Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Agustus 2017

Ai Sabar do Nasiam Paimahon Janji ni Jahowa?

Ai Sabar do Nasiam Paimahon Janji ni Jahowa?

“Nasiam pe sabar ma.”​—JAKOBUS 5:8.

DODING: 78, 139

1, 2. (a) Mase sipata isungkun hita, “Sadia dokah?” (b) Mase boi malas uhurta anggo manrimangi pasal juakjuak ni Naibata sapari na ongga manungkun “Sadia dokah”?

“SADIA dokah?” Ai do na isungkun si Jesaya pakon si Habakuk. (Jes. 6:11; Hab. 1:2) Sonai homa sanggah Raja Daud manuratkon Psalmen 13, dong ompat hali ia manungkun sisonai. (Ps. 13:2, 3) Sobali ai, sanggah ididah Jesus bahat halak na lang porsaya, ihatahon ia do homa “Sadia dokah?” (Mat. 17:17) Sonai homa hita pe ra do marsungkun-sungkun songon sidea ai.

2 Mase sipata isungkun hita, “Sadia dokah?” Ra do halani bahat hagedukon atap boritan hita anjaha matua. Sunsah do pangahapta halani manggoluh bani “ari hasunsahan”. (2 Tim. 3:1) Atap boi do homa halani bahat halak na mangkorjahon na sambor, gabe pusok ma uhurta. Lang soal aha alasanni, tontu malas do uhurta  mambotoh lang ihasogamkon Jahowa juakjuak-Ni sapari na manungkun sisonai.

3. Aha do na boi mangurupi hita ase totap toguh ibagas parlajouan?

3 Aha do na boi mangurupi hita ase totap toguh ibagas parlajouan? Sanina ni Jesus na margoran si Jakobus mangkatahon, “Ai pe, nasiam sanina, sabar ma nasiam das hubani ari parroh ni Tuhan in!” (Jak. 5:7) Halani ai, porlu do hita sabar. Tapi, aha do arti ni na sabar ai, anjaha aha ma na boi bahenonta ase sabar?

AHA DO HASABARON AI?

4, 5. (a) Sonaha ma na sabar ai, anjaha sasintongni mase hita boi gabe sabar? (b) Aha do na ihatahon si Jakobus pasal hasabaron? (Idah gambar bani alm. 3.)

4 Bibel mangkatahon buah ni tonduy na pansing do hasabaron ai. Anggo lang iurupi Naibata, sunsah do hita ase sabar halani lang gokan dear. Sibere-bere ni Naibata do hasabaron ai. Anggo sabar hita, taridah ma holongta bani Jahowa pakon hasoman. Tapi anggo lang sabar hita, gabe galek ma holongta bani na legan. (1 Kor. 13:4; Gal. 5:22) Jadi, sonaha ma na sabar ai? Ai ma totap toguh do haporsayaonni bani Naibata hassi pe ibagas parlajouan. (Kol. 1:11; Jak. 1:3, 4) Anjaha lang soal aha na masa hubanta, totap do hita porsaya bani Naibata anggo sabar hita. Anjaha hasabaron ai pe boi mangurupi hita ase ulang mambalas na jahat. Bibel pe mangkatahon porlu do hita sabar laho paimahon. On ma na laho iparlajari hita bani Jakobus 5:7, 8. (Basa.)

5 Mase hita porlu sabar paimahon janji ni Jahowa? Ipausih si Jakobus do aha na masa hubanta pakon parjuma-juma. Hassi pe ia domma martidah, seng boi paksaonni ase suan-suanan ai podas tubuh atap pe marbuah. Tapi maningon sabar do ia paimahon “buah na maharga hun tanoh in”. Sonai homa sonari on, adong na lang boi tarbahen hita sanggah paimahon parsaud ni janji ni Jahowa. (Mrk. 13:32, 33; Lah. 1:7) Jadi, porlu do hita sabar songon parjuma-juma ai.

