Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Agustus 2017

Tongtong ma Patuduhkon Biak na Dear

Tongtong ma Patuduhkon Biak na Dear

“Pakei nasiam ma jolma na baru.”​—EPESUS 4:24.

SONGS: 43, 106

1, 2. (a) Mase hita boi marparlahou songon na iharosuhkon Naibata? (b) Biak na madear aha do na laho iulas hita humbani Kolosse 3:10-14?

BANI Bibel sahap Simalungun, dong do dua hali ihatahon “jolma na baru”. Artini, ai ma marparlahou “usih hubani Naibata”. (Ep. 4:24; Kol. 3:10) Tapi, ai boi do hita marparlahou songon na iharosuhkon Naibata? Boi. Halani usih songon rupa ni Naibata do jolma itompa janah boi mangusihi biak-Ni.​—1 Mus. 1:26, 27; Ep. 5:1.

2 Halani lang gokan dear urah do hita marparlahou na lepak. Ra do ai halani hita tading bani ianan na marparlahou na masambor. Tapi halani pangurupion ni Naibata, hita boi marparlahou songon na iharosuhkon Naibata. Ulas hita ma piga-piga biak na dear na iharosuhkon Naibata. (Basa Kolosse 3:10-14.) Dob ai iulas hita ma sonaha do hita mangkorjahon ai ibagas pangidangionta.

 “SADA DO NASIAM HAGANUP”

3. Biak aha do na porlu tumang ipatuduh hita?

3 Apostel Paulus patorangkon porlu tumang do hita patuduhkon biak na so sididah rupa. Ia mangkatahon, “Seng dong be ijai Jahudi barang Gorik, jabolon barang halak na mardeka.” Ibagas kuria ulang ma adong na marpangahap lobihan do ia humbani na legan halani suku, bangsa atap pe halani dong jabatanni. Mase? Halani na gabe halak Kristen, ‘sada do hita haganup’.​—Kol. 3:11; Gal. 3:28.

Seng ipalegan-legan hita halak halani suku atap pe pargoluhanni

4. (a) Sonaha do pangahapta bani halak na legan? (b) Ai urah do patuduhkon biak na so sididah rupa? Mase?

4 Anggo ipatuduh hita biak na so sididah rupa, hormat do hita bani ganup halak lang soal aha sukuni, atap pe sonaha pargoluhanni. (Rom. 2:11) Tapi bani piga-piga ianan, lang sai urah mandalankon on. Umpamani, i Afrika Selatan dong ibahen pamarentah sada aturan anggo halak na legan warna kulitni lang boi rup marsaor, tapi maningon pulig-pulig do iananni. Janah dong saksi Jahowa na tading ijai. Halani ai, iojur Pangurus Pusat ma sanina-botou ase mandalankon podah on, ‘Palumbang ma uhur nasiam!’ Jadi bani bulan Oktober 2013, ibahen ma pangaturan bani sidea na tading ijai ase marsiurupan hassi pe lang sarupa warna kulitni ampa iojur ma sidea ase marsitandaan.​—2 Kor. 6:13.

5, 6. (a) Pangaturan aha do na ibahen bani sada nagori ase sanina-botou na ijai boi marsaor? (Idah gambar bani alm. 21.) (b) Sonaha do hasilni?

5 Jadi ibahen sanina-botou na ijai ma pangaturan ase dua kuria na lang sarupa warna kulitni atap bahasani, boi marsaor samah sidea bani piga-piga ujung minggu. Anjaha sidea pe boi rap marbarita, martumpu atap pe manrohi rumah ni sanina-botou na legan. Dong marratus kuria na dihut bani pangaturan ai. Anjaha dear tumang do laporan na ijalo kantor cabang. Halak na lang saksi pe longang do mangidah ai. Umpamani, dong sada siparhorja ugama mangkatahon, “Hassi pe lang saksi ahu, tapi hupuji do nasiam halani dear tumang do pangaturan na ibahen nasiam laho marbarita. Hassi pe palegan-legan warna kulitni, tapi marsada do nasiam.” Sonaha do pangahap ni sanina-botou bani pangaturan ai?

