Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Desember 2017

“Hubotoh do, na Puho do Ia bani Parpuhoon Simagira”

“Hubotoh do, na Puho do Ia bani Parpuhoon Simagira”

“Huan-huanta ai, domma modom; tapi na laho ma Ahu hujai mamuhoisi.”​—JOH. 11:11.

DODING: 142, 129

1. Aha do haporsayaon ni si Marta pasal botouni na dob matei ai? (Tonggor ma gambar bani alm. 3.)

HUAN-HUAN ampa susian ni Jesus do si Marta. Ia marpusok ni uhur halani botouni si Lasarus matei. Ai adong do na mambahen si Marta tarapoh? Adong. Jesus marjanji, “Na laho puho do botoumai!” Tontu janji on lang boi mintor manasap ganup pusok ni uhurni. Tapi porsaya do ia bani janji ni Jesus, anjaha nini ma, “Eak, hubotoh do, na puho do ia bani parpuhoon simagira.” (Joh. 11:20-24) Jadi porsaya do si Marta dong do holi parpuhoon. Anjaha lang piga dokah dobkonsi ai, ibahen Jesus ma halongangan, ipapuho ma si Lasarus.

2. Mase hita marosuh mangusihi haporsayaon ni si Marta?

2 Hita lang mangarapkon Jahowa pakon Jesus papuhoon halak na ihaholongi hita sonari. Tapi songon si Marta, ai toguh do haporsayaon ni nasiam pasal parpuhoon? Ra, adong do na dob matei paramangonni,  parinangonni, namatorasni, ompungni atap pe anakni. Nasiam lang boi be pajumpah, marsahapi, atap pe tartawa rap pakon sidea. Tapi dong na mambahen hita boi tarapoh. Usih songon na ihatahon si Marta, ‘Hu botoh do halak na huhaholongi puho do holi bani ari simagira.’ Halani ai ma, hita halak Kristen porlu mamingkirhon mase hita porsaya pasal parpuhoon.

3, 4. Aha do na baru ibahen Jesus, janah sonaha ai boi patoguhkon haporsayaon ni si Marta?

3 Si Marta marhuta i dohorhon Jerusalem, halani ai ma lang ididah ni sanggah Jesus papuhoon anakni sada na mabalu i huta Nain i Galilea. Tapi ra do barita ai domma itangarni. Na leganni, ra do domma itangarni Jesus papuhoon boru ni si Jairus. Haganupan halak na i rumahni si Jairus mambotoh “na dob matei do [boruni ai]”. Tapi, ijolom Jesus ma tanganni janah ihatahon, “Puho ma!” Dob ai mintor manggoluh ma use na matei ai. (Luk. 7:11-17; 8:41, 42, 49-55) Ibotoh si Marta pakon si Maria do anggo Jesus boi pamalumkon na boritan. Halani ai, porsaya do sidea anggo ijin do Jesus sanggah si Lasarus boritan, lang matei botouni ai. Tapi, halani si Lasarus domma matei, aha do na ihaporsayai si Marta? Ia porsaya na laho puho do si Lasarus bani ari simagira atap “ari parpudi”. Mase ia porsaya? Anjaha mase ham boi porsaya dong do parpuhoon bani ari simagira?

4 Bahat do alasanta boi porsaya pasal parpuhoon. Anjaha dong piga-piga contoh na laho iulas hita. Ra do holi dapot nasiam parlajaran na baru pasal ai. Ganupan ai boi mambahen lambin toguh haporsayaon nasiam pasal parpuhoon bani ari simagira.

PARPUHOON NA PATOGUHKON HAPORSAYAONTA!

5. Mase si Marta porsaya na laho puho do si Lasarus?

5 Pardiateihon ma anggo si Marta seng mangkatahon, ‘Puho ma namin botouhu ai.’ Tapi, ia mangkatahon, “Hubotoh do, na puho do ia bani parpuhoon simagira.” Mase ma ia porsaya tumang? Halani ia domma manangar anggo na matei boi mulak manggoluh. Anjaha ra do domma iparlajari ia i rumah atap pe i rumah parguruan humbani na etek nari. Sonari ulas hita ma tolu sarita pasal parpuhoon ibagas Bibel.

