Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Agustus 2017

Holong—Biak na Ponting

Holong—Biak na Ponting

ISURUH Jahowa do apostel Paulus manuratkon siah biak na madear, na dong halani tonduy na pansing. (Gal. 5:22, 23) Haganupan biak na madear ai igoran ma “buah ni Tonduy”. * (Idah surat partoruh.) Biak na madear on bagian humbani jolma “na baru in” na maningon idalankon haganup halak Kristen. (Kol. 3:10) Usih songon hayu na boi marbuah halani dong bah, sonai homa do sasada halak boi mandalankon biak na madear halani pangurupion tonduy na pansing.​—Ps. 1:1-3.

Si Paulus mangkatahon biak na parlobei ai ma holong. Mase ponting holang ai? Si Paulus mangkatahon anggo lang adong holong, “na lang do” ahu ai. (1 Kor. 13:2) Aha do artini holong, anjaha sonaha hita pataridahkon ai bani ganup ari?

AHA DO HOLONG AI?

Hassi pe lang urah patorangkon artini holong ai, tapi Bibel patugahkon sonaha do halak na parholong ai. Umpamani anggo parholong do sasada halak, ‘sabar anjaha basar’ ma ia janah “malas do uhurni bani hasintongan”. Anjaha “bani haganup do ia tahan, haganup do ihaporsayai, haganup do iarapkon, sabar do ia manaron haganup.” Dob ai sari anjaha setia do ia bani hasoman. Tapi anggo lang adong bani sasada halak holong, simburu do ia, margijang ni uhur, seng dear marsahap, mangindahi bani sandiri ampa mardomdom. Marimbangkon pataridahkon biak na lang dear nongkan, hita sihol mangkaholongi na legan humbani uhurta anjaha “seng ipindahi na bani sandiri”.​—1 Kor. 13:4-8.

JAHOWA PAKON JESUS SIUSIHAN NAMADEAR PASAL HOLONG

“Naibata ai ma haholongon.” (1 Joh. 4:8) On taridah humbani haganup pambahenan-Ni. Holong-Ni sibanggalan bani manisia ai ma isuruh do Jesus Kristus hu tanoh on anjaha matei laho mangkopkop hita. Apostel Paulus mangkatahon, “Hunjon do gabe talar holong ni uhur ni Naibata banta, ai ma humbani na dob sinuruh-Ni Anak-Ni na sasada in hu dunia on, ase manggoluh hita marhiteihon-Si. Ibagas on do haholongan ai, ai ma, sedo hita na mangkaholongi Naibata, tapi Ia do na mangkaholongi hita, anjaha isuruh do Anak-Ni bahen pardearan pasaloseihon dousanta.” (1 Joh. 4:9, 10) Halani holong ni Naibata, isasap do dousa-dousanta anjaha adong pangarapan ai ma hagoluhan.

Jesus pataridahkon holongni bani manisia marhitei mambere hagoluhanni laho mandalankon harosuh ni Naibata. Apostel Paulus mangkatahon, “Marhitei rosuh-Ni ai gabe pansing do hita, halani badan ni Jesus Kristus, na dob ginalangkon-Ni ai, torus lalab marhitei na sahali ai.” (Heb. 10:9, 10) Jesus mangkatahon, “Seng dong holong sibanggalan, anggo iberehon sada halak hosahni mangkopkop hasomanni.” (Joh. 15:13) Jadi, lang dong manisia na pataridahkon holong sisonai. Ai boi do  manisia na lang gokan dear mangusihi holong ni Jahowa pakon Jesus? Boi! Ulas hita ma sonaha hita boi mangusihi sidea.

“MARPARLAHOU MA IBAGAS HAHOLONGAN”

Apostel Paulus mangojur hita ase, “Sitiru Naibata ma nasiam, songon anak na hinaholongan! Anjaha marparlahou ma nasiam ibagas haholongan, songon Kristus na mangkaholongi nasiam.” (Ep. 5:1, 2) Aha do artini ‘marparlahou ibagas haholongan’? Artini pataridahkon holong bai ganup panorang. Anjaha lang pitah bani sahap tapi bani parlahou. Apostel Johannes mangkatahon, “Nasiam dakdanakku, ulang ma hatanta pakon dilahta mangkaholongi, tapi marhitei pambahenan ma ampa hasintongan.” (1 Joh. 3:18) Umpamani sanggah hita mangambilankon “Ambilan Na Madear on pasal Harajaon” ai ma halani holongta bani Jahowa ampa hasoman. (Mat. 24:14; Luk. 10:27) Dob ai anggo hita ‘marparlahou ibagas haholongan’, gabe parholong ma hita, sabar, maridop ni uhur, anjaha ra manasap dousa ni halak na legan. Hita pe unduk bani podah ni Bibel ase “marsisasapan dousa songon panasap ni Naibata bani dousa nasiam ibagas Kristus”.​—Ep. 4:32.

Anggo hita mamodahi atap pe maminsang, sedo artini na sogam do hita bani halak ai. Umpamani dong piga-piga namatoras, anggo ribut dakdanakni, sipata namatoras pitah mambere aha na ipindo dakdanak ai. Tapi anggo namatoras tongon-tongon mangkaholongi dakdanakni sipata porlu do iuhum dakdanakni. Jadi sonai homa do Naibata hassi pe Ia haholongan, “iajar Tuhan in do na hinaholongan ni uhur-Ni”. (Heb. 12:6) Jadi sasintongni parholong do hita anggo mambere pinsang-pinsang. (Pod. 3:11, 12) Tapi dingat hita ma haganupan do hita pardousa janah gati do lepak, halani ai hita porlu manjaga holongta totap dear. Sonaha do bahenonta? Ulas hita tolu cara na boi mangurupi hita.

