Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Aha do na Iajarhon Bibel Hubanta?

 PASAL SAPULUH ONOM

Pilih ma Panombahan na Sintong

Pilih ma Panombahan na Sintong

1, 2. Aha do ra na isungkun nasiam, janah mase porlu ipastihon ai?

BUEI halak mangkatahon sidea manombah Naibata. Tapi sasintongni na ihasogamkon Jahowa, ai do na ihorjahon sidea. (2 Korint 6:17) Halani ai, iparentahkon Jahowa do ase hita luar hun ugama na ladung, ai ma Babel na Banggal. (Pangungkabon 18:2, 4) Aha do na sihol bahenonmu? Ganup hita boi mambahen pilihan. Jadi sungkun ma ibagas uhurmu, ‘Ai mangihutkon cara ni Naibata do panombahanku, atap mangihutkon harosuhku?’

2 Anggo domma luar ham hun ugama na ladung, dear tumang ai. Tapi, ra adong ibagas uhurmu rosuh ope mandalankon hasomalan hun ugama na ladung. Ulas hita ma piga-piga hasomalan ai. Anjaha arusi ma porlu tumang mangidah ai domu bani pangahap ni Naibata.

PANOMBAHAN GANA-GANA PAKON SIMAGOD NI OMPUNG

3. (a) Mase adong halak mamakei gana-gana ibagas panombahanni? (b) Aha na ipatugah Bibel pasal panombahan gana-gana?

3 Adong do halak na martahun-tahun mamakei gana-gana atap mambahen pangian laho manombah Naibata. Ra do pangahap nasiam dong na salah anggo lang ipakei ai. Tapi dingat ma, iajar Jahowa do hita sonaha manombah-Si. Janah torang do ipatugah  Bibel, mamakei gana-gana ibagas panombahanta seng iharosuhkon Jahowa.​—Basa 2 Musa 20:4, 5; Psalmen 115:4-8; Jesaya 42:8; 1 Johannes 5:21.

4. (a) Mase lang boi hita manombah simagod ni ompungta? (b) Mase ilarang Jahowa hita manungkun bani na matei?

4 Buei halak mamboiskon bahat duit ampa panorang laho manombah janah pasonangkon simagod ni ompung. Tapi domma iparlajari hita, na matei lang boi mangurupi atap manjahati hita. Janah sidea pe lang manggoluh bani ianan na legan. Sasintongni, marsahap pakon na matei dos do ai marsahap pakon begu-begu. Halani ai iparentahkon Jahowa ma halak Israel ulang manungkun bani na matei atap bani aha pe na dong kaitanni pakon begu-begu.​—5 Musa 18:10-12; idah Ambah ni Hatorangan 26 ampa 31.

5. Sonaha ase nasiam lang be manombah gana-gana atap simagod ni ompung?

5 Sonaha ase nasiam lang be manombah gana-gana atap simagod ni ompung? Basa ma Bibel, janah nanget pingkiri sonaha pangahap ni Naibata pasal ai. “Hagigian” do ai bani Naibata. (5 Musa 27:15) Martonggo ma bani Jahowa ase dos pangahap nasiam pakon Jahowa janah boi manombah-Si marhitei cara na sintong. (Jesaya 55:9) Pos ma uhur ni nasiam, ipargogohi Jahowa do nasiam laho manadingkon aha pe na dong kaitanni hubani ugama na ladung.

BOI DO HITA MARNATAL?

6. Mase tanggal 25 Desember itotapkon gabe ari partubuh ni Jesus?

6 I sab tanoh on, tarsar tumang do ari Natal ai. Buei halak marpingkir anggo ai ari partubuh ni Jesus. Tapi, sasintongni humbani halak na so sisombah Jahowa  do mulani ari Natal. Sada ensiklopedia patorangkon, 25 Desember ai ma ari raya ni halak Rom (sipajuh begu-begu) laho manombah Dewa Matahari. Halani pambobai ni gereja sihol ase sipajuh begu-begu gabe halak Kristen, itotapkon ma partubuh ni Jesus bani tanggal 25 Desember, hassi pe lang bani ari ai Jesus tubuh. (Lukas 2:8-12) Ganup susian ni Jesus lang Marnatal. Buku Sacred Origins of Profound Things (Asal Usul Sakral dari Hal-Hal yang Bermakna Dalam) patorangkon, dob 200 tahun Jesus tubuh pe “lang dong na mambotoh ari ai, janah otik do halak na parduli attigan do partubuh ni Jesus”. Jadi marratus tahun dobkonsi Jesus tubuh do mulani Natal irayahon.

