Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Aha do na Iajarhon Bibel Hubanta?

 PASAL SAPULUH DUA

Sonaha Ase Boi Gabe Hasoman ni Naibata?

Sonaha Ase Boi Gabe Hasoman ni Naibata?

1, 2. Ise do piga-piga hasoman ni Jahowa?

ISE do na ipilih nasiam gabe hasoman? Tontu halak na iharosuhkon nasiam. Na sosok pakon nasiam, janah na marparlahou na madear.

2 Jahowa pe mamilih piga-piga humbani manisia gabe hasomani. Sontohni, si Abraham ihatahon hasoman ni Jahowa. (Jesaya 41:8; Jakobus 2:23) Marhasoman do homa Jahowa pakon si Daud. Ia mangkatahon anggo si Daud ‘harosuh ni uhur-Ni’. (Lahoan ni Apostel 13:22) Nabi Daniel pe ihatahon “haholongan ni uhur” ni Jahowa.​—Daniel 9:23.

3. Mase si Abraham, si Daud, ampa si Daniel boi gabe hasoman ni Jahowa?

3 Sonaha si Abraham, si Daud, ampa si Daniel boi gabe hasoman ni Jahowa? Nini Jahowa bani si Abraham, “Halani itangihon ho do sorang-Ku.” (1 Musa 22:18) Jahowa marhasoman pakon sidea na mandalankon titah-Ni. Sada bangsa pe boi gabe hasoman-Ni. Jahowa patugahkon bani bangsa Israel, “Tangihon hanima ma sorang-Ku, ase Ahu gabe Naibatanima, anjaha hanima gabe bangsang-Ku.” (Jeremia 7:23) Jadi, anggo hita sihol gabe hasoman ni Jahowa, maningon do ihorjahon hita parentah-Ni.

IONDINGI JAHOWA DO HASOMAN-NI

4, 5. Sonaha Jahowa mangondingi hasoman-Ni?

4 Bibel patugahkon anggo Jahowa sihol “mambere  gogoh hubani halak paruhur na marsijoloman hu Bani”. (2 Kronika 16:9) Bani Psalmen 32:8 ijanjihon Jahowa do bani hasoman-Ni, ‘Huajari anjaha hupodahi pe ho pasal dalan sidalananmu, huparmaloi anjaha iiring-iringi pangkawahku pe ho.’

5 Tapi adong munsuh na jahat na manlanglangi hita laho marhasoman pakon Naibata. Hassi pe sonai iondingi Jahowa do hita. (Basa Psalmen 55:23.) Na gabe hasoman ni Jahowa, hita maningon mangidangi Ia humbani gok ni uhurta. Tongtong ma setia hu Bani, hassi pe ibagas hasunsahan. Porsaya ma hita songon panurat ni buku Psalmen na mangkatahon pasal Jahowa, “Anggo i siamunku Ia, seng anjai jurgang ahu.” (Psalmen 16:8; 63:9) Sonaha Sibolis manlanglangi hita laho marhasoman pakon Naibata?

LADUNG NI SIBOLIS

6. Aha do na ihatahon Sibolis pasal jolma?

6 Songon na iparlajari hita bani Pasal 11, Sibolis manlawan Jahowa janah mangkatahon Ia parladung anjaha lang pintor, halani lang ipaturut-Ni si Adam ampa si Hawa manontuhon na dear atap na lepak. Buku Job pe patugahkon ituduh Sibolis do jolma. Ia mangkatahon anggo sidea mangidangi Jahowa halani upah, lang halani holong. Ihatahon homa anggo ia boi mambahen ise pe manlawan Naibata. Idah ma sonaha hita boi marlajar humbani si Job janah sonaha Jahowa mangondingi ia.

7, 8. (a) Ise do si Job ai? (b) Aha do na ihatahon Sibolis pasal si Job?

7 Ise do si Job ai? Ia sahalak na bujur na manggoluh hira-hira 3.600 tahun na salpu. Jahowa mangkatahon  lang dong jolma na songon si Job i tanoh on. Ia mabiar bani Jahowa janah daoh humbani na jahat. (Job 1:8) Tongon ma si Job hasoman ni Jahowa.

8 Tapi Sibolis mangkatahon, si Job mangidangi Naibata halani dong na laho sibuatonni. Nini ma bani Jahowa, “Ai lang iramotkon Ham do ia ampa rumahni inggot ampa haganup na dong bani? Horja ni tanganni pe itumpak Ham do manjadi, anjaha na dongni pe martambah do i tanoh ai. Tapi porini idurdurhon Ham tangan-Mu laho mambuat haganup na bani ai, mintor buraanni do Ham torang-torang.”​—Job 1:10, 11.