6 Dong sada botou na margoran si Noma, na marsahap Xhosa. Mungkahni, bungbang do pangahapni mangontang sanina-botou hun kuria marsahap Inggris hu rumahni. Tapi dobkonsi marbarita ia rapkon sanina na markulit putih janah roh hu rumahni, gabe lang be bungbang uhurni. Ia mangkatahon, “Sarupa do hita pakon sidea!” Jadi sanggah sanina-botou  hun kuria na marsahap Inggris roh marbarita pakon kuria na marsahap Xhosa, iontang si Noma ma piga-piga humbani sidea ase mangan hu rumahni. Malas tumang uhur ni si Noma sanggah mangidah sada sintua na markulit putih ra hundul i kotak plastik. Martarima kasih do ia halani pangaturan on, gabe boi ma sidea marsitandaan janah mandapot hasoman na baru hassi pe marlegan-legan warna kulitni.

PATUDUH MA IDOP NI UHUR AMPA HABASARON

7. Mase hita maningon tongtong maridop ni uhur?

7 Sanggah lape iripaskon dunia ni sibolis, bahat do hasunsahan bani juakjuak ni Jahowa. Umpamani dong na hona PHK, na boritan, iparburu, bencana alam, hajahaton, ampa na leganni. Halani ai, porlu ma hita maridop ni uhur laho mangurupi halak na sunsah. Anggo maridop ni uhur hita, on ma na mangojur hita ase basar bani na legan. (Ep. 4:32) Biak sisonon ma na mangurupi hita mangusihi Naibata janah mangapoh na legan.​—2 Kor. 1:3, 4.

8. Sonaha do hasilni anggo basar janah maridop ni uhur hita bani halak i kuria? Bere ma contoh.

8 Sonaha do hita pataridahkon habasaron bani sidea na pindah hun nagori na legan pakon bani sidea na sunsah i kuria? Alo-alo janah hasomani ma sidea, dob ai patuduh hita ma anggo sidea pe porlu do i kuria. (1 Kor. 12:22, 25) Umpamani, dong si Dannykarl na pindah hun Filipina hu Japang. Halani humbani nagori na legan do ia, bahat do na lang marosuh mangidahsi i parhorjaan. Tapi roh ma ia martumpu i kuria ni saksi Jahowa. Nini ma, “Dear tumang do ahu ialo-alo, songon na dob dokah do hanami marsitandaan.” Halani habasaron ni sidea, on ma mambahen si Dannykarly dohor bani Jahowa. Ujungni ididi ma ia janah gabe sintua sonari. Sintua na legan na sakuria pakonsi pe marmalas ni uhur mangidah si Dannykarl pakon si Jennifer parinangonni janah ihatahon ma, “Sidea ma parintis na gabe siusihan na mambahen harajaon ni Naibata siporlunan ibagas hagoluhanni.”​—Luk. 12:31.

9, 10. Bere ma contoh na patuduhkon dear do hasilni anggo maridop ni uhur hita sanggah marbarita.

9 Sanggah marbarita, ai do panorang banta laho ‘mangkorjahon na madear bani haganup halak’. (Gal. 6:10) Bahat do saksi na maridop ni uhur bani halak na roh humbani nagori na legan. Jadi iparlajari sidea ma bahasani. (1 Kor. 9:23) Janah dear do hasilni. Umpamani sada parintis na margoran si Tiffany hun Australia, marlajar sahap Swahili ase boi mangurupi kuria na marsahap Swahili i kota Brisbane. Hassi pe lang urah marlajar bahasa na baru, tapi malas tumang do uhurni. Ia mangkatahon, “Anggo sihol nasiam lambin marmalas ni uhur ibagas pangidangion, pindah ma hu kuria na marsahap na legan. Songon  na mardalani hu nagori na legan do hita, tapi sasintongni hita lang manadingkon huta. Ijin ma iahapkon ham holong parsaninaon ampa hasadaon.”