6. Parpuhoon ni ise do na domma ibotoh si Marta?

6 Parpuhoon na parlobei na masa bani Bibel, ai ma sanggah Jahowa mambere kuasa bani si Elias mambahen halongangan. I Fenisia, Israel Utara dong sada naboru na mabalu na marianan i huta Sarpat. Bujur do naboru on bani nabi Elias. Halani ai, ibahen Jahowa ma halongangan ase nitak pakon minak ni naboru ai lang marnabois, ase ia pakon anakni boi totap mangan. (1 Raj. 17:8-16) Tapi lang piga dokah, boritan ma anak ni naboru ai janah matei. Jadi roh ma si Elias, ijamah ma dakdanak ai lanjar  martonggo bani Jahowa, “Paulak Ham ma hosah ni dakdanak on hu bani.” Itangar Jahowa ma tonggoni. Puho ma dakdanak ai. (Basa 1 Raja-Raja 17:17-24.) Tontu ibotoh si Marta do sarita on.

7, 8. (a) Aha do na ibahen si Elisa laho mangapohi sada naboru na i Sunem? (b) Humbani sarita ai, aha do na iparlajari hita pasal Jahowa?

7 Parpuhoon na paduahon masa bani panorang ni nabi Elisa. I kota Sunem, marianan ma sada naboru halak Israel na lang boi marniombah. Ongga do nabi Elisa tading i rumah ni naboru ai janah bujur do naboru ai hu bani. Halani ai ipasu-pasu Jahowa ma naboru ai anjaha boi ma ia tubuhan anak. Tapi dobkonsi piga-piga tahun, matei ma anakni ai. Pusok tumang ma uhur ni naboru ai. Halani ai laho ma ia manjumpahi nabi Elisa i Dolog Karmel. Daohni hujai dong 30 kilometer. Isuruh nabi Elisa ma si Gehasi hu Sunem laho papuhohon anakni ai. Tapi dakdanak ai lang boi puho ibahen si Gehasi. Ujungni das ma naboru ai pakon si Elisa i Sunem.​—2 Raj. 4:8-31.

Jahowa boi do papuhohon na matei

8 Dob ai, martonggo ma si Elisa bani Jahowa. Itangar Jahowa ma tonggoni. Ujungni manggoluh ma use dakdanak ai. Halani ai, malas tumang ma uhur ni naboru ai! (Basa 2 Raja-Raja 4:32-37.) Ra do, idingat naboru ai tonggo ni si Hanna. Si Hanna ongga do lang boi marniombah. Tapi ipasu-pasu Jahowa ma ia janah tubuh ma si Samuel. Halani Jahowa “do na manampakkon hu tanoman anjaha na patangkogkon use”, ipuji si Hanna ma Jahowa. (1 Sam. 2:6) Jadi halani dakdanak na i Sunem ai boi manggoluh use, on patuduhkon anggo Jahowa boi do papuhohon na matei.

9. Patugah ma sarita na legan pasal parpuhoon.

9 Adong ope sarita pasal parpuhoon na masa dobkonsi si Elisa matei. Domma adong 50 tahun ia mangidangi. Tapi boritan ma ia janah ‘naborit ai ma na mamboansi matei’. Dobkonsi martahun-tahun, adong ma piga-piga halak Israel na mamboan bangkei ni sada halak hu tanoman. Tapi halani ididah sidea roh munsuh, mintor isampakkon sidea ma na matei ai hu tanoman ni si Elisa janah lintun ma sidea. Bibel mangkatahon, “Dob dais halak [na matei] ai bani holi-holi ni si Elisa, mulak manggoluh ma ia lanjar jongjong ma.” (2 Raj. 13:14, 20, 21) Jadi tolu sarita on patuduhkon bani si Marta anggo Jahowa boi do papuhohon na matei. Janah on pe mambahen hita lambin porsaya anggo kuasa ni Jahowa banggal tumang do, aha pe boi ibahen-Ni.

