Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Agustus 2017

Tadingkon ma Parlahou na Masambor

Tadingkon ma Parlahou na Masambor

“Tanggali ma jolma na buruk in rap pakon pambahenanni.”​KOLOSSE 3:9.

DODING: 83, 129

1, 2. Aha do na gati ipingkirhon halak pasal Saksi-Saksi Jahowa?

BAHAT do halak mangkatahon, anggo Saksi-Saksi Jahowa legan do humbani na legan. Umpamani, adong sada panurat na margoran si Anton Gill mamuji Saksi-Saksi Jahowa i Jerman bani panorang Nazi. Ia mangkatahon, “Bani tahun 1939, adong hira-hira 6.000 halak saksi Jahowa na iboan hu [kamp konsentrasi]. Hassi pe bahat sitaronon ni sidea, tapi totap do sidea marmegah ni uhur ampa marsada anjaha toguh haporsayaonni bani Naibata.”

2 Baru-baru on, sonai homa halak hun Afrika Selatan, sidea mangakui anggo Saksi-Saksi Jahowa legan do humbani na legan. Halani ondi, ilarang do Saksi-Saksi Jahowa martumpu pakon halak na legan warna kulitni. Tapi bani ari Minggu tanggal 18 Desember 2011, dong lobih humbani 78.000 halak na martumpu i stadion Johannesburg. Ganup sidea na martumpu ai, dong na roh humbani Afrika Selatan pakon nagori-nagori na dohor hujai. Sahalak manajer stadion ai mangkatahon, “Lape ongga huidah  sisonon. Ganup halak na roh, legan-legan do sukuni, tapi marsada do sidea, taratur anjaha rapi do parpakeianni. Ipaborsih sidea do homa stadion on.”

3. Mase hasadaonta boi orot?

3 Jadi halak na lang saksi Jahowa pe sasintongni boi do mangidah anggo saksi Jahowa i sab tanoh, orot do hasadaonni. (1 Ptr 5:9) Mase boi sonai? Halani iparlajari hita do Bibel anjaha iurupi tonduy na pansing laho mambahen hamubahon, ase boi pamalaskon uhur ni Naibata. Jadi ‘itanggali hita do jolma na buruk in’ anjaha ipakei hita do “na baru in”.​—Kol. 3:9, 10.

Hita boi do mambahen hamubaon na banggal ibagas hagoluhanta

4. Aha na laho iulas hita bani artikel on? Anjaha mase porlu?

4 Ganup Saksi-Saksi Jahowa maningon manadingkon parlahou na masambor anjaha torus mambahen hamubahon. Bani artikel on, iulas hita ma mase porlu itadingkon hita biak na masambor ai anjaha sonaha do carani. Iulas hita ma piga-piga contoh na patuduhkon anggo hita boi do mambahen hamubahon na banggal ibagas hagoluhanta. Dob ai iulas hita do homa aha do na mangurupi sidea na dob dokah gabe saksi Jahowa ase lang be mangulaki parlahouni na masambor. Mase ganupan on porlu iulas? Halani adong piga-piga na dob ididi mangulaki use mangkorjahon na sambor songon na ongga ibahen sidea sanggah lape marlajar Bibel. Jadi dingat hita ma, “Halak na mangagan jongjong ia, pangkei ma, ase ulang tompas ia.”​—1 Kor. 10:12.

HAGIGIHON MA PARRIAH-RIAHON

5. (a) Bahen ma sada limbaga na patuduhkon porlu do manadingkon parlahou na masambor. (Idah gambar bani alm. 15.) (b) Parlahou na masambor aha do na ipatugah bani Kolosse 3:5-9?

5 Aha do na ibahen nasiam anggo kotor janah marbau baju ni nasiam? Tontu mintor podas ma iganti ham. Sonai homa ma, anggo ibotoh hita domma ihorjahon hita na ihagigihon Jahowa, porlu do ibahen hita hamubahon. Pasal parlahou na masambor, si Paulus mangkatahon, “Ambukkon nasiam ma haganupan in.” Jadi ulas hita ma pasal parriah-riahon ampa habutakon.​—Basa Kolosse 3:5-9.

