Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Aha do na Iajarhon Bibel Hubanta?

 PASAL TOLU

Aha do Sura-Sura ni Naibata bani Manisia?

Aha do Sura-Sura ni Naibata bani Manisia?

1. Aha do sura-sura ni Naibata bani manisia?

DEAR tumang do sura-sura ni Naibata bani manisia. Itompa-Ni dalahi pakon naboru na parlobei aima si Adam pakon si Hawa, mangiankon pohon Eden na jenges. Ia marosuh ase sidea marginompari, mambahen tanoh on gabe paradeiso ampa mangurus binatang-binatang i tanoh on.​—1 Musa 1:28; 2:8, 9, 15; idah Ambah ni Hatorangan 6.

2. (a) Hunja do ibotoh hita tongtong do Naibata pasaudkon sura-sura-Ni? (b) Halak na sonaha do na tongtong manggoluh i tanoh on?

2 Boi do hita manggoluh i paradeiso? Nini Jahowa, “Aha na dob Huranggihon, ai do bahenon-Ku.” (Jesaya 46:9-11; 55:11) Tongon, tongtong do Naibata pasaudkon sura-sura-Ni. Dong do tujuan Naibata manompa tanoh on, “sedo ase tarulang ase itompa” ai. (Jesaya 45:18) Marosuh Ia ganup halak manggoki tanoh on. Halak na sonaha do na iharosuhkon Naibata manggoluh i tanoh on, janah piga dokah? Bibel patugahkon, “Teanon ni halak parpintor do tanoh in, anjaha tongtong do sidea marianan ijin.”​—Psalmen 37:29; Pangungkabon 21:3, 4.

3. Halani boritan janah matei manisia, sungkun-sungkun aha do na ipingkiri nasiam?

3 Sonari bahat halak na boritan janah matei. Bani piga-piga ianan dong na marporang janah  marsibunuhan. On sedo sura-sura ni Naibata. Jadi, mase sonai na masa? Pitah Bibel do na boi mambalosi ai.

MUNSUH NI NAIBATA

4, 5. (a) Ise do na marsahap bani si Hawa marhitei ulog i pohon Eden? (b) Sonaha halak na bujur boi gabe panangko?

4 Bibel patugahkon, dong sada munsuh ni Naibata ai ma “na margoran sibolis pakon setan”. Sibolis marsahap bani si Hawa marhitei ulog i pohon Eden. (Pangungkabon 12:9; 1 Musa 3:1) Ibahen Sibolis do ulog ai songon na marsahap.​—Idah Ambah ni Hatorangan 7

5 Jadi, Naibata do na manompa Sibolis? Lang! Tapi dong sada malekat na i surga na manjadihon dirini gabe Sibolis sanggah Naibata pasirsirhon tanoh on bani si Adam pakon si Hawa. (Job 38:4, 7) Sonaha dalanni? Sontohni, sonaha halak na bujur boi gabe panangko? Sedo gabe panangko ia itubuhkon. Tapi halani rosuh tumang bani barang ni halak, janah tongtong ipingkirhonni, gabe tubuh ma uhur na jahat, lanjar manangko ma ia. Jadi ia sandiri do manjadihon dirini gabe panangko.​—Basa Jakobus 1:13-15; idah Ambah ni Hatorangan 8.

6. Sonaha do sada malekat boi gabe munsuh ni Naibata?

6 Sonai ma na masa bani malekat ai. Dobkonsi si Adam pakon si Hawa itompa Jahowa, iparentahkon do sidea ase manggompari janah “manggoki tanoh on”. (1 Musa 1:27, 28) Ra do Sibolis marpingkir, ‘Ahu ma namin isombah, ulang Jahowa!’ Lambin ipingkirhon, lambin marosuh ma ia ase isombah, hapeni Jahowa do  na maningon isombah manisia. Jadi marladung ma ia bani si Hawa. (Basa 1 Musa 3:1-5.) Sonai ma ia gabe Setan Sibolis, munsuh ni Naibata.

7. (a) Mase si Adam pakon si Hawa matei? (b) Mase hita gabe matua janah matei?

7 Ipangan si Adam pakon si Hawa ma buah ai. (1 Musa 2:17; 3:6) Gabe mardousa ma sidea halani manlawan Jahowa, ujungni gabe matei ma sidea songon na ihatahon Jahowa. (1 Musa 3:17-19) Ginompar ni si Adam pakon si Hawa gabe matei halani mardousa. (Basa Rom 5:12.) Ase boi iarusi hita mase ginompar ni si Adam pakon Si Hawa gabe mardousa, rimangi ma sontoh on. Anggo setakan ni kombang loyang matopik, kombang loyangni pe gabe matopik. Sanggah si Adam manlawan dompak Naibata gabe mardousa ma ia. Halani ginompar ni si Adam do hita, gabe jolma na mardousa ma hita songon si Adam. Halani ai do hita gabe matua janah matei.​—Rom 3:23; idah Ambah ni Hatorangan 9.