Aha do na mangojur halak Kristen ra mangurupi sidea na roh humbani nagori na legan? (Idah paragrap 10)

10 Sada kaluarga hun Japang pe mangahapkon na sarupa. Si Sakiko, boruni mangkatahon, “Sanggah marbarita, gatih do hanami pajumpah pakon halak Brasil. Sanggah ipatuduh hanami ayat songon Pangungkabon 21:3, 4 atap pe Psalmen 37:10, 11, 29 ibagas bahasa Portugis, rosuh tumang do sidea anjaha dong na tariluh.” Holong do uhur ni sidea bani bani halak Portugis ai. Halani ai iparlajari sidea ma bahasa Portugis ase boi mangurupi halak ai mambotoh hasintongan. Dob ai ipungkah sidea ma partumpuan na marsahap Portugis. Dob piga-piga tahun, domma bahat na iurupi sidea laho manombah Jahowa. Si Sakiko mangkatahon, “Hassi pe lang urah marlajar sahap Portugis, tapi pasu-pasu na ijalo hanami lobih humbani na ipingkirhon hanami. Diatei tupa ma bani Jahowa.”​—Basa Lahoan ni Apostel 10:34, 35.

PATUDUH MA TORUH NI UHUR

11, 12. (a) Mase hita sihol marparlahou na dear? (b) Aha do na boi mangurupi hita ase totap martoruh ni uhur?

11 Hita marparlahou na dear ulang ma halani sihol ipuji halak tapi ase pasangapkon Jahowa. Dingat hita ma malekat na gokan dear pe boi do gabe margijang ni uhur janah mardousa. (Bandingkon Hes. 28:17.) Tarlobih ma hita na lang gokan dear. Sunsah do banta ase totap martoruh ni uhur. Tapi dong do na boi mangurupi hita ase totap martoruh ni uhur. Aha ma ai?

12 Sada carani ai ma mambasa anjaha marimbagaskon isi ni Bibel tiap ari. (5 Mus. 17:18-20) Umpamani, irimangi hita ma na iajarhon Jesus pasal toruh ni uhur. (Mat. 20:28) Ibere do homa siusihan pasal ai. Iburihi Jesus ma nahei ni susianni. (Joh. 13:12-17) Cara na leganni ai ma mangindo tonduy na pansing bani Jahowa. On boi mangurupi hita ase ulang marpangahap lobihan do dirinta marimbangkon na legan.​—Gal. 6:3, 4; Pil. 2:3.

Anggo toruh maruhur hita, lambin damei anjaha marsada ma kuria

13. Aha do pasu-pasuni anggo martoruh ni uhur hita?

 13 Basa Podah 22:4. Marosuh do Jahowa ase hita martoruh ni uhur. Halani parohkon pasu-pasu do ai. Umpamani, anggo toruh maruhur hita, lambin damei anjaha marsada ma kuria. Anjaha anggo martoruh ni uhur hita, Jahowa pe maridop ni uhur ma hubanta. Apostel Petrus mangkatahon, “Haganup ma nasiam margonditkon toruh ni uhur samah nasiam, ai iimbang Naibata do sigijang uhur, tapi ibere do idop ni uhur bani na toruh maruhur.”​—1 Ptr. 5:5.

PATUDUH MA HALAMLAMON AMPA HASABARON

14. Ise do na gabe siusihan na pataridahkon halamlamon ampa hasabaron?

14 Sonari bahat do na marpangahap anggo sasada halak na lamlam ampa sabar, halak na galek do ai. Tapi seng tongon ai. Halani Jahowa hassi pe Pargogoh na So Tarimbang, tapi lamlam janah sabar do Ia. (2 Ptr. 3:9) Umpamani, pingkirhon ma sonaha sabar ni Jahowa mambalosi sungkun-sungkun ni si Abraham pakon si Lot marhitei malekat. (1 Mus. 18:22-33; 19:18-21) Anjaha sabar tumang do Jahowa bani halak Israel na lang ra unduk hu Bani sadokah 1.500 tahun.​—Hes. 33:11.

