Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Februari 2017

Jahowa do Mambobai Juakjuak-Ni

Jahowa do Mambobai Juakjuak-Ni

“Jahowa ma tongtong mangiring-iring ho.”JESAYA 58:11.

DODING: 15222

1, 2. (a) Mase juakjuak ni Jahowa legan humbani ugama na legan? (b) Aha do na laho iulas hita bani artikel on pakon artikel na mangihut?

GATIH do halak manungkun Saksi Jahowa, “Ise do pambobai ni nasiam?” Sidea sihol mambotoh halani buei ugama pambobai ni dalahi atap naboru. Tapi megah do hita mangkatahon, Jesus do na mambobai hita sedo jolma. Janah tongtong do Jesus unduk bani Jahowa, ai ma Bapa ni ampa Pambobai na sitimbulan.Mat. 23:10

2 Sonari ipilih do homa piga-piga halak na igoran “juakjuak na bujur anjaha na maruhur” laho mambobahon juakjuak ni Naibata i tanoh on. (Mat. 24:45) Tapi hunja ibotoh hita anggo Jahowa do na mambobai hita marhitei anak-Ni? Ulas hita ma tolu alasanni. Hassi pe manisia na igunahon mambobahon, tapi Jahowa do na totap gabe Sipambobai bani juakjuak-Ni.Jes 58:11

IPARGOGOHI TONDUY NA PANSING

3. Aha do na mampargogohi si Musa mambobahon halak Israel?

3 Ipargogohi tonduy na pansing do pambobai na pinilih ni Naibata. Ipilih Jahowa ma si Musa laho mambobai halak Israel. Tapi aha do na boi mangurupi ia mandalankon tugasni? Ibere Jahowa ma “Tonduy-Ni” bani si  Musa. (Basa Jesaya 63:11-14.) Halani ai Jahowa do na sasintongni mambobahon bangsa Israel marhitei si Musa.

4. Hunja ibotoh halak anggo si Musa iurupi tonduy na pansing? (Idah gambar bani alaman 14)

4 Tapi, hunja ibotoh halak anggo si Musa iurupi tonduy na pansing? Marhitei tonduy ni Naibata, si Musa boi mambahen halongangan ampa patugahkon goran ni Nabata bani raja ni halak Masir, ai ma si Parao. (2 Mus. 7:1-3) Anjaha iurupi tonduy ni Naibata ma ia gabe pambobai na parholong ampa na sabar, sedo songon pambobai na legan na gijang uhurni. (2 Mus. 5:2, 6-9) Hunjon taridah ma anggo Jahowa do na mamilih si Musa gabe pambobai.

5. Ise ope na ibere Jahowa tonduy-Ni?

5 Ise ope na ibere tonduy ni Naibata laho mambobahon juakjuak-Ni? Bibel mangkatahon, “Gok tonduy hapentaran ma uhur ni si Josua, anak ni si Nun.” (5 Mus. 34:9) “Isorapi Tonduy ni Jahowa ma si Gideon.” (Panguh. 6:34) Janah “sogop ma Tonduy ni Jahowa bani si Daud”. (1 Sam. 16:13) Marhitei tonduy ni Naibata, sidea boi mangkorjahon na sasintongni lang tarbahen sidea. (Jos. 11:16, 17; Panguh. 7:7, 22; 1 Sam. 17:37, 50) Jahowa do na mambere kuasa bani sidea. Halani ai, Jahowa do na talup manjalo pujian.

Anggo bangsa Israel manangihon si Musa, si Josua ampa si Daud, songon na manangihon Jahowa ma ai

6. Mase Jahowa sihol ase bangsa Israel manangihon pambobai na pinilih-Ni?

6 Halani si Musa, si Josua, si Gideon, ampa si Daud ipargogohi tonduy ni Naibata, sonaha ma namin pangahap ni halak Israel bani sidea? Maningon hormat ma sidea. Sanggah halak Israel marungut-ungut bani si Musa, Jahowa mangkatahon, “Sadia dokah on apasan ni bangsa on Ahu?” (4 Mus. 14:2, 11) Jadi, tangkas ma Jahowa do na mamilih si Musa. Anggo bangsa Israel manangihon sidea, songon na manangihon Jahowa ma ai.