9. Mase Sibolis ipaturut Jahowa manlajou si Job?

9 Ihatahon Sibolis do anggo si Job mangidangi Jahowa halani ibere upah. Anjaha ia boi mambahen si Job lang be mangidangi Jahowa. Halani ai ipaturut Jahowa ma Sibolis manlajou si Job laho mambotoh ai tongon do si Job mangkaholongi Jahowa atap lang.

ILAJOU SIBOLIS DO SI JOB

10. Sonaha Sibolis manlajou si Job, tapi sonaha si Job?

10 Magou ma ganup pinahan ni si Job ibahen Sibolis. Dob ai, bunuhonni ma jabolon-jabolon ni si Job. Ujungni, bunuhonni ma ganup niombah ni si Job marhitei halisungsung. Tapi setia do si Job bani Jahowa. “Ibagas haganupan ai seng mardousa si Job barang marhutuk ia bani Naibata.”​—Job 1:12-19, 22.

Ipasu-pasu Jahowa do hatengeran ni uhur ni si Job

11. (a) Aha ope na ibahen Sibolis bani si Job? (b) Tapi, sonaha si Job?

11 Tapi lang marnaloja Sibolis. Nini ma bani Naibata, “Porini idurdurhon Ham tanganmu, laho manjamah holiholini ampa dagingni mintor buraanni do  Ham torang-torang.” Jadi, ibahen Sibolis ma si Job hona bayoh na parah. (Job 2:5, 7) Tapi totap do si Job setia bani Jahowa. Nini ma, “Ronsi matei ahu hupartahankon, paboa seng dong salahku.”​—Job 27:5.

12. Sonaha do si Job patuduhkon na parladung do Sibolis ai?

12 Lang ibotoh si Job anggo Sibolis do na mambahen sitarononni, iaganni do Jahowa na mambahen ai ganupan. (Job 6:4; 16:11-14) Hassi pe sonai, totap do ia setia bani Jahowa. Takkas ma taridah, tongon do hape si Job mangkaholongi Jahowa. Ladung do ganup hata ni Sibolis ai!

13. Aha do hasilni halani si Job totap martenger ni uhur?

13 Hassi pe lang ibotoh si Job aha na masa i surga, tapi totap do ia setia bani Jahowa janah patuduhkon parladung do Sibolis ai. Hasilni, ipasu-pasu Jahowa ma hatengeran ni uhurni ai.​—Job 42:12-17.

SONAHA DO SIBOLIS MARLADUNG PASAL HITA

14, 15. Aha do na ihatahon Sibolis pasal ganup jolma?

14 Dong parlajaran na boi ibuat hita humbani si Job. Sonari pe ihatahon Sibolis do anggo hita mangidangi Jahowa halani upah. Bani Job 2:4 nini Sibolis, “Sagala na dong bani jolma in ra do ia mambere gantih ni hosahni.” Jadi, ganup jolma na mangidangi Jahowa do na isangsihon Sibolis, sedo pitah si Job. Marratus tahun dob matei si Job, ifitnah Sibolis ope Jahowa ampa juakjuak-Ni. Sontohni Podah 27:11 mangkatahon, “Maruhur ma, ale anakku, anjaha pamalas ma uhurhu, ase hubotoh marbalos bani na pahiri ahu.”

15 Halani ai pilih ma mangidangi Jahowa, ase taridah na parladung do Sibolis ai. Hassi pe maningon mambahen hamubahon hita ase boi marhasoman  pakon Jahowa, tapi ai do haputusan sidearan! Sibolis mangkatahon anggo hita lang setia bani Jahowa sanggah adong parlajouan. Marusaha do ia manlanglangi hita ase ulang setia bani Jahowa. Sonaha dalanni?

16. (a) Aha do cara na ibahen Sibolis ase jolma lang be mangidangi Jahowa? (b) Sonaha Sibolis manlanglangi nasiam ase ulang mangidangi Jahowa?

16 Buei do cara na ibahen Sibolis ase hita ulang marhasoman pakon Naibata. Usih “songon singa na maraum mangindahi sibondutonni” do ia. (1 Petrus 5:8) Jadi, ulang pala tarsonggot hita anggo adong kaluarga, hasomanta atap pe na legan manlanglangi hita marlajar Bibel ampa mangkorjahon na pintor. * (Johannes 15:19, 20) Ipausih Sibolis do dirini songon “malekat haliharon”. Aha pe bahenonni do ase hita lang manangihon Jahowa. (2 Korint 11:14) Leganni ai, ia mambahen ase tubuh ibagas uhurta anggo hita lang talup mangidangi Naibata.​—Podah 24:10.

