Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Balos ni 10 Sungkun-Sungkun na Maposo

 SUNGKUN-SUNGKUN 3

Sonaha do Ahu Marsahap bani Namatorasku?

Sonaha do Ahu Marsahap bani Namatorasku?

MASE PORLU

Anggo dear ho marsahap bani namatorasmu, marmalas ni uhur ma ho.

AHA NA LAHO BAHENONMU?

Bayangkon ma sarita on: Dong sada dalahi na margoran si Geoff na marumur 17 tahun. Bani borngin ni ari, laho manonton TV ma ia halani domma salosei horjani.

Roh ma bapani manggila hu bani lanjar nini,

“Geoffrey! Torus do ho manonton TV. Lang iurupi ho anggimu mangkorjahon PR. Lalab do ho sonai!”

“Lalab,” nini si Geoff ma nanget.

Dob ai nini bapani, “Aha nim?”

“Lang,” songon lang jenges bohi ni si Geoff mambalosi.

Gabe manggila tumang ma bapani. “Iiah, sonai do parsahapmu!”

Anggo ho si Geoff, aha na laho bahenonmu ase ulang sonai na tarjadi?

PINGKIRHON MA!

Marsahap pakon namatorasmu usih songon na mamboan mobil do. Anggo dong batu na banggal mangambat dalanmu, tontu ipindahi ho do dalan na legan.

 SONTOHNI:

Nini sada anak boru na margoran si Leah, “Sunsah do ahu marsahap pakon bapangku. Sipata ra do lang itangar hatangku.”

SIOTIKANNI DONG TOLU NA BOI IPILIH SI LEAH.

  1. Gogoh sorani.

    Gogoh sorani mambalosi, “Ponting do on!”

  2. Lang marsahap pakon bapani.

    Lang ra be si Leah patugahkon aha masalahni.

  3. Patugahkon use bani panorang na legan.

    Mambahen surat atap holi marsahap pakon bapani.

Pandapotmu, na ija do sidearan ipilih si Leah?

RIMANGI MA: Halani mamingkiri na legan, ra do si Leah lang itangar bapani. Jadi, anggo Pilihan A, na ipilih si Leah, ra do lang iarusi bapani mase si Leah gogoh marsora janah ai pe patuduhkon lang ihormati si Leah bapani. (Epesus 6:2) Jadi lang dong gunani pilihan on.

Lang ipaturut ho na mangambat dalanmu. Sonai ma ipindahi ho cara ase dear marsahap pakon namatorasmu

Ra do urah mamilih Pilihan B, tapi totap do lang dear ai. Mase? Ase salosei masalahni, porlu do si Leah marsahap bani bapani. Anjaha bapani pe boi mangurupi anggo ibotoh aha do masalah ni si Leah. Lang salosei masalah anggo pitah sip.

Bani Pilihan C, lang ipaturut si Leah dong na mangambat ia marsahap bani bapani. Bani panorang na legan do ipatugah ia. Anggo sanggah ai ibahen ia surat bani bapani, lumbang ma uhurni.

Marhitei surat, boi do tangkas ipatugah si Leah masalahni. Anggo ibasa bapani surat ai, gabe lambin iarusi ia ma pangahap ni boruni na sasintongni. Jadi dear do Pilihan C bani si Leah pakon bapani. Marhitei surat atap marsahap pakon bapani, artini idalankon sidea do podah ni Bibel ase “parayak hita ma na padameihon”.Rom 14:19.

Aha do na legan na boi ipilih si Leah?

Anggo dong pandapotmu na legan, pingkirhon use sonaha do holi anggo ihorjahon ai.

 Tangkas Ma Marsahap

Dingat ma, lape tontu iarusi namatorasmu aha do na ihatahon ho.

SONTOHNI:

Ra do isungkun namatorasmu mase songon na mandolei ho. Tapi nimu, “Lang mahua.”

Jadi iagan namatorasmu do anggo ho lang porsaya bani sidea janah pangahapni dearan do ho patugahkon ai bani hasomanmu.

Bayangkon ma dong masalahmu anjaha namatorasmu ra mangurupi ho. Tapi anggo nimu, “Lang mahua, boi do husaloseihon on.”

  • Sonaha do pangahap ni namatorasmu?

  • Aha do sidearan hatahononmu?