Jahowa ma sidea. Ai boi saud marhitei tobusan. Dob ai marlajar ma sidea pasal Jahowa janah boi manggoluh sadokah ni dokahni (Lah. 24:15) Jahowa do Bah Tubuh hagoluhan. Jadi sanggah ipapuho Jahowa na matei, Ia ma gabe Bapa ni sidea. (Ps. 36:10) Domu bani tonggo na iajarhon Jesus, ihatahon do Jahowa ai ‘Bapanta na i nagori atas’. (Mat. 6:9) Ibere Jahowa ma kuasa bani Jesus laho papuhohon na matei. Halani ai ma ase ihatahon Jesus, “Ahu do parpuhoon ampa hagoluhan.”Joh. 6:40, 44; 11:25.

11. Aha do na iharosuhkon Naibata bani “humpulan na banggal”?

11 Ihatahon Jesus do homa, “Ai na mangkorjahon harosuh ni Naibata, ai do saninang-Ku, ai do botou-Hu, ai do inang-Ku!” (Mrk. 3:35) Marosuh do Jahowa ase ganup halak humbani bangsa, suku, ampa bahasa manombah-Si. Igoran do sidea “humpulan na banggal, na so boi bilangan ni atap ise”. Sidea na iontang ai, porsaya bani tobusan janah ra manangihon Naibata. Sidea mamuji Jahowa janah ihatahon, “Bani Naibatanta, na hundul bani paratas in do haluahon, ampa bani Anak ni biribiri in!”Pangk. 7:9, 10.

12. Marhitei tonggo na iajarhon Jesus, aha do na boi iparlajari hita pasal harosuh ni Jahowa?

 12 Marhitei tonggo na iajarhon Jesus, domma iparlajari hita pasal Jahowa ampa harosuh-Ni bani manisia. Na parlobei, maningon do hormat hita bani Jahowa janah papansingkon goran-Ni. (Jes. 8:13) Hamatean ni Jesus paluahkon hita humbani hamatean. On pe pasangapkon goran ni Naibata. Sasintongni, arti goran ni Jesus ai ma “Jahowa do Haluahon”. Na paduahon, marhitei Harajaon-Ni ipasu-pasu Jahowa ma manisia na manangihon-Si. Anjaha na patoluhon, pos do uhurta lang adong na boi manlanglangi Jahowa laho pasaudkon harosuh-Ni.Ps. 135:6; Jes. 46:9, 10

MARTARIMA KASIH MA BANI JAHOWA HALANI TOBUSAN

13. Mase ra hita ididi?

13 Sanggah hita mangondoskon diri hubani Jahowa anjaha ididi, ai pataridahkon anggo hita martarima kasih halani tobusan. Humbani pandidion, taridah ma anggo hita porsaya bani tobusan janah Jahowa do simadanta. (Rom 14:8) Sanggah ididi, hita mangindo “panggora ni uhur na borsih” bani Jahowa. (1 Ptr. 3:21) Ibalosi Jahowa ma pangindoanta ai marhitei tobusan. Janah pos do uhurta pasaudon-Ni do ganup janji-Ni hubanta—Rom 8:32.

Sonaha hita pataridahkon tarima kasih halani tobusan? (Idah paragrap 13, 14)

14. Mase hita iparentahkon Jahowa ase mangkaholongi na legan?

14 Ganup na ihorjahon Jahowa, halani holong-Ni do ai. Jadi Ia sihol ase na manombah-Si pe marsihaholongan. (1 Joh. 4:8-11) Anggo hita mangkaholongi halak, taridah ma anggo hita sihol ‘gabe anak ni Bapanta na i nagori atas ai’. (Mat. 5:43-48) Adong dua titah sibanggalan. Na parlobei mangkaholongi Jahowa, janah na paduahon mangkaholongi na legan. (Mat. 22:37-40) Jadi, hita mangkaholongi na legan marhitei mangajarhon pasal Harajaon ni Naibata bani sidea. Anggo itangihon hita titah ni Jahowa ase mangkaholongi na legan, tarlobih hasomanta sahaporsayaon, gabe “gok ma” holongta bani Jahowa.1 Joh. 4:12, 20.

 TOBUSAN PAROHKON PASU-PASU HUMBANI JAHOWA

15. (a) Pasu-pasu aha do na boi ijalo hita sonari? (b) Pasu-pasu aha do na boi ijalo hita bani ari simagira?

15 Pos ma uhurta anggo porsaya hita bani tobusan, ra do Jahowa ‘manasap’ dousanta. (Basa Lahoan ni Apostel 3:19-21.) Songon na iparlajari hita, marhitei tobusan ipilih Jahowa ma manisia hun tanoh on gabe anak-Ni i surga. Igoran ma sidea na mininakan. (Rom 8:15-17) Iontang Jahowa do homa ‘biribiri na legan’ gabe kaluarga-Ni i tanoh on. Dobkonsi sempurna, ipaturut do Sibolis sahali nari laho pakahouhon sidea. Tapi, anggo setia, ibahen Jahowa ma sidea ganup gabe anak-Ni. (Rom 8:20, 21; Pangk. 20:7-9) Tongtong do Jahowa mangkaholongi anak-Ni. Halani ai, marhitei tobusan ipasu-pasu Jahowa ma hita. (Heb. 9:12) On ma silayak-layak na boi tongtong iahapkon hita.

16. Tobusan, paluahon hita humbani aha?

16 Anggo mubah humbani dousanta, ujungni gabe kaluarga ni Jahowa ma hita. Seng boi ilanglangi Sibolis ai. Sahali do galaron tobusan, halani ai “sahali tumang do” Jesus matei. (Heb. 9:24-26) Hita matei halani si Adam, tapi halani tobusan, hita boi manggoluh sadokah ni dokahni, ampa ipaluah humbani Sibolis, janah lang be mabiar hita bani hamatean.Heb. 2:14, 15.

17. Aha do arti ni holong ni Jahowa hubanta?

17 Tongtong do saud sura-sura ni Jahowa. Songon uhum-Ni lang mubah-ubah, Jahowa pe lang ongga mubah-ubah. (Mal. 3:6) Lang pitah hagoluhan na sadokah ni dokahni na ibere hubanta, tapi ipatuduh do homa holong-Ni. “Domma ibotoh anjaha ihaporsayai hita pasal holong ni uhur ni Naibata banta. Naibata do haholongan in.” (1 Joh. 4:16) Aha na dob ijanjihon-Ni, tongtong do saud. Lang dokah nari, ibahen ma tanoh on gabe paradeiso, manisia boi mangusihi-Si, ampa marsihaholongan ma jolma ijai. Dob ai, tompaon na i surga, na i tanoh on mangkatahon, “Puji-pujian pakon hasangapon, hapentaron pakon tarima kasih, hamuliaon pakon hagogohon ampa kuasa ma bani Naibatanta in ronsi sadokah ni dokahni! Amen.”Pangk. 7:12.