PARPUHOON BANI PANORANG NI APOSTEL

10. Dobkonsi manangar si Tabita domma matei, aha do na ibahen si Petrus?

10 Bani Kitab Yunani Kristen ipatugah do homa anggo juakjuak ni Naibata  boi pagoluhkon jolma na matei. Nongkan ai domma iulas hita anggo Jesus boi papuhohon anak ni sada naboru i huta Nain janah papuhohon boru ni si Jairus. Dobkonsi ai, apostel Petrus pe boi do papuhoon sada naboru na margoran si Tabita. Martonggo ma ia janah ihatahon, “Ale Tabita, jongjong ma!” Mintor manggoluh ma naboru ai. Dob ai, “iarahkon [si Petrus] ma naboru ai” manjumpahi hasoman na legan. Tarsar ma barita ai. Halani ai gabe bahat ma halak i huta ai “na porsaya bani Tuhan in”. Sidea pe boi mambaritahon pasal Jesus anjaha patugahkon anggo Jahowa boi do papuhohon na matei.​—Lah. 9:36-42.

11. Aha na masa sanggah si Paulus marambilan i Troas, anjaha mase gabe tarapoh uhur ni halak na mabuei ijai?

11 Adong ope sarita na legan pasal halak na dob ipapuho. Ondi ai, martumpu ma si Paulus i Troas na sonari igoran Turki dompak barat laut. Marambilan ma ia ijai ronsi tongah borngin. Dong sada garama margoran si Oitikus na hundul bani jandela, manangar ambilan ni si Paulus. Tapi halani tartunduh ia, sompong madabuh ma ia hun loteng na patoluhon. Halani ai turun ma si Lukas mangidahsi. Halani dokter do homa ia, ipareksa ma, janah ibotoh ma domma matei garama ai. Turun ma use si Paulus, lanjar idahop ma na matei ai. Gabe manggoluh ma use garama ai. Ganup halak na mangidah ai gabe longang ma, anjaha “gabe tarapoh ma uhur ni sidea”.​—Lah. 20:7-12.

NA PATOGUHKON PANGARAPANTA

12, 13. Humbani sarita pasal parpuhoon na dob iulas hita, sungkun-sungkun aha do na boi ipingkirhon hita?

12 Nongkan ai domma iulas hita  sonaha juakjuak ni Naibata ai ma si Elias, Jesus, pakon si Petrus mangidah kuasa ni Jahowa laho papuhohon na matei. Tontu gabe toguh ma haporsayaonta songon si Marta anggo Jahowa boi do papuhohon na matei. Tapi sonaha bani juakjuak ni Naibata na hinan, na lape ongga mangidah parpuhoon? Ai porsaya do sidea bani pangarapan parpuhoon i ari simagira? Ai boi do sidea porsaya songon si Marta na mangkatahon pasal botouni, “Hubotoh do, na puho do ia bani parpuhoon simagira”? Mase ia porsaya dong do pangarapan parpuhoon bani ari simagira? Ai porsaya do homa nasiam?

13 Adong do piga-piga sarita bani Bibel na patuduhkon anggo juakjuak ni Naibata mambotoh dong do pangarapan parpuhoon bani ari simagira. On ma na laho iulas hita.

