Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Aha do na Iajarhon Bibel Hubanta?

 PASAL SAPULUH UALUH

Maningon do Ahu Marjanji laho Manombah Naibata anjaha Ididi?

Maningon do Ahu Marjanji laho Manombah Naibata anjaha Ididi?

1. Dob iparlajari nasiam buku on, aha do na ra ipingkirhon nasiam?

DOMMA buei hasintongan ni Bibel na iparlajari nasiam humbani buku on. Sontohni, janji ni Naibata pasal ari simagira, sonaha do halak na matei, ampa pangarapan parpuhoon. (Parambilan 9:5; Lukas 23:43; Johannes 5:28, 29; Pangungkabon 21:3, 4) Ra do domma roh nasiam hu partumpuan, janah porsaya on ma panombahan na sintong. (Johannes 13:35) Ra do homa  parhasomanan nasiam lambin orot bani Jahowa, anjaha iputuskon nasiam ma laho manombah Naibata. Halani ai, ra do nasiam marpingkir, ‘Sonari, aha do maningon bahenonku?’

2. Mase sada dalahi hun Etiopia mangindo ase ididi?

2 Ai ma na ipingkiri sada dalahi hun Etiopia. Dobkonsi Jesus ipapuho, susianni na margoran si Pilippus marbarita bani dalahi ai. Ipatuduh si Pilippus do bani, Jesus do Mesias ai. Halani tarojur humbani na dob iulas sidea, lanjar ihatahon dalahi ai ma, “Andon ma bah! Adong ope na manlanglangi ase tardidi ahu?”​—Lahoan ni Apostel 8:26-36.

3. (a) Parentah aha do na binere ni Jesus bani susianni? (b) Sonaha do sasintongni sasada halak ididi?

3 Tangkas do iajarhon Bibel, anggo sihol nasiam manombah Jahowa maningon ididi do nasiam. Iparentahkon Jesus do bani susianni, “Podahi hanima ma sagala bangsa, ase gabe susian-Ku sidea, anjaha didi hanima ma sidea.” (Mateus 28:19) Jesus pe mambere siusihan marhitei pandidionni. Sanggah ididi, isornophon do Jesus hubagas bah, lang ipispishon. (Mateus 3:16) Sonari pe, sanggah ididi sahalak Kristen, maningon do isornophon hubagas bah.

4. Aha do na ipatuduh pandidionmu bani halak na legan?

4 Sanggah nasiam ididi, ai patuduhkon tongon do nasiam sihol gabe hasoman ni Naibata anjaha mangidangi-Si. (Psalmen 40:8, 9) Ra do sungkun-sungkun nasiam, ‘Aha do na porlu hubahen ase boi ahu ididi?’

HABOTOHON AMPA HAPORSAYAON

5. (a) Paima ididi, aha do na maningon bahenonmu? (b) Mase ponting partumpuan ai?

5 Paima ididi, maningon do nasiam mananda Jahowa  pakon Jesus. On ma na ibahen nasiam sanggah marlajar Bibel. (Basa Johannes 17:3.) Tapi lang sungkup ai. Bibel mangkatahon ase “igoki bani nasiam panandaion” pasal harosuh ni Jahowa. (Kolosse 1:9) I partumpuan Saksi-Saksi Jahowa, iurupi do nasiam ase lambin orot pakon Jahowa. Ai ma ase porlu nasiam tongtong martumpu.​—Heber 10:24, 25.

Paima ididi, maningon do nasiam marlajar Bibel

6. Ase boi ididi, sadiha bahat do porlu ibotoh nasiam isi ni Bibel?

6 Tontu, Jahowa lang mangindo ase nasiam mambotoh ganup isi ni Bibel paima ididi. Songon bani halak Etiopia ai, lang ipindo Naibata ase ia mambotoh haganup paima ididi. (Lahoan ni Apostel 8:30, 31) Anggo pasal Naibata, torus do hita marlajar. (Parambilan 3:11) Tapi ase boi ididi, maningon do iparlajari nasiam siotikanni ajaran dasar ni Bibel.​—Heber 5:12.