6, 7. (a) Sonaha do hata ni si Paulus patuduhkon maningon marusaha do hita manadingkon parlahou na masambor? (b) Sonaha do pargoluhan ni si Sakura? Aha do na mangurupisi ase boi mubah?

6 Parriah-riahon. Bani Bibel, na ihatahon “parriah-riahon” ai ma rap modom pakon halak na lang paramangon atap pe parinangonni. Si Paulus mangkatahon anggo halak Kristen maningon do ‘mamunuh pagorini’ na boi mambahen tubuh hisap-hisap ni daging. Artini ai, maningon marusaha do hita mangambukkon hisap-hisap ni daging. Hassi pe lang urah, tapi boi do ibahen hita ai!

 7 Idah hita ma sada contoh pasal sada botou na margoran si Sakura hun Japang. * (Idah surat partoruh.) Sanggah marlajar anak boru ia, gati do lungunan pangahapni janah marpusok ni uhur. Sanggah marumur 15 tahun, mulai ma ia rap modom pakon marlegan-legan dalahi. Tolu hali ma ia manggugurhon. Nini ma, “Mungkahni, seng pala mahua huahap mambahen sisonon halani on do mambahen ihaholongi pangahapku. Tapi lambin dokah, lambih bulinsah ma pangahapku.” Sonai ma pargoluhanni ronsi marumur 23 tahun. Dob ai marlajar Bibel ma si Sakura bani saksi Jahowa. Marosuh do ia bani parlajaran ai. Iurupi Jahowa do ia ase mambahen hamubahon. Janah lang be bulinsah pangahapni. Sonari mangidangi gabe parintis biasa ma si Sakura anjaha lang be lungunan pangahapni. Ia mangkatahon, “Malas tumang uhurhu halani huahapkon ihaholongi Jahowa do ahu bai ganup ari.”

ULANG MANGKORJAHON HABUTAKON

8. Parlahou na sonaha do na ihatahon butak i lobei ni Naibata?

8 Habutakon. Bani Bibel hata “habutakon” lang pitah artini mangkorjahon parriah-riahon, tapi dihut do ai songon mangisop atap marhata kotor. (2 Kor. 7:1; Ep. 5:3, 4) Anjaha habutakon pe mangartihon halak na marponop-ponop laho mangkorjahon na butak songon mambasa buku na boi mambahen tubuh hisap-hisap ni daging atap mangidah pornografi. On boi mambahen sidea mangkorjahon masturbasi. (Kol. 3:5) *—Idah surat partoruh.

9. Sonaha do ujungni anggo ipaturut sasada halak ‘hisap-hisap’ ni daging ai lambin banggal?

9 Halak na tongtong mangidah pornografi boi do mambahen lambin banggal ‘hisap-hisap’ ni daging anjaha gabe hatagihan ma sidea bani seks. Piga-piga ilmuwan mangkatahon sidea na somal mangidah pornografi sarupa do ai songon na hatagihan bani alkohol atap pe narkoba, janah gabe sambor do ujungni. Gabe bulinsah ma sidea, lang martuah ibagas kaluarga, lang be ringgas marhorja, marsirang atap mandolos. Sada dalahi na lang be mangidah pornografi sadokah satahun, mangahapkon malas ni uhur janah lang be bulinsah.