6. Aha do na boi iparlajari hita humbani nabi Mika?

6 Totap do nabi Mika martahan hassi pe buei parlajouan. Nabi Mika manggoluh bani panorang ni Raja Ahas na jahat, halani ai buei ma hajahaton ijia. Bibel mangkatahon lambin bahat ma na “mangkorjahon na masambor”. (Basa Mika 7:1-3.) Lang boi iubah si Mika aha na masa ijia. Tapi adong na boi bahenonni. Ia mangkatahon, “Anggo ahu mangkawah bani Jahowa do, anjaha mangarap do ahu bani Naibata ni haluahonku; sai tangihonon ni Naibatangku do ahu.” (Mi. 7:7) Usih songon si Mika, maningon “mangarap” bani Naibata ma hita.

7. Sonaha ma namin pangahapta ibagas na paimahon janji ni Jahowa?

7 Anggo hita sabar songon si Mika, ibagas malas ni uhur do hita paimahon janji ni Jahowa. Hita lang songon  parjahat na ipenjara na laho iuhum matei paima-imahon ibagas pusok ni uhur. Tapi, malas do uhurta paimahon janji ni Jahowa pasal hagoluhan sadokah ni dokahni. Halani porsaya do hita topat bani panorangni do Jahowa pasaudkon janji-Ni. On ma na mangurupi hita ase ‘tahan marhasoman malas ni uhur’. (Kol. 1:11, 12) Tapi ulang ma ihatahon hita madokahtu do Jahowa pasaudkon janji-Ni, halani boi do ai mambahen sogam uhur-Ni.​—Kol. 3:12.

SIUSIHAN NA PATARIDAHKON HASABARON

8. Aha do na boi iparlajari hita humbani dalahi pakon naboru na isuratkon bani Bibel?

8 Aha do na boi mangurupi hita ase lambin sabar paimahon janji ni Jahowa? Rimangi hita ma pasal dalahi pakon naboru na isuratkon bani Bibel. Sabar do sidea paimahon janji ni Jahowa. (Rom 15:4) Pingkirhon hita ma sadia dokah do sidea paima-imahon ai, mase sabar sidea anjaha sonaha do Jahowa mamasu-masu hasabaron ni sidea?

Martahun-tahun do si Abraham paimahon ase boi mangabing pahompuni ai ma si Esau pakon si Jakob (Idah paragrap 9, 10)

9, 10. Sadia dokah do si Abraham pakon si Sara paimahon janji ni Jahowa?

9 Rimangi ma siusihan humbani si Abraham pakon si Sara. Halani ipataridah sidea ‘haporsayaon ampa sabar ni uhur’, dapot sidea ma “bagah-bagah” ai. Bibel patugahkon “halani sabar ia paima-imahon” marjanji do Jahowa laho mamasu-masu ia ase buei ginomparni. (Heb. 6:12, 15) Jadi  mase maningon sabar si Abraham? Halani porlu do panorang laho pasaudkon janji ai. Bani tanggal 14 Nisan tahun 1943 SM, si Abraham pakon kaluargani mandipari Bah Eprat laho hu Tanoh Parpadanan. Tapi 25 tahun nari ma ia paimahon ase tubuh si Isak, anakni ai anjaha 60 tahun ma dokahni ia paimahon ase tubuh si Esau pakon si Jakob, pahompuni.​—Heb. 11:9.

10 Sadia dokah do ipaima si Abraham ase ibere Tanoh Parpadanan ai hubani? Bibel mangkatahon anggo Jahowa, “seng ibere ope bani parbagianan ijai, sanjongkal pe lang, tapi iparbagah do, berehononni tanoh in bani, ase ia simada in ampa ginomparni, age pe seng dong anakni”. (Lah. 7:5) 430 tahun dobkonsi mandipari Bah Eprat ma ia ase ginomparni gabe sada bangsa na mangiankon tanoh in.​—2 Mus. 12:40-42; Gal. 3:17.

