Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Aha do na Iajarhon Bibel Hubanta?

 PASAL UALUH

Aha do Harajaon ni Naibata?

Aha do Harajaon ni Naibata?

1. Tonggo na tarsar aha na laho iulas hita?

MARJUTA halak domma mambotoh tonggo na tarsar na igoran Tonggo Bapanami. Tonggo on iajarhon Jesus bani susianni. Aha do na itonggohon? Janah mase tonggo ai porlu hubanta?

2. Aha ma tolu pangindoan na iajarhon Jesus porlu itonggohon?

2 Nini Jesus, “Ase sonon ma tonggonima, ‘Ham Bapanami na i nagori atas. Sai napapansing ma goran-Mu. Sai roh ma Harajaon-Mu. Sai saud ma harosuh ni uhur-Mu i nagori tongah on songon na i nagori atas.’” (Basa Mateus 6:9-13.) Mase iajarhon Jesus hita manonggohon tolu pangindoan na porlu ai?​—Idah Ambah ni Hatorangan 20.

3. Aha do na porlu ibotoh hita pasal Harajaon ni Naibata?

3 Domma iparlajari hita goran ni Naibata aima Jahowa, anjaha aha do harosuh-Ni bani manisia pakon tanoh on. Tapi, aha do artini “Sai roh ma Harajaon-Mu”? On ma na laho iparlajari hita: Aha do Harajaon ni Naibata, aha do na laho sibahenonni, janah sonaha ai boi papansingkon goran ni Naibata.

AHA DO HARAJAON NI NAIBATA?

4. Aha do Harajaon ni Naibata, janah ise do Rajani?

4 Jahowa pajongjongkon sada pamarentahan na i surga janah Jesus do na ipilih gabe Raja. Bani Bibel, on ihatahon Harajaon ni Naibata. Jesus do “Raja ni sagala raja anjaha Tuhan ni sagala tuan”.  (1 Timoteus 6:15) Jesus boi mambahen na sidearan humbani ganup pamarentahan ni manisia, janah gogohan do ia humbani sidea.

5. Hunja do harajaon ni Naibata mamarentah? Ronsi huja do pamarentahanni?

5 Ompat puluh ari dobkonsi ipapuho Jesus, naik ma ia hu surga. Ujungni, iminaki Jahowa ma ia gabe Raja bani Harajaon-Ni. (Lahoan ni Apostel 2:33) Harajaon ni Naibata do holi mamarentah hun surga hu sab tanoh on. (Pangungkabon 11:15) Ai ma ase Bibel mangkatahon Harajaon ai “harajaon-Ni na i nagori atas”.​—2 Timoteus 4:18.

6, 7. Aha na mambahen dearan do Jesus humbani raja ni manisia?

6 Nini Bibel, banggalan do Jesus humbani raja ni manisia halani pitah ia do “na so ra matei”. (1 Timoteus 6:16) Ganup manisia na mamarentah ujungni matei do, tapi anggo Jesus lang. Ganup na madear na sihol bahenonni totap do martahan.

7 Panjahaion ni Bibel patugahkon Jesus Raja na pintor janah paridop ni uhur. Bibel mangkatahon, “Sogop ma hubani Tonduy ni Jahowa, tonduy hauhuron ampa pangarusion, tonduy panuturion ampa hagogohon, tonduy habotohon ampa biar bani Jahowa. Harosuh ni uhurni ai ma marhabiaran bani Jahowa. Seng mangihutkon pangidah ni matani ia manguhumi, anjaha seng mangihutkon pambogei ni pinggolni ia mamutuskon. Tapi marhitei hapintoron do uhumanni halak na masombuh.” (Jesaya 11:2-4) Marosuh do nasiam bani raja sisonai?

8. Hunja do ibotoh hita lang pitah Jesus na mamarentah?

8 Domma ipilih Naibata ise na mamarentah i surga  rap pakon Jesus. Sontohni, ihatahon apostel Paulus bani si Timoteus, “Anggo sabar hita manaron, rap manrajai ma hita pakon-Si.” (2 Timoteus 2:12) Piga halak ma sidea na mamarentah rap pakon Jesus?

9. Piga halak do sidea na laho mamarentah rap pakon Jesus? Nantigan do mungkahni Jahowa mamilih sidea?

9 Songon na dob iparlajari hita bani Pasal 7, apostel Johannes mandapot panonggoran. Ia mangidah dong 144.000 na mamarentah rap pakon Jesus i surga. Ise ma sidea? Ipatorang si Johannes “tarsurat do goran-Ni [Jesus] pakon goran ni Bapa-Ni bani pardompakan ni sidea”. Anjaha ihatahon homa, ‘sidea mangirikkon anak ni biribiri in, atap huja pe Ia laho. Sidea do na dob tinobus humbani hajolmaon.’ (Basa Pangungkabon 14:1, 4.) Na 144.000 ai ma na ipilih Naibata na laho mamarentah tanoh on rap pakon Jesus. Humbani abad na parlobei, ipilih Jahowa ma halak Kristen na pintor laho dihut ibagas 144.000 ai. Dobkonsi sidea matei, ipapuho ma sidea hu surga.​—Pangungkabon 20:4, 6.

