Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Februari 2017

 PANGALAMAN

Buei do Iahapkon Hanami Idop ni Uhur ni Naibata

Buei do Iahapkon Hanami Idop ni Uhur ni Naibata

HUMBANI haposoonni, holong tumang do bapangku si Arthur bani Naibata, janah sihol gabe parambilan i Gereja Metodis. Tapi sanggah ibasa buku humbani Siswa-Siswa Alkitab janah marhasoman pakon sidea, gabe mubah ma pingkiranni. Bani tahun 1914 sanggah marumur 17 tahun ididi ma ia. Sadokah Porang Dunia I, ipindo do ia ase dihut marporang, tapi lang ra ia. Halani ai, ipenjarahon ma ia sadokah sapuluh bulan i Penjara Kingston, Ontario, Kanada. Dobkonsi kaluar hun penjara, gabe kolportir ma ia, sonari igoran parintis.

Bani tahun 1926, marhajabuan ma bapangku pakon si Hazel Wilkinson. Tahun 1908 inang ni si Hazel domma mananda hasintongan. Bani 24 April 1931 tubuh ma ahu. Ahu ma anak paduahon humbani ompat marsanina. Idalankon bapangku do podah ni Bibel, janah sihol ase hanami pe sonai. Manombah Jahowa do sipontingan ibagas goluhnami. Tongtong do hanami marbarita hun rumah hu rumah.Lah. 20:20.

SONGON BAPA TOTAP DO AHU NETRAL JANAH MARINTIS

Tahun 1939, masa ma Porang Dunia II. Tahun na mangihut, ilarang ma horja ni Saksi-Saksi Jahowa i Kanada. I sikkolah maningon do dakdanak hormat bendera, janah mandodingkon doding kebangsaan i kalas. Sanggah acara ai somalni ibere guru do ahu pakon botouhu si Dorothy kaluar hun kalas. Tapi bani sada ari, ipaila gurungku ma ahu janah ihatahon do ahu parbiar. Mulak hun sikkolah dong ma piga-piga hasomanku na mambogbogi ahu ronsi dabuh. On mambahen ahu lambin ‘mambalosi Naibata ase bani jolma!’Lah. 5:29.

Bani Juli 1942, sanggah marumur 11 tahun, ididi ma ahu ibagas bak na dong i peternakan. Sanggah libur sikkolah tongtong do ahu marintis. Sonari igoran ma ai parintis ekstra. Dob ai, laho ma ahu hu Ontario bagian utara rap pakon tolu sanina janah marbarita hubani parroboh hayu.

Bani 1 Mei 1949, gabe parintis biasa ma ahu. Dob ai iontang ma ahu mangurupi horja konstruksi i kantor cabang Kanada anjaha gabe anggota kaluarga Betel ma ahu ijai. Itugashon ma ahu i bagian parsetakan. Ijai marlajar ma ahu mamakei mesin setak. Ongga do ahu marhorja piga-piga minggu ronsi borngin laho mansetak risalah pasal juakjuak ni Jahowa na iparburu i Kanada.

Dob ai, marhorja ma ahu i Bagian Parambilanon. Tugashu ai ma manungkuni piga-piga parintis na laho mangidangi hu Quebec. Ijai ilarang do horjanta. Adong sada parintis na margoran Mary Zazula humbani Edmonton, Alberta. Anggota ni Gereja Ortodoks do namatorasni. Iusir namatorasni do si Mary pakon botouni hun rumah halani totap marlajar Bibel. Bani Juni 1951, ididi ma ia pakon botouni. Dob onom bulan marintis ma sidea. Sadokah na husungkuni ai, huidah holong do si Mary on bani Jahowa. Halani ai holong ma uhurhu mangidahsi. Dobkonsi siah bulan, marhajabuan ma hanami bani 30 Januari 1954. Dobkonsi saminggu marhajabuan, iontang ma hanami laho ilatih bani horja kaliling. Dobkonsi dua tahun, itugashon ma hanami i Ontario bagian Utara.

 Halani lambin banggal do horja parambilanon, lambin bahat ma ihaporluhon misionaris. Halani ahu pakon si Mary tahan do i Kanada sanggah musim borgoh atap pe sanggah bahat rongit bani musim milas, iagan hanami boi ma hanami martahan anggo itugashon huja pe. Iontang ma hanami hu Sikkolah Gilead kalas paduapuluhpituhon, janah salosei bani Juli 1956. Bulan November pindah ma hanami hu Brasil.