10. Aha do na mangurupi si Ribeiro mambahen hamubahon?

10 Bani bahat halak, sunsah do pasohkon hasomalanni na mangidah pornografi. Tapi sasintongni boi do sidea pasohkon ai. Umpamani si Ribeiro hun Brasil. Sanggah poso ope ia, itadingkon ma rumahni janah marhorja i pabrik kertas bekas. Ijai ididahni ma majalah pornografi. Nini si Ribeiro, “Lambin dokah, lambin hatagihan ma ahu mangidah ai. Anjaha lang be marosuh ahu bani naboru na tading sarumah pakon ahu. Hutadingkon ma ia ase boi manonton pornografi.” Bani sada ari i parhorjaan, ididahni ma sada buku na  marjudul Rahasia Kebahagiaan Keluarga. Ibasa ma ai. Dob ai, marlajar ma ia pakon saksi Jahowa. Hassi pe sonai seng boi podas itadingkonni pornografi ai. Tapi aha do na mangurupisi? Ia mangkatahon, “Halani martonggo, marlajar Bibel, marimbagaskon aha na huparlajari, gabe toguh ma holongku bani Naibata dobkonsi hubotoh paruhuran-Ni na dear. Ai do na mangurupi ahu manadingkon parlahou na masambor.” Jadi, marhitei pangurupion tonduy na pansing ampa parlajaran Bibel, gabe mubah ma si Ribeiro, ididi janah sonari sintua do ia.

Maningon toguh do holongta bani Naibata janah mangkagigihon na masambor

11. Aha do na mangurupi sasada halak ase lang be hatagihon bani pornografi?

11 Nongkan domma ididah hita, ase si Ribeiro boi manadingkon pornografi, lang sungkup pitah mambasa Bibel. Tapi maningon iparimbagaskon do aha na iparlajari anjaha martonggo bani Jahowa. On ma na mangurupi si Ribeiro patoguhkon holongni bani Naibata anjaha manadingkon parlahouni na sambor. Jadi, ase lang be mangidah pornografi, maningon toguh do holongta bani Naibata janah mangkagigihon na masambor.​—Basa Psalmen 97:10.

ULANG MANGGILA, KASAR MARSAHAP, AMPA MARLADUNG

12. Aha do na mangurupi si Stephen ase lang be podas manggila anjaha kasar marsahap?

12 Adong piga-piga halak na urah manggila janah kasar parsahapni. On boi mambahen kaluarga lang martuah. On ma na masa bani si Stephen hun Australia. Halani na otik, mintor manggila ma ia. Ia mangkatahon, “Domma tolu hali ahu pakon parinangonku marsipadaoh-daohan janah sompat do laho marsirang.” Tapi marlajar Bibel ma sidea pakon saksi Jahowa. Ihatahonni, sanggah lape marlajar anggo dong na lepak hu bani, mintor manggila do ia songon bom na laho mapultak. Tapi dobkonsi ihorjahon si Stephen aha na iparlajari, lambin dear ma hasilni. Ia mangkatahon, “Sompong, buei do parubahan na ibahen hanami. Halani iurupi Jahowa, gabe halak na lamlam do ahu sonari janah rosuh mardamei.” Sonari gabe siparugas i kuria do si Stephen, anjaha parinangonni, ongga do marintis biasa sadokah piga-piga tahun. Sintua-sintua na sakuria pakon si Stephen mangkatahon, “Halak na lamlam do si Stephen on, ringgas marhorja anjaha toruh maruhur. Lang ongga ididah hanami ia manggila.” Si Stephen on lang ra mamuji dirini sandiri halani domma mambahen parubahan. Tapi nini do, “Anggo lang halani pangurupion ni Jahowa, huahap lang adong pasu-pasu na hudapot songon sonari on.”

13. Mase lang dear anggo urah manggila? Aha do sipasingat ni Bibel hubanta?

13 Ipasingat Bibel do hita ase ulang  urah manggila atap kasar marsahap bani na legan. (Ep. 4:31) Halani parlahou sisonai boi do mambahen sasada halak gabe martinggili. Buei do halak marpangahap somal do mangkorjahon sisonai. Tapi sasintongni seng pasangapkon Naibata anggo ihorjahon hita sonai. Domma buei sanina-botounta na mambahen hamubahon.​—Basa Psalmen 37:8-11.