15. Sonaha do Jesus patuduhkon halamlamon ampa hasabaron?

15 Halak na “lamlam” do Jesus. (Mat. 11:29) Sabar do homa ia mangidah hahurangan ni susianni. Sanggah i tanoh on, buei do halak na manrisai ia. Tapi totap do lamlam Jesus anjaha sabar ronsi matei. Umpamani sanggah igantung bani sada hayu, martonggo do ia bani Jahowa ase isasap ma dousa ni halak na mamunuhsi. Nini do, “Seng ibotoh sidea na binahenni ai!” (Luk. 23:34) Hassi pe buei sitarononni, tapi totap do ia lamlam anjaha sabar.​—Basa 1 Petrus 2:21-23.

16. Sonaha do hita boi patuduhkon halamlamon ampa hasabaron?

16 Isuratkon si Paulus do aha na mangurupi hita ase boi lamlam janah sabar, “Marsianju-anjuan anjaha marsisasapan dousa, anggo marpangkurangi uhur ni na sada dompak hasomanni; songon na dob isasap Kristus dousa nasiam, sonai ma homa nasiam marsisasapan.” (Kol. 3:13) Ase boi manasap dousa ni hasoman, porlu do hita lamlam janah sabar. On do na boi mambahen dong hadameion ampa hasadaon ibagas kuria.

17. Mase porlu tumang patuduhkon halamlamon ampa hasabaron?

17 Marosuh do Jahowa ase hita lamlam janah sabar bani na legan. Halani halak sisonai do na boi manggoluh bani dunia na baru. (Mat. 5:5; Jak. 1:21) Anggo lamlam janah sabar hita, on boi pasangapkon Jahowa  anjaha mangurupi na legan ase mangkorjahon na sarupa.​—Gal. 6:1; 2 Tim. 2:24, 25.

PATUDUH MA HOLONG

18. Aha do kaitanni holong pakon biak na so sididah rupa?

18 Ganupan biak na iulas hita nongkan ai dong do kaitanni pakon holong. Umpamani ipasingat si Jakobus do sanina-botou na hinan, ase ulang palegan-leganhon halak na bayak pakon na masombuh. Halani lang sosok ai bani parentah ni Naibata, “Haholongi ma hasomanmin songon dirimu!” Dob ai ihatahon use, “Anggo sididah-idah bohi nasiam, na mardousa do nasiam ijai.” (Jak. 2:8, 9) Anggo holong do hita bani na legan, seng mapas hita bani sidea halani sukuni, lang dong sikkolah atap pe jabatanni. Jadi maningon ma tongtong ipataridah hita biak na so sididah rupa ibagas hagoluhanta.

19. Mase hita porlu patuduhkon holong?

19 Haholongon ai artini ‘sabar anjaha basar’ janah ‘seng ipajuntul-juntul dirini’. (1 Kor. 13:4) Ase boi tongtong marbarita, porlu do hita sabar, bujur anjaha toruh maruhur. (Mat. 28:19) Biak sisonon boi mangurupi hita ase marhasoman bani ganup halak i kuria. Anggo ipatuduh hita holong, gabe marsada ma kuria anjaha parohkon hasangapon do ai bani Jahowa. Halani ai, halak na legan pe gabe marosuh bani hasintongan. Jadi tangkas do pasal parlahou na dear ihatahon do homa, “I atas ni ganupan ai dalankon nasiam ma holong, ai in do rahut-rahut ni sagala hadearon.”​—Kol. 3:14.

“GABE BAYU MA NASIAM”

20. (a) Sungkun-sungkun aha do na porlu isungkun hita bani dirinta sandiri? Mase? (b) Aha do na ipaima hita?

20 Sungkun hita ma dirinta, ‘Ai dong ope na porlu hupadear bani parlahouku?’ Maningon martonggo do hita bani Jahowa mangindo pangurupion. Anjaha maningon ipadaoh hita do pingkiran ampa parlahou na lepak ase boi ‘manean Harajaon ni Naibata’. (Gal. 5:19-21) Dob ai, “Humbani aha na hupingkirhon, ai boi do ai pamalaskon uhur ni Jahowa? (Ep. 4:23, 24) Halani lang gokan dear, maningon pongkut do hita manjaga parlahounta ase totap dear. Tontu ipaima hita do bani ari magira sanggah haganup halak marparlahou na dear janah mangusihi Naibata!