Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Kaluarga Nasiam Boi Martuah

 Bagian 7

Sonaha Mangajari Dakdanaknima

Sonaha Mangajari Dakdanaknima

”Maningon parimbagaskonon nasiam do ganup hata on, sagala na hutonahkon bamu sadarion, anjaha maningon gogohanmu do mangajarhon in hubani anakmu.”5 Musa 6:6, 7

Jahowa mambere tugas bani namatoras ase pagodangkon niombahni. (Kolosse 3:20) Tanggung jawab namatoras do mangajari ase niombahni mangkaholongi Jahowa, janah gabe halak na martanggungjawab. (2 Timoteus 1:5; 3:15) Janah maningon do iarusi nasiam sonaha paruhuran ni niombah. Nasiam pe porlu mambere siusihan. Nasiam boi dear mangajari sidea pasal Hata ni Jahowa, anggo nasiam parlobei marimbagaskon hataNi.Psalmen 40:9.

 1 BAHEN MA NIOMBAHNIMA RA MARBUALI PAKON HANIMA

AHA NA IHATAHON BIBEL: ”Ringgas ma ia manangi-nangi, asok marsahap.” (Jakobus 1:19) Tontu harosuhnima ase niombah ra patugahkon na ibagas uhurni bani nasiam. Halani ai, sidea maningon mambotoh anggo nasiam ra manangar sanggah sidea sihol marsahap. Bahen ma dong hadameion i rumah ase lambin urah sidea patugahkon aha na ibagas uhurni. (Jakobus 3:18) Anggo nasiam kasar janah podas manguhumi, lang ra sidea patugahkon aha na ibagas uhurni. Jadi, sabar ma nasiam bani niombah, anjaha pagatih ma patuduhkon holong ni uhurnima bani sidea.Mateus 3:17; 1 Korint 8:1.

NA BOI IBAHEN NASIAM:

  • Tongtong ma tangar niombahnima

  • Pagatih nasiam ma marbuali pakon niombah, sedo pitah sanggah dong parsualan

2 PARIMBAGASKON MA AHA NA IHATAHON SIDEA

AHA NA IHATAHON BIBEL: ”Halak na marimbagaskon hata, dapotan na madear.” (Podah 16:20) Sipata, porlu do nasiam marimbagaskon aha na isahapkon, ase boi nasiam mangarusi sonaha do paruhuran niombah. Somal do na maposo lepak manghatahon aha na sasintongni ibagas uhurni. ”Halak na mintor marsampang, hape lape torang ibogei, haotoon do ai bani.” (Podah 18:13) Jadi, ulang ma podastu nasiam maringis.Podah 19:11.

NA BOI IBAHEN NASIAM:

  • Ulang mintor isappangi sanggah niombah marsahap

  • Dingat ma sonaha pangahapmu sanggah poso ope nasiam. Aha do siporlunan bamu ijia

 3 PATIDAK MA SAUHUR DO NASIAM

AHA NA IHATAHON BIBEL: ”Tangihon ma, ale anakku, pangajarion ni bapamu, ulang ma buangkon podah ni inangmu.” (Podah 1:8) Jahowa mambere kuasa bani namatoras ase mangajari niombah. Ajar nasiam ma niombah ase hormat bani nasiam. (Epesus 6:1-3) Ibotoh niombah do anggo nasiam lang ’sauhur’. (1 Korint 1:10) Ulang ma pataridah bani niombah anggo nasiam lang sapandapot, halani ai boi mambahen sidea lang sai hormat be bani nasiam.

NA BOI IBAHEN NASIAM:

  • Riahkon janah tontuhon sonaha do mangajari niombanima

  • Anggo ham lang sapandapot pasal mangajari niombah, marusaha ma mangarusi pandapot ni pasangan hidupmu

 4 BAHEN MA RENCANA

AHA NA IHATAHON BIBEL: ”Pagodang-godang nasiam ma sidea ibagas ajar ampa podah ni Tuhan.” (Epesus 6:4) Lang boi mintor marhasil mangajari niombah anggo lang adong na ibahen. Porlu do nasiam mambahen rencana laho mangajari pakon maminsang niombanima. (Psalmen 127:4; Podah 29:17) Maminsang sedo pitah mambere uhuman, tapi mangurupi niombah mangarusi mase ibahen uhuman ai. (Podah 28:7) Ajari homa sidea ase marosuh bai Hata ni Jahowa, janah mangarusi podahNi. On boi mangurupi sidea manjaga panggora ni uhur totap dear.Heber 5:14.

NA BOI IBAHEN NASIAM:

  • Pastihon ma anggo niombahnima porsaya talar do Naibata ai, janah boi ihaporsayai sidea

  • Urupi ma sidea mananda aha na masambor i Internet ampa jejaring sosial ase boi padaohkon diri. Ajari sidea sonaha manjaga diri humbani halak na rosuh mambahen pelecehan seksual bani dakdanak

”Pagodang-godang nasiam ma sidea ibagas ajar ampa podah ni Tuhan”