Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Aha do na Iajarhon Bibel Hubanta?

 PASAL SAPULUH OMPAT

Sonaha do Ase Kaluarga Martuah

Sonaha do Ase Kaluarga Martuah

1, 2. Aha do harosuh ni Jahowa bani kaluarga?

JAHOWA do na mamungkah parhajabuan. Bibel patugahkon, Ia do na manompa naboru na parlobei janah “itogu ma ia hubani si Adam”. Megah do pangahap ni si Adam lanjar ihatahon, “On ma da holi-holi humbani holi-holingku anjaha daging humbani dagingku.” (1 Musa 2:22, 23) Sihol do Jahowa ase martuah ganup na marhajabuan.

2 Tapi, buei do kaluarga na lang martuah. Hassi pe sonai, bani Bibel dong bahat podah na mangurupi ganup anggota kaluarga ase boi marmalas ni uhur.​—Lukas 11:28.

NA NIARAPKON NI NAIBATA HUMBANI PARAMANGON

3, 4. (a) Sonaha do ibahen paramangon bani parinangonni? (b) Mase porlu paramangon pakon parinangon marsisasapan dousa?

3 Bibel mangkatahon, holong janah hormat do paramangon na bujur bani parinangonni. Basa ma Epesus 5:25-29. Paramangon maningon do tongtong mangkaholongi parinangonni. Iurupi janah i8sarihon do homa parinangonni anjaha lang mambahen aha pe na paboritkon uhurni.

4 Tapi, sonaha anggo adong salah ni parinangon? Nasiam paramangon iparentahkon do, “Haholongi  nasiam ma parinangon nasiam, anjaha ulang ma kasar dompak sidea.” (Kolosse 3:19) Nasiam pe ra do mambahen hasalahan. Halani ai sasap ham ma dousa ni parinangon ase isasap Naibata dousa nasiam. (Mateus 6:12, 14, 15) Anggo ra nasiam marsisasapan dousa, martuah ma parhajabuannima.

5. Mase maningon sangap ibahen paramangon bani parinangonni?

5 Jahowa marosuh ase sangap ibahen paramangon bani parinangonni. Porlu do homa isarihon parinangonni. Anggo lang dear ibahen bani parinangonni, seng ijalo Jahowa tonggoni. (1 Petrus 3:7) Maharga do bani Jahowa ganup halak na mangkaholongi-Si. Lang palegan-legan Ia bani dalahi pakon naboru.

6. Bani paramangon pakon parinangon, aha do artini gabe “sada daging”?

6 Jesus mangkatahon, paramangon pakon parinangon “seng be dua sidea ai, tapi sada daging do”. (Mateus 19:6) Artini, maningon do totap uhur ni sidea janah ulang marbangkis. (Podah 5:15-21; Heber 13:4) Sanggah marsaor paramangon pakon parinangon, ulang ma pitah mansarihon dirini sandiri. (1 Korint 7:3-5) Maningon do idingat paramangon “seng ongga isogami jolma dagingni, tapi iparmudu-mudu anjaha isarihon do ai”. Jadi, haholongi janah sarihon ma parinangon, halani ai do na iharosuhkon parinangon lobih humbani aha pe.​—Epesus 5:29.

NA NIARAPKON NI NAIBATA HUMBANI PARINANGON

7. Mase porlu adong kopala ibagas kaluarga?

7 Maningon do adong kopala kaluarga ase ganup mardalan dear. Bani 1 Korint 11:3, Bibel mangkatahon,  “Kristus do ulu ni haganup paramangon, paramangon ulu ni parinangon, anjaha Naibata do ulu ni Kristus in.”

8. Sonaha parinangon unduk bani paramangonni?

8 Paramangon pe dong do salahni. Tapi anggo ra do parinangon mangurupi paramangon mangkorjahon na dob iputuskon, marguna do ai bani kaluarga. (1 Petrus 3:1-6) Bibel mangkatahon, “Parinangon pe ihabiari ma paramangonni.” (Epesus 5:33) Sonaha anggo ia lang sahaporsayaon pakon paramangonni? Maningon do tongtong ipasangap paramangonni. Bibel mangkatahon, “Nasiam parinangon, unduk ma nasiam bani paramangon nasiam, ase porini adong deba na so pambalosi bani Hata in, gabe tartarik uhurni marhaporsayaon marhitei parlahou ni parinangon ai, seng pala marhasoman hata, anggo ididah sidea nasiam marparlahou ibagas hasusion ampa biar dompak Naibata.” (1 Petrus 3:1, 2) Anggo dear do parlahou ni parinangon, gabe ihargai paramangon ma haporsayaonni.

9. (a) Aha do na ibahen parinangon sanggah ia lang sapandapot pakon paramangonni? (b) Aha do podah bani parinangon na isurat bani Titus 2:4, 5?

 9 Sonaha anggo parinangon lang sapandapot pakon paramangonni? Lamlam ma patugahkon ai. Songon si Sarah, ongga do lang sapandapot pakon si Abraham. Tapi nini Jahowa bani si Abraham, “Tangihon ma . . .  si Sarah.” (1 Musa 21:9-12) Anggo lang marlawanan haputusan ai pakon Bibel, dear do anggo parinangon unduk. (Lahoan ni Apostel 5:29; Epesus 5:24) Isarihon parinangon na bujur do kaluargani. (Basa Titus 2:4, 5.) Pongkut ma marhorja, ase ihaholongi paramangon ampa niombah.​—Podah 31:10, 28.

Sonaha si Sarah boi gabe siusihan bani parinangon?