11. Mase si Abraham boi sabar paimahon janji ni Jahowa janah pasu-pasu aha do na laho ijaloni?

11 Sabar do si Abraham paimahon janji ni Jahowa halani porsaya tongtong do Jahowa pasaudkon janji-Ni. (Basa Heber 11:8-12.) Totap do malas uhurni paimahon hassi pe lang haganup janji ni Jahowa boi ididahni ronsi matei. Tapi pingkirhon ma sanggah ipapuho ia i tanoh on, tontu malas tumang ma uhurni halani ibotoh bahat do isuratkon bani Bibel pasal hagoluhanni pakon kaluargani. * (Idah surat partoruh.) Anjaha malas do homa uhurni sanggah ibotoh marhiteihonsi do ipasaud Jahowa sura-sura-Ni pasal Mesias! Tontu porsaya do hita anggo si Abraham maningon sabar do paimahon ase mandapot pasu-pasu ni Naibata.

12, 13. Mase maningon sabar do si Josep, anjaha hunja do nabotoh na sabar do ia?

12 Sonai homa si Josep, pahompu ni si Abraham, sabar do ia paimahon janji ni Jahowa. Bahat do sitaronon ni si Josep. Umpamani, sanggah marumur 17 tahun ia, ijual saninani do ia gabe jabolon. Dob ai ihatahon do use ia sihol mansedai parinangon ni tuanni hape lang tongon ai. Tapi ipenjarahon do ia. (1 Mus. 39:11-20; Ps. 105:17, 18) Hassi pe setia ia bani Naibata, songon na sunsah do lalab hagoluhanni. Tapi 13 tahun dobkonsi ai, mubah ma haganupan ai. Ipaluah ma ia hun penjara anjaha gabe sipanrajai na paduahon dob si Parao i Masir.​—1 Mus. 41:14, 37-43; Lah. 7:9, 10.

Iarusi si Josep do sonaha banggal ni kuasa ni Jahowa anjaha maningon sabar do ia paimahon janji ni Jahowa

13 Ai gabe mandolei do si Josep anjaha marpangahap itadingkon Jahowa halani bueini sitarononni? Lang. Tapi halani martenger ni uhur bani Jahowa, sabar do ia paimahon janji-Ni. Anjaha iarusi do sonaha banggalni kuasa ni Jahowa. Taridah do on sanggah ia mangkatahon bani saninani, “Ulang ma nasiam mabiar, ai lang tunduk bani Naibata do age ahu? Na sambor do tongon tahi ni uhur nasiam hu bangku, tapi na madear do hadobanni ibahen Naibata, laho pasaudkon songon  na niidah nasiam sadari on, ai ma pagoluhkon sada bangsa na bolon.” (1 Mus. 50:19, 20) Jadi ibotoh si Josep maningon sabar do ia paimahon janji ni Jahowa.

14, 15. (a) Aha do na boi iarusi hita pasal hasabaron ni si Daud? (b) Aha do na mangurupi si Daud ase sabar?

14 Raja Daud pe bahat do sitarononni. Sanggah poso ope ia, iminaki Jahowa ma ia gabe raja ni Israel. Tapi 15 tahun nari do ia paimahon ase gabe raja bani sukuni sandiri. (2 Sam. 2:3, 4) Bani panorang ai, maningon maporus do ia hu huta na legan halani laho ibunuh Raja Saul. * (Idah surat partoruh.) Halani ai lang dong rumahni. Anjaha marponop ma ia bani gua-gua i halimisan ronsi si Saul matei ibagas parporangan. Dob ai, maningon pituh tahun nari ma ia paimahon ase gabe raja bani Israel.​—2 Sam. 5:4, 5.

