Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Aha do na Iajarhon Bibel Hubanta?

 PASAL PITU

Dong Do Parpuhoon!

Dong Do Parpuhoon!

1-3. Humbani aha hita lang boi maluah janah sonaha Jahowa paluahkon hita?

RIMANGI ma anggo nasiam masuk penjara, hape lang mambahen na jahat nasiam. Lang boi age aha pe ibahen nasiam laho paluahkon diri. Tapi sanggah mandolei nasiam, adong na boi paluahkon nasiam janah marjanji laho mangurupi nasiam! Sonaha pangahap ni nasiam?

2 Sonai ma na masa hubanta. Age pe marusaha hita, lang boi hita paluahkon diri humbani hamatean. Tapi, markuasa do Jahowa paluahkon hita humbani hamatean. Anjaha Ia marjanji “munsuh na parpudi siparontihonon-Ni, ai ma hamatean”.​—1 Korint 15:26.

3 Tontu malas do uhur ni nasiam halani lang be mabiar bani hamatean! Tapi, lang pitah hamatean na iparonti Jahowa. Ia pe laho papuhohon na dob matei. Pingkirhon ma artini ai. Marjanji do Ia laho pagoluhkon “na matei”. (Jesaya 26:19) Bani Bibel, on ihatahon parpuhoon.

SANGGAH NA HINAHOLONGANTA MATEI

4. (a) Aha do na mangapoh hita sanggah na hinaholonganta matei? (b) Ise do hasoman ni Jesus?

4 Sanggah dong kaluarga atap hasomanta matei, pusok tumang do uhurta. Lang dong na boi ibahen hita laho pagoluhkon sidea. Tapi Bibel  mambere apoh-apoh hubanta. (Basa 2 Korint 1:3, 4.) Pardiateihon ma sada contoh na patuduhkon anggo Jahowa pakon Jesus sihol pagoluhkon na matei. Sanggah i tanoh on, gati do Jesus manjumpahi si Lasarus pakon botouni si Marta ampa si Maria. Hatolusi sidea hasoman ni Jesus. Bibel mangkatahon, “Holong do uhurni Jesus bani si Marta, bani saninani ai ampa bani si Lasarus.” Tapi bani sada ari, matei ma si Lasarus.​—Johannes 11:3-5.

5, 6. (a) Aha na ibahen Jesus sanggah kaluarga pakon hasoman ni si Lasarus marpusok ni uhur? (b) Mase tarapoh hita mambotoh pangahap ni Jesus bani hamatean?

5 Jadi, roh ma Jesus mangapoh si Marta pakon si Maria. Sanggah ibogei si Marta domma das Jesus, kaluar ma ia manjumpahkonsi. Malas do namin uhurni mangidah Jesus, tapi ia mangkatahon, “Ambit ijon Ham Tuhan, seng matei botouhin!” Pangahap si Marta madokahtu do Jesus roh. Dob ai ididah Jesus ma tangis si Maria. Ia pe pusok uhurni janah dihut tangis. (Johannes 11:21, 33, 35) Jadi, doskon pusok ni uhur ni Jesus ma pusok ni uhurta, sanggah na hinaholonganta matei.

6 Tarapoh do hita mambotoh dos do hape pangahapta pakon Jesus pasal hamatean. Jesus usih songon Bapani. (Johannes 14:9) Tapi, Jahowa markuasa laho manasap hamatean. Ai do na sihol bahenon-Ni.

“LASARUS, KALUAR MA HO!”

7, 8. Mase ilanglangi si Marta tutup tanoman ni si Lasarus iangkat, tapi aha na ibahen Jesus?

7 Das ma Jesus i tanoman ni si Lasarus, ai ma batu na niliang na itutup batu na banggal. Nini Jesus ma,  “Angkat nasiam ma batu in.” Tapi ilanglangi si Marta, halani domma ompat ari si Lasarus itanom. (Johannes 11:39) Lang ibotoh si Marta na laho ipapuho Jesus do botouni.