IURUPI MALEKAT

7. Sonaha do malekat mangurupi si Musa?

7 Iurupi malekat do pambobai na pinilih ni Naibata (Basa Heber 1:7, 14.) Marhitei malekat, Jahowa manogu-nogu si Musa. Parlobei, isuruh sada malekat ‘na nididahni bani naporon’ do ia paluahkon ampa mambobahon halak Israel hun Masir. (Lah. 7:35) Paduahon, igunahon Naibata ma malekat laho padaskon titah bani si Musa ase iajarhon bani halak Israel. (Gal. 3:19) Patoluhon, ihatahon Jahowa ma bani, “Arahkon ma bangsa in hu tanoh na dob Huhatahon bam. Tonggor ma, malekat-Kin do mardalan i lobeimu.” (2 Mus. 32:34) Lang ipatugah anggo halak Israel boi mangidah malekat ai. Tapi humbani cara ni si Musa mangajari ampa mambobai, taridah ma malekat do na mangurupisi.

8. Sonaha do malekat mangurupi si Josua pakon si Hiskia?

 8 Ise ope na iurupi malekat? Bibel patugahkon, dong “pambobai ni bala ni Jahowa” na mangurupi si Josua ase boi manaluhon halak Kanaan. (Jos. 5:13-15; 6:2, 21) Sanggah halak Assur laho mamorangi Jerusalem, iurupi Jahowa do Raja Hiskia marhitei malekat-Ni. Ibagas na saborngin “luar ma malekat ni Jahowa, gabe ibunuh ma . . .  saratus ualuh puluh lima ribu halak”.2 Raj. 19:35.

9. Hassi pe pambobai na pinilih ni Naibata lang sempurna, aha do na maningon ibahen halak Israel?

9 Sempurna do anggo malekat. Tapi manisia na iurupi sidea lang sempurna. Sontohni, ongga do si Musa lang pasangapkon Jahowa. (4 Mus. 20:12) Sanggah marpadan si Josua pakon halak Gibeon lang isungkun lobei Jahowa. (Jos. 9:14, 15) Si Hiskia ongga do margijang ni uhur. (2 Kron. 32:25, 26) Hassi pe sonai, sihol do Jahowa ase juakjuak-Ni manangihon sidea. Halak Israel boi mambotoh pangurupion ni Jahowa bani sidea marhitei malekat na mangurupi pambobai ai. Jadi sasintongni Naibata Jahowa do na mambobai sidea.

ITOGU-TOGU HATA NI NAIBATA

10. Sonaha do si Musa mandalankon Hata ni Naibata?

10 Itogu-togu Hata ni Naibata do pambobai na pinilih-Ni. Titah na ibere bani halak Israel, ihatahon do “titah ni si Musa”. (1 Raj. 2:3) Hassi pe sonai, tong do ai titah ni Jahowa, halani Ia do na mambahen titah in bani halak Israel. Anjaha si Musa sandiri pe maningon do mandalankon ai. (2 Kron. 34:14) Sontohni, sanggah si Musa isuruh Jahowa mambahen tabernakel, “ipasaud si Musa ma ganup songon na tinonahkon ni Jahowa hu bani, sonai do ibahen”.2 Mus. 40:1-16.

11, 12. (a) Aha do na maningon ibahen si Josua ampa raja-raja na mambobai halak Israel? (b) Sonaha do titah ni Naibata mangurupi pambobai?

11 Sanggah si Josua mambobai, adong do titah ni Jahowa na dob isuratkon bani. Nini Jahowa ma, “Sai pingkir-pingkiri ma in arian pakon borngin, ase iramotkon anjaha ihorjahon ho romban hubani na tarsurat ibagas in.” (Jos. 1:8) Sonai homa do hubani Raja ni halak Israel, iparentahkon do sidea ase mambasa, manalin janah mandalankon “ganup hata ni titah pakon aturan”.—Basa 5 Musa 17:18-20.

12 Sonaha do titah ni Naibata Jahowa mangurupi sidea sanggah mambobai? Sontohni, sanggah jumpah titah ni si Musa, isuruh Raja Josia ma sekretarisni mambasahon ai. * (Idah surat partoruh.) “Dob ibogei raja ai hata ni buku titah ai, irigati ma hiouni.” Halani ai gabe tarojur ma si Hiskia laho mangambukkon ganup gana-gana i nagori ai janah ibahen ma pesta Paskah na banggal. (2 Raj. 22:11; 23:1-23) Halani si Josia ampa pambobai na legan mandalankon titah ni Naibata, sidea pe mangojur ase ganup juakjuak-Ni dihut mandalankon ai.

