Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Desember 2017

Na Isungkun Pambasa

Na Isungkun Pambasa

Ai boi do halak Kristen mamakei IUD (intrauterine device) atap KB spiral?

Ganup na marhajabuan maningon do mamutuskon pasal on. Janah pilihan ni sidea ulang ma mambahen panggora ni uhurni gabe targanggu. Halani ai, maningon ibotoh sidea ma, sonaha do sasintongni IUD (KB spiral) ai. Anjaha ipindahi sidea ma homa prinsip ni Bibel.

Iparentahkon Jahowa do bani si Adam pakon si Hawa, sonai homa bani si Noak pakon kaluargani ase, “manggompari anjaha lambin manggargar”. (1 Mus. 1:28; 9:1) Hassi pe sonai, lang adong ihatahon bani Bibel anggo halak Kristen maningon mandalankon parentah ai. Jadi halak Kristen boi do mambahen haputusan laho marniombah do atap lang, anjaha piga do holi niombahni. Halani ai, somal do ipakei alat kontrasepsi ase ulang boratan rumah atap pe hamil. Sanggah mamilih alat kontrasepsi, aha ma na porlu ipingkirhon sidea?

Haganup pilihan na ibahen halak Kristen maningon do mangihutkon prinsip ni Bibel. Sidea lang ra manggugurhon halani ilarang Bibel do ai. (2 Mus. 20:13; 21:22, 23; Ps. 139:16; Jer. 1:5) Halak na manggugurhon ai, lang mangkargai hagoluhan. Tapi sonaha do anggo manggunahon KB spiral?

Ipatorang do pasal on bani majallah The Watchtower 15 Mei 1979 (alm. 30-31). Ondi ai somal do halak mamakei KB spiral na ibahen humbani plastik. Ipamasuk ma ai hubagas rahim ase ulang boratan rumah. Tapi sonaha do alat ai marhorja lape tongon-tongon iarusi. Bahat do ilmuwan na mangkatahon anggo alat ai boi do manlanglangi sperma, ase ulang masuk laho mardomu pakon sel telur ni sada naboru. Ai ma na mambahen naboru ai ase lang boratan rumah.

Tapi dong do piga-piga bukti na patuduhkon anggo sperma boi do gabe mardomu pakon sel telur. Dob ai lambin banggal ma sel telur na dob mardomu ai ibagas tuba Fallopi. Atap pe ra do sel telur ai gabe masuk hubagas rahim. Tapi halani dong KB spiral, on ma na mambahen sel telur na ibagas rahim ai, lang magodang gabe poso-poso. On domma usih songon na manggugurhon. Ipatorang artikel ai ma use, “Halak Kristen na sihol manggunahon KB spiral, maningon do dear mamingkirhon hatorangan pasal alat ai janah mangidah prinsip hun Bibel na patuduhkon arga do hagoluhan ai.”​—Ps. 36:10.

Tapi dob kaluar majallah ai bani tahun 1979, domma lambin maju pangarusian ni dokter pakon ilmu pengetahuan.

Sonari, domma adong dua masam KB spiral. Na parlobei, alatni marisi tombaga. Alat na sada on, domma bahat ipakei i Amerika Serikat bani tahun 1988. Na sada nari ai ma marisi hormon. Alat on domma ijual humbani tahun 2001. Sonaha do alat on?

Tombaga: Songon na dob iulas nongkan, KB spiral on boi do manlanglangi sperma ase ulang masuk laho mardomu pakon sel telur. Leganni ai, alat ai pe marisi tombaga na boi gabe racun bani sperma atap pe na boi pamateihon sperma. * Dob ai, alat ai pe boi do mangubah lapisan ibagas rahim.

Hormon: KB spiral na sada on marisi hormon na sarupa pakon hormon na dong bani pil KB. Alat ai sarupa do gunani pakon KB  spiral na sapari. Alat ai boi pakaluarhon hormon ibagas rahim. Halani ai, bani piga-piga naboru, alat ai boi mambahen ase sel telur lang dong na kaluar. Jadi anggo lang dong sel telur na kaluar, lang dong be na boi mardomu pakon sperma. Anjaha alat ai pe boi mambahen lapisan ibagas rahim gabe tipis. * Leganni ai, alat ai boi mambahen lapisan serviks gabe tobal janah on do na mambahen sperma lang urah masuk hubagas rahim.

Songon na ihatahon nongkan ai, haduasi KB spiral ai boi mambahen lapisan ibagas rahim gabe tipis. Jadi anggo dong sel telur na dob mardomu pakon sperma, janah masuk hubagas rahim, sel telur ai lang boi be magodang halani domma tipis lapisan rahim ai. Tapi songon na ihatahon ilmuwan, jarang do masa sisonai. Sonai homa bani halak na mamakei pil KB.

Lang dong halak na pangkar mangkatahon, anggo haduasi KB spiral ai boi manlanglangi ase sperma ulang mardomu pakon sel telur. Tapi bani penelitian piga-piga pakar, KB spiral ai boi mambahen sel telur ase lang mardomu pakon sperma. Pandapot ni sidea, jarang tumang do sada naboru gabe boratan rumah anggo mamakei alat ai.

Bani halak Kristen na dob marhajabuan anjaha sihol mamakei KB spiral, maningon marsahapi ma lobei pakon dokter. Isungkun sidea ma aha do untungni pakon hahuranganni mamakei alat ai. Maningon sidea do na mambahen haputusan pasal on, ulang dokterni atap pe halak na legan. (Rom 14:12; Gal. 6:4, 5) Haputusan ni sidea maningon do mambahen malas uhur ni Jahowa anjaha manjaga panggora ni uhur totap borsih.​—Bandingkon 1 Tim. 1:18, 19; 2 Tim. 1:3.

^ par. 8 Sada laporan humbani Layanan Kesehatan Nasional Inggris patugahkon, “Anggo lambin bahat tombaga ibagas KB spiral ai, lobih humbani 99% ma hasilni. Artini, ibagas satahun, pitah sada naboru dassa na gabe boratan rumah, humbani 100 halak na mamakei alat ai. Tapi anggo otik dassa tombagani, hasilni pe hurang dear.”

^ par. 9 Halani hormon ibagas KB spiral ai boi mambahen lapisan ibagas rahim gabe tipis, sipata dong do dokter na mangojur naboru na madorastu haidni ase sidea mamakei alat ai, hassi pe sidea lape marhajabuan.