Bayangkon ma malas ni uhur ni kaluarga pakon hasoman ni si Lasarus sanggah ipapuho ia! —Johannes 11:38-44

8 Nini Jesus ma bani si Lasarus, “Kaluar ma ho!” Longang ma si Marta pakon si Maria mangidah aha na masa. “Luar ma tongon na matei ai; lilit ope hiou bani naheini ampa tanganni.” (John 11:43, 44) Domma manggoluh si Lasarus! Tumpu ma use ia bani kaluarga pakon hasomanni. Boi irohop sidea si Lasarus janah marsahap pakonsi. Sada halongangan do sanggah Jesus papuhohon si Lasarus!

“ALE BORU, AHU MANGKATAHON BAM, PUHO MA!”

9, 10. (a) Ise do na mambere kuasa bani Jesus laho papuhohon na matei? (b) Aha do gunani hubanta mambotoh pasal halak na ipapuho?

9 Ai marhitei kuasani do Jesus papuhohon na matei? Lang. Paima ipapuho si Lasarus, martonggo do lobei ia bani Jahowa, janah ibere Jahowa ma kuasa bani, laho papuhohon si Lasarus. (Basa Johannes 11:41, 42.) Lang pitah si Lasarus na ongga ipapuho. Bibel patugahkon hubanta, dong sada naboru marumur hira-hira 12 tahun na boritan. Pusok tumang uhur ni si Jairus, bapani. Ia mangindo ase ipamalum Jesus boruni. Pitah ai do niombahni. Sanggah marsahap ope ia hubani Jesus, adong ma na roh janah patugahkon, “Domma matei borumu! Mase sunsahanmu be Guru in?” Tapi nini Jesus hubani si Jairus, “Ulang ham mabiar, porsaya ma lah, sai manggoluh  do ia.” Jadi, rap ma sidea hu rumah ni si Jairus. Laho das ma hu rumahni, itangar janah ididah Jesus ma buei halak na tangis-tangis. Nini Jesus ma dompak sidea, “Ulang nasiam tangis! Ai seng matei ia, na modom do!” Sungkun-sungkun do ra ibagas uhur ni bapa pakon inangni aha do maksud ni Jesus. Isuruh Jesus ma halak na mabuei ai hudarat, janah iarahkon ma bapa ampa inang ni dakdanak ai masuk hu kamar hatibalan ni dakdanak ai. Ijolom Jesus ma tangan ni dakdanak ai, anjaha nini ma hubani, “Ale Boru, Ahu mangkatahon bam, puho ma!” Malas tumang uhur ni namatorasni mangidah mintor puho do boruni lanjar mardalan! (Markus 5:22-24, 35-42; Lukas 8:49-56) Humbani ari ai, sanggah ididah sidea boruni, mintor idingat sidea ma aha na dob ibahen Jahowa marhitei Jesus. *

10 Ujungni, matei do use sidea na ipapuho Jesus. Tapi, aha na dob isuratkon pasal sidea marguna do hubanta, halani boi patoguhkon pangarapanta. Jahowa sihol papuhohon halak na dob matei.

PARLAJARAN HUMBANI PARPUHOON

Apostel Petrus papuhohon si Tabita.​—Lahoan ni Apostel 9:36-42

Ipapuho si Elias do anak ni na mabalu.​—1 Raja 17:17-24

11. Aha na iajarhon Parambilan 9:5 hubanta pasal si Lasarus?

11 Torang do ihatahon Bibel anggo “halak na dob matei, aha pe lang be ibotoh”. Ai do na masa bani si Lasarus. (Parambilan 9:5) Songon na ihatahon Jesus,  doskon na modom do ia ai. (Johannes 11:11) Sanggah i tanoman si Lasarus, “aha pe lang be ibotoh”.

12. Hunja ibotoh hita puho do use si Lasarus?

12 Sanggah Jesus papuhohon si Lasarus, bahat do na mangidah halongangan ai, dihut do munsuh-munsuhni. Parpuhoon ni si Lasarus patuduhkon tongon do adong parpuhoon. (Johannes 11:47) Anjaha, bahat do halak na mangidah ai, gabe porsaya sinuruh ni Naibata do Jesus ai. Halani ai, sogam ma munsuh-munsuh ni Jesus. Jadi manriah ma sidea laho mamunuh Jesus pakon si Lasarus.​—Johannes 11:53; 12:9-11.