10. Aha na ihatahon Bibel pasal marsipadaohan ampa marsirang?

10 Sipata halani dong parsoalan, ra do na marhajabuan marsipadaohan atap pe marsirang. Tapi, Bibel mangkatahon “seng bulih sirang naboru ai humbani paramangonni” anjaha “dalahi pe, seng bulih sirangkononni parinangonni”. (1 Korint 7:10, 11) Pitah situasi na majangin do ase boi sidea marsipadaohan, ai pe maningon nanget lobei ipingkiri. Sonaha anggo marsirang? Bibel patugahkon pitah halani parbangkison do ase boi marsirang na marhajabuan.​—Mateus 19:9.

NA NIARAPKON NI NAIBATA HUMBANI NAMATORAS

Jesus do siusihan na dear bani ganup anggota kaluarga

11. Aha do na siporlunan bani niombah?

11 Nasiam namatoras, gunahon ma panorang rapkon niombahnima. Pangurupion ampa pangajarion pasal Jahowa do na siporlunan bani sidea.​—5 Musa 6:4-9.

12. Sonaha do namatoras manjaga niombahni?

12 Lambin jahat do dunia na irajai Sibolis on, anjaha buei do halak na rosuh mambahen pelecehan seksual  bani dakdanak. Dong do namatoras na maila patugahkon pasal seks bani niombahni. Tapi, sidea porlu do ipasingat janah iajari sonaha padaohkon diri humbani parjahat ai. Maningon ijaga namatoras do niombahni. *1 Petrus 5:8.

13. Mase niombah porlu iajari namatorasni?

13 Tanggung jawab ni namatoras do mangajari niombah ase dear marparlahou. Sonaha carani? Marhitei pinsang-pinsang domu hubani na patut. Ulang  kasar sanggah mamodahi sidea. (Jeremia 30:11) Ulang maminsang sanggah marah, ase lang borit uhur ni sidea halani parsahap ni nasiam na songon “paniham ni podang”. (Podah 12:18) Ajari ma sidea ase mangarusi mase porlu manangihon namatoras.​—Epesus 6:4; Heber 12:9-11; idah Ambah ni Hatorangan 30.

NA NIARAPKON NI NAIBATA HUMBANI DAKDANAK

14, 15. Mase dakdanak maningon unduk bani namatorasni?

14 Hassi pe sipata payah, tongtong do Jesus unduk bani Bapani. (Lukas 22:42; Johannes 8:28, 29) Sihol do homa Jahowa ase dakdanak unduk bani namatorasni.​—Epesus 6:1-3.

15 Dakdanak, hassi pe payah pangahapmu unduk bani namatorasmu, sai dingat ma anggo tongtong do ho unduk, malas ma uhur ni Jahowa pakon namatorasmu. *Podah 1:8; 6:20; 23:22-25.

Aha do na boi mangurupi na maposo ase lang ra mangkorjahon na salah?

16. (a) Sonaha do Sibolis mangeta-eta na maposo ase mangkorjahon na salah? (b) Mase ulang marhasoman pakon na lang mangkaholongi Jahowa?

16 Ra do Sibolis mamakei hasomanmu mangarahkon ho mangkorjahon na salah. Ia mambotoh sunsah do na maposo manulak ai. Sontohni, si Dina boru ni si Jakob marhasoman pakon sidea na lang manombah Jahowa. On parohkon bahat parsoalan hu bani pakon kaluargani. (1 Musa 34:1, 2) Anggo ihasomani ho na lang mangkaholongi Jahowa, ieta-eta ma ho mangkorjahon na lang iharosuhkon Jahowa. On boi mambahen ho pakon kaluargamu sunsah, janah borit ma uhur ni  Naibata. (Podah 17:21, 25) Halani ai pilih ma hasoman na mangkaholongi Jahowa.​—1 Korint 15:33.

KALUARGA NI NASIAM BOI MARTUAH

17. Aha do tanggung jawab ni ganup anggota kaluarga?

17 Anggo ganup anggota kaluarga ra mangirikkon hata ni Naibata, on mambahen sidea daoh humbani parsoalan. Jadi paramangon, haholongi ma parinangon. Parinangon, unduk janah sangap ma bahen paramangon. Tiru ma sontoh na isurat bani Podah 31:10-31. Namatoras, ajari ma niombah ase mangkaholongi Jahowa. (Podah 22:6) Bapa, maningon “pandei mangatur” rumah tangga. (1 Timoteus 3:4, 5; 5:8) Anjaha dakdanak, unduk ma bani namatoras. (Kolosse 3:20) Dingat ma nasiam ganupan ra do mambahen hasalahan. Jadi, toruh maruhur ma anjaha ra marsisasapan dousa. Tongon, itogu-togu Jahowa do ganup anggota kaluarga marhitei Bibel.

^ par. 12 Nasiam boi mambotoh hatorangan roh bahatni sonaha manjaga niombah bani buku Belajarlah dari Sang Guru Agung pasal 32, na hinaluarhon Saksi-Saksi Jahowa.

^ par. 15 Dakdanak lang maningon unduk bani namatorasni anggo isuruh mangkorjahon aha na marlawanan bani titah ni Naibata.​—Lahoan ni Apostel 5:29.

PARLAJARI LOBIH BAHAT

Kaluarga Nasiam Boi Martuah

Pangindo Pangurupion Naibata Ase Martuah

Dua sungkun-sungkun on boi mangurupi ase partongah jabuanima totap toguh.

Kaluarga Nasiam Boi Martuah

Sombah ma Jahowa Rap pakon Kaluarga

Sonaha ase nasiam pakon kaluarga boi marmalas uhur bani parlajaran Bibel kaluarga?