GABE MISIONARIS I BRASIL

Marlajar bahasa Portugis ma hanami dobkonsi das i Brasil. Iparlajari hanami ma sonaha mamungkah parsahapan ampa mambagihon majallah. Dob ai, marbarita ma hanami janah jumpah pakon sada naboru na ra manangar baritanami. Domma itotapkon hanami anggo jumpah pakon halak na marosuh, ibasahon hanami ma Pangungkabon 21:3, 4 na patugahkon pasal pasu-pasu humbani Harajaon ni Naibata. Dobkonsi hubasahon, mintor pingsan ma ahu halani lang tahan bani milas ni ari ijai. On ma na gabe parsoalan bangku.

Itugashon ma hanami i Campos. Ondi ai pitah sada dassa kalompok i rumah ni misionaris. Tapi sonari domma dong 15 kuria! Hanami tading i rumah misionaris rap pakon ompat hasoman, ai ma si Esther Tracy, si Ramona Bauer, si Luiza Schwarz, pakon si Lorraine Brookes (sonari si Wallen). Manussi baju, mangindahi hayu, ampa marmasak ma ahu ijai. Bani sada borngin dobkonsi hanami marlajar Ambilan na Madear, marsarita ma hanami pasal horjanami sadari ai, janah si Mary tibal i sofa. Sanggah jongjong ia, kaluar ma ulog hun toruh ni bantalni, marinjak-injak ma sidea janah mintor hubunuh ma ulog ai.

Dob satahun marlajar bahasa Portugis, gabe sintua kaliling ma ahu. Jadi mangidangi ma hanami bani huta na lang marlistrik janah modom bani amak. Marsado ampa mangajak huda do hanami laho mangidangi. Ongga do hanami markareta api laho marbarita hu sada huta i dolog-dolog. Ijai, isewa hanami ma sada rumah. Ikirim kantor cabang ma hira-hira 800 majallah na laho ibagihon bani halak. Halani ai, marulak-ulak ma hanami hu kantor pos laho mambuat majallah ai.

Bani tahun 1962 ibahen ma sikkolah bani sidea na marhorja i kuria bani piga-piga ianan i Brasil. Sadokah onom bulan isuruh ma sahalak ahu laho mangajari i kalas-kalas ai, songon i Manaus, Belém, Fortaleza, Recife, ampa Salvador. Sanggah i Manaus, huatur ma kebaktian distrik ase ibahen i gedung opera na tarsar. Tapi halani doras udan, lang adong bah siinumon na borsih janah lang adong ianan laho mangan sanggah kebaktian ai. Jadi marsahap ma ahu pakon tentara na ijai laho patorangkon pasal ai. Bujur do ia janah ipasirsir do bah siinumon janah ipajongjong ma dua tenda bahen ianan bani sanina-sanina laho marmasak ampa laho mangan.

 Sanggah ai, si Mary isuruh do marbarita hu ianan na marjualan. Ijai bahat do halak roh hun Portugal hu Brasil laho marbisnis. Halani lang adong na manangar barita ai, gabe etek ma uhur ni si Mary. Ihatahonni ma bani hasomanni, “Lang ra ahu tading i Portugal.” Tapi lang pigah dokah, dapot hanami sada surat na patugahkon anggo hanami itugashon hu Portugal. Ijai ilarang do horjanta. Tarsonggot ma si Mary! Tapi ijalo hanami do tugas ai janah pindah ma hanami hujai.

ITUGASHON HU PORTUGAL

Das ma hanami i Lisbon, Portugal, bani Agustus 1964. Tapi sunsah do hagoluhan sanina na ijai ibahen polisi rahasia. Jadi dear ma anggo lang mintor ijumpahi hanami Saksi na ijai. Isewa hanami ma sada rumah. Dobkonsi dong visa, isewa hanami ma apartemen. Dob lima bulan halani songon na domma aman, baru ma hanami boi pajumpah pakon hasoman i kantor cabang. Ujungni malas ma uhurnami halani boi martumpu!

Itutup polisi ma Balei Harajaonta sanggah ilarang horjanta. Halani ai, martumpu ma hanami i rumah ni sada sanina. Gati do rumah ni sidea ipareksa polisi, janah iboan do marratus hasomanta hu kantor polisi laho isungkuni. Kasar do polisi ai bani sidea janah ipaksa ma sidea patugahkon goran ni hasomanta na mambobai i kuria. Ase ulang tarbotoh, hanami marsidiloan mamakei goran, sedo marga.