7. Sonaha parlajaran Bibel boi mangurupi nasiam?

7 Bibel mangkatahon, “Anggo seng porsaya halak, seng tarbahen harosuh ia bani Naibata.” (Heber 11:6) Jadi, porlu do adong haporsayaonmu paima ididi. Bibel patugahkon, piga-piga halak i huta Korint na hinan “gabe porsaya anjaha tardidi” dob manangar barita na ipadas susian ni Jesus. (Lahoan ni Apostel 18:8) Parlajaran Bibel pe boi mangurupi nasiam ase porsaya bani janji-janji ni Naibata ampa guna ni tobusan ni Jesus, na paluahkon hita humbani dousa ampa hamatean.​—Josua 23:14; Lahoan ni Apostel 4:12; 2 Timoteus 3:16, 17.

PATUGAH MA HASINTONGAN NI BIBEL NA DOB IPARLAJARI

8. Aha do na mangojur nasiam patugahkon na iparlajari ai bani na legan?

8 Lambin buei iparlajari nasiam Bibel janah iahapkon  nasiam gunani ibagas hagoluhanmu, lambin toguh ma haporsayaonmu. On mangojur nasiam patugahkon bani na legan na iparlajari ai. (Jeremia 20:9; 2 Korint 4:13) Tapi, bani ise do ai ipatugah?

Haporsayaon mangojur nasiam patugahkon na dob iparlajari bani na legan

9, 10. (a) Bani ise do ipatugah nasiam na dob iparlajari? (b) Aha do na maningon bahenonmu anggo sihol marambilan rapkon sanina i kuria?

9 Boi do ipatugah nasiam bani kaluarga, hasoman, simbalog rumah atap hasoman sahorja. Dear do ai! Tapi tongtong ma basar anjaha bujur sanggah patugahkon ai. Dob ai, anggo sihol do nasiam dihut marambilan rapkon sanina i kuria, patugah ma bani saksi na mangajari nasiam. Hatahon ma anggo nasiam sihol dihut marambilan rapkon sanina i kuria. Anggo domma sirsir ham ididahni, janah parlahoumu pe domu bani aturan ni Bibel, boi ma nasiam haduasi jumpah pakon dua sintua i kuria.

10 Mase pala jumpah pakon sintua? Sidea sihol mambotoh, atap iarusi janah ihaporsayai ham do ajaran dasar ni Bibel. Atap na domma idalankon nasiam do aturan ni Bibel bai ganup ari. Atap tongon do nasiam sihol gabe sahalak Saksi Jahowa. Dingat ma, iparmahani sintua do nasiam pakon ganup pagori ni kuria. Halani ai ulang gobir patugahkon ai bani sidea. (Lahoan ni Apostel 20:28; 1 Petrus 5:2, 3) Dob ai, ipatugah sintua ma atap domma boi nasiam dihut marambilan rapkon sanina i kuria.

11. Mase porlu tumang mambahen hamubahon paima dihut marambilan rapkon sanina i kuria?

11 Paima dihut marambilan rapkon sanina i kuria, ipatorang sintua ma bani nasiam hamubahon aha na  porlu ibahen. Mase porlu tumang mambahen hamubahon? Halani hita sinuruh ni Jahowa. Jadi sanggah marambilan, maningon do parlahounta pasangapkon Ia.​—1 Korint 6:9, 10; Galatia 5:19-21.

PAUBAH MA UHUR ANJAHA MULAK MA

12. Mase ganup halak porlu mambahen hamubahon ni uhur?

12 Dong ope na laho bahenonmu ase boi ididi. Apostel Petrus mangkatahon, “Paubah nasiam ma uhur nasiam, anjaha mulak ma nasiam, ase tarsasap dousa nasiam.” (Lahoan ni Apostel 3:19) Aha do arti ni paubah uhur? Artini, manolsoli tumang hasalahan na ongga ibahen. Sontohni, anggo hinan ihorjahon nasiam parriah-riahon, maningon paubah ma uhurmu. Tapi, hassi pe domma ihorjahon nasiam na sintong sadokah on, halani mardousa do ganup hita, tongtong do porlu mambahen hamubahon ni uhur janah mangindo hasasapan ni dousa humbani Naibata.​—Rom 3:23; 5:12.