8, 9. (a) Sibolis marosuh ase si Adam pakon si Hawa porsaya bani aha? (b) Mase lang mintor iripaskon Jahowa na manlawan hu Bani?

8 Mulani Sibolis manlawan dompak Jahowa, ai ma sanggah si Adam pakon si Hawa ietaeta Sibolis ase manlawan dompak Naibata. Ia marosuh ase si Adam pakon si Hawa porsaya parladung do Jahowa ai, janah siparkuasa na lang mambere na madear bani sidea. Nini Sibolis anggo manisia lang mamorluhon Naibata, janah si Adam pakon si Hawa boi manontuhon na sintong atap na lang bani dirini sandiri. Jadi aha do bahenon ni Jahowa? Naibata boi do mintor manripaskon sidea na manlawan hu Bani. Tapi boi do taridah anggo Sibolis na marladung? Tontu lang.

 9 Sidea lang mintor iripaskon. Ipaturut Jahowa do manisia mamarentah dirini sandiri. Marhitei ai taridah ma parladung do Sibolis janah Jahowa do mambotoh sidearan bani manisia. Holi iparlajari hita ma ai roh bahatni bani Pasal 11. Tapi sonaha do pandapot ni nasiam pilihan na ibahen si Adam pakon si Hawa? Ai dearan do sidea porsaya bani Sibolis, janah manlawan bani Naibata? Domma bahat na ibere Jahowa bani sidea. Ibere Jahowa hagoluhan na sempurna, ianan, pakon horja na jenges. Tapi, lang ongga ibere Sibolis na  madear bani sidea. Anggo nasiam ijai, aha do bahenon ni nasiam?

10. Aha do siporlunan na ipilih hita?

10 Sonari hita maningon mambahen pilihan, janah pilihanta manontuhon hagoluhanta. Hita boi mamilih Jahowa atap Sibolis na gabe sipanggomgom. Anggo ipilih hita manangihon Jahowa, ai patuduhkon parladung do Sibolis. (Psalmen 73:28; basa Podah 27:11.) Otik tumang do halak na manangihon Naibata. Sasintongni lang Naibata na manrajai dunia on. Jadi anggo lang Naibata, ise do? Anggo hita mamilih Jahowa gabe Rajanta ai patuduhkon parladung do Sibolis.

ISE DO NA MANRAJAI DUNIA ON?

Anggo lang Sibolis na manranjai dunia on, ai ra do ibereni bani Jesus?

11, 12. (a) Aha do na iparlajari hita sanggah Sibolis pataridahkon harajaon ni dunia on bani Jesus? (b) Ayat na ija do na patuduhkon Sibolis do manrajai dunia on?

11 Ibotoh Jesus do ise na manrajai dunia on. Sanggah ia i tanoh on, ipatuduh Sibolis do “haganup harajaon na i dunia on ampa hasangaponni” bani. Janah, nini Sibolis ma bani Jesus, “Haganupan in hubere pe Bamu, asal ma ra Ham marsombah hu bangku.” (Mateus 4:8, 9; Lukas 4:5, 6) Rimangi ma, anggo lang Sibolis na manrajai dunia on, ai ra do ibereni bani Jesus? Lang. Sibolis do manrajai dunia on.

12 Ra do nasiam sungkun-sungkun, ‘Mase Sibolis na manrajai dunia on? Ai lang Jahowa do Pargogoh Na So Tarimbang na manompa sagala na adong?’ (Pangungkabon 4:11) Tongon, tapi Jesus patugahkon Sibolis do “raja ni dunia on”. (Johannes 12:31; 14:30; 16:11) Nini apostel Paulus, Sibolis do “naibata ni dunia on”. (2 Korint 4:3, 4) Anjaha apostel Johannes manuratkon  “ganup dunia on ibagas kuasa ni hajahaton do”.​—1 Johannes 5:19.

SONAHA DO PARBOIS NI DUNIA NI SIBOLIS?

13. Mase hita mamorluhon dunia na baru?

13 Lambin parah do dunia on, ija pe ididah hita porang, korupsi, sipakulah-kulah ampa hajahaton. Age pe marpukpuk manisia pasaloseihon parsoalan ai, tapi tongtong do lang boi. Holi ripaskonon ni Naibata ma dunia na jahat on bani porang Harmagedon, anjaha bahenon-Ni do gabe dunia na baru na dear.​—Pangungkabon 16:14-16; idah Ambah ni Hatorangan 10.

14. Ise Raja na ipilih Naibata bani Harajaon-Ni? Aha do na ipatugah Bibel pasal Jesus?

14 Jesus do Raja na ipilih Jahowa bani Harajaon-Ni i surga. Marribu tahun na salpu, Bibel patugahkon Jesus do “Raja Damei” na laho mamarentah janah harajaon ai totap do ronsi sadokah ni dokah ni. (Jesaya 9:5, 6) Jesus mangajar susianni ase manonggohon harajaon ai, “Sai roh ma Harajaon-Mu. Sai saud ma harosuh ni uhur-Mu i nagori tongah on songon na i nagori atas.” (Mateus 6:10) Bani Pasal 8, holi iparlajari hita sonaha Harajaon ni Naibata manggantihon pamarentahan ni dunia on. (Basa Daniel 2:44.) Dob ai, bahenon ni Harajaon ni Naibata ma tanoh on gabe paradeiso na jenges.​—Idah Ambah ni Hatorangan 11.