13. Aha do na mambahen legan pambobai na ipilih Naibata pakon pambobai na legan?

 13 Anggo pambobai ni jolma, marhitei hapentaranni sandiri do sidea mambobai. Sontohni pambobai ni halak Kanaan ihorjahon do na masambor ampa na butak, ai ma rap modom pakon botouni, dalahi marjolmahon dalahi, saor hubani pinahan, manggalangkon niombahni, janah manombah gana-gana. (3 Mus. 18:6, 21-25) Janah lang adong aturan na ibahen pambobai ni halak Babel pakon Masir ase bangsani borsih songon bangsa ni Naibata. (4 Mus. 19:13) Tapi anggo pambobai na pinilih ni Naibata, iojur do bangsani ase dear marparlahou, borsih, ampa manombah Naibata na sintong. Hunjon taridah ma Jahowa do mambobai sidea.

14. Mase iuhum Jahowa pambobai na pinilih-Ni?

14 Lang ganup raja na mambobai juakjuak ni Naibata manangihon tugah-tugah-Ni. Sidea lang ra mangihutkon panoguon humbani tonduy na pansing, malekat, ampa Hata ni Naibata. Halani ai iuhum Jahowa ma sidea, ampa dong na igantihon. (1 Sam. 13:13, 14) Dob ai, ipilih Jahowa ma sasada halak gabe pambobai na sempurna.

IPILIH JAHOWA MA PAMBOBAI NA SEMPURNA

15. (a) Sonaha do nabi-nabi patuduhkon na laho roh do pambobai na sempurna?(b) Ise do na gabe pambobai na sempurna?

15 Domma dokah ibahen Jahowa panjahaion pasal pambobai na sempurna bani juakjuak-Ni. Sontohni ipatugah si Musa do bani halak Israel, “Nabi sada songon ahu on pajongjongon ni Jahowa Naibatamu hun tongah-tongahmu, humbani saninamu; Ia talup tangihonon nasiam.” (5 Mus. 18:15) Dob ai ihatahon si Jesaya do homa, laho roh do sasada halak gabe “raja pakon panggomgom”. (Jes. 55:4) Anjaha isuratkon si Daniel do homa pasal Mesias na laho gabe “raja”. (Dan. 9:25) Ujungni, Jesus sandiri mangkatahon anggo ia do “Pambobai” bani juakjuak ni Naibata. (Basa Mateus 23:10.) Juakjuak ni Jahowa pe porsaya anggo Jesus do na ipilih Jahowa gabe pambobai janah ra mangihutkon ia. (Joh. 6:68, 69) Mase sidea porsaya?

Ipilih Jahowa do Jesus, pambobai na sempurna

16. Aha do na pataridahkon anggo Jesus ipargogohi tonduy ni Naibata?

16 Ipargogohi tonduy na pansing do Jesus. Sanggah Jesus ididi, ididah si Johannes ma, “buha langit, anjaha sogop ma Tonduy ai hu Bani marrupahon asas”, anjaha “ijuljul Tonduy ai ma Ia hu halimisan”. (Mrk. 1:10-12) Jadi marhitei tonduy ni Naibata, Jesus boi mangajari ampa mambahen halongangan i tanoh on. (Lah. 10:38) Anjaha ia boi pataridahkon parlahou na dear ai ma gabe halak na parholong, marmalas ni uhur, ampa toguh haporsayaonni. (Joh. 15:9; Heb. 12:2) Lang dong pambobai na legan songon Jesus.  Hunjon taridah ma anggo Jahowa do na mamilih Jesus.

Dobkonsi Jesus ididi sonaha do malekat mampargogohi-si’? (Idah paragrap 17)

17. Aha do na ibahen malekat laho mangurupi Jesus?

17 Iurupi malekat do Jesus. Lang piga dokah dobkonsi Jesus ididi, “roh ma malekat-malekat marugas Bani”. (Mat. 4:11) Paima matei Jesus, roh ma ‘sada malekat hun nagori atas mampargogohi-si’. (Luk. 22:43) Porsaya do Jesus, isuruh Jahowa do malekat-Ni laho mangurupisi anggo ihaporluhon.Mat. 26:53.