14. Sonaha do haporsayaon ni si Abraham pasal parpuhoon, anjaha aha do parlajaranni hubanta?

14 Jahowa mamarentahkon bani si Abraham, “Buat ma anakmu na sasada in, haholongan ni uhurmu, si Isak in, arahkon ma ia hu tanoh Moria, anjaha galangkon ma ia ijai bahen galangan situtungon.” (1 Mus. 22:2) Pingkirhon ma sonaha pangahap ni si Abraham dobkonsi manangar parentah ai, hape domma dokah si Abraham paima-imahon anakni ai tubuh. Anjaha Jahowa domma marjanji dapotan pasu-pasu do bangsa-bangsa marhitei ginompar ni si Abraham. (1 Mus. 13:14-16; 18:18; Rom 4:17, 18) Janah pasu-pasu ai ibere do “marhitei si Isak”. (1 Mus. 21:12) Tapi sonaha do janji ai boi saud anggo igalangkon si Abraham do si Isak? Ihatahon si Paulus do anggo si Abraham porsaya Jahowa boi do papuhohon si  Isak. (Basa Heber 11:17-19.) Tapi lang adong ipatugah bani Bibel anggo si Abraham mangarap ase anakni ai mintor ipapuho bani ari ai, atap pe bani minggu ai. Jadi, lang ibotoh si Abraham attigan do anakni ai ipapuho. Tapi porsaya do ia anggo Jahowa boi do papuhohon si Isak.

15. Aha do na ihaporsayai si Job?

15 Porsaya do homa si Job dong do parpuhoon bani ari simagira. Ibotohni do anggo sada hayu iroboh, boi do use martunas. Tapi lang sonai bani manisia. (Job 14:7-12; 19:25-27) Anggo domma matei jolma, ai ma ujungni. (2 Sam. 12:23; Ps. 89:49) Tapi on sedo artini anggo Jahowa lang boi pagoluhkon na matei. Halani si Job sandiri porsaya idingat Jahowa do ia janah sihol papuhohonsi, hassi pe lang ibotohni attigan do ai saud.​—Basa Job 14:13-15.

16. Aha do na ihatahon sada malekat bani si Daniel na mambahen ia gabe tarojur?

16 Pingkirhon hita ma pasal si Daniel. Tongtong do ia mangidangi Jahowa janah ipasu-pasu do ia. Ihatahon malekat ma “haholongan ni Naibata” do ia. Ihatahon use anggo ia mandapot ‘hadameion’ janah “margogoh”.​—Dan. 9:22, 23; 10:11, 18, 19.

17, 18. Aha do janji ni Jahowa bani si Daniel?

17 Sanggah si Daniel marumur hira-hira 100 tahun, ra do nini uhurni na laho matei mando ia. Tapi, porsaya do si Daniel bani pangarapan parpuhoon. Anggo ibasa hita bani buku Daniel, marjanji do Naibata hu bani, “Anggo ho, tuju ma ujungni ai, marsaran ma ho.” (Dan. 12:13) Ibotoh si Daniel do lang dong “panimbangion atap habotohon atap hapentaran anggo i nagori toruh”. (Par. 9:10) Hassi pe sonai, dong do pangarapan bani si Daniel.

18 Ihatahon malekat ni Jahowa do bani si Daniel, “Puho do ho use laho manjalo rupeimu bani ujung ni panorang.” Jadi ibotoh si Daniel do na laho ipapuho do ia bani ari simagira. Ai ma ase ihatahon “bani ujung ni panorang”.

Songon si Marta, hita pe boi do porsaya bani parpuhoon (Tonggor ma paragrap 19, 20)

19, 20. (a) Aha do na mambahen si Marta porsaya bani pangarapan parpuhoon? (b) Aha do na laho iulas hita bani artikel na mangihut?

19 Jadi porsaya do si Marta na laho puho do botouni ai “bani parpuhoon simagira”, halani mambotoh sarita pasal parpuhoon. Sonari on, hita pe boi porsaya songon si Marta, halani hita domma mambotoh janji ni Jahowa bani si Daniel. Jadi, tongon-tongon do adong parpuhoon.

20 Ganupan sarita pasal parpuhoon na dob iulas nongkan patuduhkon anggo halak na matei boi do mulak manggoluh. Anjaha juakjuak ni Naibata sapari pe porsaya do homa bani pangarapan parpuhoon i ari simagira. Tapi, ai adong ope bukti na legan na mangurupi hita ase lambin porsaya anjaha paima-imahon pangarapan ai? Tapi attigan do parpuhoon ai masa? On ma na laho iulas hita bani artikel na mangihut.