Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Barita na Madear Humbani Naibata!

 PARLAJARAN 8

Mase Ipaturut Naibata Hajahaton pakon Sitaronon?

Mase Ipaturut Naibata Hajahaton pakon Sitaronon?

1. Sonaha do mulani hajahaton?

Ipaturut Naibata do pamarentahan ni manisia dokah marhuasa ase patuduhkon sidea lang boi manasap haganup sitaronon ni manisia

Mulani hajahaton i tanoh on aima sanggah Sibolis manghatahon ladung na parlobei. Bani mulani, Sibolis sada malekat na gokan dear. Tapi, ”seng jongjong ia ibagas hasintongan”. (Johannes 8:44) Sihol do ia isombah, tapi pitah Naibata do na patut isombah. Sibolis marladung hubani naboru na parlobei aima si Hawa, anjaha mangojurhon ase unduk hubani, lang hubani Naibata. Si Adam pe gabe dihut lang unduk hubani Naibata. Pilihanni si Adam, mambahen sitaronon pakon hamateian.Basa 1 Musa 3:1-6, 19.

Sanggah Sibolis mangojurhon si Hawa ase lang unduk hubani Naibata, ia domma mambahen sada parlawanan hubani hadaulatan ni Naibata, atap pe jabatanNi na Sitimbulan. Buei do jolma na dihut hubani Sibolis, lang manjalo Naibata gabe Panguasa ni sidea. Jadi, topat ma Sibolis isobut ”raja ni dunia on”.Basa Johannes 14:30; 1 Johannes 5:19.

2. Martikas do tinompa ni Naibata?

Tinompa ni Naibata lang adong na martikas, gokan dear do haganup. Manisia pakon malekat na itompa Naibata boi do mambalosi Naibata ibagas pikiran atap pe uhur na pintor. (5 Musa 32:4, 5) Naibata mambere hubanta pilihan, manghorjahon na dear atap pe na geduk. On mambere hita sada panorang ase patuduhkon holongta hubani Naibata.Basa Jakobus 1:13-15; 1 Johannes 5:3.

3. Mase ipaturut Naibata sitaronon das hubani sonari on?

Ipaturut Jahowa do sidea manlawan hadaulatonNi bani parsatongkinan. Aha do gunani? On patuduhkon anggo lang marhitei Naibata, pamarentahan na ija pe lang boi mambahen goluh ni manisia lambin dear. (Parambilan 7:29; 8:9) Dob adong 6.000 taun sejarah ni manisia, tarbukti do pamarentahan ni jolma  lang marhasil. Sontoni: lang boi manasap porang, hajahaton, hagedukon, atap pe naborit.Basa Jeremia 10:23; Rom 9:17.

Tapi, pamarentahan ni Naibata mambere tuah hubani halak na unduk hubaNi. (Jesaya 48:17, 18) Lang dokah nari, Jahowa sihol mamboiskon haganup pamarentahan ni manisia. Pitah halak na mamilih pamarentahan ni Naibata do na marianan i tanoh on.Jesaya 11:9. Basa Daniel 2:44.

4. Aha do gunani hasabaron ni Naibata hubanta?

Sibolis manghatahon lang adong jolma na manombah Jahowa ibagas holong na pintor. Sihol do Nasiam patidakkon anggo hatani Sibolis ai lang tongon? Eak, boi do Nasiam patidakkon ai. Halani hasabaron ni Naibata, ibere ma panorang hubanta laho mambahen pilihan, pamarentahan ni Naibata atap pamarentahan ni jolma. Pilihanta taridah ibagas parlahounta.Basa Job 1:8-12; Podah 27:11.

5. Aha do buktini anggo hita mamilih Naibata gabe Panguasanta?

Pilihanta patuduhkon, na sihol do hita mambahen Naibata gabe Panguasanta

Hita mamilih Naibata gabe Panguasanta anggo ipindahi anjaha ihorjahon hita hasintonganNi na ihatahon bani Bibel. (Johannes 4:23) Hita manlawan Sibolis gabe panguasanta anggo hita lang dihut bani politik pakon porang, usih songon Jesus.Basa Johanes 17:14.

Sibolis mamakei huasani laho mangojurhon halak ase marparlahou na lang marguna. Anggo hita lang manghorjahon sisonai, ra do hasoman atap pe kaluarga manrisai atap pe lang marosuh hubanta. (1 Petrus 4:3, 4) Jadi, maningon do hita mamilih. Ra do hita marsada hubani sidea na manghaholongi Naibata? Unduk do hita hubani hataNi anjaha patuduhkon hapentaron ampa holongNi? Anggo sonai, hita domma patalarhon ai parladung do Sibolis na manghatahon, anggo ibagas hamarsikon lang adong jolma na mambalosi Hata ni Naibata.Basa 1 Korint 6:9, 10; 15:33.

Halani holong ni Naibata hubani manisia, sihol do Ia manasap hajahaton pakon sitaronon. Sidea na porsaya bani janji ai, boi do mandapot hagoluhan na sadokah ni dokahni i tanoh on.Basa Johannes 3:16.