18, 19. Sonaha do Jesus mangihutkon Hata ni Naibata ibagas hagoluhanni ampa pangajarionni?

18 Itogu-togu Hata ni Naibata do Jesus. Tongtong do Jesus mangihutkon Hata ni Naibata sadokah manggoluh i tanoh on. Sontohni paima matei Jesus, ipatugah ia do panjahaion pasal Mesias. (Mat. 4:4; 27:46; Luk. 23:46) Tapi legan do anggo pambobai ni ugama. Halani iajarhon sidea do na lang sosok pakon Hata ni Naibata. Jesus mangkatahon pasal sidea, “Pasangap pamangan ni bangsa on do Ahu, tapi anggo uhur ni sidea daoh do hun Bangku. Tapi soya do parpasangap ni sidea Bangku, ai podah ni jolma do ipodahkon sidea.” (Mat. 15:7-9) Jadi, lang marosuh Jahowa mamilih halak na so manangihon hata-Ni gabe pambobai juakjuak-Ni.

19 Sanggah mangajari, tongtong do igunahon Jesus Hata ni Naibata. Ongga do pambobai ugama manungkun Jesus, tapi ibalosi ia do humbani Hata ni Naibata, sedo humbani hapentaranni  sandiri. (Mat. 22:33-40) Sasintongni boi do ibahen Jesus halak longang marhitei patugahkon sonaha hagoluhanni i surga ampa pasal panompaon. Tapi seng ra ia sonai. Iajarhon do Hata ni Naibata bani sidea anjaha “ibuhai ma uhur ni sidea, ase iarusi ma na tarsurat ai”. Sonai ma na ibahen Jesus halani marosuh do ia bani Hata ni Naibata.Luk. 24:32, 45.

20. (a) Sonaha do Jesus pasangapkon Jahowa? (b) Aha do na mambahen parlahou ni si Herodes legan pakon Jesus?

20 Bahat do halak na longang manangar pangajarion ni Jesus. Tapi, tongtong do ia pasangapkon guru-Ni ai ma Jahowa. (Luk. 4:22) Ongga do sada dalahi mandilo Jesus, “Guru, sidear uhur.” Tapi ibagas toruh ni uhur Jesus mangkatahon, “Mase ma ihatahon ham Ahu sidear uhur? Seng dong sidear uhur sobali Naibata.” (Mrk. 10:17, 18) Tapi, hira-hira ualuh tahun dob ai, gabe raja ni halak Judea ma si Herodes Agrippa I. Legan tumang do ia pakon Jesus. Sanggah marsahap bani rayatni, marpakeian na mahal do ia. Halak na mangidahsi lanjar mangkatahon, “Sora ni Naibata do in, sedo sora ni jolma!” Malas tumang uhurni halani ipuji sonai. Tapi dob ai, aha na masa? “Mintor ipukul malekat ni Tuhan in ma ia, halani seng bani Naibata ibere hasangapon; iharati gilok-gilok ma angkulani, lanjar matei.” (Lah. 12:21-23) On pataridahkon sedo si Herodes na pinilih ni Jahowa. Tapi, Jesus do na pinilih ni Jahowa, halani tongtong do ia pasangapkon Jahowa pambobai Na Tang Sitimbulan.

21. Aha do na laho iulas hita bani artikel na mangihut?

21 Jahowa marosuh ase Jesus ma gabe pambobai bani juakjuak-Ni. Dobkonsi Jesus ipapuho, nini ma bani susianni, “Domma ondos Bangku sagala kuasa na i nagori atas ampa na i tanoh on.” Dob ai nini use, “Tonggor ma, sai na hasomanan-Ku do hanima ganup ari, ronsi roh ujung ni dunia on.” (Mat. 28:18-20) Jadi, sonaha do Jesus mambobai juakjuak ni Naibata i tanoh on, hassi pe ia i surga? Ise do na pinilih ni Jahowa na gabe pambobai i tanoh on? Anjaha aha do na pataridahkon anggo manisia ai pinilih ni Naibata? Ulas hita ma balosni ai bani artikel na mangihut.

^ par. 12 Ra do on titah na isuratkon si Musa sandiri.