Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Aha do na Iajarhon Bibel Hubanta?

 PASAL DUA

Bibel—Buku humbani Naibata

Bibel—Buku humbani Naibata

1, 2. Mase ihatahon Bibel sibere-bere na istimewa humbani Naibata?

SONAHA pangahap nasiam sanggah manjalo kado humbani hasoman? Lang sabar be nasiam laho mambuha kado ai, janah malas uhur halani ia parduli bani nasiam. Martarima kasih do nasiam halani sibere-bere ai.

2 Bibel sibere-bere humbani Naibata. Bibel marisi hatorangan na lang boi dapot hita humbani buku na legan. Sontohni, Bibel patugahkon Jahowa do na manompa langit, tanoh on, ampa dalahi pakon naboru na parlobei. Bani Bibel dong onjolan na boi mangurupi hita sanggah dong parsoalan. Bani Bibel hita marlajar sonaha Naibata pasaudkon janji-Ni laho mambahen tanoh on gabe roh dearni. Jadi, Bibel aima sibere-bere na istimewa humbani Naibata!

3. Aha na boi iparlajari nasiam sanggah mambasa Bibel?

3 Sanggah nasiam marlajar Bibel, ibotoh nasiam do Naibata sihol ase nasiam gabe hasoman-Ni. Lambin bahat nasiam marlajar, lambin orot ma parhasomanan nasiam pakon Naibata.

4. Aha do na mambahen Bibel legan humbani buku na legan?

4 Marmiliar Bibel domma isetak, janah dong bani 2.800 bahasa. Lobih 90 porsen halak i sab tanoh on boi mambasa Bibel bani sahap ni sidea. Anjaha  siap minggu, lobih sajuta halak boi mandapot Bibel! Lang adong buku na legan songon Bibel.

5. Mase boi ihatahon Bibel “sinahapkon ni Naibata”?

5 “Sinahapkon ni Naibata do” Bibel in. (Basa 2 Timoteus 3:16.) Tapi ra do piga-piga halak marpingkir, ‘Manisia do na manuratkon Bibel, jadi mase boi ihatahon ai humbani Naibata?’ Balos ni Bibel, “Binobahon [atap, tinogu] ni Tonduy Napansing do, ase marsora jolma in, isuruh Naibata.” (2 Petrus 1:21) On usih songon sekretaris na isuruh pangulu mambahen surat. Hun ise do ihatahon surat ai? Kopala desa, sedo sekretaris. Sonai homa, Naibata do Pengarang  ni Bibel, tapi isuruh-Ni do manisia laho manuratkon. Itogu-togu Naibata do sidea laho manuratkon pingkiran-Ni. Sasintongni, “hata ni Naibata do” Bibel in.​—1 Tessalonika 2:13; idah Ambah ni Hatorangan 2.

Kitab Suci Terjemahan Dunia Baru na isetak bani bahat bahasa

GANUP ISI NI BIBEL SINTONG

6, 7. Mase boi ihatahon isi ni Bibel lang marlawanan?

6 Bibel isuratkon lobih humbani 1.600 tahun. Panuratni manggoluh bani masa na lang sarupa. Piga-piga dong na gijang sikkolahni, janah na legan lang. Sontohni, dong dokter tapi na legan parjuma-juma, panjala dekke, parmahan, nabi, panguhum, ampa raja. Age pe bahat na manuratkon, tapi sada do tujuanni. Anjaha isi buku na sada pakon na legan lang adong na marlawanan. *

7 Buku parlobei hun Bibel patugahkon sonaha mungkahni parsoalan i tanoh on, janah buku parpudi patugahkon sonaha Naibata mambahen tanoh on gabe paradeiso laho pasaloseihon parsoalan. Bibel patugahkon sejarah ni manisia sadokah maribu tahun, pakon pataridahkon harosuh ni Naibata tongtong do saud.

