Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Balos ni 10 Sungkun-Sungkun na Maposo

 SUNGKUN-SUNGKUN 6

Sonaha do Anggo ho Ipaksa-paksa Hasomanmu?

Sonaha do Anggo ho Ipaksa-paksa Hasomanmu?

MASE PORLU

Anggo ho seng meleng-eleng, gabe toguh ma ho hassi pe ipaksa mangkorjahon na sambor.

AHA NA LAHO BAHENONMU?

Bayangkon ma sarita on: Sanggah hasomanni sasikkolah mandohori si Brian, gabe mabiar ma ia. Domma dua hali ibagas minggu on sidea mambere sigaret. On ma na patoluhalihon.

Anak na parlobei mangkatahon:

“Pitah ham do? Eta ase hupatandahon bani hasoman.”

Ia mangkatahon hata “hasoman” lanjar mangkidopkon mata, dob ai dong na ibuat hun kantungni, janah ibere hubani si Brian.

Si Brian mangidah bani tanganni dong sigaret. Lambin mabiar ma ia.

“Maaf”, nini Si Brian. “Domma huhatahon anggo ahu lang . . . ”

Anak na paduahon mamotong: “Ulang mabiar ho!”

“Lang!” Nini si Brian tangkas.

Anak na paduahon mandohori si Brian janah manjolom abarani lanjar nini, “Buat ma, lang pala mahua ai.”

Anak na parlobei ai padohorhon sigaret bani bohi ni si Brian, janah manghusipkon, “Seng ipatugah hanami pe.”

Anggo ho si Brian aha na laho bahenonmu?

 PINGKIRHON MA!

Ai ibotoh hasoman ni si Brian do na ihorjahon sidea ai? Ai domma dear pambahenan ni sidea? Lang. Sasintongni sidea mangkorjahon ai halani mangihutkon halak na legan anjaha ase sidea pe ijalo.

Anggo ho bani situasi sisonai, sonaha do ho boi totap toguh?

  1. JAGA MA

    Bibel mangkatahon, “Halak na pantas mangidah parmaraan, jadi marponop ma ia; tapi halak na oto itoruskon do langkahni, gabe manaron.”Podah 22:3.

    Somalni, ho boi do mambotoh aha do masalahni. Sontohni, anggo ididah ho i lobei dong piga-piga hasoman sasikolah marsigaret, mintor tadingkon ma sidea.

  2. PINGKIRHON

    Bibel mangkatahon, “Marpanggora ni uhur na borsih ma.”1 Petrus 3:16.

    Rimangi ma, ‘Sonaha do pangahapku anggo ahu mangihutkon halak na mabuei?’ Tongon, bani panorang na tongkin boi do ho toguh. Tapi sonaha do pangahapmu ujungni? Ai ra do ho pasedahon parhasomananmu pakon Naibata pitah halani mangihutkon hasoman?2 Musa 23:2.

  3. PUTUSKON MA

    Bibel mangkatahon, “Marhabiaran do halak na maruhur.”Podah 14:16.

    Dokah atap lang, hita maningon mambahen pilihan, janah pilihanta manontuhon hagoluhanta. Bani Bibel ipatugah do pasal si Josep, si Job, pakon Jesus, na mambahen pilihan na topat. Dong homa na mambahen pilihan na lepak, sontohni si Kain, si Esau, si Judas. Sonaha anggo ho?

Bibel mangkatahon, “Ramotkon habujuron.” (Psalmen 37:3) Anggo domma ipingkirhon ho aha do akibatni, gabe urah ma ho patugahkon pendirianmu.

Lang maningon iajar-ajari ho sidea. Sungkup do anggo ihatahon ho “LANG”. Atap ase ibotoh sidea anggo ho lang ra, hatahon ma:

  • “Lang ra ahu!”

  • “Lang ra ahu mangkorjahon ai!”

  • “Ibotoh ho do kan lang ra ahu mangkorjahon ai!”

Anggo toguh do ho anjaha mintor podas itolak ho sidea, lang ra be sidea mamaksa ho!

 SONAHA DO ANGGO HO IEJEK

Anggo ra do ho mangihutkon sidea, usih ma ho songon robot na iatur-atur sidea

Sonaha anggo dong na mangejek ho, sontohni ihatahon sidea, “Parbiar do ho!” Ijek sidea do ho ase ra ho mangihutkon sidea. Jadi sonaha balosmu? Dong dua pilihan i toruh on.

  • Ulang borit uhurmu. (“Tongon do ai, parbiar do ahu!” Dob ai patorang ma alasanmu.)

  • Dear ma balosi. Tolak ma sidea tapi patorang ma homa mase ho lang ra mangkorjahon ai. (“Lang dong gunani in!”)

Anggo sai ipaksa do ho, tadingkon ma sidea! Halani anggo ijai ho torus, gabe urah ma ho mangihutkon sidea. Tapi anggo itadingkon ho do sidea, ai patuduhkon anggo ho lang ra mangihutkon sidea.

Sasintongni, sai adong do na mamaksa-maksa. Tapi, ho boi do mamilih aha na laho bahenonmu janah totap toguh lang mangihutkon sidea. Maningon ho do na mambahen pilihan!Josua 24:15.