13. Mase hita porsaya Jahowa boi papuhohon na matei?

13 Jesus mangkatahon papuhohonni do holi “haganup halak na i tanoman in”. (Johannes 5:28) Artini ai, manggoluh do use ganup halak na idingat Jahowa. Tapi ase boi ipapuho, maningon do idingat Naibata haganup pasal na matei ai. Boi do ai? Dong marmiliar bintang i langit. Tapi nini Bibel, ibotoh Jahowa do goran ni ganupan bintang ai. (Basa Jesaya 40:26.) Anggo goran ni ganup bintang boi idingat Jahowa, tontu urah do Ia mardingat ganup na matei na laho ipapuho. Halani Jahowa do sitompa haganup, tontu markuasa do Ia papuhohon na matei.

14, 15. Aha do na iparlajari hita humbani hata ni si Job pasal parpuhoon?

14 Si Job porsaya bani parpuhoon. Ia manungkun, ‘Anggo matei sada jolma, boi do ia manggoluh use?’ Dob ai nini ma bani Jahowa, “Anggo mardilo Ham mintor balosanku do Ham, tontu siholan Ham bani jadi-jadian ni tangan-Mu.” Ibotoh si Job do anggo  Jahowa sihol papuhohon na matei bani ari magira.​—Job 14:13-15.

15 Sonaha pangahap nasiam mambotoh pangarapan parpuhoon? Sungkun-sungkun do ra nasiam, ‘Ai ipapuho do homa kaluarga pakon hasomanku na dob matei?’ Tarapoh do hita halani mambotoh Jahowa sihol papuhohon na matei. Pardiateihon ma aha na ihatahon Bibel pasal ise do na laho ipapuho janah ija do sidea ipapuho.

BOGEION NI NA I TANOMAN IN MA SORANI JANAH PUHO MA

16. Hagoluhan na sonaha do iahapkon sidea na ipapuho i tanoh on?

16 Bani na basaia, sidea na puho tumpu use bani kaluarga pakon hasomanni. Sonai do na masa bani ari magira. Tapi dearan do parpuhoon bani ari magira. Mase? Halani ganup na ipapuho holi, boi manggoluh sadokah ni dokahni i tanoh on, na lang adong be porang, hajahaton, ampa na boritan.

17. Ise do holi na laho ipapuho?

17 Ise do holi na laho ipapuho? Nini Jesus “bogeion ni haganup halak na i tanoman in ma sora-Ni, jadi mandarat ma”. (Johannes 5:28, 29) Anjaha Pangungkabon 20:13 mangkatahon, “Ibere laut ai ma sagala na matei ibagas ai, anjaha hamatean pakon nagori toruh ai pe ibere ma sagala na matei na ijai ai.” Dong marmiliar halak na laho ipapuho. Apostel Paulus pe mangkatahon, “parpintor ampa pargeduk” manggoluh do use. (Basa Lahoan ni Apostel 24:15.) Aha do artini ai?

I Paradeiso, na matei ipapuho janah pajumpah use pakon na hinaholonganni

18. Ise do ”parpintor” na laho ipapuho?

 18 “Parpintor” aima juakjuak ni Naibata na basaia na manggoluh sanggah Jesus lape roh hu tanoh on. Sontohni si Noak, si Abraham, si Sarah, si Musa, si Rut, pakon si Ester na laho ipapuho i tanoh on. Boi ibasa nasiam pasal sidea bani buku Heber bindu 11. Sonaha juakjuak ni Jahowa na matei bani panorang sonari on? Sidea pe, “parpintor” na laho ipapuho use.

19. Ise do “pargeduk”? Janah mase sidea ipapuho?

 19 “Pargeduk” aima marmiliar halak na dob matei na lape ongga mananda Jahowa. Hassi pe domma matei, lang ihalupahon Jahowa sidea. Tapi ipapuho do holi sidea, ase boi marlajar janah mangidangi Jahowa.

