Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Februari 2017

Na Isungkun Pambasa

Na Isungkun Pambasa

Isuratkon apostel Paulus do anggo Jahowa “seng paturuton-Ni nasiam lajouon lobih humbani gogoh nasiam”. (1 Kor. 10:13) Humbani ayat on, ai ibotoh Jahowa do parlajouan na lah masa hubanta janah ibahen ma parlajouan na boi itaron hita?

Anggo tongon do ai, pingkirhon ma pangkorhonni bani goluhta. Umpamani, adong sada niombah na matei mandolos, tontu pusok tumang do uhur ni bapani. Ra do sungkun-sungkun ia, ‘Ai domma itontuhon Jahowa na laho masa on, janah ibotoh na boi do hanami manaron on?’ Bahat tumang do hasunsahan i dunia sonari on. Halani ai, boi do ihatahon anggo Jahowa na manontuhon aha na masa ibagas hagoluhanta?

Anggo ipareksa hita bani 1 Korint 10:13, lang iajarhon Bibel anggo Jahowa mambotoh parlajouan na laho masa hubanta, janah manontuhon parlajouan na boi itaron hita. Mase? Ulas hita ma ompat alasanni.

Na parlobei, ipaturut Jahowa do hita mambahen pilihan. Jahowa sihol ase hita mambahen pilihanta sandiri. (5 Mus. 30:19, 20; Jos. 24:15) Anggo ipilih hita dalan na dear na dob itontuhon Jahowa, toguon-Ni ma langkahta. (Pod. 16:9) Anggo lepak do pilihanta, sambor ma na dapot hita. (Gal. 6:7) Jadi anggo domma itontuhon Jahowa parlajouan na masa hubanta, aha ma gunani hita boi mambahen pilihan?

Na paduahon, lang ilinggomi Jahowa hita humbani “panorang ampa na masa”. (Par. 9:11) Sasada halak boi do hona parmaraan halani ia adong bani ianan ampa panorang sanggah masa parmaraan ai. Ongga do ihatahon Jesus adong 18 halak na matei halani idondoni manara na marumbak. Ipatorang Jesus do, sedo halani Naibata sidea matei. (Luk. 13:1-5) Jadi lang sosok ihatahon anggo Jahowa manontuhon ise na laho matei ampa na manggoluh, paima masa parmaraan ai.

Na patoluhon, ganup halak maningon do pataridahkon anggo ia setia bani Jahowa. Sibolis mangkatahon manisia ra manangihon Naibata halani dapot pasu-pasu. Tapi anggo adong parlajouan itadingkon ma Jahowa. (Job 1:9-11; 2:4; Pangk. 12:10) Jadi, anggo ilinggomi Jahowa do hita humbani parlajouan ai, tontu sintong ma na ihatahon Sibolis ai.

Na paompathon, lang tongtong igunahon Jahowa kuasa-Ni laho mambotoh aha na laho masa. Tongon, boi do Jahowa mambotoh aha na laho masa bani ari simagira. (Jes. 46:10) Tapi Bibel pataridahkon lang tongtong igunahon Jahowa kuasa-Ni ase mambotoh aha na laho masa. (1 Mus. 18:20, 21; 22:12) Parholong janah pintor do Jahowa ai, jadi paturuton-Ni do hita mambahen pilihan sandiri.5 Mus. 32:4; 2 Kor. 3:17.

Jadi aha do artini sanggah ihatahon si Paulus, “seng paturuton-Ni nasiam lajouon lobih humbani gogoh nasiam”? Ijon si Paulus patorangkon aha na ibahen Jahowa sadokah masa parlajouan ai, sedo sanggah lape masa parlajouan ai. Anggo hita porsaya bani Jahowa, iurupi do hita manaron parlajouan ai. (Ps. 55:23) Ulas hita ma mase si Paulus mangkatahon sonai.

Alasan na parlobei ai ma parlajouan na “somal bani jolma” do na masa hubanta. Halani hita manggoluh bani dunia na irajai Sibolis on, tontu sai adong do hasunsahan ampa parmaraan. Tapi anggo hita marpangunsandeian bani Jahowa, boi do hita totap martahan janah setia  bani Jahowa. (1 Ptr. 5:8, 9) Bani 1 Korint bindu 10:6-11, ipatugah si Paulus do hasunsahan na masa bani halak Israel sanggah i halimisan. Sidea na marpangunsandeian bani Jahowa boi manaron parlajouan ai, tapi sidea na lang marpangunsandeian gabe lang setia bani Jahowa.

Alasan na paduahon ai ma “hatengeran do Naibata”. Aha do artini ai? Anggo irimangi hita sonaha Jahowa mansarihon juakjuak-Ni, taridah ma tongtong do iurupi Jahowa halak “na mangkaholongisi, pakon na manramotkon tonah-Ni”. (5 Mus. 7:9) Anjaha Jahowa tongtong do pasaudkon janji-Ni. (Jos. 23:14) Jadi pos ma uhurta anggo (1) seng ipaturut Jahowa hita manaron parlajouan na borat tumang na lang boi tartaron hita, ampa (2) “bahenon-Ni do homa hadobanni” hubanta.

Jahowa ‘mangapoh hita ibagas sagala sitarononta’

Sonaha do ‘bahenon ni Jahowa hadoban’ bani sidea na marpangusandeian hu Bani? Sasintongni boi do ipadaoh Jahowa parlajouan ai. Tapi dingat ma si Paulus mangkatahon “bahenon-Ni do homa hadobanni, ase tartaron nasiam”. Gatih do hadoban ai marhitei ipargogohi Jahowa hita ase boi totap setia. Ulas hita ma aha do bahenon-Ni.

  • Jahowa ‘mangapoh hita ibagas sagala sitarononta’. (2 Kor. 1:3, 4) Boi do ibahen Jahowa damei uhur pakon pingkiranta marhitei Bibel, tonduy na pansing ampa juakjuak na bujur.Mat. 24:45; Joh. 14:16; Rom 15:4.

  • Toguon ni Jahowa do hita marhitei tonduy-Ni ase boi mardingat podah hun Bibel janah maruhur sanggah mambahen haputusan. (Joh. 14:26)

  • Igunahon Jahowa do malekat-Ni laho mangurupi hita.Heb. 1:14.

  • Igunahon Jahowa do hasomanta sahaporsayaon laho mangurupi ampa mangapoh hita.Kol. 4:11.

Jadi, aha na boi iparlajari hita humbani hata ni si Paulus na isuratkon bani 1 Korint 10:13? Lang itontuhon Jahowa parlajouan na laho itaron hita. Tapi anggo hita marpangunsandeian hu Bani, boi do hita martahan. Ibotoh hita do anggo Jahowa tongtong mambahen hadoban hubanta ase totap setia hu Bani.