Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Barita na Madear Humbani Naibata!

 PARLAJARAN 2

Ise do Naibata?

Ise do Naibata?

1. Mase hita maningon manombah Naibata?

Naibata na sintong, aima Panompa sagala na adong. Ia lang marbona anjaha lang marujung. (Psalmen 90:2) Bona bani barita na madear, na ipatugah ibagas Bibel, aima Naibata Jahowa. (1 Timoteus 1:11) Halani Ia do na mambere hogoluhan hubanta, jadi pitah Ia do na patut si sombahon.Basa Pangungkabon 4:11.

2. Sonaha do Naibata ai?

Lang adong jolma na ongga mangidah Naibata halani Tonduy do Ia. Artini gijangan do Ia humbani manisia ibagas huasa, hapentaron pakon na legan. (Johannes 1:18; 4:24) Age pe sonai, boi do hita mambotoh sonaha paruhuran Naibata humbani na tinompaNi. Sontoni, marmasam buah pakon bunga-bunga, patuduhkon Naibata parholong ampa pentar, sonai homa do bolak ni dunia on patuduhkon huasaNi.Basa Rom 1:20.

Lambin ta botoh ma sonaha do Naibata ai, anggo hita mambasa Bibel. Sontoni, Bibel patugahkon hubanta aha do na iharosuhkon Naibata, aha na lang. Sonaha do pambahenanNi hubani jolma, anjaha sonaha do Ia mangidah ganup na masa.Basa Psalmen 103:7-10.

3. Adong do goran ni Naibata?

Age pe bahat jabatan ni Naibata tapi pitah sada do goranNi. Ipatugah do hubanta ibagas Bibel ise goranNi, ”Ahu do Jahowa, ai ma Goran-Ku.” (Jesaya 42:8) Legan do manghatahon goran ni Jahowa bani sada ianan pakon ianan na legan. Bani sahap Indonesia ihatahon, ”Yehuwa”, dong homa do manghatahon ”Yahweh”. Tapi bani sahap Simalungun ihatahon, ”Jahowa”.Basa Psalmen 83:19.

Goran ni Naibata domma isasap bani buei ni Bibel janah iganti gabe Tuhan atap Naibata. Tapi na parlobei sahali,  sanggah Bibel isuratkon, goran Naibata adong do hira-hira 7.000 hali. Sanggah Jesus mangajar pasal Naibata, ipatugah Jesus do goran ni Naibata.Basa Johannes 17:26.

4. Ihaholongi Jahowa do hita?

Songon bapa na parholong on do, Naibata mambere hasonangan hubanta

Halani buei ni sitaronon, boi do hita manghatahon Naibata Jahowa lang manghaholongi hita? Piga-piga halak manghatahon sitaronon ai parlajouan humbani Naibata. Tapi, lang tongon sonai.Basa Jakobus 1:13.

Ihargai Naibata do hita, ibere do hubanta laho mambahen pilihan ibagas pargoluhanta. Tontu, sonang do hita halani ai. (Josua 24:15) Tapi, buei do jolma mamilih manghorjahon na jahat. Ai do na mambahen bahat sitaronon. Pusok do uhur ni Naibata mangidah haganup hajahaton.Basa 1 Musa 6:5, 6.

Jahowa aima Naibata na manghaholongi hita. Sihol do Ia ase hita sonang ibagas hagoluhan. Lang piga dokah nari, Ia laho manasap haganup sitaronon ampa na mambahen sitaronon ai. Tapi, adong do alasan mase ipaturut sitaronon ampa hasunsahan sonari on. Ipatugah do holi ai i parlajaran 8.Basa 2 Petrus 2:9; 3:7, 13.

5. Sonaha do hita boi dohor hubani Naibata?

Jahowa mangontang hita ase dohor hu Bani marhitei tonggo. Isarihon Naibata do hita haganup. (Psalmen 65:3; 145:18) Ra do Ia manasap dousa-dousanta, anjaha malas do uhurNi anggo hita pasonangkon Ia, hassi pe gatih hita lepak. Hita lang gokan dear, tapi boi do hita marhasoman bani Naibata.Basa Psalmen 103:12-14; Jakobus 4:8.

Halani Jahowa mambere hagoluhan hubanta, maningon do holongta banggalan marimbangkon na legan. (Markus 12:30) Patuduh Nasiam ma holong in marhitei marlajar sonaha do Naibata anjaha manghorjahon hataNi. Ujungni, lambin orot ma parhasomanan Nasiam hubani Naibata.Basa 1 Timoteus 2:4; 1 Johannes 5:3.