20. Mase lang ganupan na matei ipapuho?

20 Anggo sonai, ai ipapuho do ganup na matei? Lang. Jesus mangkatahon adong do na lang ipapuho. (Lukas 12:5) Ise do na manontuhon sasada halak ipapuho atap lang? Tongon, Jahowa do Panguhum na tang sitimbulan. Hassi pe sonai, ibere do bani Jesus kuasa “gabe panguhum bani na manggoluh ampa na matei”. (Lahoan ni Apostel 10:42) Ise pe parjahat na lang ra marubah humbani hajahatonni lang ipapuho.​—Idah Ambah ni Hatorangan 19.

IPAPUHO HU SURGA

21, 22. (a) Aha do artini ipapuho hu surga? (b) Ise do na parlobei ipapuho hu surga?

21 Bibel patugahkon hubanta adong do halak na laho hu surga. Sanggah sasada halak ipapuho hu surga, sidea ipapuho lang ibagas pardagingon tapi ibagas partonduyon.

22 Jesus do na parlobei ipapuho hu surga. (Johannes 3:13) Dobkonsi tolu ari Jesus ibunuh, ipapuho Jahowa ma ia, tapi lang ibagas pardagingon. (Psalmen 16:10; Lahoan ni Apostel 13:34, 35) Songon na ipatorang apostel Petrus, “tarbunuh do Ia ibagas pardagingon, tapi ipagoluh do ibagas partonduyon”. (1 Petrus 3:18) Jadi ibagas partonduyon do Jesus puho janah marhagogohon! (1 Korint 15:3-6)  Bibel pe mangkatahon lang pitah Jesus na ipapuho hu surga.

23, 24. Ise do “hulanan na etek” na ipatugah Jesus, janah dong piga halak sidea?

23 Paima matei Jesus, nini ma bani susianni, “Na laho do Ahu pasirsirhon ianan bannima.” (Johannes 14:2) Jadi piga-piga susianni laho ipapuho ase rap pakonsi i surga. Piga halak do sidea? Songon na ihatahon Jesus “hulanan na etek” do sidea. (Lukas 12:32) Anjaha apostel Johannes patugahkon bilanganni na laho hu surga sanggah ia mangidah Jesus “jongjong . . . i Dolog Sion [surga] anjaha rap pakonsi saratus ompat puluh ompat ribu halak.”​—Pangungkabon 14:1.

24 Attigan do na 144.000 halak Kristen ai ipapuho? Songon na ihatahon Bibel, ai tarjadi bani mulani pamarentahan ni Jesus i surga. (1 Korint 15:23) Sonari hita manggoluh bani panorang ai, anjaha buei humbani na 144.000 ai domma ipapuho hu surga. Bani sidea na manggoluh ope i tanoh on pakon sidea na matei bani panorang on, mintor ipapuho do hu surga. Tapi, bueinan do halak na ipapuho bani ari magira laho manggoluh i Paradeiso i tanoh on.

25. Aha do na laho iparlajari hita bani pasal na mangihut?

25 Lang dokah nari be, ipaluah Jahowa ma manisia humbani hamatean, janah lang dong be hamatean sadokah ni dokahni! (Basa Jesaya 25:8.) Tapi bani sidea na laho hu surga, maraha do sidea ijai? Bibel patugahkon sidea laho mamarentah rap pakon Jesus bani Harajaon ni Naibata. Bani pasal na mangihut iparlajari hita ma pasal harajaon ai.

^ par. 9 Bibel patugahkon pasal sidea na ipapuho, ai ma na maposo, na matua, dalahi pakon naboru, halak Israel pakon halak na legan. Boi ibasa nasiam bani 1 Raja 17:17-24; 2  Raja 4:32-37; 13:20, 21; Mateus 28:5-7; Lukas 7:11-17; 8:40-56; Lahoan ni Apostel 9:36-42; 20:7-12.