7. Mase halak Kristen lang Marnatal?

7 Buei halak mambotoh humbani sipajuh begu-begu do ari Natal pakon hasomalanni, songon marpesta ampa tukar kado. Sontohni, i Inggris pakon i Amerika, ongga do Natal ilarang halani ibotoh ai humbani sipajuh begu-begu. Iuhum do ise pe na Marnatal. Tapi ujungni, buei halak Marnatal use. Mase halak Kristen lang Marnatal? Halani sidea sihol pamalaskon uhur ni Naibata.

BOI DO HITA MARULANG TAHUN?

8, 9. Mase halak Kristen bani abad na parlobei lang marulang tahun?

8 Ulang tahun, aima pesta na gati homa irayahon buei halak. Boi do halak Kristen marulang tahun? Bibel patugahkon pitah na so sisombah Jahowa do na mambahen pesta ulang tahun. (1 Musa 40:20; Markus 6:21) Pesta ulang tahun ibahen laho pasangapkon dewa-dewa. Halani ai halak Kristen bani abad na parlobei  “mangarusi anggo pesta ulang tahun ai humbani hasomalan ni sipajuh begu-begu”.​—The World Book Encyclopedia.

9 Halak Rom ampa Junani porsaya sanggah sasada halak tubuh, adong tonduy na roh na manjaga halak ai sadokah goluhni. Nini buku The Lore of Birthdays (Kepercayaan Tradisional tentang Hari Lahir), “Dong kaitan ni tonduy ai pakon dewa na dos ari tubuhni pakon na marulang tahun ai.”

10. Mase halak Kristen sonari on pe lang marulang tahun?

10 Ai marosuh do Jahowa bani ari raya na dong kaitanni humbani ugama na ladung? (Jesaya 65:11, 12) Tontu lang. Halani ai, hita pe lang marulang tahun atap mambahen pesta aha pe na dong kaitanni bani ugama na ladung.

IHAROSUHKON NAIBATA DO AI?

11. Mase buei halak marari raya? Aha do na siporlunan hubanta?

11 Hassi pe buei halak mambotoh Natal ampa ari raya na legan humbani sipajuh begu-begu, tapi totap do ai irayahon sidea. Pangahap ni sidea, ai ma panorang na topat laho martumpu pakon kaluarga. Sonai do pangahap nasiam? Dear do martumpu pakon kaluarga. Jahowa do na mamungkah kaluarga, janah sihol ase hita orot pakon kaluarganta. (Epesus 3:14, 15) Tapi, parhasomananta pakon Jahowa do na siporlunan marimbangkon dihut bani ari raya na pasonangkon kaluarganta. Halani ai ma apostel Paulus mangkatahon, “Paruhurhon nasiam ma, atap aha do harosuh ni Tuhan in!”​—Epesus 5:10.

12. Ari raya aha do na lang iharosuhkon Jahowa?

12 Buei halak marpingkir lang soal hunja do  mulani ari raya ai. Tapi lang sonai pingkiran ni Jahowa. Ganup ari raya hun ugama na ladung, atap aha pe na pasangapkon jolma atap lambang ni negara, seng iharosuhkon-Ni ai. Sontohni, dob luar halak Israel hun Masir, ibahen sidea ma ari raya na somal ibahen halak Masir bani dewa-dewani tapi igoran ma ai “ari raya bani Jahowa”. Ujungni, iuhum Jahowa do sidea halani ai. (2 Musa 32:2-10) Songon na ihatahon nabi Jesaya hubanta “ulang jamah na mabutak!”​—Basa Jesaya 52:11.

MARUHUR MA HUBANI NA LEGAN

13. Sungkun-sungkun aha do na dong ibagas uhurmu sanggah nasiam lang be marari raya?

13 Sanggah iputuskon nasiam lang be dihut marari raya, ra do adong sungkun-sungkunmu. Sontohni: Aha do na huhatahon anggo hasoman sahorjangku manungkun mase ahu lang dihut Marnatal? Aha do bahenonku anggo adong na mambere kado Natal? Aha do na huhatahon anggo iarahkon paramangon atap parinangonku marari raya? Sonaha ahu mangurupi niombahku ase ulang pusok uhurni halani lang ibahen pesta ulang tahunni?