13. Aha do arti ni “mulak”?

13 Ai sungkup do pitah manolsoli hasalahan na hinan? Lang. Si Petrus mangkatahon porlu do homa nasiam “mulak”. Artini, nasiam porlu manadingkon parlahou na sambor ai, anjaha horjahon ma na sintong. Bayangkon ma nasiam laho mardalani hu sada ianan na lape ongga irohi. Janah lang piga dokah, ibotoh ma anggo domma salah dalan nasiam. Aha do bahenonmu? Mintor soh do ham janah mamutar hu dalan na sintong. Sonai homa sanggah nasiam marlajar Bibel, ra do ididah nasiam adong hasomalan na porlu iubah. Sirsir ma “mulak”—mambahen hamubahon na iporluhon—anjaha mangkorjahon na sintong.

 MARJANJI LAHO MANOMBAH JAHOWA

Ai domma marjanji nasiam laho mangidangi Jahowa?

14. Aha do artini marjanji laho manombah Jahowa?

14 Na porlu homa bahenonmu paima ididi, ai ma marjanji laho manombah Jahowa. Artini, ibagas tonggo, nasiam mambahen janji pitah Jahowa na isombah anjaha mangkorjahon harosuh-Ni do na siporlunan bamu.​—5 Musa 6:15.

15, 16. Mase sasada halak ra marjanji manombah Jahowa?

15 Marjanji laho mangidangi Jahowa usih songon mambahen janji bani sasahalak na ihaholongi nasiam. Sontohni, sada garama na martunangan pakon sada anak boru. Lambin dear ia mananda naboru ai, lambin bagas ma holongni janah sihol marhajabuan pakonsi. Hassi pe dong tanggung jawab na banggal dobkonsi marhajabuan, tapi ra do ia mambuatsi gabe parinangonni halani mangkaholongi naboru ai.

16 Sonai homa, lambin itanda nasiam Jahowa, lambin bagas ma holongmu hu Bani janah sihol mambere na sidearan laho mangidangi-Si. On mangojur nasiam laho mambahen janji ibagas tonggo. Bibel mangkatahon, ise pe na sihol mangirikkon Jesus maningon “iparnalang ma dirini”. (Markus 8:34) Aha do artini ai? Artini, manangihon Jahowa, ai do na siporlunan ibagas goluhmu. Harosuh ni Jahowa do na siporlunan humbani sura-suramu sandiri.​—Basa 1 Petrus 4:2.

ULANG MABIAR MARJANJI LAHO MANOMBAH JAHOWA

17. Mase piga-piga halak lape mambahen janji laho manombah Jahowa?

17 Piga-piga halak lape mambahen janji laho manombah Jahowa, halani mabiar seng boi manggoki janji.  Mabiar do homa sidea pailahon Naibata. Atap adong do ra na marpingkir, anggo lape mambahen janji laho manombah Naibata, boi do ope uhur-uhur ni sidea marparlahou.

18. Aha do na mangurupi nasiam ase ulang mabiar mambahen janji laho manombah Jahowa?

18 Holong bani Jahowa boi mangurupi nasiam ase ulang mabiar mambahen janji laho manombah-Si. Holong ai ma na mangojur nasiam laho manggoki janji bani Naibata. (Parambilan 5:3; Kolosse 1:10) Anjaha gabe urah ma pangahapmu mangkorjahon harosuh ni Jahowa. Apostel Johannes manuratkon, “On do holong ni uhur bani Naibata, anggo idalankon hita titah-Ni, anjaha seng borat titah-Ni in.”​—1 Johannes 5:3.

