Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Barita na Madear Humbani Naibata!

 PARLAJARAN 14

Mase Adong Sada Tumpuan na Laho Iarahkon Naibata?

Mase Adong Sada Tumpuan na Laho Iarahkon Naibata?

1. Mase Naibata mangarahkon bangsa Israel i masa na basaia?

Naibata patumpuhon ginompar si Abraham gabe sada bangsa anjaha mambere titah hubani sidea. Igoran do sidea bangsa Israel anjaha ipakei laho manjolom sada haporsayaon, laho manombah pakon manjolom hataNi. (Psalmen 147:19, 20) Jadi, haganup jolma humbani sagala bangsa mandapot pasu-pasu marhitei bangsa Israel.Basa 1 Musa 22:18.

Ipilih Naibata do bangsa Israel gabe saksi-saksiNi. Aha na iahapkon bangsa Israel patuduhkon aha do gunani mambalosi titah-titah ni Naibata. (5 Musa 4:6) Jadi, marhitei bangsa Israel haganup bangsa boi mananda Naibata na sintong.Basa Jesaya 43:10, 12.

2. Mase halak Kristen na sintong iarahkon?

Ujungni, bangsa Israel lang iharosuhkon Naibata. Iganti ma bangsa ai gabe kuria Kristen. (Mateus 21:43; 23:37, 38) Sonari, kuria Kristen na sintong manggantihon bangsa Israel gabe saksi-saksi bani Jahowa.Basa Lahoan ni Apostel 15:14, 17.

Jesus patumpuhon pangihutni laho mambaritahon pakon mambahen ase haganup jolma humbani sagala bangsa gabe pangihutni. (Mateus 10:7, 11; 24:14; 28:19, 20) I ari parpudi on, parhorjaan ai domma das bani ujungni. On ma parlobei sahali bani sejarah, Jahowa patumpuhon buei ni jolma humbani sagala bangsa hubagas sada haporsayaon laho manombah Ia. (Pangungkabon 7:9, 10) Halak Kristen na sintong iarahkon ase marsigolpaan ampa marsiojuran. I sab dunia on, sidea mandapot parlajaran Bibel na sarupa age ija pe partumpuan ni sidea.Basa Heber 10:24, 25.

 3. Sonaha do mulani partumpuan Saksi-Saksi Jahowa i masa sonari on?

”Siswa-Siswa Alkitab” aima sada tumpuan na etek bani taun 1870, mandapot hasintongan-hasintongan humbani Bibel na tartanom sadokah on. Sidea mambotoh anggo Jesus domma mangarahkon kuria Kristen ase marbarita. Halani ai do sidea mamungkah sada horja na banggal aima na laho mambaritahon Harajaon i sab dunia on. Humbani taun 1931, igoran ma sidea Saksi-Saksi Jahowa.Basa Lahoan ni Apostel 1:8; 2:1, 4, 11; 5:42.

4. Sonaha do Saksi-Saksi Jahowa iarahkon?

Lobih hurang 2.000 taun na salpu, kuria-kuria Kristen i buei ni bangsa mandapot arahan humbani pangurus pusat, na mangakui Jesus Kopala ni kuria. (Lahoan ni Apostel 16:4, 5) Sonai homa do sonari on, Saksi-Saksi Jahowa i sab dunia on mandapot arahan humbani Pangurus Pusat, aima piga-piga sintua na marpambotoh. Sidea mangawasi kantur Saksi-Saksi Jahowa i sada nagori na laho manerjemahkon, mansetak pakon mambagihon sibasaan bani parlajaran Bibel i lobih 600 sahap. Jadi, Pangurus Pusat boi pasirsirhon apoh-apoh pakon arahan marhitei Bibel hu lobih 100.000 kuria i sab dunia on. Bani kuria-kuria, piga-piga dalahi itabalhon gabe sintua atap pe parmahan, halani sidea manghorjahon aha na ipindo ni Bibel pasal jabatan parmahan ibagas kuria. Sintua-sintua on mansarihon hulanan biri-biri Naibata ibagas holong.Basa 1 Petrus 5:2, 3.

Saksi-Saksi Jahowa iarahkon ase mambaritahon barita na madear anjaha mambahen sidea gabe pangihut ni Jesus. Songon susian ni Jesus na hinan mambaritahon barita na madear hu rumah-rumah, sonai homa do Saksi-Saksi Jahowa, mambere parlajaran Bibel hubani halak na tongon manghaholongi hasintongan. Tapi, Saksi-Saksi Jahowa lang pitah songon sada tumpuan, sidea sada kaluarga na mampardiateihon hasomanni janah marbapahon Bapa na parholong. (2 Tessalonika 1:3) Halani Saksi-Saksi Jahowa iarahkon laho pasonangkon Naibata anjaha mangurupi halak na legan, sidea gabe sada kaluarga na marmalas ni uhur i tanoh on.Basa Psalmen 33:12; Lahoan ni Apostel 20:35.