14. Ai boi do halak na kasar gabe lamlam?

14 Adong sada sanina na margoran si Hans mangidangi gabe sintua i Austria. Koordinator badan penatua na sakuria pakon si Hans mangkatahon, “Lape ongga ahu pajumpah pakon halak na lamlam songon si Hans.” Sasintongni sedo halak na lamlam hinan si Hans. Sanggah poso ope ia, minum-minum ma ia anjaha martinggili. Ongga do sanggah tenggen ia, manggila tumang ma ia bani hasomanni naboru janah ibunuh ma hasomanni ai. Halani ai iuhum ma ia i penjara sadokah 20 tahun. I penjara pe, seng mubah parlahouni. Jadi ipindo inangni ase ijumpahi sada sintua ma ia. Dob ai, marlajar Bibel ma si Hans. Ihatahon si Hans ma, “Sunsah tumang do huahap manadingkon parlahou na sambor. Tapi hudingat ma bani Jesaya 55:7 ihatahon do, ‘Itadingkon parjahat ma dalanni’, anjaha bani 1 Korint 6:11 ihatahon ‘sisonai do nasiam deba lobei’ na patuduhkon dong do hape na boi manadingkon parlahou na sambor. Ayat on do na mangojur ahu. Sabar do Jahowa mangurupi ahu marhitei tonduy-Ni ase boi ahu  mubah.” Ididi ma si Hans sanggah i penjara ope ia. Sapuluh pitu satongah tahun nari ma dobkonsi ididi, ase maluah ia. Nini ma, “Martarima kasih do ahu bani Jahowa halani holong ni atei-Ni janah ra manasap dousangku.”

15. Aha deba nari na ihatahon hasamboron? Aha do na ihatahon Bibel pasal ai?

15 Sada hasamboron do homa marladung ai. Umpamani, buei do halak na marladung ase lang manggalar pajak atap ase lang martanggung jawab bani hasalahanni. Tapi “pintor anjaha bonar” do Jahowa. (5 Mus. 32:4) Marosuh do ia ase ganup panombah-Ni ‘mangkatahon na sintong’ janah ‘ulang marsiladungan’. (Ep. 4:25; Kol. 3:9) Jadi maningon ihatahon hita ma hasintongan hassi pe sunsah ai atap boi mambahen hita maila.​—Pod. 6:16-19.

NA BOI MANGURUPI ASE MUBAH

16. Pangurupion aha do na ibere ase boi itadingkon hita parlahou na masambor?

16 Sedo halani hagogohanta sandiri ase boi hita mubah. Songon si Sakura, si Ribeiro, si Stephen, pakon si Hans, sidea boi mubah halani pangurupion ni Naibata marhitei parlajaran Bibel ampa tonduy na pansing. (Luk. 11:13; Heb. 4:12) Hita pe sonai ma. Ase boi mubah, maningon iparlajari hita ma Bibel, irimangi janah martonggo bani Naibata mangindo hapentaran ampa hagogohon ase boi mandalankon aha na dob iparlajari. (Jos. 1:8; Ps. 119:97; 1 Tes. 5:17) Anjaha porlu do iparlajari hita aha na laho iulas i partumpuan janah dihut martumpu. (Heb. 10:24, 25) Dob ai, ipakei hita ma homa aha na dob ipasirisir organisasi ni Jahowa songon publikasi, JW Broadcasting, JW Library, pakon jw.org.​—Luk. 12:42.

Sonaha do hita boi manadingkon parlahou na masambor? (Idah paragrap 16)

17. Aha do na laho iulas hita bani artikel na mangihut?

17 Domma iulas hita parlahou na masambor aha do na maningon itadingkon halak Kristen ase boi pamalaskon uhur ni Jahowa. Tapi dong ope na porlu bahenonta. Maningon ibahen hita ma na madear anjaha tongtong mangkorjahon ai. Bani artikel na mangihut, iulas hita ma pasal ai.

^ par. 7 Goran ni halak bani artikel on, dong piga-piga na iubah.

^ par. 8 Idah pasal 25 buku Pertanyaan Kaum Muda—Jawaban yang Praktis, Jilid 1.