HORJAHON MA PARENTAH NI JAHOWA

17. Mase hita manangihon Jahowa?

17 Taridah ma parladung do Sibolis anggo itangihon hita Jahowa. Sonaha ase hita manangihon Naibata? Bibel mangkatahon, “Maningon haholonganmu do Jahowa Naibatamu humbani sagala uhurmu pakon humbani sagala tonduymu pakon humbani sagala gogohmu.” (5 Musa 6:5) Halani holong itangihon hita do Jahowa. Lambin banggal holongta hu Bani, lambin  sihol ma hita mandalankon titah-Ni. Apostel Johannes manuratkon, “On do holong ni uhur bani Naibata, anggo idalankon hita titah-Ni, anjaha seng borat titah-Ni in.”​—1 Johannes 5:3.

18, 19. (a) Aha deba horja na ihagigihon Jahowa? (b) Hunja do ibotoh hita anggo Jahowa lang mangindo lobih humbani na boi ibahen hita?

18 Tapi, aha do na ihatahon Jahowa seng bulih ihorjahon hita? Idah ma piga-piga sontohni bani kotak “ Hagigihon ma na Ihagigihon Jahowa”. Ra do pangahap nasiam lang pala salah mangkorjahon sisonai. Tapi anggo ibasa hita Bibel janah nanget ipingkiri, iarusi hita ma aha do gunani mandalankon titah ni Jahowa. Janah ra do homa nasiam porlu mambahen hamubahon. Anggo ra nasiam mambahen hamubahon hassi pe ai payah, iahapkon nasiam ma hadameion  ampa malas ni uhur janah boi gabe hasoman ni Naibata. (Jesaya 48:17, 18) Sonaha do hita boi mambahen hamubahon?

19 Jahowa lang ongga mangindo lobih humbani na boi ibahen hita. (5 Musa 30:11-14) Halani hasoman-Ni do hita, Ia do na lobih mangarusi pasal dirinta marimbangkon hita sandiri. Ibotoh-Ni do gogoh ampa hagalekonta. (Psalmen 103:14) Ihatahon si Paulus do hubanta, “Hatengeran do Naibata, seng paturuton-Ni nasiam lajouon lobih humbani gogoh nasiam, tapi rap pakon parlajouan ai bahenon-Ni do homa hadobanni, ase tartaron nasiam.” (1 Korint 10:13) Pos ma uhurta ipargogohi Jahowa do hita laho mangkorjahon na sintong. Bereon-Ni do hubanta “hagogohon na sumurung” na mangurupi hita ibagas hasunsahan. (2 Korint 4:7) Iahapkon Si Paulus do ai, halani in nini  ma, “Haganup do tarhorjahon ahu marhiteihon Ia, na margogohi ahu.”​—Pilippi 4:13.

HAROSUHKON MA NA IHAHOLONGI NAIBATA

20. Biak na sonaha do maningon itiru hita, janah mase?

20 Anggo hita sihol gabe hasoman ni Jahowa, ulang ma horjahon na salah. (Rom 12:9) Tapi lang sungkup pitah ai. Maningon do ihorjahon hita na iharosuhkon-Ni songon na ipatugah bani Psalmen 15:1-5. (Basa.) Maningon do homa itiru hita biak-Ni songon “holong, malas ni uhur, damei, lumbang ni uhur, habasaron, halayakon, haporsayaon, halamlamon, ampa panrajaion diri”.​—Galatia 5:22, 23.

21. Sonaha ase hita boi pataridahkon biak na iharosuhkon Jahowa?

21 Sonaha ase hita boi pataridahkon biak na jenges ai? Tongtong ma mambasa ampa marlajar Bibel ase ibotoh hita harosuh ni Jahowa. (Jesaya 30:20, 21) Anggo sonai ibahen hita, lambin banggal ma holongta hu Bani janah lambin marosuh ma hita mandalankon titah-Ni.

22. Aha do hasilni anggo itangihon hita Jahowa?

22 Hamubahon na ibahen hita usih songon mananggalkon pakeian na buruk, dob ai mamakei pakeian na baru. Bibel mangkatahon porlu do “itanggali nasiam jolma na buruk in” anjaha pakei nasiam ma “na baru in”. (Kolosse 3:9, 10) Hassi pe lang urah mangkorjahon ai, tapi anggo marusaha do hita manangihon Jahowa, ijanjihon-Ni do banta “upah banggal”. (Psalmen 19:12) Jadi, humbani gok ni uhur ma tangihon Jahowa, lang halani upah, ase taridah parladung do Sibolis ai. Dob ai nasiam boi gabe hasoman ni Naibata!

^ par. 16 On sedo mararti anggo Sibolis na mambahen ganup halak manlanglangi hita ase lang marlajar Bibel. Tapi Sibolis do “naibata ni dunia on” janah “ganup dunia on ibagas kuasa ni hajahaton do”. Jadi, ulang pala tarsonggot anggo adong na parontihon hita mangidangi Jahowa.​—2 Korint 4:4; 1 Johannes 5:19.