Maharga tumang do bannami mangidangi Jahowa lobih humbani 60 tahun

Ibahen hanami ma ase hasomanta boi mandapot publikasi na mangurupi sidea ase martahan. Jadi iketik si Mary ma artikel parlajaran Ambilan na Madear pakon buku na legan bani kortas stensil. Dob ai ipakei ma kortas ai laho mansetak bahat buku bani hasomanta.

MAMPARTAHONKON HASINTONGAN I PENGADILAN

Bani Juni 1966 ibahen ma persidangan i Lisbon. Ituduh do 49 halak hasomanta hun kuria Feijó, mambahen partumpuan na manlanggar uhum. Paima persidangan, ibahen hanami ma latihan ase boi monang. Tapi ujungni talu do hanami. Halani ai ipenjarahon ma 49 halak hasomanta ai. Adong na iuhum sadokah 45 ari, dong homa lima satongah bulan. Tapi gabe hasaksian na dear do ai, halani sanggah persidangan ai, ipatugah pengacaranami do na ihatahon si Gamaliel humbani Bibel. (Lah. 5:33-39) Anjaha pasal persidangan ai tarsar do ibaritahon. Malas do homa uhurnami, halani pengacaranami gabe ra marlajar Bibel janah martumpu.

Bani Desember 1966 gabe pengawas cabang ma ahu janah marhorja bani bagian hukum. Aha pe ibahen hanami do ase horjanta lang be ilarang i Portugal. (Pil. 1:7) Ujungni, bani 18 Desember 1974 lang be ilarang pamarentah horjanta. Roh do hasomanta si Nathan Knorr ampa si Frederick Franz hun kantor pusat dihut marmalas ni uhur.  Ibahen ma kebaktian na banggal i Oporto ampa i Lisbon. Dong 46.870 halak na roh hu acara ai. Seng boi ihalupahonnami kebaktian ai.

Iurupi Jahowa do ase barita na madear on, boi das hu pulou-pulou na marsahap Portugis, songon pulou Azores, Tanjung Verde, Madeira, ampa São Tomé pakon Príncipe. Halani lambin bahat na manangar ambilan ai, ihaporluhan ma kantor cabang na lambin banggal. Dobkonsi ipajongjong, roh ma sanina Milton Henschel marambilan laho maresmihon kantor ai bani 23 April 1988. Adong 45.522 halak na roh. Dihut do homa 20 halak misionaris na ongga mangidangi i Portugal.

HANAMI MARLAJAR HUMBANI SIDEA NA SETIA

Sadokah martahun-tahun, malas do uhurnami boi marlajar humbani buei hasoman na setia. Ongga do hanami rap marhorja pakon Sanina Theodore Jaracz janah bahat do na boi huparlajari hun bani, sanggah manrohi kantor cabang na legan. Ijai dong masalah janah aha pe domma ibahen Panitia Cabang laho pasaloseihon ai. Tapi lang dong hasilni. Gabe lang sodap pangahap ni sidea halani ai. Jadi iapoh Sanina Jaracz ma sidea lanjar ihatahon, “Bere ma panorang bani tonduy na pansing marhorja.” Sanggah ahu pakon si Mary hu Brooklyn marpuluh tahun na salpu, ipindo hanami ma podah hun Sanina Franz, janah ihatahon, “Aha pe na tarjadi tongtong ma irikkon organisasi ni Jahowa. Pitah organisasi on do na mandalankon parentah ni Jesus laho mambaritahon Harajaon ni Naibata!” Hudingat do tongtong podahni ai.

Ganup on mambahen ahu pakon si Mary marmalas ni uhur. Bahat do na boi hudingat sanggah manrohi buei kantor cabang i sab tanoh on. Malas uhurnami boi pajumpah pakon marmasam hasoman, janah ipatoguh hanami ma sidea anggo pangidangion ni sidea ihargai Jahowa. Hanami pe mangojur sidea ase totap martahan.

Sonari hanami domma marumur 80 tahun janah si Mary pe buei do na boritni. Janah buei do hasunsahan na legan. Hassi pe sonai totap do toguh haporsayaonnami janah lambin sihol uhurnami ase setia bani Jahowa. Anggo irimangi hanami na dob salpu, porsaya do hanami buei do pasu-pasu ni Jahowa halani idop ni uhur-Ni. *—Idah surat partoruh.

^ par. 29 Sanggah artikel on ipasirsir marujung goluh ma Sanina Douglas Guest bani 25 Oktober 2015. Tongtong do ia setia bani Jahowa.