15 Mase si Daud sabar paimahon janji ni Jahowa? Ipatugah ma balosni dobkonsi ompat hali ia manungkun “Sadia dokah?” Bani psalmen na sarupa, ia mangkatahon, “Ia ahu, bani idop ni uhur-Mu do ahu marhatengeran, marolob-olob do uhurhu, mangidah haluahon na hun Bamu. Mandoding ma ahu bani Jahowa halani pambahenan-Ni na madear bangku.” (Ps. 13:6) Ibotoh si Daud holong anjaha setia do Jahowa hu bani. Ipingkirhon ia ma sonaha pangurupion ni Jahowa hu bani janah porsaya boi do Jahowa paluahkonsi bani panorang na topat. Jadi ibotoh si Daud maningon sabar do ia paimahon janji ni Jahowa.

Ibagas na sabar paimahon, Jahowa lang pitah mambere parentah, tapi Ia do siusihan na sidearan

16, 17. Sonaha do Jahowa pakon Jesus patuduhkon hasabaron ibagas na paimahon?

16 Ibagas na sabar paimahon, Jahowa lang pitah mambere parentah, tapi Ia do siusihan na sidearan. (Basa 2 Petrus 3:9.) Umpamani, marribu tahun na salpu i pohon Eden, ihatahon Sibolis na geduk do Jahowa. Tapi sabar do Jahowa “paima-imahon” ronsi goran-Ni tongon-tongon ipapansing. Halani ai ma dapotan pasu-pasu do halak “na martenger ni uhur Bani”.​—Jes. 30:18

17 Jesus pe sabar do ibagas na paimahon. Sanggah i tanoh on, setia do ia ronsi matei. Bani tahun 33 M, naik ma ia hu surga mamboban nilai tobusan bani Jahowa. Anjaha sabar do homa ia paimahon ronsi tahun 1914 ase ipabangkit gabe raja. (Lah. 2:33-35; Heb. 10:12, 13) Dob ai, sabar do  ia paimahon ase haganup munsuhni iripaskon bani ujung ni Pamarentahan Saribu Tahun. (1 Kor. 15:25) Dokah tumang do Jesus paimahon ai. Jadi maningon sabar do ase mandapot pasu-pasu ni Naibata.

AHA DO NA MANGURUPI HITA?

18, 19. Aha do na boi mangurupi hita ase sabar paimahon janji ni Jahowa?

18 Marosuh do Jahowa ase hita sabar paimahon. Aha do na boi mangurupi hita ase sabar? Martonggo ma mangindo tonduy na pansing, halani buah ni tonduy do hasabaron ai. (Ep. 3:16; 6:18; 1 Tes. 5:17-19) Jadi pindo ma bani Jahowa ase iurupi nasiam pataridahkon hasabaron!

19 Pingkirhon ma use aha do na mangurupi si Abraham, si Josep pakon si Daud ase sabar paimahon janji ni Jahowa, ai ma halani martenger ni uhur hubani Jahowa. Sidea lang pitah mamingkirhon harosuh ni sandiri. Jadi, anggo irimangi hita pasu-pasu na ijalo sidea, on boi mangurupi hita ase sabar paimahon janji ni Jahowa.

20. Aha do na sihol bahenonta?

20 Hassi pe ra do borat parlajouan na roh hubanta, tapi tongtong ma “marpangarapan” bani Naibata. Sipata ra do ihatahon hita, “Piga dokah on, Tuhan?” (Jes. 6:11) Tapi marhitei pangurupion ni tonduy na pansing, boi ma ihatahon hita songon si Jeremia, “Jahowa do rupeihu,” anjaha “Halani ai Bani do ahu marpangarapan.”​—Tangis. 3:21, 24.

^ par. 11 Adong hira-hira 15 bindu bani buku 1 Musa na mangulas pasal si Abraham. Anjaha adong lobih 70 hali goran ni si Abraham ipatugah bani Kitab-Kitab Yunani.

^ par. 14 Dobkonsi dua tahun ipilih Jahowa si Saul gabe raja, itulak Jahowa ma ia. Tapi mamarentah ope si Saul 38 tahun nari ronsi matei.​—1 Sam. 13:1; Lah. 13:21.