10. Mase ihatahon Jahowa mangkaholongi hita halani mamilih Jesus pakon na 144.000 laho mamarentah?

10 Halani isarihon Jahowa do hita, ipilih ma ase manisia na mamarentah rap pakon Jesus. Ibotoh Jesus do sonaha pangahapta pakon sitarononta. Halani ai ma Jesus do raja na sidearan hubanta. Si Paulus mangkatahon Jesus boi “mangahap bani hagalekonta”, janah “na tarlajou do ia bani haganup songon hita”. (Heber 4:15; 5:8) Na 144.000 ai pe mambotoh sonaha sitaronon ni manisia. Ongga do sidea galek janah boritan. Jadi porsaya ma hita anggo Jesus  pakon na 144.000 ai mangarusi pangahapta pakon parsoalan na masa hubanta.

AHA DO NA LAHO BAHENON NI HARAJAON NI NAIBATA?

11. Mase iajarhon Jesus susianni manonggohon ase saud harosuh ni Naibata i surga?

11 Iajarhon Jesus do susianni manonggohon ase saud harosuh ni Naibata i surga. Mase? Domma iparlajari hita bani Pasal 3, Sibolis manlawan dompak Jahowa. Tapi, ipaturut Jahowa ope Sibolis pakon malekat na lang setia adong i surga. Jadi, lang ganupan ijia mangkorjahon harosuh ni Naibata i surga. Bani Pasal 10, holi iparlajari hita pasal Sibolis pakon pangihutni ai.

12. Aha do na masa na ipatugah bani Pangungkabon 12:10?

12 Bibel patugahkon dobkonsi Jesus mamarentah gabe Raja bani Harajaon ni Naibata, mintor iporangi ma Sibolis. (Basa Pangungkabon 12:7-10.) Dong dua na masa na ipatugah bani ayat 10. Parlobei, Jesus Kristus mulai mamarentah bani Harajaon ni Naibata. Na paduahon, idabuhkon ma Sibolis hun surga hu tanoh on. Songon na laho iparlajari hita, ai domma saud.

13. Aha do na masa i surga sanggah Sibolis idabuhkon?

13 Bibel patugahkon marmalas ni uhur ma ganup malekat i surga halani lang dong be Sibolis pakon pangihutni ijai. Hita mambasa, “Marmalas ni uhur ma ham nagori atas pakon sagala na marianan ibagas!” (Pangungkabon 12:12) Damei ma i surga halani ganupan domma mangkorjahon harosuh ni Naibata.

Lambin roh bahatni ma sitaronon i tanoh on dobkonsi Sibolis pakon begu-beguni idabuhkon. Marujung mando sitaronon

14. Aha na masa i tanoh on dobkonsi Sibolis idabuhkon hun surga?

 14 Tapi legan do na masa i tanoh on. Buei hasunsahan na masa halani “domma susur sibolis” janah “marah tumang, ai ibotoh pondok mando panorangni”. (Pangungkabon 12:12) Halani domma idabuhkon janah ibotoh na laho iripaskon mando ia, marah tumang ma ia. Ihorjahon Sibolis ma ganup na boi mambahen hasunsahan ampa sitaronon i sab tanoh on.

15. Aha do harosuh ni Naibata bani tanoh on?

15 Tapi, totap do harosuh ni Naibata bani tanoh on. Sihol do Ia ase manisia na sempurna manggoluh sadokah ni dokahni i paradeiso i tanoh on. (Psalmen 37:29) Jadi, sonaha Harajaon ni Naibata boi pasaudkon ai?

16, 17. Aha do na ipatugah Daniel 2:44 hubanta pasal Harajaon ni Naibata?

16 Bani buku Daniel 2:44 isuratkon, “Tapi bani panorang ni raja-raja ai, pajongjongon ni Naibata na i surga ai ma sada harajaon, na so tarpatunduk ronsi sadokah ni dokahni, anjaha kuasa-Ni ai pe seng padason ai bani bangsa na legan; ropukan-Ni do sagala harajaon ai anjaha boiskonon-Ni do ai, tapi totap do anggo ai ronsi sadokah ni dokahni.” Aha na iajarhon ayat on pasal Harajaon ni Naibata?