19. Mase lang pala mabiar marjanji laho manombah Jahowa?

19 Marjanji laho manombah Jahowa, sedo maningon gabe gokan dear. Seng ipindo-Ni lobih humbani na tarbahenta. (Psalmen 103:14) Iurupi Jahowa do nasiam mangkorjahon na sintong. (Jesaya 41:10) Pos ma uhurmu bani Jahowa humbani gok ni uhurmu, janah “Ia ma papintor dalanmu”.​—Podah 3:5, 6.

PANDIDION DALAN ASE MALUAH

20. Dobkonsi marjanji laho manombah Jahowa, aha do langkah na mangihut?

20 Ai domma marjanji nasiam laho manombah Jahowa? Anggo domma, sirsir ma nasiam hu langkah na mangihut, ai ma pandidion.

21, 22. Sonaha nasiam “manaksihon” haporsayaonmu i lobei ni halak simbuei?

21 Patugah ma bani koordinator badan penatua i kuria, anggo nasiam domma marjanji laho manombah Jahowa janah sihol ididi. Iatur sintua ai ma holi ase  piga-piga sintua mangulas ajaran dasar ni Bibel pakon nasiam. Anggo ididah sidea sirsir do hape nasiam, ipatugah sidea ma anggo nasiam boi ididi bani partumpuan banggal na mangihut. Bani partumpuan banggal ai, holi dong ambilan pandidion na patorangkon arti pandidion. Dob ai, isungkun siparambilan ma dua sungkun-sungkun bani sidea na laho ididi. Balos  ni nasiam bani dua sungkun-sungkun ai patuduhkon anggo nasiam “manaksihon” haporsayaon i lobei ni halak simbuei.​—Rom 10:10.

22 Dob ai, ididi ma nasiam. Masuk ma nasiam hubagas bah, anjaha ididi. Pandidion ai patuduhkon bani  ganup halak anggo nasiam domma marjanji laho manombah Jahowa janah gabe sahalak Saksi Jahowa.

ARTI PANDIDION NI NASIAM

23. Aha do arti ni ididi “hubagas goran ni Bapa, Anak ampa Tonduy Na Pansing”?

23 Jesus mangkatahon, ganup susianni maningon ididi “hubagas goran ni Bapa, Anak ampa Tonduy Na Pansing”. (Basa Mateus 28:19.) Aha do artini ai? Artini, nasiam manjalo Jahowa gabe siparkuasa, manjalo pamarentahan ni Jesus na laho pasaudkon sura-sura ni Naibata, janah manjalo tonduy na pansing na ipakei Jahowa laho pasaudkon harosuh ni uhur-Ni.​—Psalmen 83:19; Mateus 28:18; Galatia 5:22, 23; 2 Petrus 1:21.

Sanggah ididi, ai patuduhkon nasiam sihol mangkorjahon harosuh-Ni

24, 25. (a) Aha ope arti ni pandidion ai? (b) Aha do na laho iulas hita bani pasal na parpudi i buku on?

24 Adong ope artini pandidion. Sanggah isornophon hubagas bah, artini domma itadingkon nasiam pargoluhonmu na hinan. Sanggah mandarat humbagas bah, ai patuduhkon sirsir ma nasiam laho mangidangi Jahowa janah mangkorjahon harosuh-Ni. Dingat ma, bani Jahowa do hita marjanji, lang bani jolma atap pe sada organisasi.

25 Pandidionmu mangurupi nasiam lambin dohor bani Jahowa. (Psalmen 25:14) Tapi on lang mararti pandidion boi paluahkon sasahalak. Bani surat ni si Paulus ihatahon do, “Marhasoman biar pakon gobir ma haporluhon nasiam haluahon nasiam.” (Pilippi 2:12) Parmulaan ope pandidion ai. Tapi sonaha ase nasiam boi totap dohor bani Jahowa? Balos ni sungkun-sungkun ai, dong bani pasal na parpudi bani buku on.