Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Barita na Madear Humbani Naibata!

 PARLAJARAN 4

Ise do Jesus Kristus?

Ise do Jesus Kristus?

1. Sonaha do mulani hagoluhan ni Jesus?

Biak na sonaha do, mambahen Jesus urah i dohori?MATEUS 11:29; MARKUS 10:13-16.

Ia tinompa ni Naibata na parlobei. Lang songon manisia na legan, sanggah lape roh hu tanoh on, Jesus manggoluh i nagori atas songon sada malekat. (Johannes 8:23) Ia lang itubuhkon bani sada naboru i nagori atas, tapi itompa Naibata Jahowa, aima Bapani na i nagori atas. Jadi, topat ma Jesus isobut Anak ni Naibata. Isobut homa do ia ”Hata ni Naibata” halani ia do na padaskon Hata ni Naibata. (Johannes 1:14) Hun nagori atas, Jesus mangurupi Jahowa manompa sagala na adong, i nagori atas pakon i tanoh on.Basa Podah 8:22, 23, 30; Kolosse 1:15, 16.

2. Mase Jesus roh hu tanoh on?

Naibata manuruh AnakNi roh hu tanoh on, anjaha mamindahkon hagoluhanni hubani sada naboru na margoran si Maria. Jadi, Jesus lang marbapahon manisia. (Lukas 1:30-35) Jesus roh hu tanoh on aima (1) mangajarhon hasintongan ni Naibata, (2) gabe sitiruon pasal mandalankon harosuh ni Naibata age pe ibagas hamarsikon, ampa (3) mambere hagoluhanni na gokan dear gabe ”tobusan”.Basa Mateus 20:28.

3. Mase hita mamorluhon tobusan?

Tobusan, aima arga na ibayar laho paluahkan jolma humbani hamateian. (2 Musa 21:29, 30) Sanggah manompa manisia, Naibata lang ongga marosuh sidea matua janah matei. Aha buktini? Naibata manghatahon hubani si Adam manisia na parlobei, anggo ia mangankon buah humbani na adong itongah-tongah Pohon Eden, maningon do ia matei. (1 Musa 2:16, 17; 5:5) Bibel manghatahon, hamateian ”roh” hu tanoh on marhitei si Adam. Jadi, si Adam manoruskon dousa hubani haganup ginomparni na mambahen  sidea matua janah matei. Halani ai do hita mamorluhon tobusan ase boi maluah humbani dousa na ibahen si Adam.Basa Rom 5:12; 6:23.

Ise do na boi mambere tobusan hubanta ase boi maluah humbani hamateian? Anggo hita matei, hita mambayar uhuman ni dousanta. Manisia na lang gokan dear, lang boi mambere tobusan bani dousa ni halak na legan.Basa Psalmen 49:7-9.

4. Mase Jesus maningon matei?

Lang songon hita, Jesus gokan dear halani ia itubuhkon marhitei sada halongangan. Lang ongga ia manghorjahon dousa. Jadi, lang porlu ia matei bani dousani, tapi ia matei bani jolma na mardousa. Naibata do na manuruh Jesus, halani holongNi hubani manisia. Jesus pe sonai do, ipatuduh do holongni hubanta marhitei unduk hubani BapaNi anjaha mambere hagoluhanni hubanta.Basa Johannes 3:16; Rom 5:18, 19.

5. Aha do na ihorjahon Jesus sonari?

Sanggah i tanoh on, Jesus pamalumhon halak na boritan, pagoluhkon halak na dob matei, ampa mangurupi halak na marsik. Sonai ma Jesus patuduhkon, aha do na laho ihorjahonni i ari na magira bani haganup jolma na unduk hubani. (Mateus 15:30, 31; Johannes 5:28) Dob matei Jesus, Naibata pagoluhkon ia use ibagas partonduyon. (1 Petrus 3:18) Dob ai, Jesus hundul i siamun ni Naibata paimahon ase Naibata mambere huasa hubani laho mamarentah gabe Raja i atas tanoh on. (Heber 10:12, 13) Sonari, Jesus domma mamarentah gabe Raja i nagori atas, anjaha pangihutni patugahkon barita na madear i sab dunia on.Basa Daniel 7:13, 14; Mateus 24:14.

Lang dokah nari, Jesus laho mamakei huasa Harajaonni laho manasap haganup sitaronon ampa na mambahen sitaronon. Haganup jolma na porsaya janah unduk hubani Jesus, mandapot hagoluhan i paradeiso aima hagoluhan na marmalas ni uhur i tanoh on.Basa Psalmen 37:9-11.