TANOH NA BARU DOMMA DOHOR!

15. Aha do “tanoh na baru” ai?

15 Bibel patugahkon, “Paima-imahon do hita bani langit na baru pakon tanoh na baru, ianan ni hapintoran in.” (2 Petrus 3:13; Jesaya 65:17) Sipata, sanggah Bibel patugahkon “tanoh on”, ai mararti halak na  manggoluh i tanoh on. (1 Musa 11:1) Jadi, sasintongni tanoh na baru aima halak na manangihon Naibata janah mandapot pasu-pasu hun Bani.

16. Aha do na laho ibere Naibata bani sidea na manggoluh i tanoh na baru, janah sonaha hita ase boi mandapot ai?

16 Ijanjihon Jesus do “hagoluhan sisadokah ni dokahni” bani sidea na manggoluh i tanoh na baru. (Markus 10:30) Sonaha ase hita boi mandapot ai? Laho manorih balosni basa ma Johannes 3:16 ampa 17:3 Idah hita ma bani Bibel sonaha do hagoluhan i Paradeiso.

17, 18. Hunja do ibotoh hita dong do holi hadameion i sab tanoh on, janah lang dong be na ihabiarhon?

17 Lang dong be hajahaton ampa porang. Lang dong be parjahat i tanoh on. (Psalmen 37:10, 11) Naibata “pasohkon parmunsuhan das hu ujung ni tanoh on”. (Psalmen 46:10; Jesaya 2:4) Pitah halak na mangkaholongi janah manangihon Naibata do na tading i tanoh on. Dong hadameion na manongtong.​—Psalmen 72:7.

18 Lang dong be na ihabiarhon juak ni Jahowa. Sapari, sanggah halak Israel manangihon Naibata, sonang do sidea halani iondingi Naibata. (3 Musa 25:18, 19) I Paradeiso, lang adong be na mambahen hita mabiar.​—Basa Jesaya 32:18; Mika 4:4.

19. Mase hita porsaya bahat do holi sipanganon i tanoh na baru?

19 Bahat sipanganon. “Sai junah ma omei i tanoh in, das bani pakpak ni dolog.” (Psalmen 72:16) Ipasu-pasu Jahowa ma hita janah “ibere tanoh gogohni”.​—Psalmen 67:7.

20. Hunja do ibotoh hita holi tanoh on gabe paradeiso?

20 Tanoh on gabe paradeiso. Holi, ganup halak  dong bei rumah pakon jumani na jenges. (Basa Jesaya 65:21-24; Pangungkabon 11:18.) Gabe jenges ma tanoh on songon pohon Eden. Ibere Jahowa ma haporluanta. Bibel patugahkon, “Ham do na mambuha tangan-Mu, anjaha Ham do na pabosur sura-sura ni sagala na manggoluh.”​—Psalmen 145:16.

21. Hunja do ibotoh hita mardamei do holi manisia pakon binatang?

21 Mardamei do manisia pakon binatang. Binatang seng manjahati manisia. Dakdanak seng mabiar bani binatang-binatang na marbisa.​—Basa Jesaya 11:6-9; 65:25.

22. Aha na laho bahenon ni Jesus bani halak na boritan?

22 Lang dong na boritan. Sanggah Jesus i tanoh on, bahat halak ipamalumni. (Mateus 9:35; Markus 1:40-42; Johannes 5:5-9) Tapi bani Harajaon ni Naibata, ipamalumni do holi ganup halak. Lang dong be na mangkatahon, “Boratan do ahu!”​—Jesaya 33:24; 35:5, 6.

23. Aha do na laho bahenon ni Naibata bani halak na matei?

23 Na matei mulak manggoluh. Marjanji do Naibata papuhohon marjuta halak na matei. “Mulak manggoluh parpintor ampa pargeduk.”​—Basa Johannes 5:28, 29; Lahoan ni Apostel 24:15.

24. Sonaha do pangahap ni nasiam pasal hagoluhan i Paradeiso?

24 Ganup hita boi mamilih mananda janah mangidangi Jahowa atap marparlahou domu bai uhurta sandiri. Anggo hita mangidangi Jahowa dapot hita ma hagoluhan na sonang bani ari simagira. Sanggah ipindo sada dalahi ase idingat ia, marjanji do Jesus, “Rap pakon Ahu ma ho i Paradeiso.” (Lukas 23:43) Parlajari hita ma roh bahatni pasal Jesus janah sonaha janji-janji ni Naibata saud marhiteihonsi.