8. Bahen ma sontoh na pataridahkon isi ni Bibel sintong pakon ilmu pengetahuan.

8 Bibel isuratkon sedo laho mangajarhon ilmu pengetahuan atap pe gabe buku parlajaran i sikkolah. Tapi sanggah patugahkon ilmu pengetahuan,  tongtong do sintong isini. Sonai do buku humbani Naibata. Sontohni, buku 3 Musa marisi parentah ni Naibata sonaha halak Israel manjaga ase panahit ulang manrarat. Domma dokah isurat on sanggah lape ibotoh halak anggo bakteri pakon virus boi mambahen boritan. Bibel pe patugahkon, Naibata manggantung tanoh on i atas ni na lang. (Job 26:7) Anjaha domma dokah ipatugah bani Bibel pasal siklus air i tanoh on.​—Parambilan 1:7.

9. Aha do na boi iparlajari hita humbani hajujuron ni panurat ni Bibel?

9 Sejarah na dong bani Bibel, tongtong do isini sintong. Tapi, bahat do panurat ni buku-buku sejarah lang patugahkon ganup na masa. Sontohni, partaluni bangsa ni sidea sanggah marporang. Tapi jujur do panurat ni Bibel patugahkon sanggah bangsa Israel italuhon. Ipatugah sidea do homa hagalekon ni sidea. Sontohni, bani buku 4 Musa, ipatugah si Musa do hasalahanni na banggal. (4 Musa 20:2-12) Hajujuron ni panurat ni Bibel pataridahkon humbani Naibata do Bibel ai. Jadi, hita boi porsaya bani Bibel.

BIBEL MARISI PODAH NA DEAR

10. Mase podah ni Bibel marguna hubanta sonari on?

10 Bibel in “sinahapkon ni Naibata do, anjaha marguna mamodahi, maminsang, pauli-ulihon”. (2 Timoteus 3:16) Marguna do podah ni Bibel hubanta sonari on. Ibotoh Jahowa do sonaha hita itompa, jadi dearan do Ia mangarusi, mananda pingkiran, pakon paruhuranta marimbangkon dirinta sandiri. Ia sihol ase hita marmalas ni uhur.

11, 12. (a) Podah na dear aha do na ibere Jesus bani buku Mateus bindu 5 ronsi 7? (b) Aha deba nari na iparlajari hita hun Bibel?

 11 Bani Mateus bindu 5 ronsi 7, ibasa hita podah na dear na ibere Jesus sonaha ase marmalas ni uhur, sonaha marsaor pakon na legan, sonaha martonggo, pakon pangahapta pasal duit. Age pe podah on domma isuratkon 2.000 tahun na salpu, tapi marguna do banta ronsi sonari.

12 Bani Bibel, iajar Jahowa do hita onjolan ase kaluarga martuah, gabe siparhorja na dear, janah mardamei pakon na legan. Tongtong do onjolan ni Bibel boi mangurupi hita lang soal ise do hita, ija tading, atap aha pe parsoalanta.​—Basa Jesaya 48:17; idah Ambah ni Hatorangan 3.

NASIAM BOI PORSAYA BANI PANJAHAION NI BIBEL

Panjahaion ni si Jesaya pasal partaluni huta Babel

13. Aha na isuratkon si Jesaya pasal huta Babel?

13 Bahat panjahaion ni Bibel na dob saud. Sontohni, panjahaion ni si Jesaya pasal partalu ni Babel. (Jesaya 13:19) Torang do ipatugah sonaha pardabuhni. Dong horbangan na banggal ampa binanga na mangondingi huta ai. Tapi panjahaion ni si Jesaya, ipakorah do binanga ai janah horbanganni lang itutup. Seng dong parlawanan sanggah sidea masuk hu huta ai. Isuratkon do homa goran ni na laho manaluhon Babel, ai ma si Kores.​—Basa Jesaya 44:27–45:2; idah Ambah ni Hatorangan 4.

14, 15. Sonaha do panjahaion ni si Jesaya saud?

14 Dobkonsi dua ratus tahun panjahaion ai isuratkon, roh ma tentara mamorangi Babel. Ise do kopalani? Si Kores raja ni Persia, domu bai panjahaion. Ganup panjahaion ai saud.