14, 15. Aha do bahenonmu anggo adong na mangkatahon, “Selamat Natal!” atap na mambere kado?

14 Maruhur janah lamlam ma sanggah mambalosi ai. Sontohni, anggo adong na mangkatahon, “Selamat Natal!” hatahon ma, “Diatei tupa.” Tapi anggo adong na sihol mambotoh, boi do ipatorang mase nasiam lang marari raya. Tapi tongtong ma nasiam basar, maruhur, janah hormat patorangkon ai. Bibel  mangkatahon, “Sai tongtong ma jenges hata nasiam, songon na ginaraman, ase ibotoh nasiam, sonaha patut marbalos bani ganup halak.” (Kolosse 4:6) Boi homa ihatahon, malas do uhur ni nasiam marsaor pakon sidea, janah mambere atap manjalo kado, tapi lang bani panorang ari raya songon on.

15 Aha do bahenonmu anggo adong na mambere kado? Lang ganupan ipatugah Bibel aha na maningon bahenonta. Tapi porlu do ijaga ase borsih panggora ni uhurta. (1 Timoteus 1:18, 19) Ra do na mambere kado ai lang mambotoh anggo nasiam lang marari raya. Atap ra do ihatahonni, “Hubotoh do ham lang marari raya, tapi sihol do ahu mambere kado bamu.” Ijon, nasiam do na mamutuskon kado ai ijalo atap lang. Aha pe na iputuskon nasiam, pastihon ma panggora ni uhurmu totap borsih. Ulang horjahon aha pe na parsedahon parhasomananta pakon Jahowa.

NASIAM AMPA KALUARGA NI NASIAM

Sidea na mangidangi Jahowa marmalas ni uhur

16. Aha do bahenonmu anggo iarahkon kaluarga marari raya?

16 Aha do bahenonmu anggo iarahkon kaluarga marari raya? Ulang pala martinggili halani ai. Dingat ma, dong do hak ni sidea manontuhon aha na laho bahenonni. Basar anjaha hargai ma pilihan ni sidea songon nasiam sihol ihargai. (Basa Mateus 7:12.) Tapi sonaha anggo kaluargamu sihol rap pakon ham sanggah ari raya ai, aha do bahenonmu? Martonggo ma lobei bani Jahowa ase iurupi nasiam mambahen haputusan na dear. Pingkirhon ma situasi ai janah pindahi ma hatorangan pasal ai. Dingat ma, pasonangkon Jahowa do na iharosuhkon nasiam.

17. Aha do bahenonmu laho mangurupi niombah na maretek ni uhur halani mangidah hasomanni marari raya?

 17 Sonaha nasiam mangurupi niombahmu sanggah ididah sidea hasomanni marari raya? Atur ma panorang na jenges laho mambere kado bani sidea. Anjaha hadiah sidearan na boi ibere nasiam ai ma panorang ampa holong ni nasiam.

DALANKON MA PANOMBAHAN NA SINTONG

18. Mase dear anggo hita roh hu partumpuan?

18 Laho pasonangkon Jahowa, porlu do itadingkon hita ari raya ampa hasomalan humbani ugama na ladung. Leganni ai, porlu do homa mandalankon panombahan na sintong. Sonaha carani? Ringgas ma roh hu partumpuan. (Basa Heber 10:24, 25.) Porlu tumang do partumpuan bani panombahan na sintong. (Psalmen 22:23; 122:1) Halani ijai boi hita marsiojuran.​—Rom 1:12.

19. Mase porlu patugahkon pasal hasintongan ni Bibel na dob iparlajari nasiam?

19 Na porlu homa bani panombahan na sintong aima patugahkon bani na legan pasal na dob iparlajari nasiam. Buei halak holsohan halani hajahaton i sab tanoh on. Ra do adong na itanda nasiam na mangahapkon sonai. Patugah ma bani sidea pangarapan ari simagira na jenges. Sai roh ma nasiam hu partumpuan janah patugah ma hasintongan ni Bibel bani na legan. Jadi lang dong be pingkiranmu mulak hubani ugama na ladung pakon hasomalanni. Porsaya ma martuah do nasiam, janah ipasu-pasu Jahowa do ganup na binahenmu laho manombah-Si ibagas cara na sintong.​—Maleaki 3:10.