17 Parlobei, Harajaon ni Naibata mamarentah “bani panorang ni raja-raja ai”. Artini sanggah Harajaon ai mulai mamarentah, dong ope pamarentahan ni manisia i tanoh on. Na paduahon, totap do ronsi sadokah ni dokahni Harajaon ai, janah lang  adong na boi manggantihon. Anjaha na patoluhon, iporangi Harajaon ai do holi ganup pamarentahan na i dunia on. Harajaon ni Naibata do holi na monang. Jadi, pitah Harajaon ai do pamarentahan na sidearan laho mamarentah manisia i sab tanoh on.

18. Porang aha do na masa sanggah pamarentahan ni dunia on manlawan Harajaon ni Naibata?

18 Sonaha do Harajaon ni Naibata manggantihon pamarentahan ni dunia on? Paima porang na parpudi, aima Harmagedon, pakahouhon ni begu-begu ma “raja-raja ni sab dunia on, laho patumpuhon sidea hu parporangan bani ari na banggal ai, ari ni Naibata, Sigomgom haganupan”. Marporang do holi pamarentahan i sab tanoh on dompak Harajaon ni Naibata.​—Pangungkabon 16:14, 16; idah Ambah ni Hatorangan 10.

19, 20. Mase hita mamorluhon Harajaon ni Naibata?

19 Mase hita mamorluhon Harajaon ni Naibata? Dong tolu alasan. Parlobei, mardousa do hita, boritan, janah matei. Tapi Bibel patugahkon, bani Harajaon ni Naibata hita boi tongtong manggoluh. Bani Johannes 3:16 ihatahon, “Ai sonon do holong ni uhur ni Naibata bani dunia on, pala do Anak-Ni na sasada in iberehon, ase ulang magou ganup na porsaya Bani, tapi ase hagoluhan na sadokah ni dokahni bani.”

20 Alasan na paduahon, buei do parjahat i tanoh on na marladung janah marparlahou na masambor. Lang dong na boi ibahen hita laho manripaskon sidea. Pitah Naibata do na boi manripaskon sidea bani porang Harmagedon. (Basa Psalmen 37:10.)  Alasan na patoluhon, halani pamarentahan na i dunia on kejam janah korupsi. Sidea lang mangurupi halak ase manangihon Naibata. Songon na ihatahon Bibel “jolma manrajai hasomanni jolma gabe hasedaon bani sandiri”.​—Parambilan 8:9.

21. Sonaha do Harajaon ai pasaudkon harosuh ni Naibata i tanoh on?

21 Dobkonsi Harmagedon, Harajaon ni Naibata pasaudkon harosuh-Ni i tanoh on. Igari ma Sibolis ampa begu-beguni. (Pangungkabon 20:1-3) Ujungni, lang dong be na boritan atap pe na matei. Halani tobusan, ganup manisia boi tongtong manggoluh i Paradeiso. (Pangungkabon 22:1-3) Marhitei Harajaon ai ma goran ni Naibata ipapansing. Artini, sanggah Harajaon ni Naibata mamarentah, ganup manisia pasangapkon goran ni Jahowa.​—Idah Ambah ni Hatorangan 21.

NANTIGAN DO JESUS GABE RAJA?

22. Hunja do ibotoh hita lang mintor gabe Raja Jesus sanggah ia naik hu surga?

22 Iajarhon Jesus do susianni ase martonggo, “Sai roh ma Harajaon-Mu.” On patuduhkon pamarentahan ai roh bani ari simagira. Jahowa do na pajongjongkon  harajaon ai janah Jesus na ibahen gabe Raja. Dobkonsi Jesus naik hu surga, ai mintor gabe Raja do ia? Lang, paimahon ope ia. Songon na ipatugah si Paulus pakon si Petrus humbani panjahaion Psalmen 110:1, nini Jahowa ma, “Hundul ma ho hu siamunkon, paima Hubahen munsuhmu, gabe sidogei-dogeian bani naheimu.” (Lahoan ni Apostel 2:32-35; Heber 10:12, 13) Piga dokah do Jesus paimahon ase gabe Raja ia?

Harajaon ni Naibata laho pasaudkon harosuh ni Naibata i tanoh on

23. (a) Nantigan do Jesus mamarentah gabe Raja? (b) Aha do na laho iparlajari hita bani pasal na mangihut?

23 Dokah paima tahun 1914, dong tumpuan halak Kristen na mangarusi dong tahun na ponting bani panjahaion ni Bibel. Aha na masa bani tahun 1914 patuduhkon tongon do pangarusion ni sidea. Gabe Raja ma Jesus bani tahun ai. (Psalmen 110:2) Dob ai, idabuhkon ma Sibolis hu tanoh on, janah ibotohni do “pondok mando panorangni”. (Pangungkabon 12:12) Bani pasal na mangihut, iparlajari hita ma roh bahatni na patuduhkon hita manggoluh bani panorang ai, janah lang piga dokah nari Harajaon ai pasaudkon harosuh ni Naibata i tanoh on.​—Idah Ambah ni Hatorangan 22.