 15 Marpesta do halak Babel bani borngin sanggah sidea iporangi. Pos do uhur ni sidea halani dong tembok na gijang ampa binanga na mangondingi sidea. I luar huta ai, ipakorah si Kores pakon tentarani do binanga ai. Jadi, tentara Persia boi mardalan masuk hu bagas huta ai. Halani martembok do huta ai, sonaha  sidea boi masuk? Songon panjahaion ai, horbangan huta ai lang itutup jadi seng dong parlawanan sanggah sidea masuk hu huta ai.

16. (a) Panjahaion ni si Jesaya, sonaha do ujungni huta Babel? (b) Hunja do ibotoh hita saud do panjahaion ni si Jesaya?

16 Panjahaion ni si Jesaya patugahkon lang dong be na mangiankon huta Babel. Isuratkon, “Seng be iankonon ai lalab atap hundulan ai marsundut-sundut.” (Jesaya 13:20) Saud do ai? Sonari, huta Babel hira-hira 80 kilometer hun selatan ni Baghdad, Irak, tading timbunan batu. Ronsi sonari lang dong be na tading ijai. Sapuon ni Jahowa do Babel “marhitei sapu-sapu hasedaon”.​—Jesaya 14:22, 23. *

Timbunan batu huta Babel

17. Mase hita porsaya bani janji ni Naibata?

17 Panjahaion Bibel na dob saud mambahen hita porsaya bani panjahaion Bibel pasal ari simagira. Hita porsaya bani janji ni Naibata laho mambahen tanoh on gabe paradeiso. (Basa 4 Musa 23:19.) Dong pangarapan “hagoluhan na so ra bois, na dob  humbani mulani iparbagah Naibata, na so siparladung in”.​—Titus 1:2. *

BIBEL BOI MAMBAHEN HAGOLUHAN NASIAM LAMBIN DEAR

18. Sonaha si Paulus manggambarhon “hata ni Naibata”?

18 Domma iparlajari hita lang dong buku songon Bibel. Isini topat, janah sintong bani ilmu pengetahuan pakon sejarah. Bibel pe marisi podah na madear ampa bahat panjahaion na dob saud. Tapi lang pitah ai. Apostel Paulus manuratkon, “Manggoluh do hata ni Naibata anjaha marhagogohon.” Aha do artini ai?​—Basa Heber 4:12.

19, 20. (a) Sonaha Bibel mangurupi nasiam mamareksa diri? (b) Sonaha nasiam patuduhkon tarima kasih halani sibere-bere ni Naibata ai ma Bibel?

19 Bibel boi mambahen hagoluhan nasiam lambin dear. Bibel mangurupi nasiam mamareksa janah mangarusi sonaha sasintongni pingkiran pakon paruhuran nasiam. Sontohni, ra do hita mangahap mangkaholongi Naibata. Tapi, laho pataridahkon holong ai, maningon do ihorjahon hita aha na ihatahon ni Bibel.

20 Bibel tongon do humbani Naibata. Ia marosuh ase nasiam mambasa, mamparlajari, janah mangkarosuhkon ai. Martarima kasih ma janah totap ma marlajar Bibel. Dob ai ibotoh nasiam ma aha do harosuh ni Naibata bani manisia. Bani pasal na mangihut, holi iparlajari hita aha do harosuh-Ni.

^ par. 6 Dong na mangkatahon Bibel ai lang topat isini. Tapi, lang tongon ai. Idah ma pasal 7 hun buku Alkitab—Firman dari Allah atau dari Manusia? hinaluarhon ni Saksi-Saksi Jahowa.

^ par. 16 Anggo marosuh nasiam mambotoh roh bahatni panjahaion ni Bibel, basa ma bani Buku bagi Semua Orang alaman 27-29, hinaluarhon ni Saksi-Saksi Jahowa.

^ par. 17 Pardabuh ni huta Babel, on ma sada panjahaion Bibel na dob saud. Idah nasiam panjahaion pasal Jesus Kristus bani Ambah ni Hatorangan 5.