Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Kaluarga Nasiam Boi Martuah

 Bagian 8

Sanggah Adong Pusok ni Uhur

Sanggah Adong Pusok ni Uhur

”Ihamalaskon nasiam, age pe marhoru nasiam tongkin sonari, anggo porlu ibagas bagei ni parlajouan.”1 Petrus 1:6

Age pe nasiam domma marusaha mambahen na dear ase rumah tangga martuah, tapi situasi na so panagaman boi do mambahen nasiam lang be totap marmalas ni uhur. (Parambilan 9:11) Naibata na parholong boi do mangurupi nasiam sanggah marpusok ni uhur. Anggo idalankon nasiam podah ni Bibel, ham pakon rumah tanggamu boi iurupi ibagas hasunsahan.

 1 MARPANGUNSANDEIAN BANI JAHOWA

AHA NA IHATAHON BIBEL: ”Ompaskon nasiam ma haganup na hinolsohkon nasiam hu Bani, ai isarihon do nasiam.” (1 Petrus 5:7) Tongtong ma dingat anggo parlajouan in sedo humbani Naibata. (Jakobus 1:13) Tongtong ma dohor Bani, ase iurupi Jahowa nasiam ibagas hasunsahan. (Jesaya 41:10) Pabotohkon ma uhur nasiam i lobei-Ni.Psalmen 62:9.

Tarapoh do nasiam anggo mambasa ampa mamparlajari Bibel bai ganup ari. Ujungni, nasiam mangahapkon sonaha Jahowa ”mangapoh nasiam ibagas sagala sitaronon”. (2 Korint 1:3, 4; Rom 15:4) Ijanjihon Naibata do ’damei na mangatasi haganup paruhuron’ hubani nasiam.Pilippi 4:6, 7, 13.

NA BOI IBAHEN NASIAM:

  • Martonggo ma mangindo pangurupion bani Jahowa ase ulang mandolei

  • Pingkirhon ma ganup pangurupion anjaha pilih ma ija do sidearan bannima

2 SARIHON MA DIRIMU SANDIRI AMPA RUMAH TANGGAMU

AHA NA IHATAHON BIBEL: ”Uhur ni halak na pantas jumpahan habotohon, anjaha pinggol ni halak na maruhur pindah-pindah bani hapentaran.” (Podah 18:15) Pindahi ma ganup hatorangan pasal aha na ihaporluhon rumah tanggamu. Marsahap ma pakon sidea, janah tangihon aha na ihatahon sidea.Podah 20:5.

Sonaha anggo adong na hinaholonganmu matei? Ulang malang pataridahkon pusok ni uhur. Dingat ma, Jesus pe ”tangis” do. (Johannes 11:35; Parambilan 3:4) Porlu do marsaran janah ulang hurang modom. (Markus 6:31) On boi mangurupi nasiam ibagas pusok ni uhur.

NA BOI IBAHEN NASIAM:

  • Pasomal ma marbuali ibagas rumah tanggamu. Sanggah dong pusok ni uhur, sidea pe seng marayoh marbuali pakon nasiam

  • Marsahap-sahap ma pakon sidea na ongga marpusok ni uhur

 3 PINDO MA PANGURUPION

AHA NA IHATAHON BIBEL: ”Bani sagala panorang do marholong atei huan-kuan, gabe sanina ibagas hasosakan do ia, ase tubuh.” (Podah 17:17) Sihol do hasomanmu mangurupi. Tapi sipata, seng ibotoh sidea aha na laho ibahen. Halani ai, ulang maila patugahkon aha na ihaporluhon nasiam. (Podah 12:25) Dob ai, pindo ma pangurupion bani sidea na mangarusi Bibel, ase iurupi nasiam mandalankon podah ni Bibel.Jakobus 5:14.

Nasiam boi tarojur anggo marsaor pakon sidea na porsaya hubani Naibata ampa janji-janjiNi. Mangurupi sidea na ibagas hasunsahan, boi do use mangapoh nasiam. Patugah ma haporsayaonmu ampa janji-janji ni Naibata Jahowa bani sidea. Ringgas ma mangurupi na mamorluhon, anjaha ulang padaohkon diri humbani sidea na parduli janah na manghaholongi nasiam.Podah 18:1; 1 Korint 15:58.

NA BOI IBAHEN NASIAM:

  • Marsahap ma pakon hasomanmu, janah jalo ma pangurupionni

  • Torang ma patugah aha na ihaporluhon nasiam