Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Balos ni 10 Sungkun-Sungkun na Maposo

 SUNGKUN-SUNGKUN 1

Ise do Ahu?

Ise do Ahu?

MASE PORLU

Anggo ibotoh ho ise dirimu janah aha do pendirianmu, ai boi mangurupi ho ase mambahen haputusan na dear anggo dong na mangeta-eta ho mangkorjahon na sambor.

AHA NA LAHO BAHENONMU?

Bayangkon ma sarita on: Si Karen roh hu sada pesta. Dob ai, lang piga dokah dong na mangkatahon hu bani.

“Mardia do ho ijon jongjong?”

Itorih si Karen ma, si Jessica do hape hasomanni. Iboan si Jesicca do dua botol minuman na marisi alkohol janah ibere bani si Karen lanjar nini ma, “Eta ma minum-minum hita otik.”

Seng ra namin si Karen. Tapi tubuh ma ibagas uhurni, mabiar do ia holi lang dong na ra marhasoman pakonsi anggo lang ra ia manginum ai. Pangahapni homa, bujur do si Jessica ai. ‘Lang pala salah anggo otik do iminum’, ninuhur si Karen. ‘Ah, on kan lang narkoba.’

Anggo ho do si Karen, aha na laho bahenonmu?

PINGKIRHON MA!

Ase boi mambahen haputusan na dear, porlu do ibotoh ho halak na sonaha do ho. Artini, maningon iarusi ho do ise dirimu janah aha do pendirianmu. Ai boi mangurupi ho ase totap toguh, lang urah mangihutkon buei halak.1 Korint 9:26, 27.

Sonaha do ase ho boi totap toguh? Dear do anggo ibalosi hita sungkun-sungkun na mangihut.

 1 AHA DO KELEBIHANKU?

Anggo ibotoh ho aha do kelebihan ampa sifatmu na dear, gabe toguh ma ho.

SONTOH BANI BIBEL: Nini apostel Paulus, “Anggo hurang pandei pe ahu bani hata, tapi lang anggo bani habotohon.” (2 Korint 11:6) Halani tangkas do iarusi si Paulus ayat on, boi do ia totap toguh hassi pe dong na mangejek ia. Lang ipaturut ia na mangejek ai mambahen ia maretek ni uhur.2 Korint 10:10; 11:5.

PAREKSA MA DIRIMU: Suratkon ma i toruh on aha do kelebihan atap keahlianmu.

Suratkon ma homa aha do sifat-sifatmu na dear. (Sontohni, parduli do ho? rosuh mambere? jujur? atap tepat waktu?)

2 AHA DO HAHURANGANKU?

Usih songon rantei bosi, boi do rotap halani dong na maseda. Sonai homa boi do ho lang gabe toguh anggo ho irajai hahuranganmu.

SONTOH BANI BIBEL: Ibotoh si Paulus do hahuranganni. Isuratkon ia ma, “Ai ihamalaskon jolma parbagas na bangku ai do namin titah ni Naibata, tapi huidah do titah na legan ibagas pagori ni dagingku, na marmunsuh dompak titah na ibagas uhurhu, gabe ipatunduk do ahu bani titah ni dousa.”Rom 7:22, 23.

PAREKSA MA DIRIMU: Aha do hahuranganku na porlu ipadear?

 3 AHA DO TUJUANKU?

Ai ra do ho marangkot tapi isuruh ho ase supirni kaliling hujai hujon ronsi bois minakni? Boros janah na oto do sisonai!

Aha parlajaranni? Anggo dong tujuan ibagas goluhmu, gabe toguh ma ho halani ibotoh ho aha na laho bahenonmu.

SONTOH BANI BIBEL: Isuratkon si Paulus, “Ia ahu, sedo na so martujuan parlintunonku.” (1 Korint 9:26) Marimbangkon mangihutkon buei halak, ibahen si Paulus do tujuan ibagas goluhni.—Pilippi 3:12-14.

PAREKSA MA DIRIMU: Suratkon ma i toruh on tolu tujuanmu ibagas satahun on.

4 AHA DO PRINSIPKU?

Anggo tangkas ibotoh ho halak na sonaha do ho, usih ma ho songon hayu na gogoh uratni na totap martahan hassi pe roh logou na doras

Anggo lang dong prinsipmu, gabe urah ma ho mangihutkon halak. Songon bunglon, urah do ho mubah-ubah ase boi ijalo hasomanmu. Ai do tandani anggo lang dong prinsipmu.

Tapi anggo toguh do ho, artini dong prinsipmu—lang soal aha pe na ibahen halak na legan.

SONTOH BANI BIBEL: Sanggah poso ope si Daniel, “domma iputuskon ibagas uhurni” laho mandalankon titah ni Naibata, hassi pe daoh ia humbani kaluarga pakon hasomanni. (Daniel 1:8) Jadi, dong do prinsipni janah manggoluh do ia domu bani prinsip ai.

PAREKSA MA DIRIMU: Aha do prinsipmu? Sontohni, porsaya do ho bani Naibata? Mase porsaya ho anggo dong do Naibata ai?

Porsaya do ho anggo parentah ni Naibata do sidearan bamu? Mase porsaya ho?

Ujungni, na ija do na ipilih ho—gabe bulung na madabuh hujai hujon ibahen logou, atap gabe urat ni hayu na gogoh na totap martahan hassi pe roh logou na doras? Anggo sonai, lambin tangkas ma iarusi ho halak na sonaha do ho, anjaha ho pe boi do songon hayu na gogoh uratni. Anjaha on boi mangurupi ho mambalosi sisungkunan, Ise do Ahu?