SONAHA DO HITA BOI PATARIDAHKON HOLONG?

Parlobei, pindo ma tonduy na pansing bani Naibata laho mangurupi nasiam pataridahkon holong. Jesus mangkatahon anggo Jahowa mambere “Tonduy Na Pansing bani sagala na mangindo hu Bani”. (Luk. 11:13) Jadi pos ma uhurta anggo hita mangindo tonduy na pansing anjaha mangihutkon panogu-noguanni, boi do ai mangurupi hita ase lambin parholong. (Gal. 5:16) Umpamani anggo nasiam sada sintua sihol maminsang na legan marhitei hata ni Naibata, pindo ma tonduy na pansing laho mangurupi nasiam ase maminsang ibagas holong. Atap anggo nasiam namatoras sihol maminsang niombah nasiam pindo ma tonduy na mapansing ase iurupi nasiam ibagas na maminsang ai sedo ibagas gila tapi halani holong do.

Paduahon, pingkirhon ma sonaha do Jesus pataridahkon holong sanggah adong na manrisai ia. (1 Ptr. 2:21, 23) Sanggah dong na mambahen borit uhurmu sungkun ma dirimu sandiri, ‘Aha do na ibahen Jesus?’ Halani mardingat contoh ni Jesus, on boi mangurupi sada botou na margoran si Leigh laho mambahen haputusan na dear. Ia mangkatahon, “Bai sada panorang ongga adong sada hasoman saparhorjaan manongos sada e-mail bani hasoman na legan laho pabajan-bajankon ahu ampa horjangku. Borit tumang do uhurhu. Tapi dobkonsi hurimangi aha na ibahen Jesus sanggah adong na manrisai ia, huputushon ma ase manalpuhon ai ganup. Ujungni hubotoh ma na dong hape naboritni hasomankai anjaha bahat do homa pingkiranni. Hubotoh ma lang hapeni ibotoh ia aha na isuratkonni ai.” Jadi anggo hita mangusihi Jesus, tongtong do hita pataridahkon holong bani na legan.

Patoluhon, parlajari hita ma pataridahkon holong na lang mangindahi na porlu bani diri sandiri. Holong sisonai do na gabe tanda ni halak Kristen. (Joh. 13:34, 35) Dong do holong  sisonai bani Jesus janah ia mambere siusihan na gokan dear hubanta. Marhitei aha? Ai ma ra do ia manadingkon nagori atas ampa “ipalumei do diri-Ni” janah mangkopkop hita “ronsi matei”. (Pil. 2:5-8) Anggo itiru hita holong ni Jesus, pingkiran ampa paruhuran pe gabe usih ma songon Jesus.

GUNANI PATARIDAHKON HOLONG

Buei do gunani anggo hita pataridahkon holong. Ulas hita ma dua contohni:

Aha do gunani anggo hita pataridahkon holong?

  • PARSANINAON I SAB TANOH ON: Halani marsihaholongan, hu kuria na ija pe hita laho i sab tanoh on, tontu dear do hita ialo-alo. Sada pasu-pasu do mambotoh anggo hita ihaholongi ‘haganup sanina na i sab dunia on’! (1 Ptr. 5:9) Pitah bani juakjuak ni Naibata dassa boi dapot nasiam holong sisonai.

  • HADAMEION: Anggo ‘marsianjuan hita ibagas uhur na holong’, gabe marmalas ni uhur ma hita ibagas ‘hasadaon marhitei panrahut ni damei’. (Ep. 4:2, 3) Hita boi mangahapkon hadameion sisonai i partumpuan atap pe bani kebaktian. Ai lang longang nasiam mangidah hadameion sisonai bai dunia na jahat on? (Ps. 119:165; Jes. 54:13) Anggo hita marayak hadameion, on pataridahkon hita mangkaholongi na legan, anjaha on boi pamalaskon uhur ni bapanta na i surga.​—Ps. 133:1-3; Mat. 5:9.

“NA PADEAR-DEARHON DO HOLONG NI UHUR”

Isuratkon si Paulus do, “Na padear-dearhon do holong ni uhur.” (1 Kor. 8:1) Aha do artini ai? Bani 1 Korint bindu 13, ipatorang si Paulus do sonaha holong ai boi padear-dearhon. Anggo parholong, seng mangindahi na porlu bani diri sandiri tapi haporluan ni na legan do na ipingkirhon. (1 Kor. 10:24; 13:5) Halani sabar, anjaha basar do holong ai, on boi patoguhkon kaluarga ampa kuria.​—Kol. 3:14.

Bahat do cara laho pataridahkon holong bani na legan, tapi maningon banggalan do holongta hubani Naibata. Mase? Halani holongta hu Bani ai do mambahen toguh hasadaonta! Humbani marmasam hagoluhan, suku ampa bahasa, boi do “sauhur” mangidangi Jahowa. (Sep. 3:9) Marusaha ma hita pataridahkon biak na ponting on bai ganup ari.

^ par. 2 On ma biak na parlobei humbani siah artikel na laho mangulas pasal ganup buah ni tonduy.