Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Kaluarga Nasiam Boi Martuah

 Bagian 5

Sonaha Boi Totap Mardamei Pakon Simatua

Sonaha Boi Totap Mardamei Pakon Simatua

”Pakei nasiam ma . . . habasaron, toruh ni uhur, halamlamon, ampa lumbang ni uhur [atap sabar].”Kolosse 3:12

Marhajabuan artini mamungkah partongah jabuan na baru. Tongtong do nasiam holong pakon hormat bani namatorasnima. Tapi sonari, pasangan hidupmu do siporlunan. Ra do lang sosok pangahap namatoras pasal ai. Tapi, podah hun Bibel boi mangurupi nasiam ase mardamei bani simatua pakon sindohor, anjaha patoguhkon partongah jabuannima na baru.

 1 PINGKIRHON MA NA DEAR PASAL SIMATUAMU

AHA NA IHATAHON BIBEL: ”Pasangap bapamu pakon inangmu!” (Epesus 6:2) Lang sual sadia umurmu, tongtong ma hormati namotarasmu. Sonai homa pasangan hidupmu pe porlu do ipardiateihonni namatorasni. ”Seng subil haholongon in”, halani ai ulang ma nasiam simburu mangidah parhasomanan pasangan hidupmu pakon namatorasni.1 Korint 13:4; Galatia 5:26.

NA BOI IBAHEN NASIAM:

  • Ulang hatahon sonon, ”Tongtong do iapasi sindohormu ahu” atap ”Aha pe na huhorjahon lang ongga ihargai namatorasmu”

  • Idah ma situasini songon pangidah ni pasangan hidupmu

 2 MARTANGGUNGJAWAB MA IBAGAS PARTONGAH JABUANMU

AHA NA IHATAHON BIBEL: ”Tadingkonon ni dalahi do bapa pakon inangni laho mangkasomani parinangonni, gabe sada daging ma sidea.” (1 Musa 2:24) Sanggah nasiam mamungkah partongah jabuan, ra do pangahap ni namatoras martanggungjawab ope bani nasiam, janah ra do sidea palobih tu mangastui partongah jabuannima.

Nasiam do manontuhon ija do na boi iastui simatua. Dob ai, dear ma patugah bani sidea, ulang kasar. (Podah 15:1) Toruh ni uhur, lamlam, ampa hasabaron boi mangurupi nasiam ase lambin dohor pakon simatua, anjaha ’marsianjuan ibagas uhur na holong’.Epesus 4:2.

NA BOI IBAHEN NASIAM:

  • Anggo domma lobihtu pangahapmu iastui simatuamu rumahtangganima, bani panorang na tonang riahkon ma ai bani pasangan hidupmu

  • Manriah ma nasiam sonaha do bahenonnima pasaloseihon parsualan ai